08/06/2026
حركة جمهورية قرطاج ضد العنصرية المتلحفة وراء الوطنية والدفاع عن الوطن. فمة برشة صفحات ومجموعات وشخصيات مأثرة، تاثروا بفكر كريم مختار، مؤسس حركة جمهورية قرطاج والاب الروحي لقيام قرطاج الجديدة، ولكن للأسف خذاوا منو وشوهوه ونسبوه لصفحاتهم ومجموعاتهم العنصرية والحاثة على العنف والهمجية بدلا عن التحرك بالقانون والتحضر. صفحات تصور في شخصيات قرطاجية كيما حنبعل وغيرو ولكن تشوه فيهم من منظورهم البربري المتعطش للجريمة. حركة جمهورية قرطاج تجرم مثل هذه التصرفات وتعتبرها تشويه لتاريخ قرطاج. حركة جمهورية قرطاج واضحة وصريحة من يوم انبعاثها للوجود: نحن نناضل من اجل سيادة جمهورية وبناء دولة قوية وكذلك ضد العنصرية وضد الهمجية والبربرية. سيادة الدولة معناها قانون عقلاني، موش نزوات عاطفية، وتحركات فكرية عقلانية، وسياسة جمهورية مبنية على التحضر والنقاش والتعددية، موش على فرض الراي الواحد والفكر القبلي والعشائري المقيت المتخبي وراء وطنيات مزيفة. الي يحب يخدم البلاد ويدافع عليها ماعليه كان يطور روحو ويخدم فعليا ويبني فعليا، موش فقط يشتم ويهدد ويفبرك الفيديوات والصور بالذكاء الاصطناعي ويخرج للشارع لشتم وتعنيف الناس. الي يحب يخدم بلادو ينجم يتجه بالحوار لموظفي الدولة باش يتحركوا قانونيا وبشكل متحضر للتعامل مع ازمة الهجرة الغير شرعية ويرحل المهاجرين الغير شرعيين سواء الي جاونا من الصحراء الافريقية ولا من الشرق ولا من الغرب الكل على حد السواء. ترحيل المهاجرين غير الشرعيين دور الدولة موش دور كل من هب ودب كيما زادة دور موظفي الدولة باش يقوويوا الحدود ويحرروا الاقتصاد ويخلقوا الثروات والتكنولوجيات العصرية اللازمة باش انجموا نحميوا حدودنا. جمهورية قرطاج القوية الي نحلموا بيها ماهاش مرتع متع قبائل همجية يسعاوا لفرض قانون الغاب وضرب هوية وصورة الحضارة القرطاجية تلبية لامراضهم النفسية.
