28/04/2026
Fakamanatu ‘a e ‘Aho Fakamamani Lahi ki he Koloa Fakaʻatamai (Intellectual Property)
24 ‘Epeleli; ‘I hokosia ko ia ‘o e ‘aho fakamamani lahi ‘o e Koloa Faka’atamai (Intellectual Property) ‘i he Sāpate 26 ‘Epeleli 2026, na’e fakamanatu ai ‘e he Potungāué ʻi he Falaite kuoʻosí ʻaho 24 ʻEpeleli, ʻaki ha ako fakataukei ma’ae ngaahi kupu felāve’i fekau’aki mo e kaveinga ‘o e ta’u nί “IP and Sports: Ready, Set, Innovate”. Na’e kau mai ki ai ‘a e ngaahi ‘api ako, ngaahi pisinisi mo e ngaahi kulupu sipoti. Na’e fakatefito ‘a e akó ‘i hono fakatupulekina ‘enau ‘ilo fekau’aki mo hono ngāue’aki ‘o e koloa faka’atamai (IP)- Maaka Fefakatau’aki, Hiki Tatau, mo e Tisaini Ngāue’anga ke hoko e sipoti ko e koloa, pea mo e founga hono malu’i fakalao e koloa ko iá ke ne fakatafe mai ha pa’anga.
Ne lava ke ‘ohake ha ngaahi a’usia kehekehe ke fai e feakoʻaki ai pea hā ai e mahuʻinga fau ʻo e maluʻi fakalao ʻo e ngaahi koloa fakaʻatamaí ‘o ʻikai ngata pē ʻi he sipotí ka ko ha faʻahinga sekitoa pē ʻi he pisinisí.
