𝗦𝗘𝗖𝗥𝗘𝗧𝗔𝗥𝗜𝗢 𝗗𝗘 𝗘𝗦𝗧𝗔𝗗𝗢 𝗗𝗔𝗦 𝗣𝗘𝗦𝗖𝗔𝗦

05/06/2026

𝐌𝐀𝐏𝐏𝐅 𝐋𝐀𝐍𝐒𝐀 𝐃𝐈𝐒𝐓𝐑𝐈𝐁𝐔𝐈𝐒𝐀𝐔𝐍 𝐅𝐈𝐍𝐈 𝐌𝐀𝐍𝐔 𝐌𝐀𝐑𝐄𝐊𝐎 𝐁𝐀 𝐆𝐑𝐔𝐏𝐔 𝐀𝐆𝐑𝐈𝐊𝐔𝐋𝐓Ó𝐑 𝐒𝐈𝐑𝐀

𝐃Í𝐋𝐈, 𝟎𝟓 𝐉𝐮ñ𝐮 𝟐𝟎𝟐𝟔 – Ministru Agrikultura, Pekuária, Peskas no Florestas Interinu, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, sexta ne’e, ofisialmente halo lansamentu distribuisaun fini manu Mareko ba grupu agrikultór sira iha salaun Uma Tradisionál Ministério Agricultura, Pecuária, Pescas e Florestas (MAPPF), Comoro.

Programa distribuisaun fini manu ne'e nu'udar parte husi esforsu Governu atu hasa'e produtividade agríkola no reforsa seguransa ai-han nasionál, liuhosi apoiu direta ba agrikultór sira iha teritóriu tomak.

Fini manu mareko ne'ebé distribui ba grupu agrikultór sira espera bele aumenta produsaun agríkola no kontribui ba dezenvolvimentu setór agrikultura iha Timor-Leste.

Iha intervensaun, Ministru Interinu nian hateten, Governu kontinua kompromete atu fó apoiu ba agrikultór sira hodi hasa'e kapasidade produsaun no melhora moris komunidade rural sira.

Nia mós enkoraja benefisiáriu sira atu uza fini manu ne'e ho di'ak no responsavel atu atinji rezultadu ne'ebé di'ak liu.

Grupu benefisiariu hirak ne’e, hosi Munisípiu Aileu, Covalima, no Bobonaro.

Atividade lansamentu ne'e, Ministru Interinu hetan akompaña hosi Sekretáriu Estadu Pekuária, Dr. José Vieira de Araújo no partisipa mós hosi dirijente MAPPF, reprezentante grupu agrikultór sira, tékniku agrikultura no konvidadu sira seluk.

Governu espera katak inisiativa ida ne'e bele fó benefísiu direta ba agrikultór sira no fortalese dezenvolvimentu sustentável iha setór agrikultura nasionál.

26/05/2026

𝐒𝐄𝐏 𝐌𝐀𝐔-𝐂𝐀𝐑𝐎 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐓𝐋𝐃𝐏𝐌 𝟐𝟎𝟐𝟔

𝐃Í𝐋𝐈, 𝟐𝟔 𝐌𝐀𝐈𝐔 𝟐𝟎𝟐𝟔 - Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐂𝐚𝐫𝐨”, tersa ne’e reprezentante Ministério da Agricultura, Pecuária, Pesca e Florestas hodi partisipa iha 𝘛𝘪𝘮𝘰𝘳-𝘓𝘦𝘴𝘵𝘦 𝘋𝘦𝘷𝘦𝘭𝘰𝘱𝘮𝘦𝘯𝘵 𝘗𝘢𝘳𝘵𝘯𝘦𝘳𝘴 𝘔𝘦𝘦𝘵𝘪𝘯𝘨 (TLDPM) 2026, ne’ebé realiza iha salaun auditóriu Xanana Gusmão, Ministério das Finanças, Ai-tarak Laran.

