Sherzodjon Yuldashev, Ziyokor ko'chasi 98-uy, Yaypan (2026)

24/02/2025

Qudash mahallasida ham tibbiyot punkti ish boshladi

O‘zbekiston tumani “Qudash” mahalla fuqarolar yig‘ini vakillarining murojaatlarini qanoatlantirish va hududda aholiga ko‘rsatilayotgan tibbiy xizmat sifatini yaxshilash maqsadida mahallada tibbiyot punkti o‘z faoliyatini boshladi.

73-sonli oilaviy poliklinika filiali sifatida ish boshlagan tibbiyot maskanida bugunning o‘zida tuman markazidan kelgan shifokor mutaxassislar tomonidan mahalla aholisi uchun tibbiy ko‘rik tashkil etildi.

Tuman hokimi Sherzodjon Yuldashev va tuman Ichki ishlar bo‘limi boshlig‘i Sodirjon Abdullayev jarayonlarda ishtirok etib, mahalla nuroniylari hamda soha mutaxassislari bilan suhbatlashdi. Mutasaddilarga muassasa faoliyatini yanada takomillashtirish, mahalla ahli uchun shifokorlarning doimiy ko‘rigini ta’minlash yuzasidan qo‘shimcha zaruriy ko‘rsatmalar berildi.

Endilikda “Qudash” mahalla tibbiyot punkti hududdagi 3 ming 300 nafarga yaqin aholiga tibbiy xizmat ko‘rsatadi. Bir k***a 50 nafargacha fuqaro qabuliga mo‘ljallangan punktda kasallik aniqlangan bemorlar dispanser nazoratiga olinib, tibbiy davolanishga yo‘llanadi.

22/02/2025

O‘zbekiston tumanida kun-u tun ishlaydigan savdo va xizmatlar uchun maxsus ko‘chalar soni ortib bormoqda

Xususan, tumanning Alisher Navoiy shoh ko‘chasida, “O‘zbekiston” o‘yingohiga tutash manzilda tashkillangan ana shunday markaz faoliyati yanada takomillashtirilmoqda.

Tuman markazidagi yana bir maskan - Ulug‘bek ko‘chasida xuddi shunday kun-u tun faoliyat yurituvchi savdo va xizmat ko‘rsatish majmuasi barpo etilib, uning faoliyati ham yanada kengaytirilmoqda.

Xizmat ko‘rsatish va savdo obyektlarining barchasi haftada 7 kun, 24 soat aholiga xizmat ko‘rsatishi belgilangan.

21/02/2025

Sho‘rqishloq mahallasi “og‘ir hudud” toifasidan chiqarilib, tomorqachilikda ham namunali maskanga aylantiriladi

O‘zbekiston tumanidagi “Sho‘rqishloq” mahallasi ham “og‘ir hudud” toifasiga kiritilib, hududdagi infratuzilma bilan bog‘liq mavjud muammolarni bartaraf etish, bu orqali esa aholi turmush farovonligini yaxshilash yuzasidan 2025 yilga mo‘ljallangan manzilli dastur ishlab chiqilgan.

Drayver sohasi dehqonchilik, supurgichilik va chorvachilik bo‘lgan mahalla o‘ramidagi 710 tadan ziyod xonadonda 3 ming 700 dan ortiq aholi vakillari istiqomat qiladi. Mavjud xonadonlarning tomorqa maydoni qariyb 44 gektarni tashkil etadi.

Tuman hokimi Sherzodjon Yuldashev bugun ayni mahallada bo‘lib, aholi bandligini ta’minlash va daromadini oshirish, kambag‘allikni qisqartirish, tadbirkorlikni rivojlantirish, tomorqalardan samaralari foydalanish borasida amalga oshirilayotgan ishlar holati bilan tanishdi.

Qayd etish joiz, mahallani “og‘ir hudud” toifasidan chiqarish maqsadida belgilangan manzilli dasturga ko‘ra hududda tomorqalarni sug‘orish uchun drenaj tizimini tashkil etish, elektr ta’minoti va yo‘l infratuzilmasini yaxshilash hamda boshqa bunyodkorlik tadbirlarini amalga oshirish rejalashtirilgan. Buning uchun 3,1 mlrd so‘mdan ziyod mablag‘ sarflanishi ko‘zda tutilgan.

