29/08/2026
Protestë për komunat dhe qytetarin apo kundër qeverisë?
Thirrjet e disa kryetarëve të komunave për protestë me 1 shtator, nuk mund të merren seriozisht, ku ajo protestë shpallet në emër të “të drejtave të komunave dhe qytetarëve”, e në thelb është protestë krejt politike kundër Qeverisë.
E para, qytetarët nuk janë dekor politik dhe as alibi për protesta. Ata janë sovrani. Me votën e tyre i japin një qeverie legjitimitetin për programin, politikat dhe prioritetet me të cilat ajo ka kërkuar besimin e tyre. Prandaj, të protestosh kundër një qeverie të votuar nga vet ata qytetarë dhe njëkohësisht ta paraqesësh protestën si “protestë për qytetarët”, është një nonsens politik.
Komunat nuk duhet të jenë arenë e opozitarizmit ndaj qeverisë, ajo është hapësirë e qeverisjes dhe bashkëpunimit institucional. Suksesi i saj matet me sa projekte e financa arrin të sjellë nga qeveria dhe sa mirë i shndërron ato në rezultate për qytetarët.
Qeveria Kurti, përmes skemave sociale të mirëorientuara dhe politikave mbështetëse, ka investuar dhe po investon miliona euro drejtpërdrejt te qytetarët dhe ato tashmë janë të prekshme. Ndërkohë, mbështetja për komunat ka arritur në nivele që nuk i kanë pasur asnjëherë më herët. Buxheti për komunat për vitin e ardhshëm tejkalon 900 milionë euro. Vetëm javën e kaluar, Ministria e Financave publikoi Qarkoren e Dytë Buxhetore për Komunat, ku përcaktohen kufijtë buxhetorë për secilën komunë.
Dhe ja disa fakte konkrete që e bëjnë edhe më absurde retorikën e protestës.
Kur jemi te komuna e Rahovecit, është absurde të protestosh kundër qeverisë në emër të “të drejtave të komunës”, kur vetëm dy ditë më parë komuna e Rahovecit mori 2.11 milionë euro mbështetje nga qeveria për projektin e banimit social, ashtu siç ka marrë edhe shumë projekte të tjera kapitale me qeverinë, po i përmendi me radhë:
Qendra Multifunksionale në Rahovec, 2.5 milionë euro.
Rruga me katër korsi Rahovec–Xërxë, rreth 14.8 milionë euro (e ritenderuar me 3 lot)
Rruga Sapniq–Nashpallë, 894,887.59 euro.
Rruga Fortesë–Celinë , 799,641.45 euro.
Rrugët nga rrethrrotullimi “Rija” deri në dalje për Xërxë, 3,299,953 euro.
Rruga Rahovec–Drenoc–Senoc-Pastasel-Polluzhë-Çifllak, 3,863,123.57 euro.
Parkingjet e reja me ndriçim publik dhe hapësira të gjelbëruara – 289,972.50 euro.
Ballkoni panoramik, 319,993 euro.
Parku Solar në Kramovik, 70 milionë euro.
Mbështetja për bujqësinë në Rahovec , mbi 26 milionë euro për rreth 12,000 përfitues.
Mbështetja për verëtarët e Rahovecit, dyfishim i mbështetjes.
Investimet në arsim me rreth 4 milionë euro: Janë renovuar për efiçiencë energjetike:
SHFMU “Gëzim Hamza” – Rahovec,
"Isa Boletini” – Rahovec,
"Bekim Sylka” – Rahovec,
"Rilindja” – Çifllak,
"Faik Konica” – Celinë,
"Dëshmorët e Zatriqit” – Zatriq,
"Hamez Thaçi"– Xërxë,
"12 Maji” – Ratkoc dhe
“Skënder Kastrati” – Gexhë.
Ndërsa Internet i shpejtë për shkolla:
Gjimnazi “Xhelal Hajda – Toni” dhe dy shkolla të tjera janë lidhur në rrjetin arsimor KREN.
Po ashtu, është përfunduar Shkolla “3 Dëshmorët” në Vrajakë–Bratatin, ndërsa Shkolla “Milaim Krasniqi” në Pastasel, me investim të nivelit qendror, është në ndërtim dhe pritet të përfundojë këtë vit.
Çerdhet e reja, rreth 1 milion euro.
Të gjitha projekte të investuara nga qeveria kanë marr formën më të bukur të realizimit të tyre dhe qytetarët i shohin ato.
Ndërkohë, aty ku përgjegjësia për projektin është komunale, nga procedurat tenderuese, pastaj projektimi e deri te mbikëqyrja e realizimit të tyre, rezultatet kërkojnë një tjetër analizë, shembuj:
-Rruga me katër korsi Xërxë-Rahovec-ka shtatë vite që nuk përfundon.
-Sheshi Qendror vazhdon të mbetet vetëm një parking makinash, ndërsa një projekt kapital i kësaj rëndësie nuk po gjen dot fundin.
-Prej vitesh, objekti i ri i shkollës "Hamëz Thaçi" në Xërxë nuk po gjen dot përfundimin.
-Edhe shtrati i lumit Brestovc–Hoqë e Vogël, Nagavc-Krushë e Madhe mbetet ende pa u rregulluar, ndonëse bëhet fjalë për një projekt konkret që prek drejtpërdrejt jetën dhe sigurinë e banorëve.
Këto nuk janë çështje abstrakte, por janë projekte konkrete kapitale në terren që nuk gjejnë assesi përfundimin e tyre, dhe këto janë vetëm disa, ndërkohë që ka dhe projekte tjera të mesme e më të vogla që presin realizimin, madje disa ende as që kanë nisur.
Andaj, kur flitet për “të drejtat e qytetarëve”, qytetari ka të drejtë të pyesë: pse projektet që janë në përgjegjësi komunale zvarriten gati për një dekadë dhe kush mban përgjegjësi për këtë?
Kryetarët e komunave që thërrasin protesta do të duhej të shqetësoheshin së pari për menaxhimin e shtëpisë së tyre: për administrimin konceptual e profesional të buxhetit, rritjen e të hyrave, përfitimin e projekteve të reja, mbështetjen reale të bujqëve, rregullimin e sektorit të shëndetësisë, depolitizimin e arsimit, ndreqjen dhe përmirësimin e urbanizmit, menaxhimin efikas të deponive ilegale të mbeturinave, dhe të gjithë sektorëve tjerë, për menaxhimin sa më të mirë dhe që është përgjegjësi e kompetencë e tyre.
Nuk mund të protestosh ndaj qeverisë me arsye thjesht puro politike, ndërkohë që hesht për përgjegjësitë që janë tërësisht në nivelin komunal.
Sepse nuk mund të kërkosh gjithmonë më shumë nga jashtë, ndërkohë që brenda teje lëngojnë sektorë të tërë. Është si në një shtëpi, i zoti i shtëpisë fillimisht e rregullon shtëpinë e vet, pastaj del në oborr të ankohet për lagjen e kështu me radhë.
Qytetarët meritojnë më shumë se një protestë të paketuar me retorikën e “të drejtave të tyre”. Ata meritojnë qeverisje profesionale, menaxhim të mirë dhe rezultate konkrete. E mbi të gjitha, meritojnë të mos përdoren si mburojë për beteja politike që nuk janë të tyret.
