04/09/2026
Masraxa Shariif Saalax ayaa lagu qabtay munaasabad si heer sare ah loo soo agaasimay oo lagu daah-furay buugga “Sooyaalka Maansada”, oo uu qoray Abwaan Maxamed Cabdi Looyaan, kana mid ah hawlwadeennada Akademiyada Cilmiga, Dhaqanka iyo Suugaanta.
Munaasabadda ayaa waxaa ka qeyb galay Guddoomiyaha Akademiyada Mudane Ismaaciil Yuusuf Cusmaan, wasiirro, xildhibaanno ka tirsan labada Aqal ee Baarlamaanka Federaalka Soomaaliya, Guddoomiyaha Degmada Waaberi, Agaasime-waaxeedyada qaar ee Akademiyada, mas'uuliyiin xilal h**e u soo qabtay iyo xubno ka tirsan bahda qorayaasha, abwaannada iyo suugaanyahannada Soomaaliyeed.
Buugga “Sooyaalka Maansada” ayaa xambaarsan xog iyo qoraallo la xiriira sooyaalka iyo horumarka maansada Soomaaliyeed, isagoo wax weyn ka tari kara diiwaangelinta, ilaalinta iyo fahamka hiddaha suugaaneed ee bulshada Soomaaliyeed.
Guddoomiyaha Akademiyada Cilmiga,Dhaqanka iyo Suugaanta ayaa munaasabadda ka jeediyay hadal kooban, isagoo bogaadiyay dadaalka uu Abwaan Maxamed Cabdi Looyaan geliyay qorista iyo soo saarista buuggan, isaga oo sidoo kale tilmaamay muhiimadda ay leedahay in la qoro lana keydiyo suugaanta Soomaaliyeed, si jiilasha dambe ay uga faa’iideystaan dhaxalka suugaaneed ee dalka.
Munaasabadda ayaa sidoo kale fursad u noqotay bahda suugaanta iyo qorayaasha Soomaaliyeed inay ku dhiirrigeliyaan qoraaga sii wadidda dadaallada ku aaddan qorista iyo horumarinta afka, dhaqanka iyo suugaanta Soomaaliyeed.
Daah-furka buugga “Sooyaalka Maansada” ayaa kusoo beegmaya xilli ay sii kordhayaan dadaallada lagu kobcinayo qoraalka, cilmi-baarista iyo keydinta suugaanta Soomaaliyeed.
DHAMMAAD
XAFIISKA WARBAAHINTA IYO XIRIIRKA DADWEYNAHA EE AKADEMIYADA CILMIGA, DHAQANKA IYO SUUGAANTA.
