https://www.facebook.com/107137468607218/

Ntethe's novels and drama, Durban (2026)

16/07/2026

ISIGUBHU

By Sizakele Xulu

ISIGCAWU 14

[Kuntambama uZinhle noMkhize sebebuyile ekhaya, uLindi ungena esangweni lakwakhe uyadlwathuzela udinwe ugane unwabu uqhamuka nje uyamemeza akasenendaba nabantu ukuthi bayamubuka]

Lindi : [ememeza] Thelangaye Mkhize!!![angene endlini afice uMkhize usemangele ukuthi wabizwa ngepasi nje kwenzenjani] Lalela -la ngizokubuza kube kanye, kanye Mkhize yezwa!! KHONANI KULENDLU ENGENHLA ? Futhi ungalinge uqambe amanga ungenze isilima

Mkhize : [ Azenze umuntu odinwayo kodwa ugqiba ukuthi wethukile] Mfazi ndini ukuthathelaphi ukuthi ungibukanise ngomphakathi ngaloluhlobo usuqhuba intwala ngewisa Lindiwe

Lindi : [ ehleka kancane sakubhuqa ] iheee….ihee wena ucabanga ukuthi kusiniswa amahleza la [amemeze uzinhle] ZINHLE!!!

Zinhle : [asabele esekhishini] Mah uyangibiza [aqhamukele kubona] sengikhona

Lindi : Lalela sisi hamba uyoqoqa wonke amasakana akho siyahamba la ngeke sihlale nombulali thina umuntu othwele ophila ngemali yegazi

Mkhize : [ useyabakaza] Nkosikazi cela ungangishiyi mama wabantwana bami ngingachaza mama

Lindi : iheeee bona baphi abantwana [usebambe edandi] usho laba abadliwa ilenyoka yakho othwele ngayo usho labo [athi uyaphenduka abone uZinhle usamile ulokhu ebakaza] Habe kusamile lokhu ngane ngithe qoqa izinto zakho wena sambe la!![aphume athi lacu uZinhle]

Mkhize : [emncenga ] Mkami angiqondile lokho yonke lento engiyenzile bengenzela nina bekumele ngizame nami njengendoda

Lindi : Ingakho ubungafuni siye esangomeni ubuwazi amanyundululu akho azophuma ubunesikhathi sonke ukuthi ungazise

Mkhize : Cela ungixolele Mkami

Lindi : Selidume ladlula Mkhize isikhathi sesidliwe yinja [ukhuluma nje uqoqa izimpahla zakhe] wena nezinyoka zakho salani,, Zinhle asambe bo!

Mkhize :Nizoyaphi mawakhe

Lindi : Nginekhaya Mkhize angixoshwanga [usehudula isikhwama sakhe uyophuma ngomnyango]

Mkhize : [Useyakhala manje] Ngizoba yini ngaphandle kwenu Ngiyakucela maLindi wami [amubambe isandla]

Lindi : Ayikho into ekukhalisayo wena ukhaliswa ilesisibeletho sami engihamba naso angithi uthwala ngabantwana bami wena

Mkhize : Ngiyaxolisa mama bengingakuqondile lokho akuyona into engavumelana ngayo noNdlovu lena , Ngiyakucela dali ungahambi

Lindi : [amuzibe engathi akamuzwa] uziqoqe zonke intozakho Zinhle

Zinhle : yebo mama[ aphume emnyango]

Lindi : Wena sala nalezinyoka zakho ungalinge usifonele kusuka manje mina nawe asazani [baphume bahambe bangabheka emuva]
Mkhize : [wakhipha ucingo lwakhe wafonela umfowabo] Mfwethu

Mpiyakhe : sho bafo

Mkhize : [ekhala] Ngimoshile bafo umfazi ungishiyile nengane , ayisekho mina into engiyiphilelayo

