30/09/2026
Miratohet buxheti i Komunës së Ferizajt për vitin 2027
Është mbajtur mbledhja e rregullt e Kuvendit të Komunës së Ferizajt. Hapjen e kësaj mbledhjeje e bëri kryesuesi i Kuvendit të Komunës, Xhavit Zariqi, ndërsa ka marrë pjesë edhe numri një i qytetit të Ferizajt, Agim Aliu, por edhe drejtorët e drejtorive komunale.
Në fillim të kësaj mbledhjeje, Visar Azemi nga Lidhja Demokratike e Kosovës dhe Brahim Osmani nga Lëvizja Vetëvendosje kërkuan që të bëhej ndryshimi i pikave të rendit të ditës. Ata kërkuan që pika e katërt e rendit të ditës të kalojë tek pika e shtatë e rendit të ditës, ndërsa kjo pikë të renditej si e katërta. Por kjo gjë nuk ndodhi dhe anëtarët e LDK-së dhe VV-së lëshuan sallën.
Bile, anëtarët e LDK-së, ndryshe nga subjektet e tjera politike të përfaqësuara në Kuvendin e Komunës, nuk e votuan edhe deklaratë, duke zgjedhur ta lëshojnë sallën në momentin kur Kuvendi po shprehte qëndrimin e tij lidhur me aktgjykimin e shkallës së parë të Dhomave të Specializuara të Kosovës.
Në hapjen e diskutimit për buxhetin komunal, Kryetari i Komunës së Ferizajt, Agim Aliu, ka thënë se në këtë seancë të fund-shtatorit, si rëndom në këtë hark vjetor buxhetor, në agjendë pune kanë dokumentin themelor të qeverisjes lokale, Projektbuxhetin e Komunës për vitin buxhetor 2027, si dhe planifikimin e hershëm për vitet pasuese.
Sipas tij, ky dokument nuk është thjesht i tillë, dokument që përmban përmbledhje shifrash, dokument shumëfaqësh, por në thelb e qëllimin parësor të tij ka sendërtimin e vizionit, pikëpamjen e Ferizajt të së ardhmes, duke gërshetuar e formuar në vetvete boshtin e investimeve kapitale që presin, kërkojnë, duan ferizajasit dhe Ferizaj.
“Duke qenë kështu, i rëndësisë kapitale e vendimtare për të ardhmen e Ferizajt e ferizajasve, ky projeksion buxhetor ndikon drejtpërdrejt në përditshmërinë e ferizajasve, në kërkesat që ata kanë, në nevojat e së ardhmes që koha i shpalos sot. Andaj, ne, ekipi ynë qeverisës, për t’i dhënë konturat këtij buxheti, dëgjuam qytetarët, pyetëm ata, përfshimë idetë e tyre, mbi të gjitha i dhamë drejtim projektimit e zgjidhjes së kërkesave që bartin nevojat komunitare. Ky volum i organizuar i punëve publike përfshin çdo lagje, çdo fshat e secilën zonë të Ferizajt në projeksionin vjetor e të viteve pasrendëse buxhetore. Aty është zëri i qytetarëve e mbi të gjitha bindja jonë se me guxim, me vizion, duke qenë të qëndrueshëm e të palodhshëm në angazhimin tonë publik, të bëjmë atë për të cilën morëm besim, atë që dëshmuam ndër vite se dimë, mundemi dhe ia dalim ta bëjmë më së miri – t’i shërbejmë ferizajasve, t’i sjellim Ferizajt vepra publike kapitale që nxisin hovet e zhvillimit të tij, siç po ndodh për gjithë këto vite. Natyrisht, përveç punëve publike që po jetësohen në harqe kohore të parashikuara me kontrata, projeksionin tonë buxhetor e pasuruam edhe me dhjetëra projekte të reja, me ide e nisma që janë përkthyer në objektiva tona të përditshme të punës”, është shprehur Aliu.
Ai tutje ka thënë edhe një të vërtetë që secili prej nesh e di, e ndjen dhe e sheh çdo ditë. Jo vetëm Ferizaj, por veçanërisht Ferizaj, po përballet me situata sfiduese në aspektin buxhetor, pa mbështetje siç meriton, me pengesa që trashin vështirësitë, por ne ju themi ferizajasve, me sinqeritetin më të plotë, me bindjen më të thellë, se askush dhe asgjë nuk mund ta ndalë hapërimin e Ferizajt shtigjeve të zhvillimit, ecjen tonë përpara siç meriton Ferizaj ynë.
“Dhe i themi PO: Do të rikthehet shpejt Ferizaj, do të vazhdojmë me punë e vepra të reja publike, ecim bashkë drejt asaj çfarë meritojmë, shërbejmë komunën tonë.
