31/08/2026
Agter die Karel Landman Monument staan ’n groep mense wat hul tyd, energie en talente gee om ons erfenis te bewaar en aan die volgende geslag oor te dra.
In hierdie reeks stel ons graag die mense agter die monument aan julle voor.
Vandag is dit die beurt van ons oud-voorsitter, Riana Heyneke. Alhoewel sy nie meer die voorsitter is nie, bly sy steeds ’n aktiewe en waardevolle lid van die komitee.
Riana bly tans in Cannon Rocks, ’n kusdorpie in die Oos-Kaap, om die draai van ons monument.
Vandag is Riana ’n afgetrede sakevrou, maar sy was ook ’n pre-primêre onderwyseres.
Afrikaans lê haar baie na aan die hart en sy is baie trots op haar mooi beskrywende moedertaal.
Riana se passies is wyd en uiteenlopend, van haar kerk en haar taal, tot mense help wat gehelp wil wees, boeke, katte en diere in die algemeen, YouTube en Netflix, en uiteindelik iets wat dalk die belangrikste van alles is:
“om n ordentlike mens te wees.”
Een van haar gunsteling herinneringe by die monument is ’n besondere oomblik in die monument se geskiedenis:
“Die Stormjaers,1ste keer toe daar meer as 500 mense vir Geloftedag opgedaag het en die KLM komitee se ywer.”
Wanneer Riana gevra word wie of wat haar inspireer, dink sy aan haar ouers en aan mense wat die vrugte van die Gees uitleef:
“My pa en ma,mense wat pluk het en die Vrugte van die Gees.”
En haar gunsteling Afrikaanse woord?
“Tameletjie en honderd ander woorde.”
Haar raad aan jongmense is gebalanseerd en vorentoe-gerig.
“Jongmense is in n moeilike situasie in SA , maar ons as Afrikaners mag nooit vergeet waar ons vandaan kom en dan moet ons vorentoe met almal en ons ryke geskiedenis deel met almal en ander se geskiedenis ook respekteer.”
En wanneer sy oor erfenis praat, beklemtoon Riana dat dit iets is waarvan ons aktief deel moet wees, iets waarvoor ons nooit skaam moet wees nie:
“Dis baie belangrik om altyd deel te wees van jou erfenis en nie skaam daarvoor te wees nie.Voed jou kinders hierin op en wys en vertel almal wat wil luister.”
Dit is Riana Heyneke, ons Oud-Voorsitter, en een van die mense agter die Karel Landman Monument.
Deur hierdie reeks wil ons julle bekendstel aan die mense wat hul tyd, kennis en passie gee om hierdie plek en die verhaal wat dit vertel, te bewaar.
Want erfenis is nie net iets wat ons uit die verlede ontvang nie. Dit is iets waarvoor ons vandag verantwoordelik is, en wat ons môre aan die volgende geslag moet oordra.
