STAE TIMOR -Media

08/05/2026

Ermera, iha loron 07 Maiu 2026 horseik - Diretóra Nasional STAE ba Asuntu Jestaun Baze Dadus Resenseamentu Eleitoral, Informatika Teknolojia no Informasaun Públiku, Sra. Tulia Onorina Andrade de Jesus, hamutuk ho Diretóra STAE Munisípiu Ermera, Sra. Romenia Perreira, partisipa enkontru ho Autoridade Munisípiu no reprezentante lideransa husi Suku Assuilau no Suku Ducurai. Atividade ida-ne’e hala’o iha salaun enkontru VIP Autoridade Munisipál Ermera.

Objetivu prinsipal husi enkontru ida-ne’e maka atu diskute kona-bá disputa unidade jeográfika husi Aldeia Ertoi, hodi garante klareza ba entre Suku Assuilau no Suku Ducurai kona-bá obsesaun husi sidadaun balun iha aldeia eratoiatu entrega ba suku Assuilau. Enkontru ida-ne’e nu’udar parte krusiál hodi esforsu atu hametin koordensaun entre autoridade munisipál nian hodi apoia ba iha jestaun dadus jeográfiku sira ne'ebé loos.

Liuhusi enkontru ida-ne’e, parte sira reafirma sira nia kompromisu hamutuk atu buka solusaun ne’ebé justu, hodi evita interpretasaun diferente iha terrenu ne’ebé bele fó impaktu ba prestasaun servisu atendementu públiku no prosesu administrasaun.

Iha intervensaun Diretóra Nasionál STAE, Sra. Tulia Onorina Andrade de Jesus, subliña katak kriasaun suku no aldeia tenke bazeia ba desizaun no akordu husi komunidade sira, la’ós estabelese husi STAE ka DNASS. Tanba durante ne’e parte barak maka fó sala ba iha STAE kona-bá suku ka aldeia nia naran sala, maski nune’e STAE atualiza de'it dadus bazeia ba diploma ofisiál sira ne'ebé fó sai husi diploma ministerial.

Entretantu, iha diskursu Diretór Nasional Apoiu Administrasaun Suku (DNAAS), Sr. Celestino Marques mós subliña importánsia atu mantein klareza ba aldeia Eratoi atu integra ba suku Assuilau ka suku anterior (Ducurai). Hodi nune’e ekipa tékniku husi DNASS bele prepara relatóriu rejultadu ne’e hodi submete ba iha Sua Exelénsia Ministru Administrasaun Estatál (MAE) hodi hein desizaun no despaixu husi Sua Exelénsia MAE ba asuntu ne’e.

Enkontru ne’e prezidi husi reprezentante prezidente autoridade munisipál, atual sekretária autoridade assuntu sosiais no organizasaun, Sra. Paulina do Rosário Lemos, sekretáriu planeamentu investimentu dezenvolvimentu integradu, Sr. António Alves da Costa, Diretór ONG, Sr. Francisco Menezes, Xefe Aldeia Eratoi, Sr. Júlio de O. Pinto, Xefe Suku Assuilau, Sr. Mario de Deus, Xefe Suku Ducurai, Sr. Rafael Soares Maia, representante lia nain husi suku Assuilau no Ducurai, inklui funsionáriu husi ekipa tékniku DNASS no STAE.

Nune’e mos antes atu hahu atividade ne’e, Diretóra Nasionál STAE mos utiliza tempo balun hodi observa direita ba iha Atividade Resensiamento eleitoral no atualizasaun baze de dadus nebe’e halo hela iha Munisipiu Ermera.

Durante observasaun Diretóra nasionál STAE hato’o mensagem ba iha ekipa teknikú STAE munisipiu Ermera nian atu nafatin mantein disiplina servisu hodi atende sidadaun eleitor sira tuir oras servisu nebe’e iha nomos nafatin halo atendementu tuir prosedimentus ou rekejitus RE-ABD nebe’e STAE haktuir durante ne’e.

