Buganda Kingdom, Mengo, Kampala (2026)

03/09/2026

Minisita Joseph Kawuki, alambudde embuga z'e ggombolola Ssaabagabo Kabulasoke ne Ssaabaddu Maddu mu Ssaza Gomba.

Okulambula kuno kuli mu buwufu bw'okulondoola entambuza y'emirimo gy'Abaami ba Kabaka okulaba nga obuweereza bwa Nnyinimu butuuka ku buli muntu ate nga bwa mutindo.

03/09/2026

Mu kaweefube w'okusitula omutindo mu bukulembeze, Minisita Joseph Kawuki asisinkanye olukiiko olukulembeze olw'essaza Gomba n'abalambika ku bwe balina okutambuzaamu emirimo gy'abwe.

Abasabye bannyikize emirimo gyabwe, bazimbe emirandira gy'ebitongole byabwe okugeza olukiiko nga lusimbye emirandira okuviira ddala ku ssaza, obutasigalira mabega mu mirimo gya Kabaka, n'okwettanira tekinologiya.

03/09/2026

Omwami w'Essaza Gomba omuwummuze Jackson Celestino Musisi, yebazizza nnyo Ssaabasajja Kabaka okumulengera okumuweereza mu bwami obumuyambye okufuna emikwano egimukulaakulanyizza.

Okwebaza kuno Oweekitiibwa Musisi akuweeredde mu makaage e Kabulasoke, bw'abadde akyazizza Minisita wa Gavumenti ez’Ebitundu okulambula kwa Kabaka n'ensonga za Buganda ebweru, Oweek Joseph Kawuki, enkya ya leero mu kaweefube gw'aliko ow'okulambula embuga z’amaggombolola ezisabgibwa mu Gomba okwongera okulondoola entambuza y’emirimu gy'Abaami ba Kabaka.

Oweekitiibwa Jackson Celestino Musisi, agambye nti mu myaka 10 gye yamala nga omwami w'Essaza Gomba, yayiga ebintu ebiwerako omuli; obukulembeze, yafuna emikwano, yatandika okulima emmwanyi era kati alina yiika ezisoba mu 30 era ensimbi azifuna, era agamba nti bino byonna teyandibifunye singa Beene teyamulengera awonno musiimu eri omutanda olw'okumuwa omukisa ogwo.

Minisita Joseph Kawuki, asinzidde wano n'ategeeza nti omwami wa Kabaka alina okufuba okulwanirira Nnamulondo nga akuuma eby'obugagga bya Kabaka naddala ettaka, akumaakuma abantu be, era abakubirizza okubeera abawulize eri Maasomoogi.

Minisita Kawuki, yebazizza Oweek Musisi Jackson Celestino olw'okuwa obuwagizi oyo eyamuddira mu bigere n'amuteekateeka era n'amuyambako mu kuweereza, ky'agambye nti kikolwa kirungi era kiraga obumu mu kuweereza Kabaka, bw'atyo n'ategeeza nti kikulu omukulembeze okukola emirimo era n'awummula n'awa abalala omwagaanya okuweereza. Asabye abakulembeze obutalemera mu ntebe.

Oweekitiibwa Jackson Celestino Musisi y'ali Kitunzi okuva mu 2013 okutuuka mu 2024 n'awummula.

03/09/2026

Minisita Kawuki akuutidde abakulembeze abalonde aba Gomba District okukola ebintu ebirimu ensa ne mu kiseera ky'okunoonya akalulu nga kituuse bakanoonye mu mirembe baleme kukuba bantu miggo okufuna obuwagizi bwabwe.

Okwogera bino, Minisita wa Gavumenti ez’Ebitundu, okulambula kwa Kabaka n'ensonga za Buganda ebweru, Oweekitiibwa Joseph Kawuki, asinzidde ku kitebe kya District y'e Gomba gy'akyaddeko n'asisinkana abakulembeze abalonde n'abakola emirimo egy'ekikugu.

Bano Minisita Kawuki abasabye bakole ebintu ebiri ku mutindo beewale okukola neemalidde. Awadde eky'okulabirako eky'amakubo mwasanjala agaddaabirizibwa District mu buli mbalirira ya mwaka ate nga ne byebakoze tebiri ku mutindo, n'awabula nti bwe baba balina ssente ntono, bakoleko ekitono naye nga kiri ku mutindo.

