Office of the Auditor General FGS

Office of the Auditor General FGS This is the Official page of the Office of the Auditor General of the Federal Republic of Somalia.

Xafiiska Hantidhowrka Guud ee JFS waxa uu dhammaan caalamka, gaar ahaan dadweynaha Soomaaliyeed, ugu hambalyeynayaa Muna...
26/05/2026

Xafiiska Hantidhowrka Guud ee JFS waxa uu dhammaan caalamka, gaar ahaan dadweynaha Soomaaliyeed, ugu hambalyeynayaa Munaasabadda Ciidul-Adxa, waxa uuna si gaara farxadda iyo daamaashaadka Ciidda ula wadaagayaa dhammaan shaqaalaha dowladda, gaar ahaan kuwa Hantidhowrka.

Barakada iyo khayrka ku jira Ciiddan awgeed, waxa aan Alle ka rajeeneynaa inuu noo xoojiyo midnimadeena, nabaddeena iyo gaarista yoolasha dowlad wanaagga aan hiigsaneyno.

Ciid Wanaagsan. كل عام و أنتم بخير. Eid Mubarak.

Hantidhowraha Guud iyo wafdi uu hoggaaminayo ayaa magaalada Monrovia ee dalka Liberia kaga qeyb galay Shir-Madaxeedkii 2...
23/05/2026

Hantidhowraha Guud iyo wafdi uu hoggaaminayo ayaa magaalada Monrovia ee dalka Liberia kaga qeyb galay Shir-Madaxeedkii 22aad ee Hay’adaha Hantidhowrka Guud ee Afrikada ku hadasha Ingiriiska (𝐀𝐅𝐑𝐎𝐒𝐀𝐈-𝐄), kaas oo ay kasoo qeybgaleen Hantidhowrayaasha Guud, wafdiyo ka socday Hay’adaha Hantidhowrka Guud ee xubnaha ka ah 𝐀𝐅𝐑𝐎𝐒𝐀𝐈-𝐄 iyo saaxiibbada bah-wadaagta caalamiga ah.

Hantidhowraha Guud ee JFS, Mudane Axmed Ciise Guutaale, iyo wafdiga uu hoggaaminayay ayaa si firfircoon uga qeyb qaatay doodaha farsamo, fursadaha iskaashiga iyo isdhaafsiga khibradaha ee ay yeesheen Hay’adaha Hantidhowrka Guud iyo hay’adaha bah-wadaagta la ah.

Shirkan ayaa lagu falanqeeyey mowduucyo la xiriira xoojinta tayada baarista, adeegsiga falanqeynta xogta casriga ah (Data Analytics) iyo baarista deymaha dowladda, si loo taageero isla-xisaabtanka, hufnaanta iyo joogteynta maaliyadeed.

Ka qeybgalka shirkan ayaa XHGS u ahaa fursad lagu xoojinayo iskaashiga xirfadeed, isdhaafsiga khibradaha iyo la socodka hababka casriga ah ee la xiriira shaqada Hay’adaha Hantidhowrka Guud.

Xubno sare oo ka tirsan Xafiiska Hantidhowrka Guud ee JFS ayaa ka qaybgalay “Aqoon-is-weydaarsi Heerkiisu Sarreeyo oo ku...
18/05/2026

Xubno sare oo ka tirsan Xafiiska Hantidhowrka Guud ee JFS ayaa ka qaybgalay “Aqoon-is-weydaarsi Heerkiisu Sarreeyo oo ku Saabsan Warbixinnada Horumarka Waara (Sustainability Reporting)”, kuwaas oo looga baahan yahay hay’adaha, gaar ahaan kuwa dowladda, in ay daaha ka qaadaan oo ay dadweynaha u soo bandhigaan.

