03/08/2026
اليوم في رفراف حضرت على اكسيدون باش يبقا في ذاكرتي عمري الكل .. ناس ملوحة مغفصة ناس تصيح ما تنجمش تتنفس... كرهبة فيها مرأة أنا طليت و هي تقلي النفس مقطوع خذيت كرضونة نمروح عليها ساقيها الزوز مكسرين و راجلها من قدام بكلو دم مسلم وصابر.. الكرهبة الي من الجنب مراااا ميتة داخل فيها الفولون و والدها بجنبها حي أم مغفص.... نمشي للي مطيشين على الكياس نلقا طفلة متاع 16 عام ما تتحركش قتلي نحب امي... و امها هي الي ماتت 😭😭قلتلها لاباس هزوها للصبيطار.. نكذب الله غالب ما لقيت ما نقول😥 الآخرى عمرها 6 سنين ساقها مكسورة و تخرج في الدم من فمها و تقلي نحب ماما... و الحمد لله هاذي امها لاباس ساقيها مضرورين.. الأخرين زوز نساء مطيشين بالدم في وجوههم و حيين ٱم ما يتحركوش و الله اعلم الضربة وين... نحكيلكم على تفاصيل باش تردو بالكم في السياقة على رواحكم و على عائلاتكم و احبابكم و اصحابكم... راو الكياس خطر في خطر و الغلطة تنجم تكون نتائجها كبيييييرة عاىلات تتشتت و صغار يتامي...
عندي ملاحظة الجرحى تسعة و الحماية جات إمخر بقريب نص ساعة هزت زوز و بقينا نستناو في الأخرى...ناس تعيط و تصيح وكراهب الاسعاف مافماش....عيب راو هكا في منطقة سياحية جايينها ٱلاف الضيوف كل يوم
تدوينة الصحفية خولة الكـعبي
