Buganda Kingdom, Mengo, Kampala (2026)

02/06/2026

Abavubuka okuva e Masaka mu Buddu, abakola emirimu egy'enjawulo ku mikolo bakiise Embuga okwanjulira Katikkiro omwoleso gwe bategese ge batuumye Greater Masaka Bridal Expo ogutandika ku Lwokutaano luno nga 5-7 Ssebaaseka 2026.

Katikkiro Charles Peter Mayiga asinzidde mu nsisinkano n'abavubuka bano n'asaba abakola obuweereza obw'enjawulo ku mikolo okufuba okukola ebintu eby'omutindo, okulondoola be bakozesa n'okubasasula obulungi. Abakubirizza okubeera n'ebiwandiiko ebibayamba okumanya emirimu gye bakola bwe gitambula okulaba nti tebafiirwa wabula bagifunemu.

Katikkiro akoowodde abantu naddala Bannabuddu okugenda mu mwoleso guno basobole okubaako bye bayiga, bakole emikolo egiri ku mutindo kyokka alabudde abavubuka okwewala okutegeka emikolo nga bakozesa ssente eza bizinensi kubanga kivaamu ate emirimu okusaanawo.

Minisita w'Abavubuka Owek. Robert Serwanga asinzidde mu nsisinkano eno n'asaba abavubuka okunyiikira okukolera awamu nga Kabaka bwe yabalagira ng'akikaatiriza nti abantu abakolera awamu bafunamu nnyo okusinga oyo ayimirira yekka. Yebazizza abavubuka bano olw'okwegatta bakolere wamu emirimu era abasabye mu mwoleso gwe bategese buli kye bategeka bakulembeze mutindo.

Wasswa David Kajubi akulembeddemu abavubuka bano ategeezeza nti abavubuka bangi mu bitundu ebyesudde ne Kampala bakola ebintu ebirungi bingi naye tebirabika era eno y'ensonga ebaleese Embuga okweyanjula bongere okutegeerekeka eri abantu bategeere bye bakola era babawagire.

Ensisinkano eno yetabiddwamu Omukubiriza w'Olukiiko lwa Buganda Owek. Patrick n'abagenyi ab'enjawulo

02/06/2026

Katikkiro awabudde abakwasi ba "vidiyo" n'ebifaananyi bya bannabitone obutava ku mulamwa gw'oluyimba.

Kamalabyonna Charles Peter Mayiga agamba nti vidiyo eneewangaala erina okuggyayo omulamwa gw'oluyimba olukwatibwa, olwo amakulu g'oluyimba galeme kufa.

"Omuyimbi tasobola kukwatira vidiyo mu nnimiro n'asigala nga yebyudde" Katikkiro bw'ategeezezza.

Okwogera bino Katikkiro abadde ayogerako eri abakugu mu kukwata vidiyo n'ebifaananyi bya bannabitone abeegattira mu kibiina ki Uganda Cinematographers Association, abakyadde embuga okwanjulira Katikkiro enteekateeka zaabwe ez'okussaawo enkolagana n'Obwakabaka okukwata ebyafaayo by'obwakabaka omuli ebifo by'obulambuzi, ku ntambi olwo biterekebwe abaliddawo balibisomako.

Katikkiro asanyukidde enteekateeka eno era n'ategeeza nti kikulu nnyo buli muntu okuvumbula ekitone ky'alina naddala omuvubuka, kubanga ekitone bwe busobozi bw'omuntu obwamutondebwamu, oli bwakivumbula kimugasa, ne banne abalala wamu n'obuganda, era buli omu alina obuvunaanyizibwa obuzza Buganda ku ntikko nga ayita mu ky'alinamu obukugu naddala ekitone. Bw’atyo abasabye bezuule bamanye ebitone bye balina era bategeere engeri y'okubikozesaamu.

