TAMISEMI

30/10/2026

RAIS SAMIA KUZINDUA MJI WA SERIKALI MTUMBA, PROF. SHEMDOE AWAALIKA WANANCHI KUSHUHUDIA HISTORIA IKIANDIKWA

Na: OWM–TAMISEMI, Dodoma

Waziri wa Nchi, Ofisi ya Waziri Mkuu – Tawala za Mikoa na Serikali za Mitaa (OWM–TAMISEMI), Mhe. Prof. Riziki Shemdoe, amewaalika wananchi wa Jiji la Dodoma kujitokeza kwa wingi kesho, Oktoba 30, 2026, kushuhudia uzinduzi wa kihistoria wa majengo ya ofisi za Wizara na Taasisi za Serikali pamoja na barabara za lami katika Mji wa Serikali Mtumba, utakaofanywa na Rais wa Jamhuri ya Muungano wa Tanzania, Mhe. Dkt. Samia Suluhu Hassan.

Prof. Shemdoe alitoa mwaliko huo Oktoba 28, 2026, akiwa katika Viwanja vya Bunge la Jamhuri ya Muungano wa Tanzania jijini Dodoma.

“Tarehe 30 Oktoba, 2026, Mhe. Rais Dkt. Samia Suluhu Hassan atazindua Mji wa Serikali Mtumba jijini Dodoma. Sisi OWM–TAMISEMI ni miongoni mwa wanufaika wa uzinduzi huo, kwani tumejenga jengo kubwa la kisasa litakalowachukua watumishi wengi, ambao watatoa huduma kwa wananchi na wadau wengine katika eneo moja,” ameeleza Prof. Shemdoe.

Prof. Shemdoe alisema kuwa, kabla ya jengo hilo kujengwa, watumishi walikuwa wakihudumia wananchi katika majengo tofauti; baadhi wakiwa Mtumba, wengine katika Jengo la Sokoine mjini na wengine Chuo Kikuu cha Dodoma (UDOM). Hata hivyo, amesema kukamilika kwa jengo hilo kumepunguza changamoto hiyo na kurahisisha utoaji wa huduma kwa wananchi kwa kuwa watumishi sasa wanafanya kazi katika jengo moja

30/10/2026

30/10/2026

VAZI RASMI, NISHATI SAFI, VIZIMBA BORA, KUBORESHA HUDUMA ZA MAMA LISHE NA BABA LISHE

Na: OWM–TAMISEMI, Dodoma

Mwenyekiti wa Umoja wa Mama na Baba Lishe Tanzania (UMALITA), Bi. Havijawa Omary, amesema kupitia Ofisi ya Waziri Mkuu – TAMISEMI, wamepokea na kutekeleza maelekezo ya Mhe. Rais Dkt. Samia Suluhu Hassan ya kuwa na vazi rasmi litakalowatambulisha mama lishe na baba lishe nchini, ambalo kwa sasa liko katika hatua za mwisho za kukamilishwa na litazinduliwa hivi karibuni.

Bi. Havijawa amesema hayo leo, Oktoba 29, 2026, wakati mama lishe na baba lishe hao walipotembelea jengo jipya la Ofisi ya Waziri Mkuu – TAMISEMI lililopo katika Mji wa Serikali, kwa lengo la kupata uelewa wa huduma zinazotolewa na Serikali kupitia Ofisi hiyo.

“Tunaomba mabwana afya na mabibi afya wote nchini watusaidie kusimamia mama lishe na baba lishe kuvaa vazi hilo rasmi na kuwachukulia hatua watakaoshindwa kulivaa, kwani litakuwa ni utambulisho wetu kwa wananchi tunapowahudumia,” amesema Bi. Havijawa.

Aidha, Bi. Havijawa ameiomba Ofisi ya Waziri Mkuu – TAMISEMI kuhakikisha mama lishe na baba lishe wanapewa maeneo ya biashara, pamoja na vizimba vikubwa vitakavyowawezesha kupika kwa kutumia nishati safi na kutekeleza kaulimbiu yao isemayo, “Vaa kishua, pika kishua; kuwa mama na baba lishe wa kishua,” kwa kupikia nishati safi.

Kwa upande wake, Mkurugenzi Msaidizi wa Serikali za Mitaa wa OWM–TAMISEMI, Bw. Stephen Motambi, amesema amepokea ombi la mama lishe na baba lishe hao la kupatiwa maeneo na vizimba vya kufanyia shughuli zao, na kwamba litafanyiwa kazi na wahandisi, maafisa biashara na wataalamu wa sayansi ya chakula na lishe, kwa kuzingatia matumizi ya teknolojia ya nishati safi.

