Komuna e Prizrenit

04/06/2026

Kryetari Shaqir Totaj takoi sot një delegacion të lartë nga institucionet financiare ndërkombëtare, i cili po qëndron në Kosovë në kuadër të Konferencës Rajonale për Kripto-Asetet dhe Paranë Digjitale, të organizuar nga Banka Qendrore e Republikës së Kosovës.

Delegacioni udhëhiqej nga Tobias Adrian, Këshilltar Financiar dhe Drejtor i Departamentit të Tregjeve Monetare dhe të Kapitalit në Fondin Monetar Ndërkombëtar (FMN), të cilët Kryetari Totaj i njoftoi për potencialin e Komunës së Prizrenit në fushën e zhvillimit dhe inovacionit.

Gjatë vizitës, mysafirët i panë edhe vlerat historike, kulturore dhe turistike të qytetit të Prizrenit.

04/06/2026

Kryetari Shaqir Totaj priti sot profesorin amerikan, Carl Canlas, nga “Utah Valley University”, ekspert në fushat e Sigurisë Kibernetike, Inteligjencës Artificiale dhe Menaxhimit, i cili ka qenë i angazhuar në Universitetin e Prizrenit “Ukshin Hoti” si ekspert për përdorimin etik të inteligjencës artificiale, ku ka mbajtur ligjërata dhe prezantime për studentët, me ç’rast prezantim të ngjashëm ka zhvilluar edhe në Këndin Amerikan me të rinjtë dhe vullnetarët.

Gjatë takimit u diskutua për rëndësinë e përdorimit të përgjegjshëm të inteligjencës artificiale në institucione dhe arsim, si dhe për ekspertizën e tij në hartimin e rregulloreve institucionale që promovojnë përdorimin etik dhe të sigurt të kësaj teknologjie.

Kryetari Totaj e falënderoi z. Canlas për kontributin e dhënë në avancimin e njohurive dhe praktikave moderne në fushën e inteligjencës artificiale dhe për mbështetjen ndaj komunitetit akademik dhe të rinjve në Prizren.

04/06/2026

03/06/2026

Kryetari Shaqir Totaj mori pjesë sot në hapjen e Ekspozitës Mobile Kulturore të përgatitur nga Organizata “Voice of Roma, Ashkali and Egyptians” (VoRAE) e cila është realizuar me qëllim të promovimit të historisë, kulturës, traditave dhe kontributit të komuniteteve rom, ashkali dhe egjiptian në Kosovë.

Në kuadër të ekspozitës janë prezantuar 20 pano ekspozuese, tri veshje tradicionale të komuniteteve si dhe artefakte kulturore e materiale multimediale.

Ekspozita do të qëndrojë e hapur për vizitorë deri më 10 qershor 2026 në hapësirat e Shtëpisë së Kulturës “Xhemajli Berisha” në Prizren.

03/06/2026

Kryetari Shaqir Totaj, së bashku me Ambasadorin e Bullgarisë në Kosovë, Sh.T. Hristo Kraevski, përuruan sot qendrën e rinovuar shëndetësore dhe fushën e basketbollit në shkollën fillore të Lubinjës së Epërme, investime të realizuara me mbështetjen e Ambasadës së Bullgarisë në Prishtinë.

Ky donacion ka përmirësuar kushtet për nxënësit dhe banorët e zonës, duke kontribuar në avancimin e infrastrukturës arsimore, sportive dhe shëndetësore në komunitet.

"Falënderojmë Ambasadën e Bullgarisë për partneritetin dhe mbështetjen e vazhdueshme në projekte që ndikojnë drejtpërdrejt në mirëqenien e qytetarëve tanë" - u shpreh Kryetari Totaj.

02/06/2026

Mbahet mbledhja e radhës e Kuvendit të Komunës së Prizrenit

Kryesuar nga Kryesuesi i Kuvendit, Simir Krasniqi, në prani të anëtarëve të Kuvendit dhe monitoruesve e mediave, u mbajt sot mbledhja e rregullt e Kuvendit të Komunës së Prizrenit.

Gjatë kësaj mbledhjeje u shqyrtuan dhe miratuan këto pika të cilat i ka rekomanduar Komiteti për Politikë dhe Financa (KPF):

1. Shqyrtimi dhe miratimi i procesverbalit të mbledhjes së rregullt të datës 30 mars 2026;
2. Shqyrtimi dhe miratimi i Rendit të Ditës;
3. Pyetjet e kuvendarëve dhe ngritja e çështjeve të ndryshme;
4. Shqyrtimi dhe miratimi i propozim-vendimit për subvencionimin e transportit urban;
5. Shqyrtimi dhe miratimi i draft-rregullores për menaxhimin e mbeturinave në Komunën e Prizrenit;
6. Shqyrtimi dhe miratimi i projekt-planit komunal për ri integrim të qëndrueshëm të personave të riatdhesuar dhe integrimin e të huajve në Komunën e Prizrenit 2026-2028;
7. Shqyrtimi dhe miratimi i propozim-vendimit për formimin e grupit punues për hartimin e Rregullores së Punës së Kuvendit të Komunës së Prizrenit;
8. Informatë mbi gjendjen e barazisë gjinore dhe realizimin e objektivave të strategjisë komunale për Barazi Gjinore 2024–2026 në Komunën e Prizrenit;
9. Propozim-vendim për ndryshimin dhe plotësimin e vendimit nr.001/011-52028 i datës 30 prill 2026, për bartjen e mjeteve të tejkaluara dhe të pashpenzuara nga të hyrat vetanake të vitit 2025 në vitin 2026.

02/06/2026

𝐍𝐉𝐎𝐅𝐓𝐈𝐌

Drejtoria Komunale e Arsimit ka hapur konkursin për ndarjen e bursave për studentët e Komunës së Prizrenit, për vitin akademik 2025/2026.