Tuman rahbari aholi vakillari va nuroniylar bilan muloqotlarda ana shu xayrli rejalar tafsilotlari haqida ma’lum qildi.

Aholi xonadonlarida bo‘lib tomorqalardan samarali foydalanish, boshlangan bahorga tayyorgarlik yumushlarining borishini ko‘zdan kechirdi. Tajribali tomorqachilar va sohani endi astoydil boshlagan yoshlar vakillarining faoliyati, tashkil etilgan issiqxonalar natijadorligi o‘rganildi.

Xonadon egalari bilan suhbatlarda tomorqadan samarali foydalanish orqali har bir xonadon yaxshigina daromad topishi mumkinligi, yerning har qarichi - qimmatli manba ekanligi haqida tushuntirishlar berildi. Bu borada haligacha yetarli ish tashkil etmay, tomorqasiga befarq qarayotgan xonadon vakillari qarashlarini o‘zgartirish haqida mahalla faollariga zaruriy ko‘rsatmalar berildi.

Kommunal idoralar mutasaddilari hamrohligida esa aholi murojaatlari asosida mahalla infratuzilmasini yaxshilashga doir qo‘shimcha vazifalar ijrosi muhokama qilindi. Mas’ullarga hududda amalga oshiriladigan obodlik tadbirlari haqida aniq vazifa-topshiriqlar yuklatildi.

21/02/2025

Baynalmilal jangchi-faxriylar e’zozlandi

Qo‘shni Afg‘oniston hududida tinchlikni ta’minlash maqsadida 1979 yil 25 dekabrda boshlangan harbiy harakatlar 1989 yil 15 fevral kuni Hayraton ko‘prigi orqali qo‘shinlarning olib chiqib ketilishi bilan yakun topgan edi.

Qariyb o‘n yil davom etgan harbiy harakatlar chog‘ida O‘zbekistondan 65 ming nafarga yaqin askar ishtirok etib, ulardan 1520 nafari halok bo‘lgan, 2,5 mingga yaqini og‘ir tan jarohatlarini olganlar.

Afg‘on zaminida tinchlik va barqarorlikni ta’minlash uchun O‘zbekiston tumanidan mingdan ziyod askar jalb etilgan. Ayni kunlarda ulardan 650 nafardan ziyodi o‘z oilalari bag‘rida, tinch yurtimizda farovon hayot kechirmoqda.

Sochtepa mahallasidagi “O‘zbegim” tantanalar majmuasida bo‘lib o‘tgan O‘zbekiston "Veteran" faxriy jangchilar va nogironlari birlashmasi tashkil topganligining 31 yilligi hamda Afg‘oniston hududidan harbiy qo‘shinlar cheklangan kontingentini olib chiqilganligining 36 yilligiga bag‘ishlangan madaniy-ma’rifiy tadbirda mard baynalmilalchi tumandoshlarimizga ehtirom ko‘rsatildi.

Tuman hokimligi tashabbusi bilan tashkillangan tadbirda tuman sektor rahbarlari, Mudofaa ishlari bo‘limi mutasaddilari, davlat va jamoat tashkilotlari vakillari ishtirok etdi. Unda so‘z olgan tuman hokimi Sherzodjon Yuldashev dunyoda hech qachon urush bo‘lmasligi, ona vatanimiz va butun yer yuzida hamisha tinchlik, farovonlik hukm surishini tilab, qo‘shni elda tinchlik uchun kurashgan o‘g‘lonlar hamisha e’zozda ekanligini ta’kidladi.

Bu urushdan ko‘plab oilalar aziyat chekkani va mard yigitlarning janglardagi jasoratlarini eslandi. Afg‘on urushida halok bo‘lganlar xotirasi yodga olindi.

Faxriylarning bir guruhiga maxsus medallar va tuman hokimligining esdalik sovg‘alari topshirildi.

Tadbir tumanimiz san’atkorlari tomonidan tayyorlangan konsert dasturi bilan davom etdi.

21/02/2025

Fuqarolar qabuli muammolar yechimiga xizmat qilmoqda

Bugun O‘zbekiston tumani hokimligida tuman sektor rahbarlarining fuqarolar bilan navbatdagi qabuli bo‘lib o‘tdi.

