Deputy Commissioner Shangla

06/09/2026

📢 ضلع شانگلہ کے تمام اراضی مالکان کے لیے اہم اطلاع

تمام اراضی مالکان سے گزارش ہے کہ اپنا قومی شناختی کارڈ (CNIC) جلد از جلد اپنے متعلقہ تحصیل سروس ڈلیوری سنٹر (TSDC) یا پٹوار خانہ میں جمع کروائیں، تاکہ آپ کی زمین کا ریکارڈ آپ کے قومی شناختی کارڈ کے ساتھ منسلک کیا جا سکے۔

اس اقدام کے ذریعے آپ:

📱 اپنے موبائل فون کے ذریعے اپنی زمین کی فرد حاصل کر سکیں گے۔

🔐 اپنی زمین کا ریکارڈ محفوظ اور مستند بنا سکیں گے۔

📄 زمین کے ریکارڈ تک آسان اور بروقت رسائی حاصل کر سکیں گے۔

ڈپٹی کمشنر شانگلہ محمد عبداللہ شاہ

06/09/2026

06 ستمبر 2026ء — یومِ دفاع پاکستان

ڈپٹی کمشنر شانگلہ کی ہدایات کی روشنی میں ضلعی انتظامیہ شانگلہ کے زیرِ اہتمام ایڈیشنل ڈپٹی کمشنر جنرل شانگلہ حامد علی گیگیانی کی قیادت میں یومِ دفاع پاکستان کے حوالے سے پروقار تقریب کا انعقاد کیا گیا۔

تقریب میں مختلف لائن ڈیپارٹمنٹس کے افسران و نمائندگان اور ضلعی انتظامیہ کے افسران و اہلکاران نے شرکت کی۔ اس موقع پر وطنِ عزیز کے دفاع کے لیے اپنی جانوں کا نذرانہ پیش کرنے والے شہداء اور غازیوں کو خراجِ عقیدت پیش کیا گیا اور ملکی سلامتی، قومی یکجہتی اور وطن سے محبت کے عزم کا اعادہ کیا گیا۔

یومِ دفاع پاکستان کے موقع پر ڈویژنل فارسٹ آفیسر شانگلہ بلال احمد کی موجودگی میں شجرکاری بھی کی گئی۔ اس موقع پر ضلع شانگلہ کو سرسبز و شاداب بنانے، ماحول کے تحفظ اور درختوں کی اہمیت کو اجاگر کرنے کے عزم کا اظہار کیا گیا۔

ایڈیشنل ڈپٹی کمشنر جنرل شانگلہ حامد علی گیگیانی نے کہا کہ شہداء کی لازوال قربانیاں ہمارے لیے مشعلِ راہ ہیں۔ قومی دن ہمیں اپنے شہداء کو یاد کرنے کے ساتھ ساتھ ملک کی ترقی، سلامتی اور خوشحالی کے لیے اپنا کردار ادا کرنے کا پیغام دیتے ہیں۔

تقریب کے اختتام پر پاکستان کی سلامتی، ترقی و خوشحالی اور شہداء کے درجات کی بلندی کے لیے خصوصی دعا بھی کی گئی۔

پاکستان زندہ باد 🇵🇰

03/09/2026

ستمبر 2026 کی SNIDs مہم کے حوالے سے DPEC اجلاس

ستمبر 2026 میں منعقد ہونے والی (SNIDs) مہم کے سلسلے میں ڈسٹرکٹ پولیو ایریڈیکیشن کمیٹی (DPEC) کا اہم اجلاس منعقد ہوا، جس کی صدارت ایڈیشنل ڈپٹی کمشنر (F&P) شانگلہ عمر بن ریاض نے کی۔

اجلاس میں محکمہ صحت اور دیگر متعلقہ محکموں کے افسران و نمائندگان نے شرکت کی۔ اجلاس کے دوران ستمبر کی SNIDs مہم کی تیاریوں، مائیکرو پلاننگ، ویکسینیشن ٹیموں کی تشکیل، سیکیورٹی انتظامات، فیلڈ مانیٹرنگ، آگاہی اقدامات اور مہم کے مؤثر نفاذ کے حوالے سے تفصیلی غور و خوض کیا گیا۔

