26/08/2018
معلومات مهمة عن مرض الكوليرا . هو واحد من الامراض اللي نطلقو عليها "امراض الايادي المتسخة" maladie des mains sales .
هو مرض جرثومي، معدي جدا ، strictement humain ما يمرضوش بيه القطط و الكلاب ..
بكتيريا الكوليرا وين تعيش ؟
في 3 بلايص :
-في الماء
-في بعض الاسماك و القشريات البحرية (crevette ، écrevisse ، escargot )
-و بالطبع في جسم الانسان : في الجهاز الهضمي و الفضلات البشرية ، في العرق و بعض الافرازات الاخرى .
من هنا نستنتجو طرق العدوى :
- استعمال ماء ملوث بالفضلات البشرية، في الشرب او الطبخ او الدوش...
الماء الملوث يكثر مثلا بعد الفيضانات مع مشاكل البنية التحتية و عجز التطهير الصحي .
- العدوى المباشرة من انسان حامل للجرثومة الى انسان آخر ( مثلا عن طريق المصافحة بيدين متسختين )
-استهلاك fruits de mer ملوثة او خضر مسقية بماء ملوث ...
اذا شاءت الظروف و صارت العدوى ، بكتيريا الكوليرا تمر من المعدة للامعاء و غادي تفرز مادة سمّيّة toxine cholérique و هذي مسؤولة على اعراض الكوليرا الرئيسية :
خاصة خاصة الاسهال الشديد (جريان الجوف).
الوجايع و التقلصات المعوية، التقيؤ...
الاعراض تنجم ما تظهرش اصلا رغم وجود عدوى (و هذي حاجة خطيرة)
و تنجم تظهر فقط بعد ساعات من العدوى .
الكوليرا في نوعها الحاد forme grave ممكن تخلي الانسان يدخل للتوالات من 10 الى 50 مرة في اليوم ! و يضيع كميات كبيرة برشا من سوائل الجسم (من 3 الى 15 لتر ! ) والاملاح . هذا يعني جفاف الجسم .
و من هنا تجي خطورة المرض هذا اللي توصل للموت اذا ما صارش العلاج في اسرع وقت ، و الخطورة تتضاعف اذا كان المريض ضعيف المناعة او يعاني من نقص التغذية.
بعد ما فهمنا ماهية المرض و طرق انتقاله ، نتعدى بيكم لأهم نقطة :اللي هي الوقاية .
الوقاية تصير بطرق بسيطة تخلينا نتفادى العدوى :
-نكثرو من غسيل اليدين،للكبار و الصغار ! ماء و صابون يكفي.
- نتأكدو من مصادر التزود بالماء و نتجنبو ماء البير و مياه السدود و البحيرات و العيون ..خاصة مع الفيضانات الاخيرة و اخبار انتشار الوباء.
- الجافال : مادة سحرية رخيصة و ناجعة و لازم تكون ديما موجودة في الدار: استعملوها في تنظيف التوالات و اللافابو وتعقيم الماء و تنظيف الخضرة ..
-الحوتة ولا كعبة الcrevette نطيبوها بالباهي.
-التلقيح vaccin anti-cholérique : Shanchol® متوفر في تونس على حد علمي.
- التوعية و التحسيس. وهذا دور الصفحة متعنا من سنوات، اللي يعرف معلومة تكون موثوقة و من مصدر مطلع ، يحاول ينشرها مع لصحاب و الجيران، في القهوة و الخدمة... تحب تعرف معلومة ولا نصيحة اكتب كومنتار والا ابعثلنا ميساج 😇 .
و كي تحس بأي اعراض مقلقة امشي مباشرة لطبيبك او لاقرب مستشفى.
و ان شاء الله تونس ديما لاباس 😊
انشروها للمحافظة على تونس