Janë të shumta nismat tona të punës, të cilat paraqiten detajisht e të përllogaritura në këtë projeksion buxhetor, shtrirë në kohë zbatimi e me buxhetet që kërkojnë, garanci kjo se ato do të realizohen, do të jetësohen, për t’i shërbyer ndër breza qytetin dhe fshatrat tona.
Buxheti i Komunës së Ferizajt për vitin 2027 arrin lartësinë në vlerën totale 56,102,329.00, e që, ndarë vetëm në fushën e investimeve kapitale, kemi 15,350,388 për projektet kapitale të Komunës së Ferizajt për vitin kalendarik 2027.
Me vendimmarrjen tuaj sot për këtë projeksion buxhetor, vendosim bashkë në kalendarin e punëve publike, projekte të reja, nisma me dobi direkte për qytetarët, për të mos u ndalur, për të mos njohur stagnimin në rrugëtimin tonë për Ferizajn që i takon gjeneratës tjetër. Në fokus patëm dhe kemi projektet e gjelbra si kryefjalë e mandatit tonë qeverisës, i cili përkthehet jo në fjalë, por në vepra të rëndësisë kapitale, masive të gjelbra, si zgjerimi i Parkut të Lirisë e Parku në Kodrën e Sherretëve, tashmë i përfunduar. Shto kësaj edhe parqet në zonat e ndryshme të qytetit, si Parku tek ish-KRM “Pastërtia”, si dhe Parku tek ish-Stacioni i Autobusëve, gati në përfundim, për të vazhduar po kështu edhe me mbjelljen e mijëra drunjve të rinj në zonën e qytetit që formësojnë një kurorë të gjelbër masive në zemër të qytetit tonë. Ferizajt të Gjelbër do t’i shtojmë edhe Parkun e Ri të Qytetit, si dhe ndërtimin e Bulevardit të Rinisë – kuarte e korridore këto të gjelbra që i japin identitet krejt të ri urban qytetit tonë”, tha Aliu.
Gjatë fjalës së tij, Kryetari i Ferizajt, Agim Aliu, është ndalur edhe tek infrastruktura e qytetit të Ferizajt.
“Në fushën e infrastrukturës rrugore, ku shkëlqeu e u shndërrua në referencë Ferizaj ynë përgjatë viteve, do të vazhdojmë me punë e projekte transformuese që japin dimensione të reja zhvillimi e çelin mundësi të shumëfishta për qytetarët e bizneset, shërbimet e investimet në të ardhmen.
Nga projektet që padyshim do të lënë gjurmë në fizionominë urbane të Ferizajt është ai i ndërtimit të shesh*t nga rruga “Madeleine Albright” deri tek Teatri i Qytetit – një vepër kjo e re identitare që i vishet trupit të transformuar të qytetit. Do të vazhdojmë me projektin e ri për ndërtimin e Unazës së Brendshme të Qytetit, që rrit mobilitetin e sigurinë, me kushte e standarde infrastrukturore model. Në këtë projeksion zënë vend të rëndësishëm edhe projektet që lidhin Ferizajn – zonën urbane me atë rurale dhe fshatrat me njëra-tjetrën, si asfaltimi i rrugës që lidh rrugën “Naim Beka” me rrugën “Epopeja e Jezercit”, rruga Manastirc-Pleshinë, rruga Zaskok-Ferizaj, rruga Varosh-Gurëz, rruga Prelez i Jerlive-Prelez i Muhaxherëve e dhjetëra projekte të asfaltimeve të rrugëve në fshatra si në Mirash, Balaj, Rakaj, Slivovë, Dremjak, Pleshinë, Komogllavë e pothuajse në të gjitha fshatrat e Komunës sonë, përfshirë edhe investimet në infrastrukturën nëntokësore, si në rrjetin e ujësjellësit dhe kanalizimit”, ka potencuar këto projekte numri një i qytetit të Ferizajt, Agim Aliu.
Ndërsa, sa i përket fushës së shëndetësisë, Aliu ka thënë se do të vazhdohet me ritmin e njëjtë në infrastrukturën shëndetësore, si përmes ndërtimit të objektit të ri të Qendrës Kryesore të Mjekësisë Familjare, ndërtimit të një QMF-je në qytet, QMF-ja nr. 12, si dhe Qendrat e Mjekësisë Familjare në Koshare dhe Rakaj, pa lënë anash edhe investimet në rritjen e cilësisë së shërbimeve përmes blerjes së aparaturave më të avancuara, si dhe fuqizimin e shërbimit të kujdesit paliativ.
“Në këtë spektër të investimeve parashohim edhe ndërtimin e shtëpisë për mbrojtjen e fëmijëve në Ferizaj – Qendër Burimore për Fëmijët me Nevoja të Veçanta, një projekt ky i rëndësisë së veçantë për fushën e mirëqenies sociale”, ka thënë Aliu.