Mpiyakhe : Ngiyeza manje mfwethu musa ukukhuluma kanjalo

Mkhize : Kulungile bafo ungeza [aluvale ucingo ,akhulume yedwa ekhala] Ayisekho vele into engiyiphilelayo kulomhlaba ungishayile wonke lomcebo bengenzela uLindi noZinhle manje ngoba bengasekho nje bengishiyile nami kuphelile ngami anginamndeni anginabani [ athathe intambo eshalofini ayibophe eklabheni lendlu athathe isitulo agibele alungisele ukuzilengisa] iyona mpilo encono lena engifanele kwelamathongo vele ngizotholwa uMpiyakhe . Bogogo noMkhulu BoKhabazela cela ningamukele [wasikhahlela isihlalo]

Mpiyakhe : [Ungena uyagijima uma efika wafica uMkhize eluyalenga endlini,wathuka wathwala izandla ekhanda] Hawu kodwa mfwethu ungenzani [ wakhala wazama ukumqaqa kanti usethule]

THE END

Please share ,Like and comment🙏

16/07/2026

ISIGUBHU

By Sizakele Xulu

ISIGCAWU 13

[Seliphelile uviki uLindi ebuyile esibhedlela naye usepholile wazama ukwamukela isimo ngemuva kokulahlekelwa umntwana isimo emzini wakhe sesibuyele esimeni baphila kahle kodwa namanje umoya kaLindi awuhlalisekile useze wanquma ukuba ayobona isangoma kepha amufihlele uMkhize ngoba ubengayizwa kahle lendaba . Kusekuseni uMkhize usehambile waya emsebenzini uLindi yena ulungiselela uZinhle ukuya esikoleni]

Lindi : Yazi mntanami bengicabanga ukuthi ngoba ubaba wakho usemsebenzini ake ngiphume nami ngiyobona umakhosi kodwa ngiyacela ungamtsheli uyihlo

Zinhle : Kulungile mama kodwa awusho kungani ubaba enqaba ukuthi niye kumuntu ngoba phela ekugcineni kumele sazi ukuthi kwenzakalani

Lindi : Nami angazi weZinhle mhlampe khona akufihlayo

Zinhle : Uyangixaka ngampela mina ubaba ngoba uyakholelwa nje emadlozini nansi nendlu yabantabadala ngenhla lena angafuni nokuthi size singene kuyona nangephutha

Lindi : Uthi phela abantu besifazane abavumelekile ukungena khona kakhulukazi mina ngoba ngumakoti

Zinhle : Hawu angiyazi ke leyo

Lindi : Ngiyakutshela sisi , Ngisahamba ke ntombi ukhiye uwubeke phansi kwentshe ngoba angazi ukuthi ubani ozosheshe abuye phekathi kwethu

Zinhle : ay ayikho inkinga mama

Lindi : ngiyabuya ke[aphume]

[Lomuzi usegqumeni uqhelile kweminye imizi uhloniphekile unesithunzi kuthulekile , uLindi abonakale engena khona engeniswa uthwasa wakhona ]

Makhosi : Siyakwamukela sisi kade sikulindile

Lindi :Ngyabonga makhosi ey kuningi fuze ngabe Kade ngafika

Makhosi : ungahlala lapho esicephini , manje awusho ukhala ngani amakati ekhala ngobisi

Lindi : Ngizohlola makhosi kuningi engingakuqondi okwenzeka empilweni yami nasemndenini nje uqobo manje ngifuna ukwazi isizathu nokuthi ngingasizakala kanjani

Makhosi : Ay layikhaya asichithi mathambo umuntu uzibonela ngawakhe amehlo afuna ukukubona [abize uthwasa acele athathe indishi encane afake amanzi phakathi abuye nawo] Yabona lapha sisi uzobuka la phakathi emanzini noma ngabe yini ozoyibona ungethuki ngoba uzophazamiseka ungawavali amehlo uze uqede uyezwa

Lindi : Yebo makhosi

Makhosi : [afake isandla emanzini akhuleke awanyakazise bese eyayeka]ungasondela uzobuka

Lindi : [asondele abuke kulamanzi abheke kuwona amubone umyeni wakhe kusukela eya kwaNdlovu eyocela isigubhu ambone eyosibeka endlini engenhla ezisika umunwe econsisa igazi esigubhini kuze kufike la esebona khona inyoka esigubhini]Aybo Mkhize [aquleke]