06/05/2026

Dili, 05 Maiu 2026 horseik- Diretór Jerál STAE, Sr. Elviro Fernandes Moniz, konvoka enkontru mensal hamutuk ho Diretór Nasional STAE nain tolu mak hanesan Diretór Nasional ba Asuntu Administrasaun Finansas, Aprovisionamentu no Lojístiku, Sr. Agustinho da Cunha, no Diretór Nasional ba Asuntu Koordenasaun Munisipál, Edukasaun Eleitoral no Jurídiku, Sr. Eduardo Casimiro de Deus, nomós Diretóra Nasional ba Asuntu Jestaun Baze Dadus Resenseamentu Eleitoral, Sra. Tulia Onorina Andrade de Jesus, inklui Xefi departamentu sira husi STAE nasional iha Sala Gabinete Diretór Jerál STAE.

Enkontru ida-ne’e hanesan parte agenda rutina Diresaun Jerál STAE nian, ne’ebé ho objetivu atu halo avaliasaun ba servisu ne’ebé hala’o ona durante fulan Abril inklui servisu sira ne’ebé hala,o iha trimestre dahuluk nian no identifika servisu hirak ne’ebé presiza atu implementa iha fulan ida ne’e.

Durante enkontru Diretor jeral STAE husu ba iha kargus Direjentes hirak ne’e, atu bele aselera servisu nebe’e maka STAE planeia ona tuir planu asaun annual nebe’e STAE iha no husu husi kada diresaun nasional no xefi departementu sira, atu bele nafatin identifika nesesidades lojistika ba iha preparativus eleisaun persidente 2027, hodi bele solusiona antes implementa eleisaun presidente iha tinan oin.

Durante enkontru husi kada diresaun nasional sira aprezenta mos relatoriu progresu servisu hahu husi trimestre primeiru nian ba iha Diresaun jeral maka hanesan husi parte dirasaun nasional ba Asuntu Administrasaun Finansas, Aprovisionamentu no Lojístiku, aprezenta kona ba progresu akizisaun material ba eleisaun prezidente, rejultadu rekrutamentu ekipa resensiadora ba atividade resensiamentu eleitoral nian nomos prosesu aprovisionamentu nian.

Husi diresaun nasional ba asuntu jestaun baze dadus resenseamentu eleitoral, aprezenta kona-ba rejultadu provisoriu dadus eleitor iha prosesu resensiamento eleitoral no atualizasaun baze dadus eleitoral rutina nebe’e maka hala,o hela iha nivel munisipiu nomos preparasaun ba iha sosilizasaun no implementasaun atividade RE-ABD iha nivel postu.

Entertantu husi diresaun nasional ba Asuntu Koordenasaun Munisipál, Edukasaun Eleitoral no Jurídiku, aprezenta kona-ba rejultadu provisoriu identifikasaun centro votasaun no estasaun de votu nomos progresu implementasaun atividade edukasaun eleitoral iha ensino secundário sira iha kada Munisipiu nebe’e ho nia alvu ba eleitor potensial sira ho idade tinan 16 ba leten.

Nune’e antes remata enkontru ne’e, diretor jeral STAE apela ba iha kargu xefias sira atu nafatin kumpri regras servisu sira nomos nafatin iha koordenasaun servisu nebe’e diak hodi atinji metas servisu STAE nian.

20/04/2026

Iha loron, 20 Fulan Abril 2026, Secretáriado Tecnico Da Administração Eleitoral (STAE) , liu husi ekipa juri ba vaga operador Sistema, asistente operador sistema nomos ofisial pontu fokal, hahu halo fali teste oral ou intervista ba kandidatu sira nebe’e pasa ona iha faze teste eskrita nian.

Teste oral ne’e hanesan etapa ikus ba prosesu rekrutamentu operador Sistema, asistente operador sistema nomos ofisial pontu fokal iha munisipiu 12, autoridade Ataúro nomos RAEOA.

