30/05/2026
Wasaaradda Kalluumeysiga iyo Dhaqaalaha Buluugga ayaa maanta Magaalada Muqdisho ku qabatay kulan lagu ansixinayey Qorshaha Qaran ee Wax-ka-qabashada Kalluumeysiga Sharci-darrada ah, aan la soo sheegin iyo aan la nidaamin (NPOA-IUU Fishing).
Kulanka waxaa furay isla markaana xiray Mudane Liban Abdullahi Hassan, Agaasimaha waaxda Maaraynta Kalluumeysiga ee Wasaaradda Kalluumeysiga iyo Dhaqaalaha Buluugga, isagoo adkeeyey muhiimadda ay leedahay in la helo qorshe qaran oo mideeya dadaallada lagu ilaalinayo khayraadka badda Soomaaliya laguna xakameynayo kalluumeysiga sharci-darrada ah.
Intii uu socday kulanka, Hashim Cali Shire ayaa soo bandhigay warbixin faahfaahsan oo ku saabsan Qorshaha Qaran ee NPOA-IUU, isagoo sharaxay ujeeddooyinka, mudnaanta, iyo tallaabooyinka la qorsheeyey si loo xoojiyo la-socodka, xakamaynta iyo dabagalka kalluumeysiga sharci-darrada ah.
Kulanka waxaa ka qayb galay Maamulka Gobolka Banaadir, guddoomiyeyaasha iskaashatooyinka kalluumeysatada ee Kulmis iyo Alla-Aaamin, iyo kalluumeysatada kala duwan ee Gobolka Banaadir.
Ka-qaybgalayaashu waxay soo jeediyeen talooyin iyo aragtiyo wax ku ool ah oo lagu sii tayeynayo qorshaha, si uu u noqdo mid ka tarjumaya baahiyaha iyo duruufaha dhabta ah ee bulshada kalluumeysiga.
Kulankan ayaa qayb ka ah dadaallada Wasaaradda ee lagu horumarinayo maareynta waarta ee khayraadka badda Soomaaliya iyo xoojinta iskaashiga hay’adaha dowladda, maamulka gobolka, iyo bulshada kalluumeysatada si loo ciribtiro kalluumeysiga sharci-darrada ah.
