06/01/2025
PREZIDENTE – AMD, GREGÓRIO DA CUNHA SALDANHA
TRANSFORMASAUN MUNISIPIU DILI; EZIJE KOMPRIMISU, LEALDADE, SERIEDADE NO RESPONSABILIDADE IHA SERVISU
Dili, 6 Janeiru 2025 – Prezidente Autoridade Munisipal Dili, Gregório da Cunha Saldanha "Mouris", hato’o sentimentu esperansa ne’ebe klean ho determinasaun ba Diretor Servisu Munisipal hotu, Chefe Departementu, Administrador Postu Administrativu, Chefe Suco no estrurura konselhu suco hotu. “Ita hasoru momentu krusial ba futuru Dili, ne’ebe momentu ba transformasaun ezije ita hotu nian komprimisu, lealdade, seriedade, responsabilidade ba servisu”.
Transferensia Autoridade Munisipal Dili ba Kámara Munisipal, marka pasu desizivu iha desentralizasaun ba podér lokál, nudar dalan naruk, nakonu ho dezafiu, maibé esensiál tebes ba progresu no prosperidade ba sidade Dili.
Intervensaun Prezidente Autoridade Munisipal Dili, Gregório da Cunha Saldanha liu husi diskursu hateten, ne’e laos projetu ne’ebe hare’e deít administrativu, maibé esforsu koletivu ne’ebe ezije partisipasaun ativa no kolaborasaun ema hotu.
Prezidente – AMD afirma, transformasaun futuru Dili depende ba kapasidade atu hakat liu dezafiu, liu husi diálogu konstrutivu, buka solusaun no promosaun ba ambiente servisu, bazeia ba kooperasaun no respeitu mútuu.
Prezidente – AMD hateten, husi ba kotukkritika ne’ebe la fo fuan diak, tau hamutuk ita nian unidade, ita mesak familia, unidus iha objetivu komún atu servi sidadaun Dili ho efikásia no dedikasaun.
“Hau sente dezafiu ne’ebe ita hasoru no hau rekonhese kritika, problema no defisiénsia ne’ebe eziste. Maibé, hau nian konviksaun forte katak ita iha kapasidade atu hakat liu problema bo’ot ne’ebe ita hasoru. Ita tenki iha mehi katak Dili, tenki sai ezemplu ba munisipiu seluk, sidade ne’ebé saudavel, mo’os, vibrante no sustentavel”.
Prezidente – AMD, Gregório da Cunha Saldanha hateten, problema lixo sai dezafiu bo’ot, tanba ne’e ezije resposta ida integrada, involve komunidade hotu. Ita tenki sensibiliza sidadaun hotu, fo importansia no kontribuisaun iha luta ne’e. Maski dalan ba perfeisaun sai nudar dalan naruk no ezije esforsu ne’ebe sei la-para, ita nian komprimisu seriu no asaun hamutuk ba transformasaun ne’e nudar prioridade no simbolu ba ita nia susesu koletivu.
Importante tebes, durante períudu udan no konsekuénsia ba populasaun Dili, presiza implementa mudans aobrigatóriu ba komunidade ne’ebe hela iha mota ninin, Fomentu II, Comoro, nudar medida prevensaun atu garante seguransa ba rezidentes sira. “Ita tenki foti asaun ho seriedade no urjénsia. Sidadaun moris iha risku no labele husik problema ne’e kontinua. Ita sei servisu hamutuk ho komunidade atu dezenvolve planu realokasaun ne’ebe justu no efikás, fornese uma foun ne’ebe seguru ba komunidade ne’ebe afetadu, no implementa medida prevene inundasaun iha futuru”.
Prezidente – AMD, Gerg’orio da Cunha Saldanha hateten, ne’e sai dezafiu bo’ot, maibe ita esforsu hamutuk, ita halo diferensa signifikativu ba sidadaun nian moris no hadiak seguransa Dili ba tempu naruk.
Prezidente – AMD hateten, “hau hakarak halo dialogu ho funsionáriu hotu AMD nian, intelektual, emprezáriu, reprezentante husi partidu politiku no sidadaun hotu, ita disponivel atu diskute solusaun ne’ebe konkretu, define objetivu komún no halo planu asaun ne’ebe bele permite ita atu hadiak signifikativamente kualidade moris ba sidade Dili”.
Iha tinan 2025 ne’e, Prezidente – AMD husu forma ekipa Auditoria Interna, ne’ebe kompostu husi espesialista iha varius área atu hadiak prosedimentu servisu, garante transparénsia no kria servisu ne’ebe lao diak. Kualker indísiu ba korupsaun ka falsifikasaun sei hetan investigasaun ne’ebe permanente, no sei enkaminha ba autoridade kompetente.
Prezidente – AMD, Gregório da Cunha Saldanha hateten, iha tinan 2025 sai nudar tinan trabnsformasaun ne’ebe signifikativu, renovadu no esperansa ba futuru sidade Dili.
-Dili # #