Sanjari na hilo, Bw. Motambi amesema Serikali inatambua kuwa baadhi ya mama lishe wana watoto wadogo, hivyo katika miundombinu ya masoko inayoendelea kujengwa, itahakikisha kunakuwa na vituo vya malezi ya watoto wadogo ili mama lishe waweze kuwaacha watoto katika vituo hivyo na kuendelea na shughuli zao.

Bw. Motambi ameongeza kuwa OWM–TAMISEMI itaendelea kushirikiana na maafisa afya wenye jukumu la kuwasimamia mama lishe na baba lishe, huku akiwataka kuwasilisha Ofisini hapo changamoto zote zinazowakabili katika utekelezaji wa majukumu yao ya kila siku.

Naye, Mkuu wa Kitengo cha Mawasiliano Serikalini wa OWM–TAMISEMI, Bi. Roida Andusamile, amesema amefurahishwa na ziara ya mama lishe na baba lishe hao na kuwataka kuendelea kutembelea Ofisi hiyo kwa ajili ya kujifunza na kutumia fursa zinazopatikana.

27/10/2026

Bungeni Leo Oktoba 27,2026

27/10/2026

Matukio ya wiki ya Ofisi ya Waziri Mkuu Tawala za Mikoa na Serikali za mitaa (OWM-TAMISEMI

24/10/2026

PROF. SHEMDOE AINGILIA KATI KUTATUA MGOGORO, MADEREVA BAJAJI MBEYA KUREJEA KAZINI

Na: OWM–TAMISEMI, Mbeya

Waziri wa Nchi, Ofisi ya Waziri Mkuu – Tawala za Mikoa na Serikali za Mitaa (OWM–TAMISEMI), Mhe. Prof. Riziki Shemdoe, ameelekeza kuundwa kwa timu itakayozunguka Jiji la Mbeya kufanya tathmini ya maeneo watakayotumia madereva wa bajaji, njia watakazotumia, njia za daladala pamoja na kupendekeza njia za usafiri zitakazowawezesha abiria kufika katika eneo la uwanja wa ndege wa zamani, ambako soko la wamachinga litajengwa.

Prof. Shemdoe amesema uundaji wa timu hiyo ni hatua ya kutatua mgogoro baina ya madereva wa bajaji na daladala uliopelekea kuibuka kwa mgomo wa madereva hao na kusababisha kusimama kwa huduma za usafiri jijini Mbeya, na kuongeza kuwa mgomo huo ulitokana na uongozi wa mkoa kutowashirikisha kikamilifu madereva wa bajaji katika kutekeleza maelekezo ya Mhe. Rais Dkt. Samia Suluhu Hassan ya kuboresha usalama wa madereva hao.

Prof. Shemdoe ametoa maelekezo hayo leo, Oktoba 22, 2026, jijini Mbeya kwa Mkuu wa Mkoa wa Mbeya, Mhe. Jumanne Sagini, ya kuunda timu hiyo baada ya kufanya kikao na makundi husika. Amemtaka timu hiyo iwe na wawakilishi kutoka Ofisi ya Mkuu wa Mkoa, LATRA, Halmashauri ya Jiji, wamachinga, madereva wa bodaboda, bajaji na daladala, na kuwasilisha taarifa ndani ya siku 14 ili kuwezesha kutatuliwa kwa changamoto iliyojitokeza jijini Mbeya.

“Timu hiyo, Mheshimiwa Mkuu wa Mkoa, uiandalie hadidu za rejea, lakini miongoni mwa kazi zinazotakiwa kufanywa ni kuzunguka mji wote wa Mbeya ili kuangalia bajaji zitakaa wapi, daladala zitapita wapi, pamoja na kuandaa njia za usafiri za kuja hapa katika eneo ambalo soko la wamachinga litajengwa,” amesisitiza Prof. Shemdoe.

Kutokana na hatua hiyo, Prof. Shemdoe na wawakilishi wa madereva wa bajaji wamekubaliana kuwa madereva hao warejee kazini na kuwa tayari kwa utaratibu utakaowekwa na Serikali ili waendelee kutoa huduma za usafiri na usafirishaji kwa wananchi wa Jiji la Mbeya.