Aqoon-is-weydaarsigan, oo uu soo qabanqaabiyey Ururka AFROSAI-E, ayaa ka dhacay magaalada Pretoria ee dalka Koonfur Afrika intii u dhaxeysay 11-15 May, waxaana ka qaybgalay Hay’adaha Hantidhowrka Guud ee 7 dal oo Afrikaan ah, iyada oo halkaas lagu soo bandhigay muhiimadda ay leedahay in lagu baraarugo shaacinta sida ay hay’aduhu ugu dadaalayaan yareynta khataraha shaqada ay u hayaan dadweynaha u geysan karto deegaanka, bulshada iyo maamul wanaagga, Xafiisyada Hantidhowrkuna ay noqdaan tusaalooyin lagu daydo.

Intii uu socday aqoon-is-weydaarsiga ayaa xubnihii ka socday XHGS waxa ay halkaas ku soo bandhigeen hortabinnada qaran ee Soomaaliya, caqabadaha taagan, iyo sida uu Xafiisku diyaar ugu yahay in horumar laga sameeyo badqab-siinta deegaanka, bulshada iyo maamul wanaagga, iyada oo loo marayo diyaarinta baarisyo xiriir la leh, lana adeegsanayo halbeegyada iyo heerarka caalamiga ah ee jira, taas oo ay isla sidaas oo kale iyaguna u soo bandhigeen dalalkii ka qaybgalay “aqoon-is-weydaarsiga”.

Doodaha, leyliyada iyo soojeedinnada dhacayay intii uu aqoon-is-weydaarsigu socday oo dhan waxa ay xoojinayeen sida ay baahi aasaasi ah ugu tahay dadweynaha in ay hay’aduhu furaan xogtooda, oo ay soo bandhigaan warbixinno qoran oo la xiriira waxa ay sameeyeen, kana qabteen arrimaha Deegaanka, Bulshada iyo Maamul Wanaagga (Environment, Social, Governance, ESG), si ay dadweynuhu u ogaadaan meesha ay taagan tahay hay’ad waliba, iyada oo ay markaas kadib Hay’adaha Hantidhowrku ku sameynayaan baarisyo lagu xoojinayo isla-xisaabtanka, daahfurnaanta iyo dowlad wanaagga.

Xafiiska Hantidhowrka Guud ee JFS ayaa tababar ku saabsan adeegsiga nidaamka Microsoft Power BI (Business Intelligence) ...
17/05/2026

Xafiiska Hantidhowrka Guud ee JFS ayaa tababar ku saabsan adeegsiga nidaamka Microsoft Power BI (Business Intelligence) u qabtay howl-wadeeno ka tirsan Xafiiska, si loo xoojiyo awoodda farsamo ee la xiriirta falanqaynta xogta iyo diyaarinta warbixinno tayo leh.

Tababarkan ayaa diiradda lagu saaray hababka casriga ah ee uruurinta xogta, falanqaynteeda, soo bandhigiddeeda, iyo sameynta jaantusyo fududeeya fahamka xogaha baarista hantidhowriseed.

Adeegsiga nidaamka Power BI waxa uu muhiim u yahay shaqada hantidhowrista, maadaama uu sare u qaadayo saxnaanta iyo tayada xogaha, fududeynayo falanqaynta natiijooyinka baarista, isla markaana gacan ka geysanayo diyaarinta warbixinno casri ah oo taageera isla-xisaabtanka, daahfurnaanta, iyo go’aan-qaadashada ku dhisan xog sugan.

Xafiiska Hantidhowrka Guud ee JFS waxa uu si joogto ah u xoojiyaa aqoonta iyo xirfadaha howl-wadeennada ka tirsan Xafiiska, si loo horumariyo tayada shaqada hantidhowriseed iyo adeegyada uu Xafiisku u hayo hay’adaha dowladda iyo bulshada Soomaaliyeed.

Xafiiska Hantidhowrka Guud ee JFS ayaa magaalada Nairobi, Kenya, ku soo gabagabeeyey aqoon-is-weydaarsi socday 10 ilaa 1...
15/05/2026

Xafiiska Hantidhowrka Guud ee JFS ayaa magaalada Nairobi, Kenya, ku soo gabagabeeyey aqoon-is-weydaarsi socday 10 ilaa 14 May 2026, kaas oo ku saabsanaa xoojinta isla-xisaabtanka iyo dabagalka hay’adaha dowladda.

