Komuna e Ferizajt

14/08/2026

"MASAKRA E TIVARIT” – FILMI QË RIKTHEN NË KUJTESË NJË NGA TRAGJEDITË E HISTORISË SONË

Në platën para IAAP “Zenel Hajdini”, sonte u shfaq premiera e filmit “Masakra e Tivarit”, me regji dhe skenar të Mentor Hazirit, një vepër që përmes gjuhës së filmit rikthen në vëmendje një nga ngjarjet më të dhimbshme të historisë sonë.

I konceptuar si film dokumentar me elemente të dramatizuara, “Masakra e Tivarit” ndërthur materiale dhe fotografi autentike, skena të interpretuara nga aktorët, rrëfimin historik, këngën dhe muzikën instrumentale, duke sjellë para publikut përmasat dhe tragjedinë e ngjarjes, në të cilën u vranë mijëra shqiptarë.

Mbrëmjes i dha një dimension të veçantë prania e aktorëve të filmit dhe e pjesëtarëve të tjerë të ekipit realizues, të cilët, së bashku me publikun, përjetuan premierën e kësaj vepre në Ferizaj.

Shfaqja e filmit u vlerësua si një kontribut i rëndësishëm në ruajtjen dhe përcjelljen e kujtesës historike, veçanërisht te brezat e rinj, për ngjarje që kanë lënë gjurmë të thella në historinë e popullit shqiptar.

Filmi “Masakra e Tivarit” është realizuar me mbështetjen e Ministrisë së Kulturës, ndërsa organizimi i shfaqjes premierë u mbështet nga Drejtoria për Kulturë, Rini dhe Sport në Ferizaj.

Mbrëmja u përmbyll me interpretimin e disa baladave në nderim të viktimave të Masakrës së Tivarit, duke i dhënë aktivitetit karakterin e një homazhi për të vrarët. Në fund, për të pranishmit u organizua edhe një koktej rasti.

13/08/2026

U hap kompleksi i ri banesor "Ferizaj i Ri" investim nga "Fitorja" sh.p.k.

Mbrëmë në një atmosferë festive, me pjesëmarrjen e qindra pjesëmarrësve nga fusha e politikës, biznesit, artit e kulturës, veprimtarë e personalitete të shquara, u bë hapja solemne e kompleksit të ri banesor "Ferizaj i Ri" investim ky që u realizuar nga gjigandi i ekonomisë ferizajase, Kompania "Fitorja" Shpk, me pronar emblemën e të bërit biznes e humanistit Tahir Maloku i cili gjithashtu mbrëmë shënoi 80 vjetorin e lindjes, ku mes emocionesh, një atmosfere fantastike u shënua ky përvjetor jubilar.

Nga Komuna e Ferizajt në këtë ngjarje morën pjesë Shefi i Kabinetit të Kryetarit, Albion Sherifi si dhe drejtorët e drejtorive komunale Afrim Llabjani, Alberton Sahiti dhe Balton Dërguti. Drejtori Llabjani uroi kompaninë "Fitorja" në këtë solemnitet duke u shprehur se kjo kompani dhe udhëheqja e saj, ishin gjithmonë pranë qytetarëve edhe në kohërat më të vështira, edhe në mbështetje të luftës çlirimtare si dhe pas luftës duke qenë faktor i rëndësishëm e promotor i zhvillimit ekonomik lokal e më gjerë.

12/08/2026

Aktivitete të shumta në Ferizaj për Ditën Ndërkombëtare të Rinisë

Me rastin e Ditës Ndërkombëtare të Rinisë, e cila shënohet më 12 gusht, në Ferizaj u organizua një program i pasur me aktivitete të dedikuara për të rinjtë, me fokus në promovimin e pjesëmarrjes, kreativitetit, bashkëpunimit dhe aktivizimit rinor.

Në kuadër të programit u zhvillua diskutimi me temën “Kontekste të ndryshme, aspirata të përbashkëta”, ku të rinjtë patën mundësi të ndajnë ide, përvoja dhe perspektiva të ndryshme.