Bano era Kamalabyonna abakuutidde okusitula omutindo mu mirimo gy'abwe nga bakozesa obuyiiya, beewale okukopperera eby'abazungu naye baluubirire ekintu ekisinga obulungi, era n'abasaba okubeera abeerufu eri abakozi be bakozesa, babasasule nabo bakimanye nti bali ku mulimu era bagwenyumirizeemu.

Jude Ssempeebwa Nnyanja, ku lwa banne, ategeezezza Katikkiro nti ekibiina kyabwe kitunuulidde okutumbula omutindo gw'omulimo gw'abwe mu kubangula abapya mu kisaawe kino, okuwa abavubuka emirimo naddala mu kukwata ennyimba z'abayimbi. Mu buwufu obwo baagala okukolagana n'Obwakabaka okukwata entambi ezoogera ku Buganda n'ebyafaayo by'abwo omuli; ebifo by'obuwangwa n'obulambuzi, engero, okubangula abavubuka ba Buganda ku nkwata y'ebifaananyi eby'omutindo n'ekigendererwa eky'okutunda Buganda mu mawanga amalala wamu n'okukozesa omutimbagano okutereka eby'obuwangwa bya Buganda.

Minisita w'Abavubuka Emizannyo n'Ebitone, Ssaalongo Sserwanga Robert, agambye nti abakugu bano bakozesa obuyiiya bungi era bafuba okuteeka ebyo bye balowooza mu bifaananyi era obukugu buno bwetaagibwa nnyo eri abavubuka ba Buganda bwekiba kya kusitula omutindo mu mirimo egy'ettanirwa abavubuka.

02/06/2026

KITALO!

Omukulu w’Ekika ky’Akasimba, Omutaka Kabazzi Nampuuma David Marvin Miti abuze!

Enteekateeka ezinaagoberera zonna tujja kuzibamanyisa.

Gutusinze nnyo Ayi Ssaabasajja, twakuumye bubi!

01/06/2026

Katikkiro akubagizza Minisita wa Kabaka ow'ebyobulimi omuwummuze Oweek Ssimbwa Bunnya olw'okufiirwa mukyala we Hajjat Mariam Bunnya mu maka ge e Kagoma.

Ayogedde ku Oweek Bunnya nga omukulembeze atuukiridde eyakulaakulanya ennyo obwakabaka era yatendeka nnyo abavubuka ba Buganda enkwata y'obukulembeze entuufu, ekirabo kyeyagabanyizaako n'Abaana be.

Yebazizza Oweek Bunnya n'omugenzi olw'enkuza ennungi ey'abaana erimu obuntubulamu obweyolekera mu buweereza bw'abwe wano e Uganda ne mu mawanga ag'ebweru gyebakolera emirmo gy'abwe, n'ategeeza nti ennaku zino abantu abakyali mu myaka emito obuwanguzi babulabira mu mayumba, emotoka, ne ssente enkalu, naye obuntubulamu kye ky'obugagga ekisinga obukulu ekikusobozesa okubeera mu bantu nga tebakwekokkola era bwe bugagga obutuufu obunaasobozesa Buganda okudda ku ntikko.

Asabye abaana b'omugenzi batwale ensonga y'okulabirira bazadde baabwe nga ekikubagizo kubanga bangi tebafuna mukisa ogwo.

Omugenzi Hajjat Mariam Bunnya yaziikibwa ssabbiti ewedde.

01/06/2026

Olukiiko olukulembeze olw’ekitongole ky’amawulire mu Ssaza Kyaggwe lusisinkanye Minisita w’amawulire okukunga era Omwogezi w'Obwakabaka, Oweek Israel Kazibwe Kitooke e Bulange Mengo, ne bamwanjulira enteekateeka y'okukunga abantu ba Kabaka n'okubunyisaamu amawulire g’Obwakabaka mu Ssaza Kyaggwe.

Robert Namugera, akulira ekitongole kino, ayanjulidde Minisita Kazibwe alipoota y'enteekateeka y'emirimo gy'abwe n'ebiteereddwako essira okukolebwako mu mwaka guno.

