29/12/2022
YIL YAKUNLARI SARHISOB QILINDI
O‘tib borayotgan 2022 yil mamlakatimizda barcha sohalarda bo‘lgani kabi yoshlar bilan ishlash tizimida ham sermahsul yillardan biri bo‘ldi.
Bugun Farg‘ona jamoat salomatligi tibbiyot institutida Yoshlar ishlari agentligi Farg‘ona shahar bo‘limi tomonidan “Yil sarhisobi”ga bag‘ishlangan taqdirlash marosimi bo‘lib o‘tdi.
Tadbirda Farg‘ona shahar hokimi Vosiljon Nazarov ishtirok etib, o‘tib borayotgan yil davomida olib borgan fidokorona xizmatlari, erishgan yutuqlari orqali shahrimiz sha’nini yuksakka ko‘tarishga qo‘shgan hissalari uchun shahar faollari va yoshlariga o‘z minnatdorchiligini bildirib, ularni erishgan yutuqlari bilan samimiy muborakbod etdi.
O‘tkazilgan tadbirda shahardagi yoshlarga oid davlat siyosatini amalga oshirish, shuningdek, mamlakatimizda hamda xalqaro maydonlarda o‘tkazib kelinayotgan sport musobaqalari va fan olimpiadalarida yuqori o‘rinlarni egallab, Respublikamiz miqyosida shahrimiz mavqei yuqori bo‘lishida o‘z hissasini qo‘shib kelayotgan faol yoshlar, yoshlarning huquq va manfaatlarini himoya qilish hamda ijtimoiy-iqtisodiy muammolarini tizimli hal etishdagi fidokorona mehnatlari uchun hamkor tashkilotlar va sektor rahbarlari turli nominatsiyalar bo‘yicha taqdirlandilar.
Agentlik shahar bo‘limining ijtimoiy tarmoqlardagi sahifalarida o‘tkazilgan so‘rovnomalar natijasiga ko‘ra,
“Yilning eng yaxshi oliy ta’lim muassasasi”,
“Yilning eng yaxshi professional ta’lim muassasasi”,
“Yilning eng yaxshi maktabi”
“Yil o‘qituvchisi”,
“Yil talabasi”,
“Yilning eng faol hamkor tashkiloti” va boshqa shu kabi nominatsiyalar bo‘yicha eng munosiblar Farg‘ona shahar hokimining tashakkurnoma va faxriy yorliqlari hamda esdalik sovg‘alari bilan taqdirlandi.
Ma’lumki, joriy yil davomida Farg‘ona shahri yoshlarga oid davlat siyosatini amalga oshirishda yuqori ko‘rsatkichlarga erishib, Respublika miqyosida eng yuqori o‘rinlarda TOP-10 talikda yilni yakunlashga erishdi.
Mana shunday yuqori ko‘rsatkichlarga erishish va yoshlar muammolarini hal qilishda mavjud sektor rahbarlarining alohida o‘rni bor.
Shu munosabat bilan, Yoshlar ishlari agentligi direktori Alisher Sa’dullaev tomonidan imzolangan “Tashakkurnoma”lar shahardagi 4 ta sektor rahbarlariga tantanali ravishda topshirildi.
Farg‘ona shahri yoshlari 2022 yilni ilm-fan, sport, san’at, madaniyat va boshqa barcha sohalarda ulkan yutuqlar bilan muvaffaqiyatli yakunlab, ularning eng munosiblari e’tirof etildi va taqdirlandi.
Yoshlar ishlari agentligi Farg‘ona shahar bo‘limi axborot xizmati
Telegram | Facebook |
