Économie solidaire et sociale Sousse ESSS

31/10/2025

حدد تاريخ فتح باب الترشح لنيل الجائزة الوطنية لأحسن مشروع للباعثين الجدد في الصناعات التقليدية، يوم الاثنين 01 ديسمبر 2025، على أن يغلق باب الترشح، يوم الخميس 15 جانفي 2026. وأفاد، الديوان الوطني للصناعات التقليدية، في بلاغ له، أن التتويج بالمسابقة سيكون ضمن فعاليات الصالون الوطني للابتكار في الصناعات التقليدية في دورته 42 المزمع إقامتها خلال الفترة الممتدة، من 27 مارس إلى 5 أفريل 2026.

29/08/2025

من وراء الكواليس- الجزء الرابع

ربي يرحم زهو

ثمة تجارب عشناها في المشروع تفوت كل معاني المنطق والشعور، وتتجاوز كل انتظاراتنا وتوقّعاتنا.. وهاذي يمكن من بين أقواها
يظهرلي فهمتو ديجا من أول حلقة فـ'من وراء الكواليس' اللي المبادرة المجتمعية والفيديو تسمّاو "زهو": على اسم مرا برباشة من جملة النساء اللي خدمت معاهم الجمعيات المشاركة في البرنامج
وكانت هي أول واحدة يحكيو معاها وتجاوبهم على أسئلتهم وقت دراسة المشروع

اسمها فيه إشراق وفرحة، على عكس الواقع القاسي اللّي عاشتّو، وزادوه العمر والمرض والهشاشة الاجتماعية قسوة على قسوة

مشينا لدارها نصوّرو في يومها كيفاش تعدّيه، وسط عالمها. الكاميرا تبعتها.. كل شيء فيها كان يحكي، حتّى سكاتها وغزرتها..
الفكرة كانت بسيطة: حبّينا نورّيو وجه وصوت إنسانة عايشة بيناتنا، آما يمكن ما تتشافش حتى كان نتعدّاو بجنبها في الشارع.. ما تظهرش في وسائل الإعلام وتنجّم تعدّي عمرها كامل ما يسمع بيها حد..

أما كي حلّتّلنا باب دارها، حلّت باب قلبها، ومعاه زادت حلّت عينينا وقلوبنا..
طلبنا إذنها بش ندخلو دنيتها، يخّي قلبت حياتنا من غير ما شاورِتنا، وخَرْجِتنا من وهم. عرّات حقيقة، ومن غير ما تشعر، خلّات فينا بصمة ما تتفسّرش وما تتنحّاش.

بعد أسابيع قليلة زهو مشات.. كهَو عدّاد عمرها وفى. ما خلطتش تشوف الفيدو كي كْمِل في لخّر، لكنها قالت فيه كل شيء.. خلّات وصيّتها ورسالتها، وأملها في مستقبل خير ل"صاحباتها" اللي كيفها..

زهو ما كانتش «مستفيدة» من مشروع، ولا مجرّد «رقم» في قاعدة بيانات وزارة ما. كانت إنسانة: عاشت، حبّت، تعبت.. ورغم تعبها قعدت قويّة وشامخة لين ماتت..

يمكن ما كانش عندها نصيب من اسمها، أما الفيديو هذا دعوة بش نحكيو قصّتها وندعيولها بالرحمة..

دقايق قليلة تنجّم تحكي عمر كامل، خاصّة إذا كانت صادقة في المشاعر والنوايا:
https://www.facebook.com/share/v/1Jg1WeEXA7/