Minisita Israel Kazibwe Kitooke, abeebazizza olw'emirimo gyebakola, obumalirivu n’okwagala obwakabaka bwabwe, era alonze Robert Namugera okukulembera ab’ebitongole by’amawulire mu masaza 18 mu Buganda, n'amusaba okukumaakuma banne n'okubabangula mu by'Amawulire ssaako okusunsula amawulire g’obwaKabaka agasaanidde.

Robert Namugera abadde wamu n'olukiiko lwe okuli; Omumyuka we Kalogoyi David Tenywa, Omukubiriza w’olukiiko - Kizito Hussein, Omuwandiisi - Katende Stuart, Omukunzi - Ssebunnya John Ronald era nga y'akulira ab’amawulire ku mutendera gw'e ggombolola, Ow'amawulire w'eggombolola Mutuba IX Goma - Kabugo Alex.

01/06/2026

Ssentebe wa bboodi ya Mengo Chamber of Commerce, Omuk. John Fred Kiyimba Freeman akubirizza Bannayuganda naddala abasuubuuzi okujjumbira emyoleso basake amagezi agabayamba okutumbula emirimu gye bakola n'okutandikawo emirala basobole okwekulaakulanya.

Okwogera bino asinzidde mu nsisinkano n'abamu ku bakungu mu kitongole ki Neabec Consulting Oy - Finland abakyaddeko Embuga mu Bulange e Mmengo okwanjula enteekateeka ze balina ze batunuulidde okuyamba abantu ba Kabaka okwekulaakulanya.

Bano balina omwoleso gwe bateekateeka oguyitibwa Nordic East Africa Business Expo, guno gwetabwamu abasuubuuzi, bannamakolero, bannabyanjigiriza, ab'ebyobulambuzi n'abantu abalala abakola emirimu egy'enjawulo. Ogw'omwaka guno gwakubaawo nga 8-10 Mutunda, 2026 e Helsinki mu Finland.

Omuk. Freeman annyonnyola nti omuntu bw'agenda mu mwoleso asisinkana abantu abakola ebyo bye yayagala edda okukola oba baali nabo mu mulimu gwe gumu nga balina bye bamusingako by'asobola okubayigirako okwesitula, bwatyo asabye Bannayuganda okusooka okwetaba mu mwoleso gwa CBS PEWOSA ogwengedde anti gutandika nga 8-14 omwezi guno mu Lubiri e Mmengo. Ate ku by'omwoleso gwa NEABEC, asabye abantu ba Kabaka okukwatagana ne Mmengo Chamber of Commerce okubatuusa ku bategesi, era alaze essuubi nti waliwo ebibala bingi mu mwoleso guno okunsiziira ku bye bakubaganyizaako ebirowoozo mu nsisinkano gye babaddemu.

Ensisinkano eno yetabiddwamu Omumyuka Owookubiri owa Katikkiro era Omuwanika wa Buganda Owek. PDG. Robert Waggwa Nsibirwa, Minisita Noah Kiyimba, Minisita Choltilda Nakate n'abaweereza abalala mu Bwakabaka ate bbo B abagenyi bakulembeddwamu Mw. Paul Jaaza omu kubatandisi b'ekitongole kino era akwanaganya ekitongole mu mawanga ga East Africa, ne banne okubadde Mw. Wambi Said ne Rev. Phillip Fred Kato

01/06/2026

Tunyweze Obukulembeze bw'ekika Ku buli mutendera okusobola okukuuma Namulondo.

Ebigambo bino byogeddwa Minisita w'eby'obuwangwa- Oweek. Dr. Anthony Wamala bw'abadde Ku mukulo gw'okujaguza kw'Omutuba gwa Kaasa e Nabiteete mu Ssaza Mawokota.

Mu kwogera kwe, Oweek Dr. Anthony Wamala, akkaatirizza obukulu bw'okunyweza obukulembeze mu Bika ku buli mutendera Ebika obutasaanawo era ategeezezza nti
Olw'obukulu bw'ensonga eno, minisitule gy'akulembera ey'obuwangwa n’ennono, yatandika kaweefube w'okulambula obutaka bw'Ebika okulaba embeera gye bulimu n'okuteekateeka obukulembeze bw'Ebika ku mitendera gyonna okusobola okukuuma Nnamulondo.