Kandidatu nebe’e tuir teste oral iha loron ne’e maka kandidatu hirak nebe’e iha munisipiu Bobonaro, Covalima, Ermera, Manufahi, Lautem, Viqueque no RAEOA, nune’e kandidatu husi munisipiu sira seluk, sei teste oral iha semana ida ne’e nia laran tuir orariu teste nebe’e publika ona husi kada STAE munisipiu.
Teste oral ne’e hala,o iha salaun STAE munisipiu idak-idak no rejultadu final husi teste ne’e sei publika iha loron 27 to’o iha loron 30 fulan ida ne’e.

11/04/2026

07/04/2026

Iha loron 06 fulan Abril 2026, Secretáriado Tecnico de Administração Eleitoral (STAE) , liu husi ekipa juri ba vaga operador sistema, asistente operador sistema nomos ofisial pontu fokal hahu halo fali teste eskrita ba kandidatu sira nebe’e pasa ona iha faze selesaun dokumentu nebe’e STAE publika ona iha loron 23 Marsu 2026.

Teste ne’e fahe ba etapa rua maka hanesan iha loron 06 fulan Abril 2026, teste eskrita ba kandidatu husi munisipiu Bobonaro, Covalima, Dili, Ermera, Manufahi, Lautem ho Viqueque, no etapa segundu sei hala’o teste eskrita ba kandidatu husi munisipiu Aileu, Ainaro, Atauro, Baucau, Liquiça, Manatuto no RAEOA iha loron 08 Abril 2026.

kandidatu ba teste eskrita ne'e, sei tuir teste iha STAE munisipiu ida-idak nian.

Total kandidatu nebe’e pasa iha selesaun dokumentu no kontinua ba teste eskrita husi munisipiu 12 nomos autoridade administrativa Atauro no RAEOA hamutuk 2.968 husi total vaga ba operador sistema hamutuk kandidatu 451, kompostu husi feto 196 no mane 255, ba vaga asistente operador sistema hamutuk kandidatu 1.306, kompostu husi feto 721 no mane 585 nomos ba vaga ofisial pontu fokal kandidatu hamutuk 1.211, kompostu husi feto 544 no mane 667.

Iha rekrutamentu ne’e STAE sei rekruta ofisial hamutuk 210, hodi prienxe vaga ba pozisaun 3 maka hanesan Operador sistema, asistente operador sistema no ofisial pontu fokal, husi total nebe’e iha, STAE sei koloka ema nain ida husi kada pozisaun ba iha postu atendementu ou postu administrativu 69 inklui postu atendementu ida iha Atauro, hodi halo atendementu ba eleitor sira nebe’e atu resensia no atualiza dadus eleitoral ba preparasaun eleisaun prezidente 2027.

Ba kandidatu hirak ne’e, hafoin tuir teste eskrita, STAE sei publika sai rejultadu teste eskrita nian iha loron 13 to’o iha loron 17 fulan ida ne’e, kandidatu nebe’e pasa iha teste eskrita sei kontinua ba iha teste oral ou intervista tuir agenda nebe STAE publika ona.

25/03/2026

Ermera, 25 Marsu 2026, Diretór Jerál STAE, Sr. Elviro Fernandes Moniz, partisipa iha serimonia inagurasaun Balkaun Úniku (BÚ) ne’ebé inagura husi Sua Exelénsia Ministru Administrasaun Estatal, Sr.Tomás do Rosário Cabral, iha Munisípiu Ermera.

Estabelesimentu Balkaun Úniku (BÚ) iha munisípiu sira hanesan parte ida husi esforsu estratéjiku Ministériu Administrasaun Estatal liuhusi Diresaun Jerál Simplifikasaun Modernizasaun no Administrasaun Lokál nian atu hametin sistema atendimentu públiku ne’ebé modernu, integradu, no responsivu. Liuhusi BÚ komunidade sira bele atu trata Billete Identidade (BI), Pasaporte, Sertidaun Kriminál, no dokumentu administrativu importante sira seluk. Inisiativa ida-ne’e maka hanesan pasu konkretu ida hodi hakbesik servisu atendementu públiku ba komunidade sira, liu-liu sira ne’ebé iha area remotas.