Enkontru ne’e reúne reprezentante hosi ministériu no instituisaun governamentál sira, parseiru internasionál, organizasaun dezenvolvimentu no setór privadu atu halo avaliasaun ba progresu dezenvolvimentu no buka solusaun ba dezafiu sira ne’ebé nasaun enfrenta.

Partisipasaun iha TLDPM 2026 mós sai hanesan oportunidade importante tanba bele hatene dezafiu sira hodi nune’e bele fó solusaun.

Reuniaun ne’e organizadu husi Ministériu Negósiu Estranjeiru no Kooperasaun no Ministériu Finansa ho tema “Trasa Hela Orizonte Ida Ne’ebe Reziliente: Ekonomia Azul, Integrasaun iha ASEAN no Asaun Koordenada”

Soru-mutuk TLDPM ne’e, ensera hosi Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay.

15/05/2026

𝐒𝐄𝐊𝐑𝐄𝐓Á𝐑𝐈𝐔 𝐄𝐒𝐓𝐀𝐃𝐔 𝐏𝐄𝐒𝐊𝐀𝐒 𝐄𝐍𝐓𝐑𝐄𝐆𝐀 𝐈𝐊𝐀𝐍-𝐎𝐀𝐍 𝐍𝐎 𝐀𝐏𝐎𝐈𝐔 𝐀𝐈-𝐇𝐀𝐍 𝐈𝐊𝐀𝐍 𝐁𝐀 𝐆𝐑𝐔𝐏𝐔 𝐀𝐊𝐈𝐊𝐔𝐋𝐓Ó𝐑 𝐈𝐇𝐀 𝐁𝐀𝐓𝐔𝐆𝐔𝐈𝐋𝐈

𝐋𝐈𝐐𝐔𝐈Ç𝐀, 𝟏𝟒 𝐌𝐀𝐈𝐔 𝟐𝟎𝟐𝟔 – Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, kinta ne'e, realiza atividade husik ikan-oan no entrega apoiu ai-han ikan ba grupu akikultór iha Batuguili, Suku Maubaralisa, Postu Administrativu Maubara, Munisípiu Liquiça.

Apoiu ne’e hanesan parte hosi esforsu Governu liuhosi Sekretaria Estadu Peskas nian atu promove dezenvolvimentu setór akikultura no hasa’e kapasidade grupu akikultór sira nian iha área rurál, hodi bele aumenta produsaun ikan no hadi’a moris komunidade sira.

Governu fó atensaun ba atividade akikultura iha área refere tanba konsideran fatin ne'e poténsia no bele sustenta ekonomia família no garante seguransa alimentár ba komunidade sira.

Grupu akikultór sira iha Batuguili simu apoiu hirak ne'e ho entuziasmu no espera katak programa hanesan ne’e bele kontinua iha futuru atu ajuda komunidade sira aumenta produtividade no rendimentu ekonomia.

14/05/2026

𝐌𝐀𝐏𝐏𝐅 𝐋𝐀𝐍𝐒𝐀 𝐒𝐈𝐒𝐓𝐄𝐌𝐀 𝐀𝐆𝐑𝐈𝐊𝐔𝐋𝐓𝐔𝐑𝐀 𝐍𝐎 𝐌𝐎𝐍𝐈𝐓𝐎𝐑𝐈𝐙𝐀𝐒𝐀𝐔𝐍 𝐁𝐀𝐈𝐋𝐎𝐑𝐎 𝐈𝐇𝐀 𝐓𝐈𝐌𝐎𝐑-𝐋𝐄𝐒𝐓𝐄

𝐃Í𝐋𝐈, 𝟏𝟒 𝐌𝐀𝐈𝐔 𝟐𝟎𝟐𝟔 - Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 "𝐌𝐚𝐮-𝐜𝐚𝐫𝐨", kinta ne'e reprezenta Ministério da Agricultura, Pecuária, Pescas e Florestas (MAPPF), halo lansamentu ba sistema indise stres agrikultura (ASIS) no ferramenta monitorizasaun bailoro, iha salaun Hotel Timor, Kolmera.

