21/08/2026
ANËTARËSI E RE
Aleanca në Viti ka bërë reforma të thella gjatë këtyre viteve të fundit, duke e rindërtuar vizionin e saj politik, si në koncept, ashtu edhe në organizim. Këto reforma janë mirëpritur nga strukturat tona dhe nga opinioni publik. Mesazhi është përçuar qartë dhe dera i është hapur secilës e secilit që ka vullnet dhe dëshirë për të dhënë kontributin e vet në politikë.
Këtë derë sot e kanë kaluar edhe Elvira Zeqiraj dhe Mendim Qosa nga Sllatina e Epërme. Dorë për dore, ashtu siç janë edhe në jetën private, Elvira dhe Mendimi sot iu bashkuan vizionit dhe strukturave të Aleancës në Viti. Tashmë janë pjesë e një ekipi që ka ofruar një alternativë politike të qëndrueshme; një ekip që sjell një perspektivë tjetër, moderne dhe sistemike të politikëbërjes.
Elvira është rritur në Itali, ndërsa Mendimi është bërë mërgimtar këto vitet e fundit. Të dy bashkë kanë dy vajza të vogla, të cilat duan t’i marrin sa më shpejt në vendlindje, ndërsa po projektojnë kthimin e tyre në atdhe. Siç e thotë Mendimi: “Ose je i çmendur që rri jashtë vendit, ose çmendesh ndërkohë. Ne duam të kthehemi.”
Elvira është dermatologe e diplomuar, ndërsa Mendimi është mjeshtër i çative. Dy dije dhe dy mjeshtëri që do t’i duhen përjetësisht vendit tonë. Mirëpo, të dy janë të vetëdijshëm se asnjë aftësi profesionale dhe asnjë kthim nuk mund të realizohet nëse Kosova nuk përparon në rrafshin ekonomik dhe politik.
Dhe pikërisht këtu del në pah besimi dhe pozicionimi i tyre krahas Aleancës dhe vizionit të saj. Këtu lidhet vullneti i Elvirës dhe Mendimit me atë të Aleancës. Këtu bashkohen mendjet dhe përcaktohen qëllimet e përbashkëta për ta ndryshuar gjendjen dhe për ta përmirësuar mirëqenien e qytetarëve tanë.
Elvirën dhe Mendimin i mirëpritën me respekt e mirëbesim Kryetari Labinot Bislimi dhe anëtarja e Këshillit të Përgjithshëm të Aleancës dhe e Kryesisë në Viti, Vjollca Drugzani.
Me këtë hapje të re të Aleancës ndaj anëtarësimeve të reja, po e fillojmë një periudhë të re të politikëbërjes, duke krijuar një standard tjetër të marrëdhënies politikë–qytetar.
Dera është e hapur. Vizioni është i qartë. Ekipi po zgjerohet.