Ho inaugurasaun Balkaun Úniku Munisípiu Ermera nian, Ministériu Administrasaun Estatal komesa kompleta dadauk ona estabelese Balkaun Úniku iha munisípiu sira mak hanesan; Manatuto, Manufahi, Baucau, Covalima, Dili, Ataúro, Likisa, Bobonaro, Oe-Cusse, Aileu, Lautem no Ermera.

Seremónia ida ne’e marka mos prezensa husi Ministru da Justisa Sr. Sérgio de Jesus Fernandes da Costa Hornai no Vise-Ministru Fortalesimentu Institusionál Sr. Paulo M. S. dos Remedios, Presidente Autoridade, Diretores-gerais, Diretores-Nasionais, Representante UNDP, Sra. Katyna Argueta nomos Autoridades lokal sira .

19/03/2026

Loron 19 Marsu 2026, Hafoin ekipa rekrutamentu iha kada STAE munisipiu simu dokumentu rekerente ba vaga operador sistema, asistente operador sistema no ofisial pontu fokal, iha loron 09 to’o iha loron 13 fulan ida ne’e, maka semana ne’e, hahu husi loron 16 to’o iha loron 20 fulan Marsu, ekipa rekrutamentu iha kada STAE munisipiu no RAEOA halo selesaun ou análize ba dokumentu ne’ebé kandidatu sira entrega, hodi garante katak dokumentu hirak ne’e prienxe rekizitu hotu ne’ebé STAE publika.

Ba kandidatu ou rekerente nebe’e maka prienxe rekezitus ou liu selesaun dokumentu STAE sei publika iha loron 23 Marsu 2026, hodi kontinua ba faze ou teste sira tuir mai.

19/03/2026

Dili, 19 Marsu 2026, Diretóra Nasional ba asuntu jestaun baze dadus, resenseamentu eleitoral, informátika teknolojia no informasaun públiku STAE, Sra. Tulia Onorina Andrade de Jesus, sai orador prinsipal iha workshop ho topiku ” presepetiva no papel feto iha prosesu desentralizasaun” nebe’e organiza husi movimentu feto foin sa’e Timor Leste (MOFFE), atividade ne’e hala’o iha Salaun Delta Nova – Comoro.

Sesaun ne’e diretora nasional STAE ne’e, koalia kona-ba sistema informasaun resensiamentu eleitoral ho baze biometriku nomos partilla kona-ba rejultadu dadus eleitoral nebe’e maka STAE rejistu ona.

Biban ida ne’e diretor nasional mos enkoraja ba partisipantes sira atu bele hatutan informasaun sira ne’e ba iha maluk eleitor sira seluk atu nune’e bele halo resensiamentu eleitoral no atualiza sira nia kartaun eleitoral hodi prepara ba iha eleisaun sira nebe’e sei akontese iha tinan hirak tuir mai.

Iha atividade ne’e partisipa mos husi Diretor jeral desentralizasaun governu lokal MAE, Sr. António Augusto Guterres.
komisaria Comissão Nacional de Eleições (CNE), Sra. Odete Maria Freitas Belo, nomos reprezentante feto Partidu politiku sira, Parseiru Nasional no Internasional inklui mos maluk feto difisiensia, estudante nomos sosiedade sivil sira.

12/03/2026

Baucau, 12 Marsu 2026, Sekretariadu Tékniku Administrasaun Eleitoral (STAE) liuhusi Diretór nasional ba asuntu koordenasaun munisípal (RAEOA), Edukasuan eleitoral no jurídiku, Sr. Eduardo Casimiro, ofisialmente hala’o abertura edukasaun eleitoral ba eleitor potensiál sira iha Munisipiu Baucau, espesifikamente iha Postu administrativu Vemasse.