Iha intervensaun Sekretáriu Estadu nian, espresa sentimentu kontente tanba bele hamutuk ho parseiru sira halo lansamentu ba sistema indise stres agrikultura (ASIS) no feramenta monitorizasaun bailoro, iha Timor-Leste.

"Ita hotu hatene katak iha Timor-Leste, ita iha klima rua hanesan bailoro no udan, nune'e onra ida ohin lori Ministério da Agricultura, Pecuária, Pescas e Florestas nia naran hala'o lansamentu ferramenta resiliensia klima esensiál rua ba Timor-Leste hanesan: Sistema Indise Stres Agrikultura (ASIS) no Ferramentu Nasionál ba Monitorizasaun Bailoro Naruk".

Nia dehan, lansamentu ne'e oportunu no vantajen bainhira Timor-Leste transforma no halo setór agrikultura atu resistente ba mudansa klima nian, presiza informasaun no alerta sedu ne'ebé pontual, viável no fasil atu asesu. Ida ne'e importante tebes atu hasa'e produtividade, hametin seguransa ai-han, no harii reziliénsia iha komunidade rurál sira.

Nia subliña, ho ASIS ne'ebe fokus ba iha impaktu bailoro-naruk liuliu ba hare no batar, ne'ebe nu'udar sentru ba seguransa ai-han iha Timor Leste, no ai-han prinsipal sira ne'e vulnerável tebes ba bailoro-naruk.

"Bainhira produsaun hare no batar menus, impaktu ba disponibilidade ai-han no aumenta Ita-nia dependensia ba importasaun".

Tanba ne'e, nia realsa katak detekta sedu bailoro-naruk no monitorizasaun ba kondisaun produsaun ai-han esensial no prioridade agrikultura nian, no mós sai hanesan prioridade nasionál.

Nia hatutan, feramenta rua ne'e sei ajuda governu no setór agrikultura atu hasa'e produtividade, hametin siguransa ai-han, habelar agrikultura sensível ba klima no proteje agrikultór sira husi impaktu bailoro-naruk, bainhira uza ho efetivu.

"Instrumentu rua ne'e sei tulun ita atu muda intervensaun sira hosi reaktif - responde ba situasaun emerjénsia ba asaun antisipatóriu".

Nia afirma, atuasaun no intervensaun antes dezastre akontese hodi redus risku dezastre, tanba ne'e informasaun alerta sedu presiza konsidera iha programa no planu ba kultivasaun, variedade atu kuda, jestaun be'e, protesaun ba ai-horis no animál sira.

Tan ne'e aproveita oportunidade, nia lori Ministério da Agricultura, Pecuária, Pescas no Florestas, hato'o agradese ba UNEP no FAO, ne'ebé apoiu ona tablet ba ofisiál estensaun agríkola sira.

Nia hatete, ekipamentu hirak ne'e sei hadi'a relatóriu iha terenu, hametin komunikasaun iha nivel hotu-hotu. Nune'e mós garante katak agrikultór sira simu informasaun iha tempu ne'ebe sertu, inklui iha area remota.

Ne'e duni, nia deklara katak Governu komitementu nafatin atu servisu hamutuk ba levantamentu no utilizasaun dadus, asegura informasaun risku klimátiku, habelar informasaun ba ofisiál estensaun sira, agrikultór no parte interesada sira hotu.

Atu remata nia kongratula parte hotu ne'ebé kontribui ona ba servisu ida ne'e, partikularmente ba ekipa FAO nia apoiu tekniku, ba UNEP nia koordenasaun, ba Green Climate Fund ba apoiu finanseira, ba ALGIS, Diresaun Extensaun, Servicos Agricultura Munisipiu sira hotu, ekipa APC no Diresaun Meteorologia no Geofiziika Nasional ba hotu-hotu nia dedikasaun no partisipasaun iha faze servisu ida ne'e nian hodi integra ASIS iha sistema nasionál.