29/08/2025

من وراء الكواليس - الجزء الثالث

سكوت حنصوّر

بعد ما قمنا بعملية معاينة واستطلاع باش نحضرو رواحنا للتصوير وفسّرنا مرّة أخرى للنساء البرباشة أهداف الفيديو ودعيناهم للمشاركة فيه، رجعنا تلقّينا الكل مع بعضنا من غدوة في نفس البلاصة.
التجربة هاذي كانت غنيّة على برشا أصعدة: إنسانيّة، اجتماعيّة، مهنيّة، وكان فيها برشا مشاعر… أوّل مرّة نعيشوها مع بعضنا وتعلّمنا منها برشا ومن بعضنا زادة.
من بين الأهداف المباشرة للنشاط هـــذا واللي خدمنا عليه برشـــا خاصّــة مع مدام منى كحلون المشرفة على نادي الرّاديو بالمركّب الشبابي بســـوسة، هو البُعد التربوي على خاطر دور المربّي (وهو هوني المشرف على أي نادي من النوادي الشبابيّــة، أما ينجّم يكون زادة معلّــم، أستــاذ أو حتّى واحد من الوالدين) ما يقتصرش كان على التعليم التقني أو الأكاديمي للأشياء (نحكيو في حالتنا هذي على تعليم تقنيات التصوير والكادر في إطار إنتاج الفيلم). أما زادة يكون مسؤول على إيصال رسائل مهمّــة للشباب: التواضع، احترام القانون، حقوق ورغبات الغير، وحماية معطياتهم الشخصية، كيفاش الواحد ينظّم وقته في الخدمة، يتعلّم إدارة مشاعرو، ينحّي من مخّه كل الأحكام المسبقة، ما يعطيش وعود كبيرة وفضفاضة هو مش قادر ينفّذها ويكون مهني وإنساني في نفس الوقت.

🙏 شكرا لـيك مدام منى على تواجدك الدّائم مع الشّباب وعلى خاطرك خير معلّم و قدوة يُحتذى بها.
🙏 يعيشك أستاذ حيّــان دغرير، لِكرم حضورك وملاحظاتك القيّمة. شهادتك في حق لَوْلاد فرحِتْنا ونعتزّو بيها .
🙏 شكرا للمجموعة الكل على الالتزام، الحُبّ والشغف اللي عطيتوه ومُوفقين في اللي جاي إن شاء الله.
😺 ضيفة الشرف: 🐾 لِيلِي

نتمناو الرسالة متاع فيديو زهو تكون وصلت بالطريقة اللي حبّيناها : https://www.facebook.com/share/v/1AnPFkbdyG/
ومن خلال عرض الكواليس، حبّيت نقول إلّي الفيديو ما هو إلا النتيجة النهائية لخدمة كبيرة ومسار طويل بدا من شهور، وقعد يفاجئ فينا، مع كل خطوة نخطيوها، بحكايات جديدة ويعلّمنا العمل الجماعي، الصبر والتخطيط مع الارتجال وقت الضرورة والتأقلم أمام المتغيّرات.

📷 🖊 نهى العذاري

28/08/2025

من وراء الكواليس - الجزء الثاني

من الفكرة إلى السيناريو

بعد ما فهمنا فكرة المبادرة وحيثيّاتها، الشبان قدّمو مقترح للسكريبت و صارت مناقشة عليه في لقاء جديد عملناه - في دار الثقافة بحمّام ســوسة - بمساعدة الأستاذ حيّان دغرير، مشكور اللي لبّى دعوة الاتحاد التونسي للتضامن الاجتماعي فرع حمام سوسة، كأحد الجمعيات اللي خدمت على مشروع "زهو".

الحاجة الباهية إنو مبادرات كيما هاذي تعطي فرصة للشباب باش يندمج في الشأن العام، يفهم أكثر ويولّي يلقى حلول مبتكرة مجتمعيّا وفي نفس الوقت يقوّي قدراتو في الهواية اللي يحبّها. ولهنا نفهمو قدّاش مهم إنّو الهياكل المعنيّة تعاون و تفتح الباب للصغار باش يتعلّمو و يساهمو.

📷 🖊 نهى العذاري

28/08/2025

من وراء الكواليس - الجزء الأوّل

كيفاش جات فكرة فيديو زهو؟

الفكرة جات كنتيجة لمسار طويل، بدا من صيف 2023، مع الورشات التكوينية _ حول إدارة مشاريع الاقتصاد الاجتماعي التضامني _ اللي كانت تجمع بين النظري و التطبيقي.
الطريقة هاذي خلات الجمعيات المشاركة، من بعد ما اختارت تخدم مع النساء البرباشة في سهلول، هبطت للشّـــارع و عملت الـمطلوب منها في الدّورة، فتعرفت على الفئة المستفيدة والحكاية تطورت، الشيء اللي خلّاها تتحوّل لمبادرة باهية و ديناميكية حلوّة برشة.
حبّينا نزيدو نثمنوها و نبنيو عليها باش نخرّجو أكثر نتايج و أكثر تأثير ...
و في الإطار هذا عملنا أوّل لقاء، وتلمّينا بشباب نادي راديو وتلفزة واب "علّــي صوتك" بالمركّب الشبابي بسوســـة
وقتها كل واحد شارك في عاصفة الأفكار والفكرة ولّات واضحة على المهمّة و الهدف متاع الفيديو التحسيسي.