Edukasaun eleitoral ida-ne’e ho tópiku “ Hakbi’it koñesimentu foin sa’e iha área eleitoral hodi promove partisipasaun sira iha aktus eleitorais” ne’ebé fornese ba iha estudante husi Eskola Secundaria Geral Filial de Vemasse, ne’ebé mak atinji ona idade 16 ba leten.

Iha edukasaun eleitoral ne’e parte husi STAE sosializa ba iha estudante sira kona-bá rekizitus no importansia husi resenseamentu eleitoral no atualizasaun baze dadus, leis no prosedimentus ba eleisaun sira nomós informasaun seluk ne’ebé relevantes ho papel STAE nian.

Atividade ida-ne’e partisipa mós husi Diretór CNE, Sr. Esmeraldo Damião Belo, Coordenador Eskola Secundaria Geral Filial de Vemasse, Sr. Tobias Simon da Costa, Reprezentante PAM, Sr. Tomas R.O.E, akompãna mós husi Diretór STAE munisipiu Baucau, Sr. Natividade Freitas Guterres nomós Xefi departementu Formasaun, Sr. Agustinho Reis Gomes inklui professores balun husi eskola refere.

Atividade ida ne’e mos sei hala’o iha munisipiu sira seluk ho alvo nebe’e hanesan, iha eskolah sira nebe’e STAE identifikadu ona.

10/03/2026

STAE loke hela vaga ba iha pojisaun Operador sistema, Asistente operador sistema no Ofisial pontu fokal.

Ba maluk sira ne’ebe interese, bele submete dokumentus iha edifisiu STAE munisipiu 12, Autoridade Ataúro nomos RAEOA.

Data submete dokumentu hahu iha loron 09 to’o 13 Marsu 2026, iha oras servisu.

Ba informasaun klaru bele hare iha ita bo’ot sira nia kuadru avisu STAE munisipiu ou bele hare mos iha kuadru avisu edifisiu Postu administrativu ida-idak.

09/03/2026

Dili, 09 Marsu 2026, Atu hakbi’it koñesimentu foin sae sira nian kona-ba prosesu eleitoral maka Diretór Nasional ba asuntu koordenasaun munisípal (RAEOA), Edukasuan eleitoral no jurídiku, Sr. Eduardo Casimiro de Deus, hamutuk ho Diretór nasional nain rua mak hanesan Diretór nasional ba asuntu Administrasaun Finansas, Rekursu umanu, Aprovisionamentu no Lojistiku, Sr. Agustinho Da Cunha nomós Diretóra nasional ba Jestaun Baze Dadus resensiamentu eleitoral, informatika teknolojia no informasaun publiku, Sra. Tulia Onorina Andrade de Jesus, halo sorumutu ho Diretór STAE munisípiu 12 , Diretór STAE autoridade administrativa Ataúro nomos RAEOA, sorumutu ne’e hala’o iha salaun enkontru STAE nasional-Caicoli.

Objetivu husi sorumutu ida ne’e hodi halo diskusaun ou Brifieng ba materia informasaun eleitoral nebe’e sei sosializa ba eleitor potensial ou estudante sira iha eskola sekundária sanulu resin lima nebe’e identifikadu ona iha Munisipiu no afixa mos orariu ba implementasaun atividade edukasaun eleitoral ba tinan 2026.

Durante sorumutu ne’e Diretór Nasional ba asuntu koordenasaun munisípal (RAEOA), Edukasuan eleitoral no jurídiku, apela ba Diretór STAE munisipiu no ofisial edukasaun eleitoral sira atu bele tau atensaun ba atividade ida ne’e no husu atu uniformiza informasaun no materia nebe’e sei hato’o ba eleitor potensial sira, atu nune’e bele sai pakote informasaun ida nebe’e informativu no akuradu.

Sorumutu ne,e partisipa mos husi xefi departementu iha STAE nasional sira inklui mos ofisial Edukasaun eleitoral husi STAE munisipiu 12, Autoridade administrativa Ataúro no RAEOA.