اجلاس میں اس عزم کا اظہار کیا گیا کہ مہم کے دوران ضلع شانگلہ کے تمام علاقوں میں ہر اہل بچے تک پولیو ویکسین کی رسائی یقینی بنائی جائے گی اور کوئی بھی بچہ پولیو کے قطروں سے محروم نہیں رہے گا۔

متعلقہ افسران کو ہدایت کی گئی کہ وہ باہمی رابطہ کاری کو مزید مؤثر بناتے ہوئے فیلڈ میں ٹیموں کی نگرانی، بروقت رپورٹنگ اور مقررہ اہداف کے حصول کو یقینی بنائیں۔

ضلع انتظامیہ شانگلہ پولیو کے خاتمے اور صحت مند معاشرے کے قیام کے لیے تمام ممکنہ اقدامات کی مکمل حمایت جاری رکھے گی۔

آئیں! اپنے بچوں کو پولیو سے محفوظ بنائیں اور پاکستان کو پولیو فری بنانے میں اپنا کردار ادا کریں۔ 🇵🇰💉

01/09/2026

ورلڈ بینک کے KP-RAP منصوبے کے تحت بورڈ ٹو پورن زیرِ تعمیر سڑک کا معائنہ
ورلڈ بینک کے تعاون سے جاری KP-RAP منصوبے کے تحت بورد تا پورن زیرِ تعمیر سڑک کا فیلڈ معائنہ کیا گیا۔ اس موقع پر ایڈیشنل ڈپٹی کمشنر (جنرل) شانگلہ، حامد علی گیگیانی نے اسسٹنٹ کمشنر الپوری اور تحصیلدار الپوری کے ہمراہ یخ تنگی اور دیگر سیاحتی مقامات کا دورہ کرتے ہوئے جاری تعمیراتی کام اور علاقے کی مجموعی صورتحال کا تفصیلی جائزہ لیا۔
دورے کے اہم نکات:
پیش رفت کا جائزہ: متعلقہ حکام نے سڑک کی تعمیراتی رفتار، معیار اور مقامی و سیاحتی ضروریات کا معائنہ کیا۔
معیار اور رفتار کی ہدایت: اے ڈی سی جی شانگلہ نے متعلقہ حکام اور ٹھیکیداروں کو کام میں بہترین معیار، رفتار اور مقررہ تقاضوں کو ہر صورت یقینی بنانے کی سخت ہدایت کی۔
سیاحت اور فلاح: اس منصوبے کا مقصد عوام کو بہترین سفری سہولیات کی فراہمی کے ساتھ ساتھ علاقے میں سیاحت کو فروغ دینا اور پائیدار ترقی کو یقینی بنانا ہے۔
ضلعی انتظامیہ شانگلہ ضلع میں جاری تمام ترقیاتی منصوبوں کی شفاف اور بروقت تیکمیل کے لیے ہمہ وقت کوشاں ہے۔

01/09/2026

NEW ADMISSIONS OPEN

محدود نشستیں آج ہی داخلہ لیں!

01/09/2026

ایڈیشنل ڈپٹی کمشنر (جنرل) شانگلہ کا کالج روڈ کا دورہ

ایڈیشنل ڈپٹی کمشنر (جنرل) شانگلہ نے متعلقہ افسران و اہلکاروں کے ہمراہ کالج روڈ کا دورہ کیا اور سڑک کی صورتحال کا جائزہ لیا۔

اس موقع پر اسسٹنٹ کمشنر الپوری اور محکمہ سی اینڈ ڈبلیو کے متعلقہ حکام کو سڑک سے ملبہ فوری طور پر ہٹانے اور ٹریفک کی روانی یقینی بنانے کے لیے ضروری ہدایات جاری کی گئیں۔

29/08/2026

وزیرِ اعلیٰ خیبرپختونخوا محمد سہیل آفریدی کا دورہ بشام سیکیورٹی و انتظامات کا جائزہ