Minisita Wamala agamba nti Bajjajjaffe, baasiba obukulembeze bwa mirundi ebiri obw'ekifundikwa n'obukozi bw'emirimu, wabula obukulembeze mu Bika ebisinga obungi, waggulu ku busolya bunywevu naye wansi waliyo obunafu era teri bukulembeze butegeerekeka.

Ategeezezza nti obukulembeze bw'Ebika bwali bw'afuuka bwa mikolo okugeza; ennyimbe, naye ate nga waliwo obwetaavu bw'obukulembeze obwanganga ebisoomooza abazzukulu mu bika era nga bulina okuteekebwateekebwa obulungi.

Wano w'asinzidde n'asaba ow'Omutuba Kaasa akole olukiiko olujjudde obulungi olukozi lw'emirimu olwo obukulembeze butambule bulungi.

Ow'Essiga Bakazirwendo Ssemandwa Jjajja w’Ekika ky'Engeye, akubirizza abazzukulu okukuuma obuwangwa bwabwe baleme kubufuula bwa by'anfuna, beewale okutunda ettaka ly'obutaka bw'omutuba basobole okusigaza webakungaanira mu nteekateeka z'omutuba gwabwe.

Kyobe Francis, ku lw'akuuma entebe ya Kayima, Hajji Hassan Kagga Kasujja, asabye ab'Omutuba gwa Kaasa okukumaakuma abazzukulu n'okubakubiriza okutuuza enkiiko mu nnyiriri zaabwe kyongere okuggumiza entambuza y'obuweereza mu Kika kyabwe e ky'Engeye. Asabye ow'Omutuba atuuziddwa, okuttukiza enkola y'okwalula abaana kiyambeko Ekika okufuna abazzukulu abatuufu omutali nsowole olwo n'emirerembe ku buzaale bw'omuntu gya kuggwawo.

01/06/2026

Akaliba akendo okalabira ku mukonda"

Wuuno musaayi muto Namukasa Faridah omukulembeze w'Abayizi ku Victoria View SS Kiyindi-Lugazi (Head Prefect) ow'ekibiina ekya S.6, yesimbawo n'awangula ku kifo kya Female Youth Council ku ggombolola y'e Najja mu Disitulikiti ye Buikwe.

Ono yawuliriza ekiragiro kya Ssaabasajja Kabaka eri abavubuka okwetaba mu bifo by'obukulembeze.

31/05/2026

Kabaka foundation (UK chapter) ejaguzza okuweza emyaka 30

Omukolo gutegekeddwa ku Royal National Hotel e London mu Bungereza, okujaguza ebituukiddwako mu myaka 30 okuva Ssaabasajja Kabaka atandikawo ekitongole kino.

Ettabi lye Bungereza nalyo lijaguzza okuweza emyaka 30 oluvannyuma lw'okutandikibwawo mu Museenene wa 1996, ate ekitebe ekikulu e Kampala kyatandikibwawo mu April 1996.

Ku mukolo guno Ssaabasajja Kabaka yebazizza abo bonna abakwatiddeko ekitongole kino okutuukiriza omulamwa ogwakitandisaawo era n'asaba abantu okwongera okukwasizaako ekitongole kino okulaba nga kituusa obuweereza eri abantu. Obubaka bwa Kabaka busomeddwa Omumbejja Joan Nassolo..

Ssenkulu wa Kabaka Foundation, Omukungu Edward Kaggwa Ndagala, asinzidde Bungereza ku mukolo guno, neyeebaza Ssaabasajja Kabaka olw'okwolesebwa kuno okutandika ekitongole kino ekikoze ennyo okubeera omuntu yenna eyetaaga okubeerwa si mu Buganda mwokka wabula ne mu bitundu bya Uganda ebitali bimu. Agamba ensiisira z’ebyobulamu ezikolebwa zijjanjaba abantu okuva mu buli kanyomero ka Uganda, ne kaweefube w'okugaba omusaayi Ssaabasajja Kabaka gweyatongoza, omusaayi guno gwataasa obulamu bw'abantu bonna mu Uganda, bw'atyo yeebazizza Beene olwa kaweefube ono.