Aqoon-is-weydaarsigan waxaa iska kaashaday Xafiiska Hantidhowrka Guud ee JFS iyo Barnaamijka Taageerada Midowga Yurub ee La-Xisaabtanka Maaliyadeed, EU SFA TA. Waxa uu sidoo kale qayb ka yahay Mashruuca SERP ee uu maalgeliyo Bangiga Adduunka, gaar ahaan qaybta xoojinta Maamulka Maaliyadda Guud.

Aqoon-is-weydaarsigu waxa uu isu keenay mas’uuliyiin sare oo ka kala socday Xafiiska Hantidhowrka Guud ee JFS, Xafiisyada Hantidhowrka Guud ee Dowlad Goboleedyada, Guddiyadda Miisaaniyadda, Maaliyadda, Qorsheynta, Iskaashiga Caalamiga ah iyo La-Xisaabtanka Hay’adaha Dowladda, iyo xoghayeyaasha guddiyadaas.

Muddo shan maalmood ah, mas’uuliyiintu waxa ay ka doodeen doorka hay’adaha Hantidhowrka Guud, shaqada Guddiyada Baarlamaanka ee dabagalka iyo la-xisaabtanka, fahamka waajibaadka sharci ee hay’ad kasta, iyo muhiimadda wada-shaqeynta ka dhexeysa hay’adaha u xilsaaran ilaalinta hufnaanta maamulka maaliyadda guud.

Sidoo kale, aqoon-is-weydaarsigu waxa uu diiradda saaray qorsheynta istiraatiijiyadeed, dabagalka ku saleysan khataraha, madax-bannaanida hay’adaha Hantidhowrka Guud, hoggaaminta ku dhisan anshaxa, iyo xoojinta hababka lagula socdo fulinta talooyinka ka soo baxa warbixinnada Hantidhowrka.

Qabashada aqoon-is-weydaarsigan waxa ay xoojinaysaa wareegga isla-xisaabtanka, laga bilaabo qorsheynta baarista, fulinta, warbixinta, ka doodista Baarlamaanka, dabagalka talooyinka, iyo hagaajinta maamulka kheyraadka dadweynaha.

Xafiiska Hantidhowrka Guud ee JFS waxa uu Golaha Wasiirrada Xukuumadda Federaalka Soomaaliya ku bogaadinayaa ansixinta H...
14/05/2026

Xafiiska Hantidhowrka Guud ee JFS waxa uu Golaha Wasiirrada Xukuumadda Federaalka Soomaaliya ku bogaadinayaa ansixinta Hagaha Nidaamka Hantidhowrka Gudaha (Internal Audit Charter), kaas oo qeexaya shaqada, howlgalka, qaab-dhismeedka, waajibaadka, iyo guud ahaan nidaamka Hantidhowrka Gudaha ee hay’adaha dowladda. Hagahan ayaa muhiim u ah xoojinta iyo kaabidda shaqada Xafiiska Hantidhowrka Guud ee JFS ee la xiriirta isla xisaabtanka, hufnaanta, iyo maamulka wanaagsan ee hay’adaha dowladda.

Hagahan waxa uu xoojinayaa nidaamyada hubinta gudaha, maareynta khataraha, iyo dabagalka waxqabadka hay’adaha dowladda. Waxa uu sidoo kale taageerayaa wareegga isla xisaabtanka, laga bilaabo qorsheynta iyo fulinta ilaa hubinta, warbixinta, iyo dabagalka sixitaanka khaladaadka.