Aholi bilan ochiq muloqotni ta’minlash, ularni qiynab kelayotgan muammolarni aniqlash va bartaraf etish maqsadida tashkillangan qabulda tuman hokimi Sherzodjon Yuldashev boshchiligidagi sektor rahbarlari va O‘zbekiston Prezidentining tumandagi Xalq qabulxonasi mudiri jismoniy va yuridik shaxslarning murojaatlarini o‘rgandi.

Qabul ishtirok etgan hamyurtlarimizning tomonidan bildirilgan qirqqa yaqin turli yo‘nalishdagi masalalar atroflicha ko‘rib chiqildi.

Shu kuni fuqarolardan aksariyat uy-joy olish yoki mavjudini ta’mirlash, bandlik, davolanish, moddiy yordam, tadbirkorlikni rivojlantirish, mahalla infratuzilmasini yaxshilash, aliment va kadastr kabi masalalarga oid murojaatlar kelib tushdi.

Muammolarning ba’zilarini qabul vaqtida ijobiy hal etishga erishildi. Ijrosi muddat va qo‘shimcha o‘rganishni talab etadigan murojaatlar yuzasidan esa mutasaddilarga aniq ko‘rsatmalar berilib, ijrosi nazoratga olindi. Qonuniy yechimga ega bo‘lmagan masalalar bo‘yicha ham tushuntirish va huquqiy maslahatlar berildi.

21/02/2025

Ayni paytda O‘zbekiston tumani hokimligi binosida tuman hokimi Sherzodjon Yuldashev boshchiligidagi sektor rahbarlarining jismoniy va yuridik shaxslar murojaatlari bo‘yicha sayyor qabuli boshlandi.

Aholi bilan to‘g‘ridan-to‘g‘ri muloqot qilish, ularni qiynab kelayotgan muammolarni aniqlash va hal etish maqsadida tashkillangan navbatdagi qabul davom etmoqda.

20/02/2025

Buvijonlar maktabi-ibrat maktabi

Nuroniy onaxonlarni ijtimoiy hayotga jalb etish orqali ularning boy hayotiy tajribasidan keng foydalanish maqsadida O‘zbekiston tumanida “Buvijonlar maktabi” faoliyat ko‘rsatib kelmoqda.

Yaypandagi “Nuroniylar maskani”da ana shu ibrat maktabi a’zolari ishtirokida navbatdagi uchrashuv bo‘lib o‘tdi. Ma’rifiy tadbir davomida doshqozonda tabiatning bahoriy ne’mati-sumalak pishirildi.

Uchrashuvda tuman hokimi Sherzodjon Yuldashev sektor rahbarlari hamrohligida ishtirok etib, kayvoni onaxonalar bilan suhbat qurdi.

Muloqotlarda keksa onaxonlarning boy hayotiy tajribasidan samarali foydalanib, oilalar va mahallalarda ijtimoiy-ma’naviy muhitni barqarorlashtirish, mahalla va ta’lim muaassasalarida yoshlarni mustaqil hayotga tayyorlash, yosh oilalar o‘rtasida ajrimlarning oldini olish hamda xotin-qizlarni milliy odob va urf-odatlar ruhida tarbiyalashdek muhim jihatlar haqida so‘z bordi.

20/02/2025

Sessiya ishida muhim masalalar muhokama etildi

Bugun tuman hokimligi majlislar zalida Xalq deputatlari O‘zbekiston tuman Kengashining yettinchi chaqiriq navbatdagi beshinchi sessiyasi bo‘lib o‘tdi.

Unda Xalq deputatlari tuman Kengashi deputatlari, tuman hokimi Sherzodjon Yuldashev, tuman hokimining tegishli o‘rinbosarlari, kun tartibiga kiritilgan masalaga aloqador davlat va jamoat tashkilotlari rahbarlari ishtirok etdilar.

Sessiya ishida dastlab, o‘tgan 2024 yil davomida investisiya, eksport va xalqaro hamkorlik yo‘nalishlari bo‘yicha tumanda belgilangan ustuvor vazifalari ijrosi yuzasidan tuman hokimining investisiya masalalari bo‘yicha o‘rinbosari Jaxongir Akramovning hisoboti tinglandi.

Shuningdek, sessiyada davlatimiz rahbarining 2025 yil 17 yanvardagi “2025 yilda aholi bandligini ta’minlash va kambag‘allikni qisqartirish chora-tadbirlari to‘g‘risida”gi PQ-12-sonli qarori ijrosi doirasida tumanning ayni yo‘nalishdagi maqsadli ko‘rsatkichlari muhokama qilinib, 2025 yilda yangi ish o‘rinlarini tashkil etish va aholini bandligiga ko‘maklashish dasturi tasdiqlandi.

