06/09/2026
WAR-SAXAAFADEED
Faahfaahin dheeraad ah oo ku saabsan howlgal qorshaysan oo 4-tii Sebtembar 2026 ay Ciidanka Xoogga Dalka Soomaaliyeed, gaar ahaan Kumaandooska Danab, ka fuliyeen deegaanka Buula-Fulaay ee Gobolka Bay, kaas oo lagu dilay 14 xubnood oo ka tirsanaa Khawaarijta Al-Shabaab.
Khawaarijta lagu dilay howlgalka ayaa isugu jiray shan horjooge iyo sagaal ka mid ah ilaaladii la socotay. Horjoogayaasha lagu dilay howlgalka ayaa kala ahaa:
1. Bishaar Maxamed Muqtaar (Sheekh Bishaar)
Wuxuu muddo dheer ka tirsanaa waxa ay ugu yeeraan xafiiska garsoorka Khawaarijta Al-Shabaab, waxaana xilliga la dilayey kooxda ugu magacawnaa qaadiga Gobolka Gedo. Waxa uu h**e xilkaas uga soo qabtay gobollada Bay iyo Shabeellaha Hoose, isaga oo door ku lahaa fulinta xukunnada sharci-darrada ah iyo nidaamka cabsi-gelinta ay Khawaarijtu ku dhibaateeyaan shacabka.
2. Cali Nuur Maxamed Idiris
Wuxuu ahaa horjooge ka tirsanaa waxa ay ugu yeeraan katiibo, kana mid ahaa horjoogayaashii hoggaaminayey maleeshiyaadka kooxda ee Gobolka Bay. Waxa uu qayb ka ahaa abaabulka iyo fulinta weerarro lagu qaaday magaalada Baydhabo.
3. Xuseen Xasan Daahir (Lahelow)
Wuxuu kooxda ugu magacawnaa waxa ay ugu yeeraan amiirka sariyada Gobolka Bay, waxa uuna mas’uul ka ahaa hoggaaminta maleeshiyaadka hubaysan iyo isku-dubbaridka dhaqdhaqaaqyada Khawaarijta ee deegaannada gobolka.
4. Nuur Cabdullaahi Xaashi (Sudeysi)
Wuxuu ahaa horjoogaha qaraxyada Khawaarijta ee Gobolka Bay, isaga oo mas’uul ka ahaa qaybta kooxda u qaabilsan diyaarinta iyo adeegsiga walxaha qarxa.
5. Cumar Xasan Xuseen
Wuxuu ka tirsanaa qaybta qaraxyada Khawaarijta, isaga oo ka shaqeynayey shabakadaha kooxda ee gobollada dalka.
Howlgalka waxaa sidoo kale dhaawacyo culus lagu gaarsiiyey Jacfar Abuu Xamsa, oo Khawaarijtu ugu magacawday waxa ay ugu yeeraan “Waaliga Gobolka Bay”, iyo Xasan Ibraahim, oo ka tirsanaa waaxda baadda iyo lacagaha sharci-darrada ah ee gobolka.
Howlgalkan ayaa dhabar-jab weyn ku ah hoggaanka, awoodda abaabulka iyo shabakadaha qaraxyada Khawaarijta Al-Shabaab ee Gobolka Bay.
Ciidanka Xoogga Dalka Soomaaliyeed waxaa ka go’an sii wadidda howlgallada qorshaysan ee lagu bartilmaameedsanayo horjoogayaasha iyo maleeshiyaadka Khawaarijta, si loo wiiqo awooddooda, loona xaqiijiyo amniga iyo xasilloonida dalka.