Makhosi : Ayboo phuthumisani amanzi ngenkomishi thwasa nangu equleka lomuntu [ lisukume ithwasa libuye nawo amanzi bawakhulekele base bemthela ngawo wavuka bazama nokumphuzisa wona]

Lindi : [Kwangathi umqondo wakhe udidekile kancane] Ngiphuphe iphupho elibi yazi ngathi umyeni wami uthwele useze wathwala nangengane yami ebingakazalwa isayihlule

Makhosi : Kanti ubungaphuphi nhlobo konke lokhu okusemqondweni wakho ubukubuka kulendishi

Lindi : Aybo uMkhize engayenza kanjani into enje kumina[Akhale]

Makhosi : Into ongayenza ukuthi uphume uphele kuloyamuzi ngokuphuthuma kungaze kuphume umphefumulo wakho kuqala

Lindi : Ngyezwa makhosi

Makhosi : Uma usukulungisile ke lokho usuzobuya ngikugeze senzele nomntwana wakho owaphuma iladi silungise izinto zakhe

Lindi : Syathokoza makhosi akubongwa[ashoye okokukhanyisa emsamo aphume ahambe]

16/07/2026

ISIGUBHU S2

By Sizakele Xulu

ISIGCAWU 12

[Kusesibhedlela uLindi ulungiselela ukuhamba ulokhu uqoqa izinto zakhe abefike nazo nelukuluku selehlile, uMkhize noMpiyakhe bayamulekelela]

Lindi : Yazi Mkhize khona into engahambi kahle khona okungahlangani

Mkhize : ukushiswa yini lokho ?

Lindi : Mhlampe khona okungalungile esakwenza sanganaka noma mhlampe khona amadlozi akufunayo ithina esingazi , ngoba phela akukwazi ukuthi singavelelwa zigameko ezingaka ngokulandelana sithule nje ngeke baba

Mkhize : [ngokwexwaya] Ay akukho madlozi lapha adiniwe unkulunkulu uyasivivinya ufuna ukubona ukuthi sisaqinile yini okholweni

Lindi : [ Ayeke akwenzayo abuke umyeni wakhe emehlweni agoqe izandla] Yazi mina baba ngibona ukuthi as**e siyobona umuntu wesizulu obonayo mhlampe inkinga ingaxazululeka nje

Mkhize : Ngyakubona maLindi uxakwe zinhlungu awuqede lapho sizohamba

Lindi : Kodwa Mkhize wabanjani yazi singaluthola ngampela usizo esangomeni noma umthandazi phela lento isinga…..

Mkhize : [emngena emlonyeni esecasukile] maLindi awuselona yini ikholwa wena , awusamkhonzi unkulunkulu ophilayo? Njengoba ulokhu ungitshela ngeZangoma nje

Lindi : Kodwa baba ngizama ukusiza

Mpiyakhe : Uqinisile ukoti bafo umbono omuhle lo eza nawo ningasizakala nobabili

Mkhize : Nawe Mpiyakhe usuzwa ngomfazi ? Utshelwa ngumfazi manje wena

Mpiyakhe : Cha bafo ngivumelana naye mhlampe khona lapho esingenzi khona kahle

Mkhize : Cha akukho lapho singenzi khona kahle , mina nani siyayivala lendaba yenu yezangoma ezingathi shu , ngiqedile akuhanjwe[baphume balandelane]

[Libalele ilanga uZama noNana basemthonjeni bawasha izingubo zokulala]

Zama : [ekhama ingubo ngetshe]Aybo mfazi yaze yakuhlaza ingane

Nana : [usebambelele eqolo] Ungasasho ntombazane ngithuke ngoma ukuthi lengane kanti Ibingenwe yini ngampela ikhuluma nathi ngaleyandlela isixoshisa okwezinja

Zama : Sizama ukusiza yona njalo ngoba isezinhlungwini ngonina izosibonga kanje

Nana : Ngojuzi nje isingaze ingichaphe kanje yey nginezinto zami mina , yona bayicosha la bayicosha khona bayenza umuntu isizibona isincono namhlanje