Kwa upande wake, Mwakilishi wa Madereva wa Bajaji, Bw. Damas Mwakalinga, amemshukuru Prof. Shemdoe kwa kusikiliza hoja zao na kusema kuwa wako tayari kushirikiana na Serikali ili kumuunga mkono Mhe. Rais Dkt. Samia Suluhu Hassan katika kuhakikisha Mkoa wa Mbeya unakuwa salama na unaendelea kudumisha amani.

23/10/2026

WAKURUGENZI WAPYA WAAPA KUWATUMIKIA WANANCHI KWA UADILIFU

Na OWM-TAMISEMI,Dodoma;

Zoezi la kufunga mafunzo kwa Wakurugenzi wapya wa Halmashauri, lililoambatana na kuapa kwao kutumikia wananchi katika Halmashauri zao, limefungwa rasmi leo katika Ukumbi wa Ofisi ya Waziri Mkuu – Tawala za Mikoa na Serikali za Mitaa (OWM-TAMISEMI) Jijini Dodoma.

Akizungumza kwa niaba ya Mkurugenzi wa Idara ya Serikali za Mitaa Mkurugenzi Msaidizi Seksheni ya Fedha, Idara ya Serikali za Mitaa, Bw. Ramadhani Madeleka, ametoa rai kwa Wakurugenzi wote wapya kuwahudumia wananchi kwa moyo mmoja na kutekeleza majukumu yao kwa ufanisi.

Amesema "mafunzo hayo ni chachu kwa Wakurugenzi wapya kuongeza ari, kujituma na kuwajibika katika kusimamia utekelezaji wa majukumu yao, huku wakizingatia maslahi ya wananchi na vipaumbele vya maendeleo katika Halmashauri zao".

Aidha, akizungumza kwa niaba ya Wakurugenzi wote Mkurugenzi wa Halmashauri ya Wilaya ya Njombe Bw. William Mathew Makufwe ameishukuru Ofisi ya Waziri Mkuu - TAMISEMI kwa mafunzo hayo k**a chachu kwao kufanya kazi kwa kujituma kuimarisha maendeleo ya wananchi wetu.

Mafunzo hayo yanatarajiwa kuwa msingi muhimu katika kutekeleza majukumu yao kwa weledi na uwajibikaji, zoezi hili liliambatana na zoezi la kiapo chao cha kuwatumikia wananchi na kuchangia ustawi wa jamii katika Halmashauri zao.

22/10/2026

WAKURUGENZI WAPYA WATAKIWA KUSIMAMIA MAPATO ILI HALMASHAURI ZIJITEGEMEE KIBAJETI

Na OWM - TAMISEMI, Dodoma

Katibu Mkuu Ofisi ya Waziri Mkuu – TAMISEMI Bw. Adolf Ndunguru amewataka Wakurugenzi wapya wa Halmashahuri, kuimarisha ukusanyaji wa mapato ya ndani na kubuni vyanzo vipya vya mapato ili Mamlaka hizo zijitegemee kiuchumi.

Bw. Ndunguru ametoa rai Oktoba 21, 2026 Jijini Dodoma, wakati akifungua mafunzo kwa Wakurugenzi hao wapya 16 walioteuliwa hivi karibuni na Mhe. Rais wa Jamhuri ya Muungano wa Tanzania Dkt. Samia Suluhu Hassan.

Bw. Ndunguru amewataka kushiriki kikamilifu kwenye mafunzo hayo ya siku mbili ili waweze kukabiliana na changamoto za kiutendaji, kutimiza malengo ya Halmashauri, kujifunza majukumu, maadili, kupambana na rushwa, kusimamia miradi, hoja za CAG, mawasiliano ya Serikali, uzoefu wa wenzao, kujitegemea kiuchumi na kuwajibika ipasavyo kazini.

“Ili tuweze kujitegemea kibajeti, tunategemea zaidi uwezo wetu katika ukusanyaji wa mapato ya ndani. Hakikisheni mnasimamia kikamilifu ukusanyaji huo, fedha zote zinafikishwa benki kwa mujibu wa taratibu, na mifumo ya kielektroniki pamoja na mashine za PoS (mashine za kukusanyia mapato) zinatumika katika kila chanzo,” amesisitiza Katibu Mkuu Bw. Ndunguru.