Pjesë e aktiviteteve ishin edhe lojërat kreative dhe rekreative “Minute to Win It”, ndërsa të rinjtë u përfshinë edhe në aktivitete sportive si Co****le dhe futbolli amerikan, në bashkëpunim me pjesëtarë të KFOR-it.

Një moment i veçantë i programit ishte edhe promovimi i librit “Ringjallja e Heshtur”, vepër e të riut nga Ferizaj, Muhamed Murati, duke i dhënë hapësirë talentit dhe krijimtarisë së të rinjve.

Realizimi i këtyre aktiviteteve u mundësua në bashkëpunim dhe me mbështetjen e Ministrisë së Sportit dhe Rinisë – Departamentit të Rinisë dhe Drejtorisë për Kulturë, Rini dhe Sport të Komunës së Ferizajt – Sektorit të Rinisë.

Aktivitetet e organizuara shënuan një tjetër hap në krijimin e hapësirave të përshtatshme për të rinjtë, duke nxitur pjesëmarrjen aktive, bashkëpunimin dhe zhvillimin e potencialit të tyre në Ferizaj.

11/08/2026

11/08/2026

Ka filluar zgjerimi i Qendrës për Mbrojtjen e Grave dhe Fëmijëve “Shtëpia Ime” në Ferizaj

Gjatë këtyre ditëve ka filluar zgjerimi i Qendrës për Mbrojtjen e Grave dhe Fëmijëve “Shtëpia Ime” në Ferizaj, me qëllim të rritjes së kapaciteteve për strehimin, mbrojtjen dhe trajtimin e grave dhe fëmijëve viktima të dhunës në familje.

Sipas menaxheres së projektit, Gresa Kllokoqi, hapësira e re pritet të ndikojë ndjeshëm në rritjen e kapaciteteve të qendrës dhe në krijimin e kushteve më të përshtatshme për gratë dhe fëmijët që kanë nevojë për strehim, mbrojtje dhe mbështetje.

Ajo theksoi se zgjerimi i objektit do të krijojë kushte më të mira dhe më dinjitoze për trajtimin e rasteve, ndërsa një tjetër përfitim i rëndësishëm do të jetë edhe rritja e qëndrueshmërisë financiare të organizatës.

“Hapësira e re do të na mundësojë që të rrisim kapacitetin dhe, njëkohësisht, të krijojmë kushte më të mira dhe më dinjitoze për secilin rast që trajtojmë. Një përfitim tjetër shumë i rëndësishëm është edhe qëndrueshmëria financiare e organizatës. Deri tani, një pjesë e konsiderueshme e mjeteve tona është shpenzuar për pagesën e qirasë së objektit ku funksionon strehimorja, si dhe për shpenzimet e komunaleve. Me kalimin në objektin e ri, këto shpenzime do të zvogëlohen ndjeshëm, duke na mundësuar që mjetet që deri tani janë destinuar për qira dhe shpenzime të tjera të objektit t’i orientojmë drejtpërdrejt te përfituesit tanë. Këto mjete do të mund të përdoren për organizimin e më shumë aktiviteteve, programeve të fuqizimit dhe riintegrimit, trajnimeve profesionale, mbështetjes për fëmijët, si dhe për shërbime dhe aktivitete të tjera që ndikojnë drejtpërdrejt në mirëqenien dhe pavarësimin e grave dhe fëmijëve që trajtojmë”, është shprehur Kllokoqi.

Zgjerimi i Qendrës për Mbrojtjen e Grave dhe Fëmijëve “Shtëpia Ime” po financohet nga The Church of Jesus Christ of Latter-day Saints (Kisha e Jezu Krishtit e Shenjtorëve të Ditëve të Mëvonshme).
Projekti pritet të kontribuojë në përmirësimin e kushteve të qëndrimit dhe shërbimeve për gratë dhe fëmijët që kërkojnë strehim dhe mbështetje, si dhe në fuqizimin e programeve që synojnë riintegrimin dhe pavarësimin e tyre.