Zama : Isikhomba ngophakathi dade isikhomba umnyango. Kodwa ngyasola shuthi ingenwe ilezinto zikayise azithatha lapha kwaNdlovu

Nana : [Ahleke kakhulu bashayane izandla] Iheeeee ey ungasho uphinde makhi hlampe izona nje lezi ezibenza nje

Zama : [ esondela kakhulu kumkhozi wakhe bese ehlisa izwi] mana wesisi usholo ukuthi mhlampe noLindi udliwa izona kuthwalwe ngaye

Nana : Mhlampe nje kwazi bani , naye uyobe uyalunga ngoba kade sasimtshela esibuka ubulima buka manje uyofela emanyaleni

Zama : Ay siyoyicela ivuthiwe sisi [baqhubeke bawashe]

07/07/2026

ISIGUBHU

By Sizakele Xulu

ISIGCAWU 11

[Kusesitolo samathuluzi uLucky no Mpiyakhe bayasebenza babe sebephazanyiswa ukukhala kocingo lukaMpiyakhe abone ukuthi umfowabo alubambe]

Mpiyakhe : [ngokwenama] Bafo kuhamba kanjani lapho bathi eeeh ngesilungu “father to be”[ahleke]uzokwazi kodwa ukuza emsebenzini bafo

Mkhize : Ey bafo cela uphuthume ngiyakudinga ndoda ngisesibhedlela , umaLindi u…[angabe asakwazi ukuqhubeka avele akhale]

Mpiyakhe : [eqoqa izinto zakhe ngokuphuthuma] Ungabe usachaza bafo ngyeza manje [avale ucingo] Lucky mfwethu sengithembe wena la ukuthi usale sewubheka ngisaphuthuma kumfwethu isimo asikho sihle

Lucky : Aw kodwa bakithi sekwenzenjani manje

Mpiyakhe : Engathi inkinga inoKoti angazi ngizozwa khona

Lucky : Ay kulungile mfwethu ake uphuthume ngizosale ngiqhubeka

Mpiyakhe : Ngiyabonga ndoda izobonana

[Kusesibhedlela uMkhize usalinde odokotela baqede ukulapha ulindi, kube sekukhala ucingo lwaMkhize methi uyabheka uNdlovu futhi]

Mkhize : Ndlovu ngithe ngizokunika imali yakho

Ndlovu : Nami bengithe ungabe usazikhathaza ngaleyo Mali isikhathi asisekho kanti ngyabona nomngani wakho omusha lona osesigubhini wenze omuhle umsebenzi lona

Mkhize : [Ngokwethuka] ukhuluma ngani Ndlovu?

Ndlovu : Ay ngizothi dudu nje ngengane yakho bakithi iyona mivuzo yokwephula osivumelwano esasinaso manje umngani uzoliqeda lonke igazi lakho othi uliletha la emhlabeni

Mkhize : [useyakhala] Cha Ndlovu ungayenzi leyonto hhayi ngezingane zami ngiyakucela ayinacala bakithi Iba nozwelo thatha mina okungenani cela ingane yami isinde

Ndlovu : selidume ledlula Mkhize [aluvale ucingo]

Mkhize : Aw kodwa bakithi ngangenzani [akhale , Kusenjalo kungene uMpiyakhe egijima afice umfowabo ehlezi phansi ekhala]

Mpiyakhe : [ Afike ahlale eduze kwakhe] ungabe usakhala bafo qina manje wenzele uLindi nengane [amhlikihle ehlombe]

Mkhize : Ey bafo kunzima mfethu

[Kungene udokotela]

Mpiyakhe : Dokotela unjani ukoti nengane?

Dokotela : ULindi uyaphila ukuthi nje usaphelelwe amandla kodwa khona imithi esimnike yona uzoba kahle nizobuyela naye ekhaya ksasa

Mkhize : umntanami yena?

