10/08/2026
تورکھو تریچ روڈ کے مسائل پر 11 اگست کو
شاگرام میں کھلی کچہری ہوگی
شاگرام: تورکھو تریچ روڈ فورم (TTRF) کے زیرِ اہتمام بونی بوزند روڈ سے متعلق عوامی مسائل کے حل اور متعلقہ حکام کے سامنے شکایات و تحفظات پیش کرنے کے لیے کھلی کچہری 11 اگست کو شاگرام پولیس اسٹیشن میں منعقد ہوگی۔
یہ فیصلہ تورکھو تریچ روڈ فورم کے چیئرمین شعیب میر اور ڈپٹی کمشنر اپر چترال کے درمیان 10 اگست کو ہونے والی ملاقات میں باہمی مشاورت سے کیا گیا۔ اس سے قبل 3 اور 4 اگست کو تورکھو تریچ روڈ فورم کی جانب سے ہونے والے احتجاج کے دوران اسسٹنٹ کمشنر اور ایس ڈی پی او نے موقع پر پہنچ کر مظاہرین سے ملاقات کی تھی اور یقین دہانی کرائی تھی کہ 12 اگست کو کھلی کچہری منعقد کی جائے گی۔
تاہم ڈپٹی کمشنر اپر چترال کی 12 اگست کو پشاور میں محکمہ پلاننگ اینڈ ڈویلپمنٹ (P&D) کے ساتھ طے شدہ اجلاس کے باعث کھلی کچہری کی تاریخ ایک روز قبل، یعنی 11 اگست مقرر کرنے پر اتفاق کیا گیا۔
کھلی کچہری میں تورکھو تریچ روڈ کی تعمیراتی پیش رفت، کام کی رفتار، تعمیر میں مبینہ طور پر غیر معیاری مٹیریل کے استعمال سے متعلق خدشات، مطلوبہ مشینری کی عدم دستیابی اور حفاظتی انتظامات، تعمیراتی کام کے معیار اور نگرانی سمیت دیگر عوامی مسائل پر متعلقہ حکام کے ساتھ گفتگو کی جائے گی۔
اس موقع پر روڈ منصوبے کے حوالے سے آئندہ کے لیے باقاعدہ ورک پلان اور عملی اقدامات سے متعلق بھی مشاورت متوقع ہے۔
تورکھو تریچ کے عوام سے اپیل کی گئی ہے کہ وہ 11 اگست کو صبح 11 بجے شاگرام پولیس اسٹیشن میں منعقد ہونے والی کھلی کچہری میں شرکت کریں اور تورکھو تریچ روڈ سے متعلق اپنے مسائل، شکایات اور تجاویز متعلقہ حکام کے سامنے پیش کریں۔
تورکھو تریچ روڈ فورم کے چیئرمین شعیب میر نے کہا ہے کہ کھلی کچہری عوامی مسائل کو متعلقہ حکام تک پہنچانے اور روڈ منصوبے کے حوالے سے آئندہ کے لائحۂ عمل پر بات چیت کے لیے اہم موقع ثابت ہوگی۔
مقام: شاگرام پولیس اسٹیشن
تاریخ: 11 اگست 2026
وقت: صبح 11:00 بجے
شعیب میر
چیئرمین، تورکھو تریچ روڈ فورم (TTRF)