Navbatida, tumanda davlat organlari va tashkilotlarining norma ijodkorligi faoliyati hamda huquqni qo‘llash amaliyotining holati to‘g‘risida tuman Adliya bo‘limi boshlig‘ining axboroti;

tuman maktabgacha va maktab ta’limi bo‘limi tomonidan 2024-2025 o‘quv yilining 1-yarim yilligida amalga oshirilgan ishlar to‘g‘risida;

tuman sektor ishchi shtablari va tashkilotlar rahbarlarining 2024 yilning 4-chorak yakuni bo‘yicha faoliyati hamda murojaatlar bilan ishlash samaradorligi to‘g‘risida tumandagi Xalq qabulxonasi mudirining axboroti;

Fuqarolar yig‘inlari raislari sayloviga tayyorgarlik ko‘rish va uni o‘tkazish chora-tadbirlari to‘g‘risida;

“O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish to‘g‘risida”gi O‘RQ-937-sonli O‘zbekiston Respublikasining Qonuni ijrosi yuzasidan tumanda amalga oshirilayotgan ishlar haqida;

O‘zbekiston tuman mahalliy byudjetining 2024-yilgi ijrosi to‘g‘risidagi masalalar ko‘rib chiqildi.

Kun tartibidagi har bir masala yuzasidan tegishli mas’ullarning hisobot va axborotlari tinglanib, deputatlar ishtirokida atroflicha muhokama qilindi.

Sessiya yakunida ko‘rib chiqilgan masalalar yuzasidan Xalq deputatlari tuman Kengashining tegishli qarorlari qabul qilindi.

19/02/2025

O‘zbekiston tumanida bahorgi ishlarga tayyorgarlik ko‘rish, chigit ekishni sifatli tashkil etish va g‘alla parvarishiga bag‘ishlangan ko‘rgazmali seminar o‘tkazildi

19/02/2025

Bahorgi mavsum dehqonchilik yumushlari oldidan ko‘rgazmali seminar o‘tkazildi

Bugun O‘zbekiston tumanida bahorgi ishlarga tayyorgarlik ko‘rish, chigit ekishni sifatli tashkil etish va g‘alla parvarishiga bag‘ishlangan ko‘rgazmali seminar bo‘lib o‘tdi.

Unda Farg‘ona viloyati prokurorining birinchi o‘rinbosari Mirzobedil Nazarov, tuman hokimi Sherzodjon Yuldashev boshchiligidagi sektor rahbarlari, qishloq xo‘jaligi sohasi mutasaddilari, paxta-to‘qimachilik va g‘allachilik klasteri mas’ullari, fermer, mexanizatorlar hamda nuroniylar qatnashdi.

Tadbir avvalida jonliq so‘yilib, Qur’on tilovati qilindi. Nuroniylar yurtimiz tinchligi va xalqimiz farovonligi, hosillar mo‘l-ko‘lchiligi, boshlanayotgan mavsumni xayrli va barokatli o‘tishini so‘rab duoga qo‘l ochdilar.

Bahorgi dala ishlarida qatnashadigan qishloq xo‘jaligi texnikalarini mavsumga tayyorlash borasida amalga oshirilgan ishlar bilan tanishildi.

Tumanda joriy yilda 4 ming 100 gektar maydonga chigit qadalishi rejalashtirilgan. Shu kunlarda 5 ming 600 gektar maydonda g‘alla parvarishlanmoqda. Chigit ekish ishlariga 120 ta chopiq traktorlari, 35 ta (shundan 20 tasi yuqori unumli) seyalka, 240 juft barana hamda boshqa turdagi texnika va agregatlar jalb qilinadi.

Seminarda tumanda qishloq xo‘jaligi sohasida o‘tgan yili erishilgan ijobiy natijalar bilan birgalikda yo‘l qo‘yilgan kamchiliklarni takrorlamaslik choralari haqida to‘xtalindi. Bunda soha xodimlari, xususan fermerlar oldida turgan dolzarb masalalar, lazerli texnikalar samarasi, chigitni 76 sm sxema asosida ekishga tayyorgarlik ko‘rish, maydonlarga o‘z vaqtida o‘g‘it berish va agrotexnik tadbirlarni to‘liq amalga oshirish orqali yuqori hosildorlikka hamda daromadga erishish imkoniyatlari to‘g‘risida so‘z bordi.