Xafiiska Hantidhowrka Guud ee JFS, oo h**e u hirgeliyey wacyigelin ku saabsan muhiimadda Hantidhowrka Gudaha iyo doorka uu ku leeyahay xoojinta nidaamyada xakamaynta gudaha ee hay’adaha dowladda, waxa uu ku dhiirrigelinayaa dhammaan hay’adaha dowladda in ay dhaqangeliyaan hagahan. Hirgelinta hagahan waxa ay gacan ka geysanaysaa in hay’adaha dowladda si joogto ah u qiimeeyaan khataraha, u xoojiyaan habraacyada gudaha, una diyaariyaan warbixinno taageeraya howlaha Xafiiska Hantidhowrka Guud ee JFS.

Hantidhowraha Guud ee JFS, Mudane Ahmed Isse Gutale, ayaa maanta magaalada Nairobi, Kenya, ka daah-furay Shirkii 4aad ee...
13/05/2026

Hantidhowraha Guud ee JFS, Mudane Ahmed Isse Gutale, ayaa maanta magaalada Nairobi, Kenya, ka daah-furay Shirkii 4aad ee Guddiga Hagidda Mashruuca EU SFA TA.

Kulanka waxaa ka qayb galay wakiillo ka socday Midowga Yurub, kooxda EU SFA TA, Adam Smith International, Hantidhowrayaasha Guud ee Dowlad Goboleedyada, iyo daneeyayaal kale oo taageera xoojinta isla-xisaabtanka maaliyadeed ee Soomaaliya.

Shirka ayaa si guud loogu falanqeeyey horumarka mashruuca, caqabadaha jira, iyo meelaha u baahan in la sii xoojiyo. Waxaa sidoo kale looga hadlay muhiimadda ay leedahay wada-shaqeynta ka dhexeysa hay’adaha Hantidhowrka Guud ee dalka iyo bahwadaagta taageerta hufnaanta maamulka maaliyadda guud.

Hantidhowraha Guud ayaa bogaadiyey taageerada Midowga Yurub ee ku aaddan dhismaha awoodda hay’adaha Hantidhowrka Guud. Waxa uu tilmaamay in wada-shaqeynta heer federaal iyo heer dowlad goboleed ay muhiim u tahay dhismaha hannaan baariseed oo xirfad ku dhisan, madax-bannaan, kana qayb qaata ilaalinta kheyraadka guud.

Kulanka ayaa ku soo dhammaaday natiijo wanaagsan oo ku aaddan in la sii wado dadaallada lagu xoojinayo daahfurnaanta, isla-xisaabtanka, iyo hufnaanta maamulka maaliyadda guud ee Soomaaliya.

Xafiiska Hantidhowrka Guud ee JFS ayaa maanta magaalada Muqdisho ku qabtay kulan lagu soo bandhigay Warbixinta Baarista ...
10/05/2026

Xafiiska Hantidhowrka Guud ee JFS ayaa maanta magaalada Muqdisho ku qabtay kulan lagu soo bandhigay Warbixinta Baarista Waxqabadka ee Adeegyada loo Fidiyo Maxaabiista ku jirta Xabsiga Dhexe ee Xamar.
‎
‎Kulanka, oo uu furay Hantidhowraha Guud ee JFS, Mudane Ahmed Isse Gutale, ayaa diiradda lagu saaray natiijooyinka baarista, talooyinka warbixinta, iyo doorka daneeyayaasha ee hagaajinta adeegyada loo fidiyo maxaabiista.
‎
‎Kulanka waxaa ka qaybgalay Taliyaha Ciidanka Asluubta Soomaaliyeed, Agaasimaha Guud ee Wasaaradda Caddaaladda, Xubin Sare oo ka tirsan Guddiga Madaxa-Banaan ee Xuquuqul Insaanka Qaranka, Agaasimaha Guud ee Guddiga Madaxa-Banaan ee Xuquuqul Insaanka Qaranka, Guddoomiyaha Midowga Jaamacadaha Soomaaliyeed, iyo wakiillo kale oo ka socday hay’adaha lagu casuumay kulanka.
‎
‎Intii uu kulanku socday, waxaa la soo bandhigay doorka daneeyayaasha ee warbixinnada baarista, xiriirka ka dhexeeya baarista iyo saameynta la taaban karo, iyo muhiimadda ay leedahay in talooyinka baarista loo beddelo tallaabooyin wax ku ool ah oo lagu xoojinayo adeegyada loo fidiyo maxaabiista.
‎
‎Ka qaybgalayaasha ayaa sidoo kale aragtiyo iyo talooyin ku biiriyay doodda ku saabsan xoojinta wada-shaqeynta hay’adaha iyo dardargelinta hagaajinta adeegyada loo fidiyo maxaabiista.
‎
Xafiiska Hantidhowrka Guud ee JFS waxa uu sii wadayaa gudashada waajibaadkiisa iyo hubinta in khayraadka guud loo adeegsado si waxtar u leh dadweynaha.

