19/03/2026
४ वर्षपछि फर्किएको एकता — नयाँ नेतृत्वप्रति हार्दिक शुभकामना !
झण्डै चार वर्ष लामो विवादको अन्त्यसँगै वृहद् एकतामा सम्पन्न १२औँ महाधिवेशनले गैरआवासीय नेपाली संघ (एनआरएनए)मा नयाँ आशा, ऊर्जा र विश्वास सञ्चार गरेको छ।
यी चार वर्ष संस्था लागि अत्यन्त पीडादायी, विभाजित र अन्योलपूर्ण रहे। तर ती कठिन घडीहरू पार गर्दै धैर्य, प्रतिबद्धता र निरन्तर प्रयासका साथ पुनः एउटै मञ्चमा उभिन सफल हुनु केवल उपलब्धि मात्र होइन—यो विश्वभर छरिएका नेपालीहरूको विश्वास, भावना र आशाको पुनर्जागरण पनि हो।
मार्च १४ ,१५ १६ मा सम्पन्न महाधिवेशनबाट सर्वसम्मत रूपमा अध्यक्षमा निर्वाचित डा. हेमराज शर्मालगायत सम्पूर्ण कार्यसमितिलाई सफल कार्यकालको हार्दिक शुभकामना व्यक्त गर्दछु। नयाँ नेतृत्वमाथि अब लाखौँ गैरआवासीय नेपालीहरूको अपेक्षा, विश्वास र भविष्य जोडिएको छ।
विशेषगरी विभाजित एनसीसीहरूलाई पुनः एकताबद्ध गर्ने, टुटेका मनहरू जोड्ने र सबैलाई समेट्दै संस्थालाई अघि बढाउने कार्यमा नेतृत्व सफल होस् भन्ने हार्दिक कामना गर्दछु।
दसौँ महाधिवेशनदेखि सुरु भएको कठिन यात्रालाई सम्झँदा आज पनि मन गह्रौँ हुन्छ। त्यो समयमा विभिन्न समूहहरूबीच देखिएको विभाजनबीच संस्थालाई जोगाउनु नै मेरो एकमात्र उद्देश्य थियो। सबै पक्षलाई एकतामा ल्याउँदै एघारौँ महाधिवेशन सम्पन्न गर्ने लक्ष्यका साथ निरन्तर प्रयास गरियो।
सहमतिका आधारमा महाधिवेशन सम्पन्न होस् भन्ने उद्देश्यले विभिन्न नेतृत्व तहबीच समझदारीहरू पनि भएका थिए। तर दुर्भाग्यवश ती सहमतिहरू पूर्ण रूपमा कार्यान्वयन हुन सकेनन् र घटनाक्रमहरू थप जटिल बन्दै संस्था अझ विभाजनतर्फ धकेलियो।
पछिल्लो चरणमा सर्वोच्च अदालतको परमादेशअनुसार बनेको कार्यसमितिमा समेत सबै पक्षलाई एउटै मञ्चमा ल्याउने प्रयास निरन्तर जारी रह्यो। व्यक्तिगतभन्दा संस्थागत स्वार्थलाई प्राथमिकतामा राख्दै एकताको अभियानमा दृढतापूर्वक लागिरहँदा अन्ततः आजको सफलतासम्म आइपुग्दा अत्यन्त सन्तोष र गर्व महसुस भएको छ।
यस यात्रामा साथ दिने, सुझाव दिने, खबरदारी गर्ने र आवश्यक ठाउँमा आलोचनामार्फत सही बाटो देखाउने सम्पूर्ण गैरआवासीय नेपाली दाजुभाइ तथा दिदीबहिनीहरूप्रति हार्दिक आभार व्यक्त गर्दछु। यो कुनै व्यक्तिगत अभियान थिएन—यो हाम्रो साझा संस्थालाई जोगाउने सामूहिक प्रयास थियो।
एकताको यात्रामा संवादका क्रममा कतै मेरा शब्द वा व्यवहारबाट कसैको मन दुखेको भए विनम्रतापूर्वक क्षमा याचना गर्दछु।
आर.के. शर्मा
पूर्वअध्यक्ष, एनआरएनए