وزیرِ اعلیٰ خیبرپختونخوا محمد سہیل آفریدی کے دورہ بشام کے موقع پر ڈی پی او شانگلہ اکرام اللہ، ایڈیشنل ڈپٹی کمشنر شانگلہ (فنانس) عمر بن ریاض ، اور اسسٹنٹ کمشنر بشام سید جاوید اقبال نے بشام کے مختلف مقامات کا دورہ کیا۔

اس موقع پر افسران نے سیکیورٹی، ٹریفک مینجمنٹ اور دیگر انتظامی امور کا تفصیلی جائزہ لیتے ہوئے متعلقہ اہلکاروں کو ضروری ہدایات جاری کیں۔

دورے کے دوران ریونیو، پولیس، ریسکیو 1122، ہیلتھ ڈیپارٹمنٹ شانگلہ اور اسپیشل برانچ کے اہلکاروں کی جانب سے سیکیورٹی اور انتظامی امور کے حوالے سے کیے گئے بہترین انتظامات کو سراہا گیا۔

وزیرِ اعلیٰ کے دورہ بشام کو پُرامن، منظم اور کامیاب بنانے کے لیے تحصیل انتظامیہ بشام، پولیس اور تمام متعلقہ اداروں کی کاوشیں قابلِ تحسین ہیں۔

29/08/2026

28/08/2026

ڈپٹی کمشنر شانگلہ ، ڈی پی او شانگلہ اور جملہ علماء شانگلہ نے فرحت اللہ مروت مرحوم مسجد کا افتتاح کیا۔

آج ضلعی سیکریٹریٹ الپوری میں ایک باوقار اور روحانی تقریب کے دوران ڈپٹی کمشنر شانگلہ، ڈی پی شانگلہ اور جملہ علماء شانگلہ نے فرحت اللہ مروت مرحوم مسجد کا باقاعدہ افتتاح کیا۔

افتتاحی تقریب میں ضلعی انتظامیہ، پولیس اور مختلف سرکاری محکموں کے افسران و اہلکاروں نے شرکت کی۔ اس موقع پر مسجد کی تعمیر و تکمیل کو ایک قابلِ قدر اور نیک اقدام قرار دیا گیا، جو ضلعی سیکریٹریٹ میں خدمات انجام دینے والے افسران، اہلکاروں اور دیگر افراد کے لیے نماز اور عبادت کی سہولت فراہم کرے گا۔

تقریب کے دوران مرحوم فرحت اللہ مروت کی خدمات اور عوام و ریاست کے لیے ان کی گراں قدر قربانیوں کو بھی خراجِ عقیدت پیش کیا گیا۔ ان کے نام سے مسجد کا قیام ان کی یاد کو زندہ رکھنے اور ان کی خدمات کو خراجِ تحسین پیش کرنے کا ایک خوبصورت ذریعہ ہے۔

اس موقع پر ڈپٹی کمشنر شانگلہ نے کہا کہ مساجد اللہ تعالیٰ کے گھر اور عبادت، اخوت، بھائی چارے اور روحانی سکون کے مراکز ہیں۔ ضلعی سیکریٹریٹ میں مسجد کی تکمیل ایک اہم اور خوش آئند پیش رفت ہے، جس سے سرکاری امور کی انجام دہی کے دوران نماز اور عبادت کی سہولت میسر آئے گی۔

ڈی پی او شانگلہ نے بھی مسجد کی تعمیر کو نیک اور قابلِ تحسین کاوش قرار دیتے ہوئے مرحوم فرحت اللہ مروت کی خدمات کو سراہا اور ان کے لیے دعائے مغفرت کی۔

تقریب کے اختتام پر مرحوم فرحت اللہ مروت کے ایصالِ ثواب، درجات کی بلندی اور ملک و قوم کی سلامتی و خوشحالی کے لیے خصوصی دعا کی گئی۔

اللہ تعالیٰ اس مسجد کو ہمیشہ آباد رکھے، اس نیک عمل کو اپنی بارگاہ میں قبول فرمائے اور فرحت اللہ مروت مرحوم کے درجات بلند فرمائے۔ آمین۔ 🤲

