02/08/2026
Sot vizituam familjen Hoxha në Muzeqinë për t'u shprehur ngushëllimet më të sinqerta, në këto ditë dhimbjeje, pas gjetjes së eshtrave të Isuf Hoxhës, 27 vjet pas ekzekutimit të tij në Burgun e Dubravës.
Isuf Hoxha ishte ish-ushtar i Ushtrisë Çlirimtare të Kosovës dhe një kontribuues i palodhur i çështjes së lirisë. Sakrifica e tij, si dhe e shumë luftëtarëve e martirëve të tjerë, mbetet pjesë e pandashme e historisë sonë dhe e rrugëtimit të popullit të Kosovës drejt lirisë.
Pas një pritjeje të gjatë prej 27 vitesh, familja Hoxha më në fund pati mundësinë t'i japë lamtumirën e fundit dhe ta prehë me dinjitet. Dhimbja për humbjen nuk shuhet kurrë, por gjetja e eshtrave sjell të paktën mundësinë për ta nderuar dhe kujtuar ashtu siç e meriton.
Duke ndarë dhimbjen me familjen Hoxha, shprehim respektin dhe mirënjohjen tonë për jetën, veprën dhe sakrificën e Isuf Hoxhës. Qoftë i përjetshëm kujtimi për të dhe për të gjithë ata që dhanë gjithçka për lirinë e Kosovës.
Lavdi!