Ndërsa, sa i përket fushës së arsimit, ai ka thënë se vazhdojnë me investimet infrastrukturore përmes ndërtimit të objekteve të reja shkollore, si në Manastirc, Varosh, Tërrn, duke i shtuar edhe hapësirat sportive ambienteve shkollore, si Salla e Sporteve për Gjimnazin “Dr. Shaban Hashani” dhe Shkollën e Mjekësisë “Elena Gjika”, Kompleksi për Sportin Shkollor në hapësirën e ish-Stadiumit “Ismet Shabani” e të tjera investime të kësaj natyre në shumë prej shkollave të fshatrave të Ferizajt.
“Po kështu, fokus të veçantë në këtë fushë do të ketë digjitalizimi, ku kemi në kalendarin e investimeve tona pajisjen e të gjitha dhomave të mësimit me tabela digjitale (smart board), blerjen e pajisjeve dhe rregullimin e kabineteve profesionale në shkolla, si dhe ndërlidhjen e bibliotekave të shkollave me bibliotekën e qytetit, një mundësi kjo për nxënësit që t’i qasen literaturës shpejt, lehtë dhe në formë digjitale. Komuna do të investojë edhe në rregullimin e hapësirave të përshtatshme për kopshtet për fëmijë, si dhe në ndërtimin e objekteve të reja të kopshteve për fëmijë, që do të përballonin kërkesat vazhdimisht në rritje të regjistrimit të fëmijëve në kopshte publike”, ka thënë Aliu.
Kryetari Aliu ka folur edhe për sferën e kulturës, rinisë dhe sportit.
“Në sferën e kulturës, rinisë dhe sportit, kemi në projeksionin tonë buxhetor tri projekte të reja, me rëndësi historike e të trashëgimisë kulturore për Ferizajn e gjithë trevën tonë: rikonstruktimi i Kompleksit Memorial të Dëshmorëve të UÇK-së në Ferizaj, projekti i ndërtimit të Kompleksit Muzeor “Hani i Ferizit”, një dëshmi kjo e kujtesës dhe historisë së qytetit tonë, si dhe ndërtimi i veprave skulpturale – identitet e simbole të zhvillimit të Ferizajt ndër periudha të ndryshme historike.
Në planin e infrastrukturës sportive parashihen projekte të shumta që i japin dhjetëra mijëra metra hapësira të reja sportive sportistëve dhe sportdashësve ferizajas. Janë projekte si ndërtimi i Palestrës së Re Sportive në qytet, ndërtimi i Stadiumit Ndihmës të Futbollit në Sazli, fushave ndihmëse në Saraishtë e Dardani, si dhe terrene e fusha sportive të shumta të shtrira në gjithë zonën urbane, ato që përmbushin synimet tona në këtë komponentë të rëndësishme të jetës shoqërore”, tha Aliu.
Tutje, Aliu ka folur edhe për planin e investimeve në bujqësi, zhvillimin e turizmit, por edhe në fushën e administratës, pronës, kadastrit e gjeodezisë, ku do të vazhdojnë përpjekjet, investimet e nismat tona për të modernizuar e digjitalizuar shërbimet, me qëllim rritjen e cilësisë, shpejtësisë dhe qasjes së qytetarëve në shërbimet komunale.
Pas fjalimit të Kryetarit Aliu, pati diskutime nga ana e pozitës, të cilët vlerësuan lart këtë buxhet.
Po ashtu, në këtë mbledhje u diskutua edhe propozim-vendimi për themelimin e panelit për përzgjedhjen e Komitetit Konsultativ. Në këtë panel do të jenë këta anëtarë:
Ndërkaq, drejtori i Drejtorisë së Shërbimeve Publike dhe Emergjencave, Alberton Sahiti, paraqiti propozim-vendimin për miratimin e raportit për vlerësimin e dëmeve të shkaktuara nga fatkeqësitë natyrore, raport ky që u miratua njëzëri.
Në mbledhje u diskutua edhe Raporti i Zyrës Kombëtare të Auditimit për efikasitetin dhe efektivitetin në procesin e ndërtimeve të larta në Komunën e Ferizajt.
Gjithashtu, drejtori Alberton Sahiti paraqiti propozim-vendimin për ndryshimin dhe plotësimin e Rregullores për Menaxhimin e Mbeturinave, si dhe propozim-vendimin me nr. 01.Nr.59, të datës 29.05.2026.
Ndërkaq, drejtori i Bujqësisë, Burim Bajrami, ka paraqitur edhe propozim-vendimin për bashkëfinancim me organizatën GLV “Bifurkacioni”.
