26/05/2026
ژوب!! عیدالاضحیٰ کی تیاریاں عروج پر، شہر کی صفائی مہم جاری*
*ژوب* - عیدالاضحیٰ کے موقع پر شہریوں کو صاف ستھرا ماحول فراہم کرنے کے لیے میونسپل کمیٹی ژوب متحرک ہو گئی ہے۔ چیئرمین میونسپل کمیٹی ژوب شاہ بران کاکڑ اور چیف آفیسر جہانگیر خان مندوخیل کی خصوصی ہدایت پر شہر کے مختلف علاقوں میں صفائی ستھرائی کا عمل تیزی سے جاری ہے۔
یہ تمام کام سینیٹری سپر وائزر حضرت عمر شیرانی کی نگرانی میں انجام دیے جا رہے ہیں۔
دی گئی ہدایات کے مطابق عیدگاہوں، اسٹیڈیم اور عوامی اجتماعات کے مقامات پر خصوصی صفائی کی گئی ہے۔ نماز عید کے اجتماعات کے پیش نظر عیدگاہوں میں چونا ڈالا گیا، کچرا اٹھایا گیا اور گرد و غبار صاف کیا گیا تاکہ نمازیوں کو کسی قسم کی دشواری کا سامنا نہ کرنا پڑے۔
اسی طرح شہر کی اہم سڑکوں، گلیوں اور نالیوں کی صفائی بھی جاری ہے۔ نکاسی آب کے نظام کو بہتر بنانے کے لیے نالیوں سے گندگی نکالی جا رہی ہے تاکہ قربانی کے جانوروں کے فضلے سے پیدا ہونے والے مسائل سے بروقت نمٹا جا سکے۔ ساتھ ہی سڑکوں پر پانی کا چھڑکاؤ بھی کیا جا رہا ہے تاکہ مٹی اور گرد کے باعث پھیلنے والی مختلف بیماریوں سے بچاؤ ممکن ہو سکے۔
چیئرمین شاہ بران کاکڑ اور چیف آفیسر جہانگیر خان مندوخیل کا کہنا ہے کہ عید کے دنوں میں شہریوں کی سہولت اولین ترجیح ہے۔ میونسپل عملہ چھٹی کے دن بھی میدان میں موجود ہے اور شہر کو صاف رکھنے کے لیے دن رات کوشاں ہے۔ انہوں نے عوام سے بھی اپیل کی کہ صفائی مہم میں تعاون کریں اور آلائشوں، کوڑا کرکٹ مقررہ جگہوں پر ڈالیں تاکہ اٹھانے میں آسانی ہو۔
شہریوں نے میونسپل کمیٹی کے اس اقدام کو سراہتے ہوئے کہا کہ ایسے اقدامات سے عید کی خوشیوں میں اضافہ ہوتا ہے۔💓