Portantu, partisipa iha serimónia ne'e, reprezentante Prezidente Autoridade, Protesaun Civil, Sr. Martinho De Fatima, DG Servicos Corporativo MAPPF, Sr. Celestino da Cunha, DG Agrikultura MAPPF, Sr. Martniho L. Gusmão, Asistente Representante FAO, Sra. Paula da Cruz, Asesór Tekniku husi UNEP, Sr. James Wicken, Komandante Operasional Autoridade Protesaun Civil Super Intendente, Nuno Rumualdo Gomes, Diretór nasionál, reprezentante liñas ministeriais sira, Parseiru Dezenvolvimentu, Akademiku no Sosiedade Civil sira.

13/05/2026

𝐒𝐄𝐊𝐑𝐄𝐓Á𝐑𝐈𝐔 𝐄𝐒𝐓𝐀𝐃𝐔 𝐏𝐄𝐒𝐊𝐀𝐒 𝐏𝐀𝐑𝐓𝐈𝐒𝐈𝐏𝐀 𝐑𝐄𝐔𝐍𝐈𝐀𝐔𝐍 𝐊𝐎𝐍𝐒𝐄𝐋𝐋𝐔 𝐌𝐈𝐍𝐈𝐒𝐓𝐑𝐔

𝐃Í𝐋𝐈, 𝟏𝟑 𝐌𝐀𝐈𝐔 𝟐𝟎𝟐𝟔 - Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 "𝐌𝐚𝐮-𝐜𝐚𝐫𝐨", kuarta ne'e partisipa iha reuniaun konsellu ministru, iha Palácio do Governo.

Soru-mutuk ne'e lidera hosi, Primeiru Ministru, 𝐊𝐚𝐲 𝐑𝐚𝐥𝐚 𝐗𝐚𝐧𝐚𝐧𝐚 𝐆𝐮𝐬𝐦ã𝐨, no hetan partisipasaun másimu hosi membru nonu governu konstitusionál.

Informasaun detallu ne'ebé diskute iha soru-mutuk ne'e bele klika link iha kraik;

https://timor-leste.gov.tl/?p=49075&lang=tp

07/05/2026

𝐒𝐄𝐊𝐑𝐄𝐓Á𝐑𝐈𝐔 𝐄𝐒𝐓𝐀𝐃𝐔 𝐏𝐄𝐒𝐊𝐀𝐒 𝐋𝐎𝐊𝐄 𝐅Ó𝐑𝐔𝐌 𝐍𝐀𝐒𝐈𝐎𝐍Á𝐋 𝐀𝐊𝐔𝐀𝐊𝐔𝐋𝐓𝐔𝐑𝐀 𝐓𝐈𝐌𝐎𝐑-𝐋𝐄𝐒𝐓𝐄 𝐁𝐀 𝐃𝐀-𝐇𝐀𝐀𝐓

𝐃Í𝐋𝐈, 𝟎𝟕 𝐌𝐀𝐈𝐔 𝟐𝟎𝟐𝟔 – Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, kinta ne'e ofisialmente loke Fórum Nasionál Akuakultura Timor-Leste ba da-haat, ne’ebé realiza iha suai room, Timor Plaza, Comoro, Díli.

Iha intervensaun Sekretáriu Estadu, hateten Fórum Nasional Akuakultura ba da-haat ne’e sei halibur hamutuk parte interesada sira hosi instituisaun Governu, setór privada no parseiru dezenvolvimentu sira.

"Forum Nasional Akuakultura Timor-Leste ba da-haat ida-ne'e, nu'udar onra boot ida mai hau hodi hamrik iha ita-boot sira nia oin. Ohin, ita halibur malu la'ós de'it atu diskute kona-ba ikan, maibé atu diskute kona-ba futuru seguransa ai-han, diversifikasaun ekonomika, no ita-nia povu nia saúde iha Timor-Leste".