Aidha, amewataka kusimamia nidhamu ya matumizi ya fedha za umma, kuhakikisha fedha za mapato ya ndani zilizotengwa kwa ajili ya miradi zinatumika kwenye miradi hiyo, na kuchukua hatua stahiki kuhusu mapendekezo ya CAG. Amewataka pia Wakurugenzi, Wakuu wa Idara na watumishi kuandaa mipango kazi, kuwajibika kwa wananchi, kutatua kero zao hadi mwisho, na kujenga mahusiano mazuri ya kikazi na Waheshimiwa Madiwani.

Bw. Ndunguru amehitimisha kwa kuwataka Wakurugenzi hao kuboresha mazingira ya kazi ya watumishi na kuepuka kuzalisha madeni yasiyo ya lazima. Amesema anatarajia mafunzo hayo yatawajengea umahiri, uwajibikaji na kujiamini katika kusimamia mipango ya Halmashauri zao, kwa manufaa ya wananchi na utoaji bora wa huduma.

Naye Bw. Charles Mwaitege, Mkurugenzi Mtendaji Halmashauri ya Wilaya ya Mtama mkoani Lindi amesema kupitia mafunzo hayo yanawaandaa ili kujua ni jinsi gani wanaweza kukusanya na kutunza mapato kwa kuzuia mianya ya upotevu wa mapato na kushirikiana na watumishi kuunda timu za ufuatiliaji za Serikali kwa kutumia mifumo ya POS ili kudhibiti matumizi mabaya ya fedha za mapato ya Serikali.

Mafunzo kwa Wakurugenzi wapya wa Halmashauri yanafanyika chini ya Ofisi ya Waziri Mkuu – TAMISEMI, lengo likiwa ni kuwajengea uwezo wa kusimamia Halmashauri zao kwa kuzingatia sheria, kanuni, taratibu na miongozo ya Serikali.

21/10/2026

ELIMU, MALEZI BORA NI SILAHA YA KUTOKOMEZA NDOA ZA UTOTONI – DKT. DUGANGE

OWM-TAMISEMI,Tanga

Naibu Waziri, Ofisi ya Waziri Mkuu – Tawala za Mikoa na Serikali za Mitaa (OWM-TAMISEMI), Dkt. Festo Dugange, amesisitiza umuhimu wa kuwekeza katika elimu, malezi bora na ulinzi wa mtoto wa k**e ili kutokomeza ndoa za utotoni nchini.

Amesema mtoto wa k**e anapaswa kupewa fursa ya kukua, kupata elimu na kujiandaa kikamilifu kabla ya kuingia katika ndoa, akieleza kuwa ndoa za utotoni zina athari kwa afya, elimu na ustawi wa familia.

Akizungumza katika maadhimisho ya Siku ya Kimataifa ya Mtoto wa K**e yaliyofanyika Oktoba 20, 2026 Wilaya ya Muheza, Mkoani Tanga, yenye kaulimbiu “Tokomeza Ndoa za Utotoni, Wekeza katika Haki za Wasichana,” Dkt. Dugange amesema ujauzito katika umri mdogo huongeza hatari za kiafya kwa mtoto wa k**e na mtoto anayezaliwa, huku ukosefu wa elimu na fursa za kiuchumi ukisababisha umaskini katika familia.

Aidha, Dkt. Dugange amesisitiza kuwa juhudi za kumlinda na kumwezesha mtoto wa k**e zinapaswa kwenda sambamba na elimu na malezi kwa mtoto wa kiume. Ameeleza kuwa wazazi na jamii wana jukumu la kuwajenga watoto wa jinsia zote katika misingi ya uwajibikaji, heshima na kupinga ukatili wa kijinsia.

Kwa upande wake, Mkuu wa Mkoa wa Tanga, Mhe. Balozi Dkt. Batilda Burian, amewahimiza vijana kujiamini, kuendeleza vipaji vyao na kushiriki kuleta mabadiliko chanya katika jamii. Ameeleza kuwa Mkoa utaendelea kushirikiana na wadau kuweka mazingira salama kwa vijana, huku akibainisha changamoto za ukatili zinazowakabili watoto wa kiume, ikiwemo ulawiti.

Naye Balozi wa Ireland nchini Tanzania, Mhe. Nicola Brennan, amesisitiza umuhimu wa kuhakikisha watoto wa k**e na wa kiume wanapata haki sawa katika elimu, huduma za afya na fursa za kujenga maisha bora.

Dkt. Dugange pia ametambua nafasi ya Femina Hip kupitia vilabu vya Fema, ambavyo kwa zaidi ya miongo miwili vimekuwa vikitoa fursa kwa vijana kujenga uongozi, kujiamini na kushiriki majadiliano kuhusu changamoto zinazowahusu.