Omukungu Kaggwa Ndagala takomye okwo ategeezezza nti Kabaka foundation ekoze enteekateeka okukyuusa obulamu bw'abantu mu migotteko, eby'obulimi, ebyenjigiriza, eby'obulamu, era aweze eri Beene nti enteekateeka z'ekitongole kino zigenda kwongerwamu amaanyi okulaba nga ebigendererwa bye kitongole kino ebyakitandisaawo bituukirira bulungi.

Agamba ekigendererwa ekikulu mu kukola ebikujjuko by'okujaguza emyaka 30 mu matabi ag'enjawulo, kwe kumanyisa abantu ba Kabaka abali emitala wa mayanja emirimo gya Kabaka Foundation, n'okunoonya abavujjirizi abayinza okubakwasizaako naddala ku nsiisira za tubeere balamu abantu bayitiridde obungi naye ate nga balina okufuna obujjanjabi obwegasa.

Ssalongo Geoffrey Kibuuka, omubaka wa Kabaka atwala e Ssaza lya UK ne Northern Ireland, yeebazizza Ssaabasajja Kabaka okutandikawo ekitongole kino okuyamba abantu abalina okusomoozebwa okw'enjawulo naddala abantu abasula mu mugotteko n'abalina endwadde ezitali zimu. Yeebazizza abaweereza ba Kabaka foundation mu Bungereza ne Ireland abakoze omulimo okulaba nga engiri ya Kabaka foundation ebunyizibwa mu Ssaza eryo awatali kwebalira.

Henry Mutumba, Ssenkulu wa Kabaka UK ne Ireland, ku lw'olukiiko lwe, beeyamye okutuusa obuweereza obutaliiko kkomo okusobola okuyamba abantu mu ngeri ez’enjawulo omuli; okusoma, obujjanjabi, okuyiga eby'obulimi, n'okufuna amazzi amayonjo.

Omubaka wa Kabaka mu Ssaza Bungereza ne Ireland omuwummuze, Oweek Ronald Muyinda Lutaaya, omukolo naye agwetabyeko.

31/05/2026

Obwakabaka busabye bannaddiini okwongera amaanyi mu kubuulira enjiri mu masomero kyongere okunnyikiza empisa mu bavubuka.

Bino bibadde mu bubaka bwa Katikkiro bwatisse Kaggo Hajji Ahmed Matovu Magandaazi, omwami w'Essaza Kyaddondo, ku mukolo gw'okutuuza Omulabirizi wa Central Uganda Conference Omusumba Pr. Simwogerere David n’olukiiko lwe, ku kkanisa ya Kireka Seventh-day Adventists.

Kamalabyonna atenderezza omutindo n’empagi okwazimbibwa Kkanisa y’abadiventi nti era abeebazizza olw’okwenyigira mu nteekateeka z’Obwakabaka entakera, wabula abajjukizza nti balina omulimu gw'okunnyikiza empisa n'obuntubulamu mu bavubuka okusobola okutaasa ebiseera by’eggwanga eby'omumaaso.

Omukolo gwetabiddwako abaami ba Kabaka ku mitendera egy'enjawulo, bannabyabufuzi, ebibiina by'Abakyala n'abavubuka okuva mu kkanisa ezitali zimu eziri mu bulabirizi bwa Central Uganda Conference.

Buganda Kingdom

02/06/2026

02/06/2026

02/06/2026

01/06/2026

01/06/2026

01/06/2026

01/06/2026

01/06/2026

31/05/2026

31/05/2026

Address

Telephone

Website

Alerts

Contact The Organization

Shortcuts

Share

Category