11/08/2026

Ferizaj i bashkohet nismës për ndryshimin e Kodit Penal

Qytetarë, zyrtarë komunalë dhe përfaqësues të shoqërisë civile mbështesin nismën legjislative qytetare të IKD-së.

Instituti i Kosovës për Drejtësi (IKD) ka nisur sot në Sheshin e qytetit në Ferizaj aktivitetin për mbledhjen e nënshkrimeve në kuadër të nismës legjislative qytetare për ndryshimin dhe plotësimin e Kodit Penal të Republikës së Kosovës.

Mbështetje për këtë nismë kanë dhënë edhe drejtues të Komunës së Ferizajt. Nënshkrimin e nismës e ka dhënë shefi i kabinetit të Kryetarit të Komunës së Ferizajt, Albion Sherifi, si dhe drejtorë të drejtorive komunale.

Nismën e kanë mbështetur gjithashtu qytetarë të shumtë të Ferizajt dhe përfaqësues të organizatave të shoqërisë civile, të cilët kanë vizituar stendën e IKD-së, janë informuar për qëllimet e saj dhe kanë dhënë nënshkrimet e tyre.

Përmes kësaj nisme propozohet që moszbatimi i qëllimshëm i vendimeve të Gjykatës Kushtetuese të përcaktohet si vepër penale, si dhe të ndalohet përdorimi i parasë publike për përfitim elektoral gjatë periudhave zgjedhore dhe parazgjedhore.

Sipas IKD-së, këto ndryshime synojnë forcimin e sundimit të ligjit, rritjen e përgjegjshmërisë institucionale dhe mbrojtjen e integritetit të procesit zgjedhor.

Aktiviteti për mbledhjen e nënshkrimeve në Ferizaj do të vazhdojë deri në orën 15:00.

11/08/2026

Inspektorati Komunal shqipton gjoba të tjera për hedhjen e mbeturinave në vende të paautorizuara

Inspektorati i Komunës së Ferizajt ka vazhduar aksionin ndaj personave që ndotin ambientin dhe hedhin mbeturina në vende të paautorizuara.

Sipas kryeinspektorit, Feriz Hyseni, janë shqiptuar edhe gjoba të tjera ndaj qytetarëve që kanë hedhur mbeturina në vende të papërcaktuara për këtë qëllim.

“Gjobat janë shqiptuar në rrugët ‘12 Qershori’, ‘Bilall Shala’ dhe ‘Imri Halili’. Persona të ndryshëm kanë hedhur mbeturina në vende që nuk janë të përcaktuara për hedhjen e tyre. Pas marrjes së informacionit, Inspektorati Komunal ka ndërmarrë masat përkatëse dhe ka shqiptuar gjoba ndaj personave përgjegjës”, ka thënë Hyseni.

Hyseni u ka bërë thirrje qytetarëve që të bashkëpunojnë me Inspektoratin Komunal dhe të raportojnë rastet kur vërejnë hedhje të mbeturinave në vende të papërcaktuara.

Ai ka theksuar se bashkëpunimi i qytetarëve është i rëndësishëm për ruajtjen e pastërtisë dhe mbrojtjen e ambientit në qytetin e Ferizajt.

09/08/2026

Libri, autorët dhe lexuesit bashkë në përmbylljen e Edicionit VIII të Panairit të Librit

Me një mbrëmje të pasur me promovime, bashkëbisedime dhe poezi, u përmbyll dita e katërt dhe njëkohësisht e fundit e Edicionit VIII të Panairit të Librit në Ferizaj.

Tri aktivitete letrare sollën para publikut autorë, vepra, poezi dhe publicistikë, duke e mbyllur këtë edicion me një program që i dha hapësirë librit dhe krijuesve ferizajas e më gjerë.

