17/10/2026
Shalay waxaan muxaadaro cinwaankeedu ahaa “Abaabulka Dhallinyarada iyo Doorkooda ku aaddan Dhismaha Dowladnimada Soomaaliyeed” u jeediyay qaar ka mid ah dhallinyarada firfircoon ee Dihan Youth Organization.
Waxaan si qoto dheer uga hadlay kaalinta ay dhallinyaradu ku leeyihiin mustaqbalka dalka, gaar ahaan sida aqoontooda, kartidooda iyo hal-abuurkooda loogu jiheyn karo dadaallo wax-ku-ool ah oo lagu horumarinayo bulshada, laguna xoojinayo dowladnimada Soomaaliyeed.
Waxa si gaar ah ii dhiirrigeliyey doodihii iyo aragtiyihii ay dhallinyaradu soo bandhigeen, kuwaas oo ku saabsanaa sidii ay qayb uga noqon lahaayeen xallinta caqabadaha haysta bulshada iyo horumarinta dalka.
Waxaan aaminsanahay in awoodda dhallinyaradu aysan ku koobnayn tiradooda, balse ay ku jirto aqoontooda, isku-xirnaantooda iyo awoodda ay u leeyihiin inay si wadajir ah wax u qabtaan.
Ugu dambayn, waxaan ku boorrinayaa dhallinyarada Soomaaliyeed inay kaalin firfircoon ka qaataan dhismaha dowladnimada, horumarinta bulshada iyo mustaqbalka dalka.
Dhallinyaradu waa awoodda iyo rajada Soomaaliya.