Xafiiska Hantidhowrka Guud ee JFS waxa uu hambalyo iyo bogaadin u dirayaa dhammaan shaqaalaha Soomaaliyeed, gaar ahaan h...
01/05/2026

Xafiiska Hantidhowrka Guud ee JFS waxa uu hambalyo iyo bogaadin u dirayaa dhammaan shaqaalaha Soomaaliyeed, gaar ahaan hawlwadeennada dowladda ee sida daacadnimada, xirfadda iyo masuuliyadda leh ugu adeegaya Qaranka.

Maalinta Caalamiga ah ee Shaqaalaha Adduunka waa munaasabad lagu xuso doorka muhiimka ah ee shaqaaluhu ku leeyihiin horumarinta dalka, dhismaha hay’adaha dowladeed iyo adeegga bulshada. Shaqaale kasta oo si hufan u guta waajibaadkiisa waxa uu qayb muhiim ah ka qaataa xoojinta dowladnimo ku dhisan isla-xisaabtan, daahfurnaan iyo adeeg dadweyne oo waxtar leh.

Xafiiska Hantidhowrka Guud ee JFS waxa uu si gaar ah u bogaadinayaa hawlwadeennada ka shaqeeya ilaalinta kheyraadka qaranka, xoojinta nidaamka maaliyadda guud iyo hubinta in hay’adaha dowladdu si masuuliyad leh ugu adeegaan shacabka Soomaaliyeed.

Hambalyo dhammaan shaqaalaha Soomaaliyeed.

Ku Xigeenka Hantidhowraha Guud ee JFS, Mudane Abdijamal Ismail, ayaa shalay kulan shaqo iyo mahadnaq ah la qaatay Isku-d...
30/04/2026

Ku Xigeenka Hantidhowraha Guud ee JFS, Mudane Abdijamal Ismail, ayaa shalay kulan shaqo iyo mahadnaq ah la qaatay Isku-duwaha TIKA Somalia, Mudane Zafer EŞKİ.

Kulanka waxaa looga hadlay guulaha iyo saameynta labadi tababar ee h**e oo fulintooda kaalin weyn ku lahayd TIKA Somalia iyo doorkooda ku aaddan hirgelinta Is-afgaradka (MoU) u dhexeeya Xafiiska Hantidhowrka Guud ee JFS iyo Xafiiska Hantidhowrka Guud ee Turkiga (TCA). Waxaa sidoo kale la isla soo qaaday dardargelinta iskaashiga iyo howlaha xiga, gaar ahaan wejiga saddexaad ee tababarka.

Ku Xigeenka Hantidhowraha Guud ee JFS waxaa kulanka ku wehliyay masuuliyiin kale oo ka socday Xafiiska Hantidhowrka Guud ee JFS. Gebagebadii, Ku Xigeenka Hantidhowraha Guud ayaa TIKA Somalia guddoonsiiyay hadiyad mahadnaq ah oo Xafiisku ugu talagalay.

Address

Villa
Mogadishu

Website

Alerts

Be the first to know and let us send you an email when Office of the Auditor General FGS posts news and promotions. Your email address will not be used for any other purpose, and you can unsubscribe at any time.

Contact The Organization

Send a message to Office of the Auditor General FGS:

Shortcuts

Share

Category