Programi i ditës nisi me prezantimin e një prej veprave të autorit Aid el-Karni, botuar nga Shtëpia Botuese “Dëshmia”. Në bashkëbisedimin me Ramadan Kashtanjevën, nga stafi i kësaj shtëpie botuese, u fol për veprën, mesazhin e saj, si dhe për veprimtarinë botuese të “Dëshmisë”.

Aktiviteti i dytë i kushtohej krijimtarisë së tri autoreve ferizajase: Idajete Imeri, Blerta Tmava Veselaj dhe Bulëza Hysenaj Ademi. Përmes bashkëbisedimit me udhëheqësen e aktivitetit, autoret prezantuan krijimtarinë e tyre, librat dhe rrugëtimin e tyre letrar. Për veprën e Bulëza Hysenaj Ademit foli edhe Alban Hajrushi, ndërsa poezi nga krijimtaria e Blerta Tmava Veselajt interpretoi Safet Syla.

Aktiviteti përmbyllës i mbrëmjes iu kushtua gazetarit dhe publicistit Nehat Islami, me promovimin e librit të tij më të ri, “Gjarpri ilir lidh shekujt”, botuar nga Botimet DRINI.

Për librin dhe krijimtarinë shumëvjeçare të autorit folën Xheladin Rexhepi dhe Rexhep Maloku, ndërsa u lexua edhe vlerësimi i Avni Halimit. Përmes shkrimeve të përmbledhura në këtë vëllim, libri sjell para lexuesit dekada të gazetarisë, kulturës dhe kujtesës historike shqiptare.

Promovimet dhe bashkëbisedimet e kësaj dite u udhëhoqën nga Zyrafete Shala.

Me këtë mbrëmje u përmbyllën aktivitetet letrare të Edicionit VIII të Panairit të Librit në Ferizaj. Përgjatë katër ditëve, panairi solli libra, autorë, botues dhe lexues në një hapësirë të përbashkët të komunikimit dhe shkëmbimit kulturor.

Edicioni i sivjetshëm dëshmoi edhe një herë se panairi është shumë më tepër se një hapësirë ku ekspozohen dhe promovohen libra. Ai është një vendtakim i autorëve, botuesve, lexuesve dhe të gjithë atyre që besojnë në vlerën e fjalës së shkruar dhe në rëndësinë e kulturës.

Klubi Letrar “De Rada” shpreh mirënjohjen dhe falënderimin për të gjithë autorët, botuesit, lexuesit, vizitorët dhe publikun që u bënë pjesë e këtyre katër ditëve, duke kontribuar në suksesin dhe mbarëvajtjen e Edicionit VIII të Panairit të Librit në Ferizaj.

07/08/2026

Mbahet takimi i përbashkët me anëtarët e Mekanizmit Koordinues Lokal për mbrojtje nga dhuna në familje, dhuna ndaj grave dhe dhuna me bazë gjinore

Me organizimin e Drejtorisë së Shëndetësisë dhe Mirëqenies Sociale mbështetur nga Rrjeti i Grave të Kosovës, sot u mbajt takimi i përbashkët me anëtarët e Mekanizmit Koordinues Lokal për mbrojtjen nga dhuna në familje, dhuna ndaj grave dhe dhuna me bazë gjinore. Gjatë takimit u prezantua raporti nga Qendra për Punë Sociale në Ferizaj mbi shërbimet sociale dhe rastet e dhunës në familje që marrin shërbime e po trajtohen nga QPS. Po kështu u diskutuan edhe hapat e përbashkët institucional në koordinimin e agjendave, aktiviteteve, hartimin e Planit të Përbashkët të Punës me qëllim parandalimin e rasteve të dhunës në familje si dhe adresimin institucional të këtyre rasteve konform legjislacionit në fuqi e veçanërisht Rregullores së veçantë të punës e veprimit të Mekanizmit Koordinues Lokal.

Drejtori i Drejtorisë së Shëndetësisë dhe Mirëqenies Sociale, Dr. Kemajl Emini në fjalën e tij tha se funksionalizimi i Mekanizmit Koordinues Lokal paraqet platformën e gjithë zinxhirit institucional lokal për adresimin e rasteve të dhunës.