Abasabye okunyweza enkolagana y'abwe n'Obwakabaka n'abategeeza nti Gomba y'emu ku District ezikolagana obulungi n'Obwakabaka ku mitendera gyonna n'abajjukiza nti abantu be bakulember ba Ssaabasajja Kabaka naye ekigendererwa kimu kya kubatuusa ku buwanguzi.

Oweek Kawuki abakulembeze bano abakubirizza okwewala obulyake n'okudiibuuda ensimbi, bakozese akatono ke balina okwesitula bagende mu maaso. Rra abakubirizza okwawula eby'obufuzi n'enkulaakulana.

Ssentebe wa District y'e Gomba, George Abigaba, asabye obwakabaka bukole ekisoboka okukulaakulanya olusozi lw'e Kisozi lutuukane n'omutindo olw'obukulu bwa lwo mu by'obuwangwa n’ennono.

02/09/2026

Obwakabaka bwa Buganda bwebazizza ekitongole kya unesco olw'okwongera obuvujjirizi ku kuyambako okutambuza emirimu gy’Amasiro omuli n’Okugazzaawo.

Katikkiro Charles Peter Mayiga akiikiriddwa minisita w’amawulire Owek. Israel Kazibwe Kitooke ng’Ekitongole ki Unesco kitongoza polojekiti ey'okukwasizaako amasiro n’olusozi Rwenzori mu kwongera okukuuma ebifo by’obuwangwa n’ennono, Minisita agamba nti bino webituukidde nga ekirindiriddwa kya Ssaabasajja Kabaka kusiima amasiro gano gaggulwewo.

"Mu mwaka gwa 2010 amasiro ge Kasubi gakwata omuliro naye obwakabaka bwalwana okulaba nga gazzibwawo , mu mwaka 2023 amasiro gaggyibwa ku lukalala lw'ebifo ebiri mu mbeera embi olw'okulafuubana okugazzawo era omulimu gwajidddwako engalo nga ekirindirirwa kya Ssaabasajja kusiima amasiro gano gaggulwewo mu butongole kubanga ggyebuvuddeko omukolo gwokusala ekisasi gwakolebwa" Minisita Kazibwe.

Minisita yebazizza ekitongole kya Unesco n'eggwanga lya Japan okuyambako obwakabaka mu kuddaabiriza amasiro ge Kasubi.

Omulangira David Kintu Wasajja ye agamba nti abantu basaanye okwenyumiriza mu by'obuwangwa n’ennono zaabwe nga wano agamba nti Obwakabaka bwatandikawo polojekti y’ebifaananyi ku masiro kisobozese okwongera okumanyisa abantu ku ba Ssekabaka baabwe.

Ssenkulu w’ekitongole kyebyobulambuzi mu Buganda ki bhtb Omuk. Najib Nsubuga agamba pulojekiti eno etongozeddwa yakuyamba abantu abaliranyewo ku kuyingiza ensimbi munsawo yaabwe.

Mu kutongoza polojekiti eno, Judith Ogana atwala eby'obulambuzi n’obuwanga mu mu kitundu ky’Amawanga g’Obuvanjuba bwa Africa e Nairobi, agamba eby'obuwangwa bya mugaso naddala mu by'ensoma nti bakulaba ng’Ebifo bino bikuumibwa butiriribi.

Dr. Ajer Basil Omuwandiisi ow'enkalakkalira mu Minisitule y'ebyobulambuzi mu ggwanga, yeyamye nti Gavumenti ya kwongera okukwatizaako ebifo bino okwongera okutumbula eby'obulambuzi mu Uganda kubanga bannayuganda bangi bafunamu ensimbi ne bakyusa embeera zaabwe.

Ate ye Omumyuka wa Ambasadda wa Japan mu ggwanga Yoshida Norimasa nga bano bebayambye okuteeka ebyuma ebizikkiriza omuliro mu masiro, agamba nti eggwanga lya Japan lyakwongera okulaba nga ebifo bino bikuumibwa butiriribi.

Bino bibadde ku wooteri ya Afrikana mu Kampala, nga era ku mukolo guno kwetabiddwako abakulembeze okuva mu bwakabaka bwa Buganda n’abakungu okuva mu gavumenti ya wakati n’abantu abalala bangi.

02/09/2026

Situla omutindo; Abavubuka n'emmwanyi.

