14/10/2026
Bashkë për shëndetin, shpresën dhe jetën! 🎀
Sot, në kuadër të Tetorit Rozë, u organizua një aktivitet vetëdijesues për rëndësinë e kujdesit për shëndetin, diagnostikimit të hershëm të kancerit të gjirit dhe solidaritetit me gratë që përballen me këtë sëmundje.
Këtë mesazh e përcollën kryetari i Komunës së Vushtrrisë, Ferit Idrizi, ambasadorja e NDI-së në Kosovë, znj. Nancy Soderberg, drejtoresha e Administratës, znj. Hyrie Uka Hoxha, doktoreshat Edona Leci dhe Mimoza Maloku, si dhe znj. Selvete Sholla, e cila ndau përvojën e saj personale në përballjen me këtë sëmundje.
Hapjen e aktivitetit e bëri kryetari i Komunës së Vushtrrisë, Ferit Idrizi, i cili në fjalën e tij theksoi rëndësinë e kujdesit për shëndetin dhe të kontrolleve të rregullta.
“Tetori Rozë na kujton se kujdesi për shëndetin nuk duhet të shtyhet, se diagnostikimi i hershëm mund të shpëtojë jetë dhe se solidariteti është i domosdoshëm për çdo grua që përballet me kancerin e gjirit. Në kuadër të angazhimit për përmirësimin e kujdesit shëndetësor, funksionalizimi i mamografisë në QKMF-në e Vushtrrisë përbën një hap të rëndësishëm drejt përmirësimit të qasjes së grave në këtë shërbim”, deklaroi kryetari Idrizi.
Gjatë aktivitetit, doktoresha Edona Leci ligjëroi për parandalimin dhe diagnostikimin e hershëm të kancerit të gjirit, ndërsa doktoresha Mimoza Maloku trajtoi rëndësinë e shëndetit mendor dhe të mbështetjes emocionale gjatë përballjes me sëmundjen. Në një rrëfim personal, znj. Selvete Sholla ndau përvojën e saj, duke përcjellë mesazhe guximi, qëndrueshmërie dhe shprese.
Aktiviteti u organizua nën patronazhin e kryetarit të Komunës së Vushtrrisë, me përkujdesjen e Drejtorisë së Administratës dhe me mbështetjen e NDI-së.