Detajet e konkursit dhe aplikacionin mund t’i gjeni në këto vegëza:

https://prizren.rks-gov.net/wp-content/uploads/2026/06/Konkurs-per-ndarjen-e-bursave-per-student-te-Komunes-se-Prizrenit-per-vitin-akademik-2025-2026.pdf

https://prizren.rks-gov.net/wp-content/uploads/2026/06/Aplikacioni-per-burses-per-studente-per-vitin-akademik-%E2%80%93-2025-2026-Shqip-Boshnjakisht-Turqisht.pdf

01/06/2026

Të nderuar qytetarë,

Komuna e Prizrenit, përmes grupit punues për përgatitjen e Buxhetit të Komunës për vitin 2026, duke u bazuar në Ligjin Nr. 03/L-040, për Vetëqeverisje Lokale, Statutin e Komunës së Prizrenit. Nr. 01/011-5643, Udhëzimin Administrativ (MAPL) Nr.04.2023 për Administratë të Hapur dhe Rregulloren 01/2025 për Transparencë në Komunën e Prizrenit, lëshon këtë:

NJOFTIM PUBLIK

Për të gjithë qytetarët e Komunës së Prizrenit, grupet e interesit dhe palët e tjera të interesuara për organizimin e konsultimit publik lidhur me: Qarkoren e Parë Buxhetore 2027/01 dhe Kornizën Afatmesme Buxhetore (KAB) 2027-2029.

Ky dokument do të jetë në konsultim publik nga 28.05.2026 deri më 11.06.2026, ndërsa, konsultimi publik me qytetarë do të mbahet më 09.06.2026 në sallën e mbledhjeve të Kuvendit Komunal (Shtëpia e Bardhë), në orën 10:00. Ky konsultim organizohet nga Ekzekutivi i Komunës së Prizrenit.

Komentet dhe sugjerimet mund t’i dërgoni deri më 11.06.2026 në orën 16:00, në e-mail-at e zyrtarëve: [email protected] , [email protected] , [email protected] , [email protected] , si dhe në formë fizike në këtë adresë: Rruga Adem Jashari Nr 275 Prizren 20000 (Shtëpia e Bardhë).

Për më shumë detaje, për organizimin e konsultimit publik për Qarkoren e Parë Buxhetore dhe KAB-in, mund t’i vizitoni vegëzat e mëposhtme:

Ueb faqen zyrtare në rubrikën konsultim publik dhe financat

https://prizren.rks-gov.net/konsultimet-publike/ , https://prizren.rks-gov.net/financa/ dhe https://prizren.rks-gov.net/qarkorja-buxhetore/ :

Platformën për Konsultime Publike:

https://konsultimet.rks-gov.net/consultations.php?InstitutionID=20528&OpenPage=0&ClosedPage=0

Facebook:

https://www.facebook.com/kkprizren

01/06/2026

REAGIM ZYRTAR I DREJTORISË PËR TURIZËM DHE ZHVILLIM EKONOMIK

Drejtoria për Turizëm dhe Zhvillim Ekonomik e Komunës së Prizrenit, si një ndër qendrat më të rëndësishme kulturore dhe historike në Kosovë, mirëpret çdo vit qindra mijëra vizitorë nga mbarë bota.

Qyteti ynë vazhdon të jetë një urë lidhëse mes kulturave, feve dhe traditave, duke promovuar vlerat e trashëgimisë sonë kulturore dhe mikpritjen qytetare që e karakterizon Prizrenin ndër shekuj.

Megjithatë, viteve të fundit është vërejtur me shqetësim fenomeni i pranisë dhe operimit të guidave ilegale turistike nga shtete të ndryshme, të cilat ushtrojnë aktivitetin pa certifikimet dhe autorizimet përkatëse.

Përveç dëmtimit të konkurrencës së ndershme ndaj guidave lokale të certifikuara, në raste të caktuara janë evidentuar edhe interpretime të pasakta e shtrembërime të fakteve historike. Kjo gjë dëmton drejtpërdrejt narrativën dhe prezantimin autentik të trashëgimisë së vendit tonë. DTZHE-ja sqaron se rregullimi i kësaj fushe mbetet kompetencë e nivelit qendror.

Edhe pse Ligji për Turizmin është në fuqi, ende mungon një rregullore e veçantë që do të mundësonte adresimin dhe mbikëqyrjen më efikase të veprimtarisë së guidave turistike në përgjithësi, e në veçanti për ata të huaj.

Një kornizë e tillë ligjore është e domosdoshme për mbrojtjen e interesit publik, ruajtjen e integritetit historik e kulturor si dhe për mbështetjen e profesionistëve vendorë të certifikuar.

Pas takimeve dhe diskutimeve me palë të ndryshme të interesit, përfshirë përfaqësuesit e Shoqatës së Guidave Turistike të Kosovës (GUIDEKS), Komuna e Prizrenit rithekson përkushtimin e vet institucional për gjetjen e një zgjidhjeje konkrete ndaj këtij fenomeni shqetësues.

Do të vazhdojmë të angazhohemi maksimalisht që Prizreni të prezantohet me dinjitet, profesionalizëm dhe autenticitet para çdo vizitori.

01/06/2026

VOTIMI ME KUSHT

Procesi zgjedhor do të zhvillohet në 38 komunat e Republikës së Kosovës përmes 949 Qendrave të Votimit.

📍 Në zgjedhjet për Kuvendin e Republikës së Kosovës, votuesit mund të votojnë me kusht në cilëndo komunë.

ℹ️ Në secilën nga 38 komunat ka vetëm një Qendër të Votimit me Kusht.