Obwakabaka mu mbalirira y'omwaka 2024/2025 omulaka gwasibwa mu kutumbula embeera z'abavubuka naddala mu by'ensimbi n'okwekulaakulanya kyokka n'omwaka guno enkola ya situla omutindo yatongozebwa nga essira liri mu kulongoosa emirimu egikolebwa abantu ba Kabaka basobole okwekulaakulanya kale nga ebyo byonna obuwufu bwassibwa ku bavubuka.

Abavubuka ba Buganda wansi w'ekibiina ekibagatta ki Buganda Youth Council bakyaddeko ku National Agricultural Coffee Institute (NaCORI) eri wansi wa National Agricultural Research Institute (NARO) e Nasuuti mu Kyaggwe nga ekigendererwa kya kwongera kufuna bumanyi n'okwongera omutindo ku kirime ky'e mmwanyi eky'ettunzi ennyo mu katale yonna kati nga basitula n'omutindo.

Minisita w'Abavubuka Emizannyo n'Ebitone, Oweek Robert Sserwanga Ssalongo nga y'akulembeddemu abavubuka bano, abakuutidde okuba ab'enjawulo mu nsi y'eby'obulimi nga balina kye bavuganyako kyokka nga bakikola mu ngeri ey’enjawulo.

"Abavubuka eyo gye muwangaalira njagala mutunule bulungi nnyo okulaba nti ggwe nga ssekinoomu oyikiriza ki? Kubanga ekisinga obukulu era enkulaakulana yonna mu kitundu etandikira ku ggwe omu, era njagala ffena abazze leero bwetuddayo tunoonye wa awayinza okutwanguyira nga abalina ettaka tubaguza amaanyi n'obukugu bbo bye batalina" minisita Sserwanga bwakuutidde abavubuka.

Minisita Sserwanga annyonyodde abavubuka bano nti ekirime ky'e mmwanyi tekiyinza kubalimba kuba ku buli mutendera gwakyo kiriko ebirungi okuva ku ndokwa okutuuka ku kaawa mu mu kikopo, kale bano abasabye okusitula omutindo gw'obulimi bwabwe nga balima emmwanyi.

Akulira entambuza y'emirimu mu NACORI Evans Atujukirire asiimye abavubuka ba Buganda olw'okwagala okuyiga n'okusoma ku mmwanyi naddala okuva mu bakugu era abanoonyereza aba NaCORI kyokka ono abasabye okussa mu nkola ebyo ebibayigiriziddwa basobole okwenogera ku nsimbi beyagalire mu myaka gy'ekivubuka.

Ssaabawandiisi w'abavubuka mu Buganda Nantamu Laziya alaze nti emisomo bwegiti gya kubasobozesa okwongera okutereeza ennimiro zaabwe entonotono kuba bayigira ku bakugu kale nga ensimbi bajja kuziweza mu nsawo ng'abavubuka b'omulembe Omutebi.

Nalugya Rachael omu ku babanguddwa, agambye nti mu ayize bwe batandika bizinensi y'e mmwanyi olw'obwangu bwalabye bwerina n'akatale wamu n'okuyamba ku kitaawe n'ennimiro ye gyalowooza nti terabiriddwa bulungi.

Kwagala Daniel okuva e Mawokota, annyonyodde nti okulambula kwongedde ku kumanya kwe naddala mu kukuza endokwa ezisobola okutundibwa nga n'emmwanyi tezinakwatibwako mu nnimiro.

Abavubuka balambuziddwa ennimiro ya Kooko (Cocoa) era nga nayo eddukanyizibwa ekitongole ki NARO mu ngeri y'okwagazisa okulima ekirime ekyo kye babannyonnyodde nti nakyo kya ttunzi ku katale k'ebirime olw'emigaso egimuvaamu.

Abavubuka mu ngeri y'emu balambuzidwa ekkolero lya NUCAFE AFRICA eryongera omutindo ku mmwanyi ne baggyamu ebintu eby'enjawulo.

02/09/2026

Abaami ba Kabaka ab’e ggombolola Mumyuka Mpenja ne Ssaabawaali Kyegonza basabiddwa okusitula omutindo gw'obuweereza bwabwe eri Kabaka olwo abantu be bakulembera basobole okwenyumiriza mu buweereza bwabwe.