Nia dehan, bainhira haree ba futuru Timor-Leste nian, rekoñese katak potensial iha akuakultura boot tebes. Enkuantu peska kaptura fornese fonte proteina ne'ebé importante, setör akuakultura rai-laran no tasi-ibun nian maka xave atu taka lakuna entre oferta no prokura.

"Agora daudaun, ita-nia família barak maka depende ba fonte ai-han importadu sira, ne'e duni atu hametin ita-nia setór akuakultura, ita hili dalan ida auto-konfiansa nian. ita hili atu fó kbiit ba ita nia akikultór lokál sira-husi rai-tetuk to'o tasi-ibun-atu produz proteína ne'ebé saudavel, baratu, no ho kualidade aas iha ita nia rai rasik".

Tan ne'e, nia deklara, Governu Timor-Leste komprometidu ba setór ida ne'e. No rekoñese katak atu akuakultura bele buras, tenke haree ba pilar kritiku importante sira hanesan; Kapasidade tékniku hodi fornese ba akiikultór sira ho prátika di'ak liu iha jestaun kolam, produsaun ai-han, no kontrolu moras. Hadi'a asesu ba ikan-oan ho kualidade no ekipamentu nesesáriu atu hasa'e produsaun. Asesu ba Merkadu hodi asegura katak saida maka akiikultór sira produz bele to'o iha merkadu, eskola, no to'o iha meza han-nian husi sidadaun sira ho efisiente.

"Ita-nia objetivu prinsipál mak atu haree fila-fali progresu dezenvolvimentu akuakultura ne'ebé akontese ona iha Timor-Leste, no identifika oportunidade sira no lakunas ne’ebé sei iha setór ida-ne’e".

Atu hakotu, Lideransa Peskas ne'e mós subliña, liuhosi diskusaun no partilha esperiénsia, espera hosi fórum ne’e bele kontribui ba hadi’a kondisaun seguransa ai-han no nutrisaun, no mós hasa’e rendimentu ekonómiku komunidade sira liuhosi asaun ne’ebé kordenadu no sustentavel.

Portantu eventu ne’e hala’o hosi Projetu Partnership for Aquaculture Development in Timor-Leste – Phase 2 (2020–2026), ne’ebé servisu hamutuk ho Ministériu Agrikultura, Pekuária, Peskas no Florestas (MAPFF).

Projetu ne’e finansia hosi Ministériu Negósius Estranjeirus no Komérsiu Nova Zelándia, no implementa hosi WorldFish iha parseria ho MAPFF.

Partisipa iha soru-mutuk ne'e, Sientista Senior/Xefe Projetu PADTL2, Dr. Jharendu Pant, hosi WorldFish Penang, Malaysia, Reprezentante Rezidente, Grupu Banku Mundial, Timor-Leste, Sr. David Freedman, Reprezentante Paiz ba nasaun Indonesia no Timor-Leste, Sr. Rajendra Aryal, hosi Organizasaun ONU ba Ai-han no Agrikultura (FAO), Timor-Leste, Embaixadora Nova Zelándia ba Timor-Leste, Sra. Helen Tunnah, Setór Privadu, Grupu Akikultor no Estudante Universitáriu sira.

24/04/2026

𝐆𝐎𝐕𝐄𝐑𝐍𝐔 𝐀𝐏𝐎𝐈𝐔 𝐄𝐊𝐈𝐏𝐀𝐌𝐄𝐍𝐓𝐔 𝐏𝐄𝐒𝐊𝐀𝐒 𝐁𝐀 𝐏𝐄𝐒𝐊𝐀𝐃Ó𝐑 𝐋𝐈𝐐𝐔𝐈Ç𝐀

𝐋𝐈𝐐𝐔𝐈Ç𝐀, 𝟐𝟒 𝐀𝐁𝐑Í𝐋 𝟐𝟎𝟐𝟔 – Governu liuhosi Ministru Agrikultura, Pekuária, Peskas no Florestas Interinu, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, sesta ne’e kontinua entrega bero ho mákina unidade 14 ba Prezidente Autoridade Munisípiu Liquiça, depois distribui ba grupu peskadór sira.