27/08/2026

ڈسٹرکٹ جرگہ ہال الپوری میں امن و امان کے حوالے سے علماء کرام کے ساتھ امن جرگہ منعقد

ضلع شانگلہ میں امن و امان کی صورتحال اور باہمی تعاون کے فروغ کے حوالے سے ڈسٹرکٹ جرگہ ہال الپوری میں علماء کرام کے ساتھ ایک اہم امن جرگہ منعقد ہوا۔

جرگہ میں ڈپٹی کمشنر شانگلہ محمد عبداللہ شاہ، ڈی پی او شانگلہ اکرام اللہ پی ایس پی، ایس پی انویسٹی گیشن شانگلہ سلیم امان اللہ خان، ایس پی ہیڈ کوارٹر شانگلہ محمد بشر خان، ایس ڈی پی او الپوری احسان اللہ، ایس ایچ او تھانہ الپوری محمد عارف، ایڈیشنل ڈپٹی کمشنرز، اسسٹنٹ کمشنرز اور ضلع بھر سے تعلق رکھنے والے علماء کرام نے کثیر تعداد میں شرکت کی۔

جرگہ سے خطاب کرتے ہوئے اسسٹنٹ کمشنر جاوید نے ضلع میں امن و امان کی مجموعی صورتحال پر تفصیلی روشنی ڈالی۔ اس کے بعد علماء کرام نے باری باری خطاب کرتے ہوئے قیامِ امن کے لیے ضلعی انتظامیہ اور پولیس کے ساتھ شانہ بشانہ تعاون جاری رکھنے کے عزم کا اظہار کیا۔

ڈپٹی کمشنر شانگلہ محمد عبداللہ شاہ نے تمام شرکاء کا شکریہ ادا کرتے ہوئے امن و امان کی اہمیت پر تفصیلی گفتگو کی اور معاشرے کے تمام طبقات، بالخصوص علماء کرام کے کردار کو امن کے قیام کے لیے نہایت اہم قرار دیا۔

ڈی پی او شانگلہ اکرام اللہ پی ایس پی نے اپنے خطاب میں کہا کہ امن اور بھائی چارہ ایک مضبوط اور خوشحال معاشرے کی بنیاد ہیں۔ انہوں نے کہا کہ منبر صرف خطاب کی جگہ نہیں بلکہ اصلاح، تربیت اور کردار سازی کا ایک اہم ذریعہ بھی ہے، لہٰذا منبر پر محبت، بھائی چارے اور امن کا پیغام عام کیا جائے۔

انہوں نے کہا کہ ضلع شانگلہ میں امن و امان کے قیام کی ذمہ داری صرف ضلعی انتظامیہ اور پولیس پر عائد نہیں ہوتی بلکہ عوام اور خصوصاً علماء کرام کا بھی اس سلسلے میں نہایت اہم کردار ہے۔

ڈی پی او شانگلہ نے کہا کہ قانون کو ہاتھ میں لینے والوں کی حوصلہ شکنی کرنا ہم سب کی مشترکہ ذمہ داری ہے۔ انہوں نے عوام سے اپیل کی کہ غیر مصدقہ خبروں اور افواہوں پر کان نہ دھریں بلکہ صرف مصدقہ اور مستند اطلاعات کو آگے بڑھائیں۔

ڈی پی او شانگلہ اکرام اللہ پی ایس پی نے مزید کہا کہ شانگلہ پولیس شہریوں کے جان و مال کے تحفظ کے لیے دن رات اپنی ذمہ داریاں ادا کر رہی ہے اور ان شاء اللہ شہریوں کی عزت، جان و مال کے تحفظ میں کسی قسم کی کوتاہی نہیں برتی جائے گی۔

جرگہ کے اختتام پر شرکاء نے ضلع شانگلہ میں پائیدار امن، بھائی چارے اور باہمی تعاون کے فروغ کے لیے ضلعی انتظامیہ اور شانگلہ پولیس کے ساتھ بھرپور تعاون جاری رکھنے کے عزم کا اعادہ کیا۔