Bw'abadde alambula ggombolola zino mu Ssaza Gomba, Minisita wa gavumenti ez'Ebitundu okulambula kwa Kabaka n'ensonga za Buganda ebweru, Oweek Joseph Kawuki, ategeezezza nti ebimu ku bintu omwami wa Kabaka by'alina okukola okusitula omutindo kuliko; okuyambako abazadde okutuukiriza obuvunaanyizibwa bw'okusomesa abaana, okutuuza enkiiko, okutambuza amawulire ku mikutu, okusitula ekitiibwa ky'embuga zaabwe, okuggulawo amakakkalabizo abantu basobole okufuna obuweereza, okunnyikiza emirimo gy'ebitongole by'e Ssaza, n'okunnyikiza emirimo gya Kabaka, okukubiriza abantu okuwayo oluwalo, okukola alipoota, n'okweyisa obulungi okusobola okuggyayo ekitiibwa ky'obwami.

Wabula Minisita Kawuki alaze ebimu ku bisuula obukulembeze okuli; obutakuuma biseera, okukuta, okulwanyisa bannaabwe, obwa nnakigwanyizi, okwekuza, okubulwa obwesimbu mu bigambo n'ebikolwa, obutali buwulize, okukozesa olulimi oluvoola n'obukumpanya.

Omwami w'Essaza Gomba, Kitunzi, Oweek Fred Williams Mugabi, asinzidde mu kulambula kuno n'asaba abakulembeze okuba obumu basobole okuweereza abantu nga tebatunuulidde bintu bibaawula naddala eby'obufuzi, eddiini ona amawanga.

Olunaku lw'e nkya Oweekitiibwa Kawuki asuubirwa okulambula ggombolola ya Ssaabagabo Kabulasoke ne Ssaabaddu Maddu.

Okulambula kuno kugendereddwamu okulondoola obukulembeze ku mitendera gyonna mu buweereza bw'Obwakabaka.

Abaami b'amasaza okuli; Mukwenda Oweek Deo Kagimu, Oweek Kaggo Hajji Ahmed Magandaazi Matovu, Oweek Katambala Hajji Sulaiman Magala, bawerekeddeko Minisita Kawuki mu kulambula kuno.

02/09/2026

Abakulira ekitongole ekivunaanyizibwa ku kulondoola ebibalo naddala eby'amayengo g'ebyempuliziganya n'ebifa mu butale, ki Public opinion polling sector institute, bakyadde embuga nebasisinkana Kamalabyonna ne Baminisita ba Kabaka ne boogera ku kussaawo enkolagana n’Obwakabaka bwa Buganda mu by’okunoonyereza, okulondoola n’okukebera enkola y’emirimu, n’okwekenneenya ebiva mu nteekateeka z’Obwakabaka ez’enkulaakulana.

Ku kwogera kwe, Katikkiro Charles Peter Mayiga ayanirizza enteekateeka eno y'okussaawo enkolagana n’aggumiza obukulu bw’amawulire agasinziira ku biwandiiko n’ebibalo (data), awamu n’empuliziganya, mu kumanya n’okutegeera abantu n’okuwagira enkulaakulana.

Katikiro annyonnyodde nti Buganda kitundu ku by'enfuna bya Uganda era obwakabaka bwesigama ku buwangwa ne butumbula ebyenfuna, era bukola ng’omutabaganya wakati wa bizinensi n’akatale.

Kamalabyonna agambye nti Buganda neetegefu okukolagana n’ebitongole nga Ipsos mu kunyweza enkulaakulana y’abantu n’ebyenfuna, nga bakozesa obuwangwa awamu n’emikutu gy’empuliziganya egy’omulembe guno okutumbula embeera n’obulamu bw’abantu baayo.

Ssenkulu wa Ipsos mu Uganda Ruth Ruigu agamba nti obumanyirivu bwa kkampuni eno obumaze emyaka 32 ng’ekola mu Uganda, bugitadde mu kifo ekirungi okuyamba Obwakabaka mu nteekateeka zaabwo.

Ruigu agamba nti Ipsos essira esinga kulissa ku mulamwa gw’Obwakabaka ogw’okutumbula omutindo n’okukakasa nti enteekateeka z’enkulaakulana zituukiriza ebigendererwa byazo.

Aba Ipsos bawagidde emirimo gy'obwakabaka ne satifikeeti ya luwalo lw'ensimbi akakadde kamu.(1000000/=)

02/09/2026

Minisita wa Gavumenti ez’Ebitundu, Okulambula kwa Kabaka n’Ensonga za Buganda ez’Ebweru Oweek. Joseph Kawuki yebazizza abantu ba Kabaka abawangaalira mu ssaza lya Ssaabasajja Kabaka Bungereza olw’okusasaanya amawulire g’Obwakabaka mu bitundu by'eyo ekyongedde okuyamba okulwanyisa abalabe b’Obwakabaka.

