04/08/2026
Gratë fuqizohen kur u krijohen mundësi. Komuniteti zhvillohet kur mbështetet prodhimi vendor.
Sot, në Sheshin e Qytetit në Pejë, u hap Panairi i Produkteve Pyjore Jodrusore, Bimëve Mjekësore dhe Aromatike, si dhe Produkteve të Bletarisë, i organizuar nga Zyra për Barazi Gjinore e Komunës së Pejës, në bashkëpunim me CNVP Foundation, përmes projektit SUNREED, mbështetur nga Ambasada Suedeze.
Ky panair përfaqëson një hap konkret drejt fuqizimit ekonomik të grave, duke krijuar një hapësirë ku puna, përkushtimi dhe produktet e tyre vendore promovohen dhe vlerësohen.
Në këtë panair, 22 gra dhe vajza nga zona të ndryshme prezantojnë produktet e tyre, duke dëshmuar potencialin e madh të grave prodhuese dhe rëndësinë e sipërmarrjes së tyre në zhvillimin ekonomik lokal.
Ky aktivitet u realizua përmes bashkëpunimit të vazhdueshëm me CNVP Foundation, një partner i rëndësishëm në mbështetjen e iniciativave që promovojnë fuqizimin ekonomik të grave, zhvillimin rural dhe promovimin e produkteve vendore.
Në hapjen e panairit morën pjesë Kryetari i Komunës së Pejës, z. Gazmend Muhaxheri, përfaqësues të CNVP Foundation, Drejtorisë për Bujqësi, Pylltari dhe Zhvillim Rural, si dhe përfaqësues të institucioneve e partnerëve të tjerë.
🙏 Mirënjohje e veçantë për CNVP Foundation për bashkëpunimin dhe mbështetjen, për bletaren Ardita Kastrati për angazhimin dhe kontributin e saj, për 22 gratë dhe vajzat pjesëmarrëse që prezantojnë me krenari produktet e tyre, si dhe për qytetarët që me praninë e tyre mbështesin prodhimin vendor.
Panairi do të jetë i hapur deri në orët e mbrëmjes. Ftojmë të gjithë qytetarët ta vizitojnë dhe të mbështesin gratë sipërmarrëse dhe ekonominë lokale.
Kur zgjedhim produktin vendor, mbështesim një grua, një familje dhe zhvillimin e komunitetit tonë. 🌿
Komuna e Pejës