📷 🖊 نهى العذاري

18/08/2025

مبادرة "زهو" قامت بها مجموعة من الجمعيّات والشباب المشاركين في المشروع وتُوّجت بفيديو قصير يحمل نفس العنوان وباارشا محبّة والتزام وأمل.. الهدف منّو تثمين الخدمة اللي سهرت عليها الجمعيّات وإيصال رسالة تســـاعد الفئة اللي اختارتها وترفع وعي المواطن (نشاركوكم قريـــبا بالفيديو وأكثر تفاصيل 🔥 )

30/07/2025

عدد كبير من الشباب، الطلبة، والحرفيين مازالوا ما يعرفوش بوجود
مركز التكوين في الحرف الفنية بنابل CFMA Nabeul (المعروف سابقاً باسم المركز القطاعي للتكوين في فنون اللهب)، واللي يوفّر دورات تكوين في اختصاصات متعددة، كيف ما يوضّح الأستاذ سفيان بن عمر في الفيديو.
المركز يرجع يفتح أبوابه بداية من سبتمبر هذا، لفائدة كل من يحب يطوّر مهاراته في اختصاصي البلّور والخزف، خاصة بالنسبة للمتخرجين من المعاهد العليا للفنون الجميلة،
من خلال دورات مكثّفة تدوم 6 أشهر فقط في بلاصة عامين.
للمهتمين، هاو رابط التسجيل وأكثر معلومات :
http://www.atfp.tn/

Beaucoup de jeunes, d’étudiants et d’artisans ne savent pas encore qu’il y a le centre de formation aux metiers artistiques (anciennement connu sous le nom du Centre sectoriel de formation aux Arts du feu), qui propose des formations dans plusieurs spécialités, comme l’explique M. Sofien BEN AMOR dans la vidéo.
Le centre rouvrira ses portes à partir de ce mois de septembre, au profit de celles et ceux qui souhaitent renforcer leurs compétences dans les spécialités Céramique et Verre, grâce à des cours accélérés de 6 mois au lieu de 2 ans.
Pour en savoir plus et s’inscrire, voici le lien : http://www.atfp.tn/

19/07/2025

👁️‍🗨️ Foire Internationale de Sousse
📍 طين أم هاشم

14/06/2025

إنّا لله وإنّا إليه راجعون

C'est avec la plus profonde tristesse que nous avons appris le décès de Mohamed El Hedi, fils de Malika SAIDANE et Zouhaier SAIDANE, un adhérent du GDA El Amal et de l’atelier de poterie : Argile Om Hashem.

محمد الهادي شارك معانا في المرحلة الثانية من المشروع منذ بدايتها وكان حاضر في الدورات التكوينية اللي قمنا بيها، وعاون أمه وكامل المجموعة اللي معاها بكل حب وحرص على إطلاق وتطوير ورشة "أم هاشم"

حضوره كان خفيف ويمكن ما يتحسّش، لكن فعّال في نفس الوقت
وبلطفه، وبرغبته الدائمة في المساعدة نجّــم يؤثّــر فينا الكل

موته خسارة كبيرة لينا، لكن خلّالنا باارشا حكايات ومواقف ما تتنساش، ابتسامته شتقعد محفورة في ذاكرتنا ومساهمته شتقعد حية في قلوبنا،
كل قطعة بش تنتجها أنامل ورشة "أم هاشم" من اليوم شتفكّرنا بيه
وشتخلّينا نقعدو نترحمو عليه

هو تو في دار الحق، إن شاء الله ربّـــي يرحمه ويجعل مثواه الجنّــة
وتعازينا الحـــارّة لأمّه وبـــوه وخــوه عبد الكريم ولكافّة عايلته -دار سعيدان- وإن شاء الله ربّـــي يلهمهم جميل الصبر والسلوان

12/06/2025

حفل اختتام السنة التربوية
اليوم، الجمعة على الساعة 16.00
مع عرض وبيع منتوجات الأطفال
بمدرسة المهن للمعاق بمساكن
انضموا لمشاركتهم الاحتفال ⚘️

حضوركم يشرفنا 🥰 كونوا في الموعد