24/06/2021
صمدین آدی لاپ اوشاق واقتلاریندان قولاغیما تانیشدی یادیما گلدیینه گوره صمد عمینین آدینی آراز آراز اوخوماغیندان ائشیتمیشم قارا داغین آراز قیراغیندا بویودویوم اوچون بو اوخوماغی ائله کورپه اوشاقلارین بیلمسی طبیعی گلر اورانین اهالیسینه.
صمد عمینین آدینی ماهنیدان باشقا ایلک دفعه آتامدان ائشیتمیشم .آتام ۱۳۲۶دوغومو اولدوغو اوچون او زامانلاردا نه اولدوغو اولایلاری چوخ گوزلجهسینه یادینا گلیر.
آتامین یازیب اوخوما ساوادی دا اولماسا هر آن صمدین آدین ائشیدنده یا ائویمیزده اونا گوره بیر کیتاب اوخویوب سوز آچاندا صمده گوره گوز یاشلاری قارا بولودلاردان لیسان یاخیش ساللانیب دئیه سولانار. بیلدیرمهمکایستسهده قهرلهنر و دال با دال نئچه سیغار یاندیرار آما هئچ زامان آتامین گوز یاشینی گورمهدیییم کیمی هئچ اوندادا گورمهرم هئچ ایستمیرمده هئچ زامان گوز یاشینی گورم.
آتام اونون اولوموندن دفعهلرجه یولداشلارینا دانیشاندا ائشیتمیشم و هامیسیندا ائله بیر جزئیاتلا دییر کی ائله بیل کیتاب اوستوندن اوخویور دانیشدیقلارینی.صمدین هاردا بوغدوردوقلارینی، صمدین جنازهسین آراز چایینین قوزی طرفیندن گتیریلمهسینی هابئله باشقا احوالاتلارینی هر سئری دانیشاندا دییر.
ائله او زامانلاردان صمد آدلا اویرتمن آراز چایینین حسرتی قدر بینیمده سوال یارانمیشدی. او کیمیدی؟ نییه اولوب؟ نییه اولدوروبلر؟ ائله بولاری دوشونه _دوشونه اوخولا گئدیردیم آنجاق سککیزی(دوم راهنمایینی)اوخودوغومدا سایقیلی حورمتلی بیر اویرتمنیمیز اولدو اونوندا ایلک تدریس ایلییدی اویرتمنیمیز گرچکدن اورک یاندیرانییدی اویرنجیلره اونونلا اونودولماز خاطیرهلر یاشامیشام آنجاق صمد عمینین دوغوم گونودو دئیه ایستییرم بیرین اوخوجولارلا پایلاشام .
هلهده دقیق یادیمدادی او گون اویرتمنیم له اوخولو بیتیردیکدن سونرا اویرتمنیمین قالدیغی ائوه گئتدیک اویرتمنیم قوپوز چالاردی ائله اوزامانلاردان دا اونجه من ده اوز عقلیمه گوره قلم اله آلیب هردن شئعیر یازاردیم آما اینسانلارلا چوخ تئز قیزیشماییرام دئیه اویرتمنیم بئله بیلمهییردی .
اویرتمنیم بیر نئچه ساعات قوپوز چالیب ائیلندیک سونرا چورک یئدیک. او گون بیرینجی کیتاب هدیهسینی حورمتلی اویرتمنیمدن آلدیم.اویرتمنیم نی هدیه وئردی اونودولماز موتلولوق ایچینده حیس ائتدیم اوزومو. اسفند آیینین سونلاریدی و بیز بایرام تعطیلاتینا گئدیردیک هلهده یادیمدا او ایل بایرام تعطیلاتیندا مجموعه داستانلارینی اوخودوم و صمدی داها تانیدیم سونرالار صمددن #تلخون و اونا گوره یازیلمیش باشقا ایکی کیتاب دا اوخودوم آنجاق ایندی اوخودوغدم قدر بیلیرم صمددن هئچ نه بیلمیرم صمدین اولماق یئتر...
آنجاق بو گون صمد عمینین مزارینی زیارت ائتدییمده شخصی لباسدا هاراسا باغلی اولانلارین زیارت ائدنلردن شکیل و فیلم گوتوردوکلری منی هئچده شاشیرمادی نییه کی اونلار پاییزدا مهندس غلامرضا امانینین مزاری اوسته بو گون یایدا صمد عمینین مزاری اوسته و صاباحلاردا باشقا یئرلرده اولاجاقلار...
منه ائله گلیر کی صمد عمی زامانیندا ساپی بیزدن اولدوغو بالتالاری دوشونوب سوزون دئییب "هر آن کی قوخماق اولماز یولا دوشدوکده قورخوموز توکولهجک"
دوغوم گونون قوتلو اولسون.
"نیگران قالماسین اولدوزا دئیین
کونلومه یازمیشام صمدین یولون"
نجف نعمتی
