08/09/2026
Asambleja Komunale e Fëmijëve në Pejë zhvilloi takimin e parë të rregullt për mandatin 2026–2028
Me fillimin e mandatit të ri 2026–2028, Asambleja Komunale e Fëmijëve në Pejë zhvilloi takimin e parë të rregullt të përbërjes së re, me pjesëmarrjen e 25 asambleistëve. Takimi u organizua nga Komuna e Pejës – Zyra për Mbrojtjen e Fëmijëve dhe Riintegrim (ZMFR), në bashkëpunim me AKF-në dhe me mbështetjen e OJQ-së “Syri i Vizionit”.
Seancën e hapi Morena Mema, Kryetare e AKF-së, e cila u uroi mirëseardhje asambleistëve dhe u dëshiroi suksese në mandatin e ri. Drita Krasniqi, zyrtare për Mbrojtjen e Fëmijëve dhe Riintegrim, i uroi asambleistët për fillimin e punës dhe për vitin e ri shkollor, ndërsa i njoftoi për rolin, përgjegjësitë dhe mundësitë që kanë si anëtarë të AKF-së, duke prezantuar edhe Manualin për Funksionimin e Asamblesë.
Në takim, Teuta Uka Qavdarbashi, përfaqësuese e OJQ-së “Syri i Vizionit”, prezantoi mbështetjen që organizata do të vazhdojë t’i ofrojë AKF-së, veçanërisht në avokimin e çështjeve të fëmijëve dhe përmes trajnimeve.
Një nga pikat kryesore ishte organizimi i katër komisioneve të AKF-së, për secilin prej të cilëve u përzgjodhën nga katër anëtarë: Komisioni për Bashkëpunim me shkollat dhe komunitetin, Komisioni për Sport dhe Kulturë, Komisioni për Veprime Humanitare dhe Komisioni për Informim.
Vëmendje e veçantë iu kushtua kërkesave të fëmijëve për Buxhetin Komunal të vitit 2027. Asambleistët kërkuan përfshirjen e prioriteteve të tyre në planifikimin buxhetor, përfshirë përmirësimin e kushteve dhe sigurisë në shkolla, higjienën, teknologjinë informative, mbështetjen për fëmijët me nevoja të veçanta dhe hapësirat për fëmijët. Në veçanti, ata kërkuan krijimin e një linje të veçantë buxhetore për fëmijët, për realizimin e prioriteteve të identifikuara nga vetë fëmijët dhe të aktiviteteve të AKF-së.
Gjatë takimit u diskutua edhe për trajnimin “Buxhetimi i Ndjeshëm ndaj Fëmijëve në Nivel Komunal”, ndërsa në fund Kryetarja e AKF-së, Morena Mema, falënderoi OJQ-në “Syri i Vizionit” për organizimin e trajnimit dhe për mbështetjen e vazhdueshme ndaj Asamblesë.
Në kuadër të mbështetjes së punës së AKF-së, Komuna e Pejës – Drejtoria e Administratës/ZMFR, pajisi asambleistët me Manualin e AKF-së, fletore pune, stilolapsa, maica dhe materiale të tjera informuese e promovuese.
Takimi shënon fillimin e punës së përbërjes së re të AKF-së për mandatin 2026–2028, me synim forcimin e zërit dhe pjesëmarrjes së fëmijëve në vendimmarrje, veçanërisht në çështjet që ndikojnë drejtpërdrejt në mirëqenien dhe zhvillimin e tyre.
