26/03/2018
Katoanga Fakamanatu e 30 Ta’u ‘o e Senita Fakafonua mo e Uike Angafakafonua mo e Talatukufakaholo: ‘Aho 30 ‘Epeleli – 4 Me.
“KAFATAHA PEA HAUKAFA”
Hou’eiki mo e kainga, kuo kotofa ‘a e ‘uluaki uike ‘o Me, ko e “Uike Angafakafonua mo e Talatukufakaholo ‘o Tonga” pea ko hono fuofua katoanga’i, ‘e fai ia he ta’u ni fakataha mo hono fakamanatu e ta’u tolungofulu ‘o e Senita kihe Angafakafonua, ‘i Tofoa.
‘E fakaava e uike mahu’inga ni he Monite 30 ‘o ‘Epeleli, ‘o tapuni kihe ‘aho Falaite 4 ‘o Me.
Koe anga leva eni e tu’u ‘a e polokalama.
Monite 30 ‘Epeleli – Sivi Hiva To’utupu moe Ngaahi Kalapu Kava Tonga
Kulupu ‘e 2:
i) Ko e hiva ko ha maa’imoa pea to e tau’olunga’i.
ii) Hiva fa’u fo’ou ke felave’i mo e – mahu’inga ke kei fakatolonga mo pukepuke hotau anga fakafonua mo e talatukufakaholo, pea mo e fakamanatu ta’u 30 ‘o e Senita Fakafonua.
(Lesisita ‘oku ta’etotongi ka ‘oku ‘I ai e pale ki he ‘uluaki, ua moe tolu he kulupu takitaha)
Tusite 1 Me – Fe’auhi Faiva
i) Lakalaka
ii) Me’etu’upaki
iii) Fa’ahiula
(Lesisita ‘oku ta’etotongi ka ‘oku ‘I ai e pale kihe ‘uluaki, ua moe tolu he faiva takitaha)
Pulelulu 2 Me – Ngaahi Ouau mo hono faka’ali’ali
i) Fakalelea Mali
ii) Tu’uvala/ Ouau ‘o e kava mali
iii) Fakatu’uta Ngaue
(Fakaafe’i atu kiai e taha kotoa, kae tautefito kihe fanau ako)
Tu’apulelulu 3 Me - Talanga ki he Talatukufakaholo
1. Tala-tukufakaholo Ngaahi ‘Afio’anga ‘o e Ha’a Tu’i
i) Va’epopua
ii) Heketa
iii) Toloa (Angaha)
iv) Kolongahau ( Mu’a)
v) ‘Ahau (Kanokupolu)
vi) Nuku’alofa
(Fakaafe’i atu ki ai e taha kotoa, ka e tautefito kihe fanau ako)
2. Ngaahi ‘ilo mo e taukei tukufakaholo. Faka’ali’ali e ngaahi ‘ilo mo e taukei tukufakaholo
i) Toutai
ii) Ngoue
iii) Me’akai fakatonga/ fakatolonga
iv) Fo’uvaka
v) Fekau’aki mo natula
(Fakaafe’i atu kiai e taha kotoa, kae tautefito ki he fanau ako)
Falaite 4 Me: Polokalama Makehe ki hono tatala e maka fakamanatu ta’u 30 ‘oe Senita Fakafonua.
‘Oku fakaafe’i atu heni e ngaahi kulupu to’utupu, kalapu kava Tonga, ngaahi ako’anga pea mo e Tonga kotoa kemou kau mai ketau ma’alali he uike fakakoloa ni, ke fakamahino ‘oku kei Tonga pe ‘a Tonga pea ‘oku tau polepole’aki hotau angafakafonua.
Koe lesisita ‘oku ‘ata he taimi ni ‘o ngata ki he 4:30pm, Falaite 20 ‘o ‘Epeleli.
‘E lele pe foki mo ha ngaahi polokalama kehe he uike kakato, ke ke me’a mai kiai mo e famili, maheni mo e kaungaako. Ke tau KAFATAHA PEA HAUKAFA.
Ki ha toe faka’eke’eke mo e fakaikiiki, fetu’utaki mai ki he
‘Ofisi ‘o e Va’a Angafakafonua moe Talatukufakaholo ‘I he ‘Ofisi ‘o e Takimamata
Fa’onelua, Hala Vuna
Telefoni – 25334
Malo ‘Aupito.
