08/05/2026
Farg‘ona viloyati “Fitch Ratings” tomonidan «BB-» reyting oldi va O’zbekistonda ikki xalqaro reytingga ega bo‘lgan birinchi hududga aylandi
Joriy yilning 7-may kuni “Fitch Ratings” xalqaro agentligi Farg‘ona viloyatining xorijiy va milliy valyutadagi uzoq muddatli emitent defolt reytingi “BB-“ darajasida, prognozi esa “Barqaror” (Stable Outlook) etib baholangani to‘g‘risida rasman o‘z vebsaytida e’lon qildi.
“Fitch Ratings” xalqaro moliya bozorlarida eng nufuzli hisoblangan
“Katta uchlik” (“Big Three”)ga kiruvchi Amerika-Britaniya reyting agentligi hisoblanadi hamda xalqaro reyting bozorining 95 foizini boshqaradi.
Avvalroq, 2025-yil noyabr oyida “S&P Global” xalqaro reyting agentligi Farg‘ona viloyatining kredit reytingini «B+» darajasidan «BB-» darajasigacha oshirgan bo‘lib, hozirda mamlakatimizda ikki nufuzli xalqaro kredit reytingini olgan yagona hudud bo‘lib turipti. Xalqaro reyting agentliklarining mazkur qarorlari viloyat moliyaviy barqarorligining mustahkamlanayotganini, jumladan, makroiqtisodiy ko‘rsatkichlarning yaxshilanayotganini aks ettiradi.
Agentlik xulosasiga ko‘ra, Farg‘ona viloyatining qarz yukini boshqarish ko‘rsatkichi barqaror darajada saqlanib qolishi kutilmoqda. Xususan, 2030-yilga qadar viloyatning qarzni qoplash koeffitsiyenti xavfsiz diapazonda bo‘lishi prognoz qilingan. Shuningdek, hududning fiskal qarz yuklamasi nisbatan past darajada qolishi, qarzga xizmat ko‘rsatish qobiliyati esa yetarli darajada saqlanishi qayd etildi.
Shuningdek, Farg‘ona viloyati “Fitch Ratings” agentligi tomonidan baholangan O‘zbekiston poytaxti Toshkent shahri, Armaniston poytaxti Yerevan shahri hamda Turkiyaning Konya shaharlari bilan teng darajada (“BB- / Barqaror”) va Turkiyaning Balikesir shahridan (“B+ / Barqaror”) bir pog‘ona yuqori reyting olgani ham e’tiborga loyiqdir.
“Fitch Ratings” Farg‘ona viloyatining iqtisodiy salohiyatiga ham alohida e’tibor qaratib, hudud mamlakatning eng yirik va iqtisodiy faol mintaqalaridan biri ekanini ta’kidladi. Bugungi k***a Farg‘ona viloyati O‘zbekiston aholisining qariyb 11 foizini tashkil etib, iqtisodiyoti jihatidan qishloq xo‘jaligi, sanoat ishlab chiqarishi va yengil sanoat tarmoqlari bo‘yicha yetakchi o‘rinlarni egallab kelmoqda.
Mazkur xalqaro kredit reytingining berilishi Farg‘ona viloyatining investitsion jozibadorligini oshirish, xorijiy investorlar ishonchini mustahkamlash hamda kelgusida yirik infratuzilma va ijtimoiy loyihalarni moliyalashtirish uchun yangi imkoniyatlar yaratadi. Shu bilan birga, bu baho hududda amalga oshirilayotgan iqtisodiy islohotlar, byudjet boshqaruvi va moliyaviy intizom samaradorligining xalqaro moliya institutlari tomonidan e’tirof etilganining yorqin ifodasidir.
Shu o‘rinda ta’kidlash joizki, tashqi makroiqtisodiy o‘zgarishlarga qaramay, viloyat barqaror iqtisodiy o‘sish sur’atlarini saqlagan holda investitsiyaviy faollikni kengaytirish va eksport salohiyatini oshirish bo‘yicha izchil rivojlanishda davom etmoqda.
Ekspertlar fikricha, Farg‘ona viloyatiga berilgan “BB- / Barqaror” reytingi hududning o‘rta muddatli moliyaviy barqarorligi saqlanib qolishini anglatib, viloyatning xalqaro moliya bozorlaridagi nufuzi va tan olinishi uchun muhim qadam bo‘lib xizmat qiladi.
Shuningdek, Farg‘ona viloyatining reytinglar bo‘yicha konsultanti “Finvizier Consultancies” kompaniyasi menejeri Yekaterina Kovrigina 2022-yildan beri viloyatning reyting jarayonini kuzatib borayotgan mutaxassis sifatida ta’kidlashicha, so‘nggi yillarda Farg‘ona viloyati moliyaviy boshqaruv sifati, investitsion faollik va makroiqtisodiy ko‘rsatkichlar bo‘yicha sezilarli yaxshilanishni namoyon etdi.
“Fitch reytingining berilishi va S&P Global tomonidan reytingning oshirilishi viloyatda amalga oshirilgan tarkibiy o‘zgarishlarni aks ettiradi va ular allaqachon xalqaro miqyosda e’tirof etilganini ko‘rsatadi”, — deydi Yekaterina Kovrigina.