Fermer xo‘jaliklari dala maydonlarida zamonaviy agrotexnika vositalaridan foydalanish, g‘allani parvarishlash, sug‘orish va oziqlantirish masalalari muhokama qilindi. Yangi mavsum oldida turgan dolzarb vazifalardan kelib chiqib, tuman mas’ullariga zaruriy ko‘rsatmalar berildi.

Tadbir davomida ilg‘or mexanizatorlar va fermerlar sovg‘alar bilan rag‘batlantirildi.

14/02/2025

Milliy liboslar – o‘zligimiz ramzi

O‘zbek milliy liboslari - xalqimizning boy madaniy an’analari, millatimiz qiyofasi hisoblanib, turmush tarzimizning ham bir qismidir.

Uzoq tarixni bosib o‘tgan, ajdodlarimiz mafkurasi va dunyoqarashi haqida so‘zlaydigan milliy liboslarimizni saqlab qolish, targ‘ib etish va milliyligimizni unutmaslik esa barchamizning burchimizdir.

Ayniqsa, bugungi k***a milliy liboslar jozibasini yoshlar o‘rtasida keng targ‘ib etish g‘oyat muhim ahamiyat kasb etmoqda.

O‘zbekiston tumanida “Milliy liboslar – milliy qadriyatlar ko‘rki” shiori ostida milliy liboslar va milliylikning ijobiy ahamiyatini targ‘ib qilishga qaratilgan chellenj davom etmoqda.

14/02/2025

“Sektor rahbarlari va yoshlar uchrashuvi”da yigit-qizlar qo‘llab-quvvatlandi

O‘zbekiston tumanida yoshlarni har sohada qo‘llab-quvvatlash, ularning taklif va tashabbuslarini amalga oshirish masalasiga alohida e’tibor qaratilmoqda.

Bugun tuman Madaniyat markazida o‘tkazilgan “Sektor rahbarlari va yoshlar uchrashuvi”da ham shu haqida so‘z bordi. Tadbirda tuman sektor rahbarlari, yoshlar ishlari bo‘limi vakillari, “Yoshlar daftari”dagi yigit-qizlar va ularning ota-onalari, nuroniylar va yoshlar yetakchilari ishtirok etdi.

Ta’kidlandiki, o‘tgan 2024 yilda “Yoshlar daftari” jamg‘armasi hisobidan va boshqa manzilli dasturlar doirasida tumandagi 2 ming 100 nafardan ziyod yoshni qo‘llab-quvvatlash maqsadi uchun 1 mlrd 563 million so‘mdan ortiq mablag‘ yo‘naltirildi.

Joriy yilda ham “Yoshlar daftari”dagi yigit-qizlarni qo‘llab-quvvatlab, ularning orzu maqsadlarini ro‘yobga chiqarish yuzasidan aniq reja-tadbirlar belgilangan.

Tuman hokimi Sherzodjon Yuldashev ertamiz egalarining bandligini ta’minlash, ularni sifatli ta’lim bilan qamrab olish va ijtimoiy qo‘llab-quvvatlash yo‘lidagi harakatlar tumanda kelgusida ham ishonchli davom etishini bildirdi.

Ochiq muloqot tarzida kechgan uchrashuv davomida 12 nafar yoshning o‘z-o‘zini band qilish uchun zaruriy asbob-uskunalar, oliy ta’lim muassasalarida o‘qiyotgan 44 talabaning to‘lov shartnoma pullari va 3 nafar yoshga davolanish xarajatlari o‘z egalariga topshirildi.

Yoshlar vakillari shu kuni shoh va shoir, buyuk davlat arbobi Zahiriddin Muhammad Bobur tavalludining 542 yilligiga bag‘ishlangan adabiy-musiqiy kechada ham ishtirok etib, madaniyat bo‘limi ijodkorlari tomonidan tayyorlangan dasturdan bahramand bo‘ldilar.

Sherzodjon Yuldashev

24/02/2025

22/02/2025

21/02/2025

21/02/2025

21/02/2025

21/02/2025

20/02/2025

20/02/2025

19/02/2025

19/02/2025

14/02/2025

14/02/2025

Address

Website

Alerts

Contact The Organization

Shortcuts

Share

Category