20/10/2026

SERIKALI KUJENGA SOKO LA ‘WAMACHINGA’ KUPUNGUZA MSONGAMANO KARIAKOO

Na: OWM–TAMISEMI, Dar es Salaam

Waziri wa Nchi, Ofisi ya Waziri Mkuu - Tawala za Mikoa na Serikali za Mitaa (OWM–TAMISEMI), Mhe. Prof. Riziki Shemdoe, amesema Serikali imekuja na suluhu ya haraka ya kupunguza msongamano na kutatua kero za muda mrefu katika eneo la biashara la Kariakoo, kwa kuanza ujenzi wa soko jipya la wafanyabiashara wadogo wadogo (wamachinga) katika eneo la Kigogo Sambusa, litakalokamilika ndani ya miezi sita ijayo.

Akizungumza jijini Dar es Salaam, Oktoba 19, 2026, katika kikao cha pamoja na viongozi wa wafanyabiashara wa Kariakoo, Wamachinga na viongozi wa Mkoa wa Dar es Salaam, Prof. Shemdoe amesema hatua hiyo inalenga kutoa ahueni ya haraka kwa wafanyabiashara na kuboresha mazingira ya biashara Kariakoo, wakati Serikali ikiendelea na mipango ya kukamilisha mradi mkubwa wa soko la kudumu unaohusishwa na uendelezaji wa Bonde la Msimbazi.

“Lengo la Serikali ni kupunguza msongamano uliopo Kariakoo. Ujenzi wa tuta katika eneo la Kigogo Sambusa unaanza mara moja na ukikamilika, Halmashauri ya Jiji la Ilala itaanza ujenzi wa soko. Tunataka eneo hili liwe tayari ili Wamachinga waweze kuhamia na kufanya biashara zao kwa amani,” amesisitiza Prof. Shemdoe.

Prof. Shemdoe amesema mradi wa soko hilo utagharamiwa kupitia asilimia tano (5%) ya mapato ya ndani ya Halmashauri ya Jiji la Ilala, hivyo amemshukuru sana Mhe. Rais Dkt. Samia Suluhu Hassan kwa kuridhia sheria ya kuruhusu mapato ya asilimia tano (5%) ya ndani yaliyolindwa yatumike kwa ajili ya uimarishaji wa miundombinu ya biashara ikiwemo ujenzi wa masoko.

Ili kuhakikisha mradi unakamilika kwa wakati, amewaelekeza Katibu Mkuu wa OWM–TAMISEMI, Katibu Tawala wa Mkoa wa Dar es Salaam (RAS) na Mkuu wa Wilaya ya Ilala kusimamia kikamilifu utekelezaji wake, huku akiahidi kurejea eneo hilo baada ya mwezi mmoja kukagua maendeleo ya ujenzi.

Aidha, Prof. Shemdoe amesisitiza kuwa wakati ujenzi wa soko hilo la wamachinga ukiendelea Kigogo Sambusa, suala la kuwapanga wamachinga katika Soko la Kariakoo litaendelea ili kariakoo iweze kupitika, hivyo amemuomba Mwenyekiti wa Wamachinga Soko la Kariakoo kuipa Serikali ushirikiano katika suala hilo.

Kwa upande wake, Mwenyekiti wa wafanyabiashara wa maduka ya Kariakoo, Bw. Severine Mushi, akizungumza kwa niaba ya wafanyabiashara wenzake, amepongeza jitihada za Serikali na kueleza kuwa wafanyabiashara wako tayari kuendelea kulipa kodi na kuchangia pato la Taifa, iwapo mazingira ya biashara yataboreshwa.

Naye, Mwenyekiti wa Wamachinga Soko la Kariakoo, jijini Dar es Salaam, Bw. Steven Lusinde, ameishukuru Serikali inayoongozwa na Mhe. Rais Dkt. Samia Suluhu Hassan kwa kuendelea kuwezesha fursa za mikopo kwa wafanyabiashara wadogo, huku akiiomba Serikali kudhibiti urasimu na vitendo vya ujanja-ujanja katika ugawaji wa maeneo mapya ya biashara.

Kukamilika kwa soko hilo kunatarajiwa kupunguza msongamano Kariakoo, kuboresha mazingira ya biashara, kupunguza migogoro ya mara kwa mara kati ya wamiliki wa maduka na wafanyabiashara wa mtaani, pamoja na kuongeza makusanyo ya kodi kwa Serikali.