Në fjalën e tij, shefi i Kabinetit të Kryetarit të Komunës së Ferizajt, Albion Sherifi, theksoi rëndësinë e këtij Mekanizmi, duke vlerësuar se funksionalizimi dhe bashkëpunimi ndërinstitucional janë thelbësor për ofrimin e mbrojtjes dhe mbështetjes efektive për viktimat e dhunës.

Në këtë takim morën pjesë akterë të shumtë institucional si nga Gjykata Themelore në Ferizaj, Prokuroria Themelore në Ferizaj, Mbrojtësi i Viktimave, Drejtoria Rajonale e Policisë në Ferizaj, Qendra për Punë Sociale, Rrjeti i Grave të Kosovës, Strehimorja "Shtëpia ime", Zyra e Punësimit, Qendra Kryesore e Mjekësisë Familjare, Qendra e Shëndetit Mental, Agjencia për Ndihmë Juridike Falas, Qendra e Aftësimit Profesional, OSBE, organizata "Down Syndrome Kosova" - Dega në Ferizaj e organizata të shoqërisë civile etj.

Gjatë diskutimeve u theksua rëndësia e bashkëpunimit ndërinstitucional dhe angazhimit të përbashkët të institucioneve, shoqërisë dhe komunitetit për parandalimin e dhunës, mbrojtjen e viktimave duke paraqitur rekomandime për masat e përbashkëta praktike në parandalimin dhe adresimin e këtyre rasteve.

07/08/2026

Takimi B2B në Ferizaj forcon lidhjet mes bizneseve vendore dhe diasporës për eksport në tregun evropian

Drejtoria e Zhvillimit Ekonomik dhe Turizmit në Ferizaj, në bashkëpunim me Odën Ekonomike të Kosovës, ka organizuar një takim ndërmjet afaristëve nga Ferizaj dhe rajoni, si dhe biznesmenëve që veprojnë në diasporë. Qëllimi i këtij takimi ishte forcimi i bashkëpunimit, nxitja e investimeve dhe krijimi i mundësive për plasimin e prodhimeve vendore në tregun e Bashkimit Evropian.

Drejtori i Zhvillimit Ekonomik dhe Turizmit në Ferizaj, Balton Derguti, tha se takimi tradicional B2B synon të krijojë ura bashkëpunimi mes bizneseve vendore dhe atyre të diasporës.

“Takimi tradicional B2B që organizohet me diasporën dhe bizneset e Ferizajt ka për qëllim t’i lidhë këto biznese mes vete, në mënyrë që shumë produkte të ndërmarrjeve të komunës së Ferizajt të eksportohen në tregun evropian përmes bashkatdhetarëve tanë që jetojnë dhe veprojnë në diasporë”, u shpreh Derguti.

Kryetari i Odës Ekonomike të Kosovës, Lulzim Rafuna, theksoi se diaspora shqiptare mbetet një faktor kyç në promovimin dhe depërtimin e produkteve vendore në tregjet e Bashkimit Evropian.

“Sot, me mbështetjen e Caritas-it, do ta lansojmë për herë të parë një platformë, përmes së cilës bizneset do ta kenë mundësinë të bashkëpunojnë në mënyrë virtuale”, tha Rafuna.

Afaristët pjesëmarrës u shprehën se takime të tilla krijojnë mundësi më të mëdha për njohje reciproke, zgjerim të rrjetit të bashkëpunimit dhe zhvillim të partneriteteve të reja afariste.

Takimi është tashmë tradicional dhe organizohet në kuadër të Ditëve të Mërgatës që mbahen në Ferizaj. Me këtë rast u prezantua edhe platforma e re e Odës Ekonomike të Kosovës, ku bizneset dhe afaristët nga diaspora mund të regjistrohen për të krijuar lidhje bashkëpunimi me kompanitë vendore dhe për të zhvilluar projekte të përbashkëta.