Bano abasisinkanye ku lwa Katikkiro n’ebamutegeeza ensonga zebaali baagala okumusisinkanirako. Oweek. Kawuki agamba nti nga bayita mu nkungaana ez’enjawulo nga BECO, okukungaanya Oluwalo, emisinde gy’amazaalibwa ga Kabaka byongedde okukumaakuma abantu ba Kabaka abali ebweru era basukkulumye nnyo mu nteekateeka zino okukira ku balala.

Bakulembeddwamu Omumyuka ow’Okubiri ow’Omubaka wa Ssaabasajja Kabaka owa UK ne Ireland (atwaala ebendobendo lya South ne West England) Muky. Janet Nabatta Mukiibi era banjulidde Minisita bye batuuseeko nga essaza nga kati Obwakabaka buweza abaweereza abasoba mu 150 ku mitendera gyonna ekifaananyi ekiraga abantu abavuddeyo okuweereza Kabaka wabwe. Muky. Nabatta agamba nti kino kibayambyeko nnyo okwekolamu omulimu nga bawagira bye baba bategese.

01/09/2026

Obukadde obusukka mu 42 bwe buleeteddwa abantu ba Ssaabasajja Kabaka okuva mu masaza 3; Busiro, Bulemeezi ne Bungereza mu luwalo olutikkuddwa Omukubiriza w’Olukiiko lwa Buganda Oweek. Patrick Luwagga Mugumbule mu bimuli bya Bulange.

Ku lwa Katikkiro, Oweek. Mugumbule atenderezza nnyo abantu ba Ssaabasajja Kabaka ababeera ebweru wa Buganda baayogeddeko nga abakiise ba Buganda abalaga abalala ekyo Buganda kyeri, nga kino kirabikira mu mirimu gyebakola, enneeyisa n’obuwangwa bwabwe.

“Okuyigiriza abaana baabwe Olulimi Oluganda n’okukuuma eby’obuwangwa nsonga nkulu nnyo kubanga eggwanga bweritandika okuseebengerera, tubaayo n’abantu abatuwaniridde mu nsi ez’ebweru,” Oweek Mugumbule.

Oweek Mugumbule agamba ensonga ya Luwalo lwaffe ya buwangwa na nnono za Buganda era oli bwava eri yonna gyawangaalira asaanidde okujja nga alina kyakiise nakyo okusobola okuwagira emirimu egikolebwa Embuga.

Minisita wa Gavumenti ez’Ebitundu Oweek. Joseph Kawuki yebazizza abantu ba Kabaka okuwagira enteekateeka z’Obwakabaka zonna ezitunulidde okuzza Buganda ku ntikko. Bano abakubirizza okuddayo okukwata ku banaabwe okwongera okutegera ensonga z’Embuga.

Omugabe w’olunaku, Dr. Grace Steven Sseruyange, nga ye Mumyuka Asooka owa Ssebwana, asabye abantu ba Kabaka okuddayo bayigirize abalala ku nteekateeka ezikolebwa Obwakabaka bazifunemu eky'okuyiga.

Omumyuka ow’Okubiri ow’Omubaka wa Ssaabasajja Kabaka owa UK ne Ireland (atwaala ebendobendo lya South ne West England) Muky. Janet Nabatta Mukiibi annyonnyodde nti essaza lino lisenvudde nga kati bekumyekumye okusobola okwekolamu omulimu ku bintu ebibazimba ebweru w’eggwanga era basobodde okukungaanya abavubuka emiti emito 200 abakola emirimu gya tekinologiya okusobola okubalungamya ku ntambuza y’emirimu ebweru gye babeera..

Eggombolola ezivudde mu masaza kubaddeko; Ssaabaddu Katabi, Mutuba V Nakiwogo ne Mutuba IV Entebbe Lunnyo okuva e Busiro nga baleese obukadde 21, Mutuba V Wabusaana okuva e Bulemeezi n’obukadde 3,900,000, awamu ne Bungereza abaleese 17,227,075.

Buganda Kingdom

03/09/2026

03/09/2026

03/09/2026

03/09/2026

02/09/2026

02/09/2026

02/09/2026

02/09/2026

02/09/2026

01/09/2026

Address

Telephone

Website

Alerts

Contact The Organization

Shortcuts

Share

Category

Listing takedown request