Serimónia entrega ne’e realiza iha Instituto Nacional de Pescas e Aquicultura (INPA-Maubara), Munisípiu Liquiça, ho prezensa husi autoridade lokál sira no reprezentante grupu peskadór sira.

Iha nia intervensaun, hateten apoiu ne’e parte husi esforsu Governu atu hasa’e kapasidade peskadór sira, hodi bele aumenta produsaun peska no kontribui ba seguransa alimentár no dezenvolvimentu ekonómiku iha área peskeira.

“Hanesan ema polítika atu dezafia ita boot sira bele kontribui ba dezenvolvimentu ekonomia iha ita-nia rai laran, espesifiku ba iha ita boot sira-nia grupu no família”.

Tanba ne’e nia afirma, Governu liuhosi Ministério da Agricultura, Pecuária, Pescas e Florestas, espesifiku Secretário de Estado das Pescas kompromete ona apoiu ekipamentu ba peskadór sira atu bele halo atividade, maibé tenke kontribui mós ba asegura rekursu marinu ho sustentabilidade.

Ikus nia husu ba grupu peskadór sira atu utiliza ekipamentu hira ne’e ho di’ak para bele dura, hodi nune’e governu bele kontinua haree fali grupu sira seluk, tanba apoiu ne’e la’ós iha Liquiça de’it, maibé iha Munisípiu hotu ne’ebé iha área tasi.

Entretantu, iha fatin hanesan reprezentante Prezidente Autoridade Munisípiu Liquiça, agradese ba Governu liuhosi Sekretaria Estadu Peskas tanba fornese ekipamentu importante ida ne’ebé bele ajuda direitamente peskadór sira iha sira nia atividade loro-loron.

Ho entrega ekipamentu ne’e, espera katak grupu peskadór sira bele utiliza ho di’ak no responsavel, hodi asegura sustentabilidade rekursus marinu no mellora moris komunidade iha área kosteira.

22/04/2026

𝐌𝐀𝐔-𝐂𝐀𝐑𝐎 𝐏𝐀𝐑𝐓𝐈𝐒𝐈𝐏𝐀 𝐑𝐄𝐔𝐍𝐈𝐀𝐔𝐍 𝐊𝐎𝐍𝐒𝐄𝐋𝐋𝐔 𝐌𝐈𝐍𝐈𝐒𝐓𝐑𝐔

𝐃Í𝐋𝐈, 𝟐𝟐 𝐀𝐁𝐑Í𝐋 𝟐𝟎𝟐𝟔 – Ministru Agrikultura, Pekuária, Peskas no Florestas Interinu, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, kurta ne’e partisipa iha reuniaun Konsellu Ministru, iha Palácio do Governo.

Soru-mutuk Konsellu Ministru ne’e, lidera direta hosi Primeiru Ministru, Kay Rala Xanana Gusmão no hetan partisipasaun másimu hosi Membru Nonu Governu Konstitusionál.

Detallu kona-ba assuntu hosi Reuniaun Konsellu Ministru ne’e, bele klika link iha kraik;

https://timor-leste.gov.tl/?p=48645&lang=tp

22/04/2026

Ministru Agrikultura, Pekuária, Peskas no Florestas Interinu, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, ho kolega membru Governu MAPPF, dirijente no funsionáriu sira, hato’o sentidu kondolénsia ba família matebian, Ministru Ensinu, Superior, Siénsia no Kultura, Dr. José Honório da Costa Perreira Jerónimo.

Adeus.... Adeus.... Até Já🙏🏻

17/04/2026

https://youtu.be/NXwicw0BDNE?si=4jExLFUf3Xc1eS2u&sfnsn=wa

ENTREVISTA ESKLUZIVA - Timor-Leste lakon osan millaun $ 48 hosi peska ilegál durante 2024-2026