Dokotela :Ngixolise bobaba umntwana yena akasindanga akasekho syaxolisa

Mkhize : [athwale izandla ekhanda ] Oooh kodwa nkosiyami ngijezelani, ngingakwazi ukuyobana umkami [echiphiza]

Dokotela : Yebo ungambona cela ningilandele [baphume belandela bayongena egumbhini lapho kulashelwa khona uLindi]

Mpiyakhe : Koti uzizwa unjani kodwa?

Lindi : Ngiyaphila bhuti izinhlungu zehlile amandla nje angakobuyi kahle

Mpiyakhe : Ay uzoba kahle koti uthe udokotela sobuyela nawe ekhaya kusasa

Lindi : [Ngokumangala abuke uMkhize ongakwazi nokubuka umfazi wakhe emehlweni]Waze wadabukisa bo baba kufe bani , uphi manje lodokotela uhambe ethi uyabuya ngifuna angitshele ukuthi injani ingane yami , Nike nambona kodwa?

Mkhize :[ebheke phansi ulokhu udonsa amafinyila] yebo mama s**e saxoxa naye

Lindi : Yah utheni?

Mkhize : [asondele kumkakhe amuqabule isiphongo abambe isandla sakhe akhokhe umoya] eeh sthandwa sami mayelana nengane ey [aphinde adonse umoya]ingane ayisekho mama ngyaxolisa[akhale]

Lindi : [aqale aciphize izinyembezi ] Ay akukwazi ay ngeyami ingane[ahlwithe isandla sakhe kuMkhize]

Mphiyakhe : Ngiyazi kunzima Koti ukwamukela kodwa kunjengoba esho nje ubafo kodwa nisazoba nazo ezinye izingane

Lindi : [ Avele asikhihle esikanandi] kungani kwenzeka konke lokhu kimi amabhadi amangaka ngenzeni kanti mina [Akhale kudume isibhedlela]

Mkhize : [emthulisa] kuzolunga mkami ungabe usakhala[naye ezesula izinyembezi]sizodlula kulesisimo asikho esingadluli.

04/07/2026

ISIGUBHU

By Sizakele Xulu

ISIGCAWU 10

[KukwaMkhize uLindi usebuyile esibhedlela uhlezi nomndeni wakhe bazibukela umabonakude]

Lindi : Zinhle mntanami kunento ekumele kuxoxele yona

Zinhle : Yini leyo mama? Kungabe sengibuyela eThekwini?

Lindi : [ ahleke kancane ]Cha ngane yami imali asikabi nayo okwamanje kodwa mase zihlangene kahle izonto uzoya

Zinhle : [Ngokudangala] Ooh ngiyakuzwa

Lindi : Into lana ukuthi sesizoba nelunga elisha lomndeni [ aziphulule isisu emamatheka]

Zinhle : Hawe ngaze ngajabula sengizoba usisi omdala nami ncooow nkosyami [asondele adlalise isisu sikanina]

Mkhize : kumele uzinakekele ke maLindi uqikelele ukudla okudlayo ngifuna umfana wami abe umqemane

Zinhle :Khululeka wena baba mina ngizokwenza isiqinisekiso ukuthi umama udla ukudla okunempilo

Mkhize : Ey uyobe ungisizile mntanami [esukuma kusofa] ngiyabuya ngisayochitha amanzi [aphume aye kuleligumbi abeka kusona isigubhu ethi uyoconsisa igazi kulokhu usifica siyanyakaza ngendlela angayiqondi ngathi kukhona okuphakathi azame asondele afike alunguze phakathi wethuka woma usewakhiphe wonke amehlo wazivala umlomo ngesandla uma ebona inkunzimalanga yenyoka] Aybooo ngiyalingwa yini uNdlovu akaze ayisho le iqhamukaphi lenyoka engaka [Kusenjalo ezwe izwi likaNdlovu ezindlebeni zakhe]

Ndlovu : [ehleka kakhulu] uyena mngani wakho omusha ke loyo ozobe edila negazi lakho ngoba awuzwani nokukhokha , unomuhobholo Mkhize

Mkhize : [egcaluza indlu yonke usebambe nekhanda ngathi alithathi kahle ] Aw kodwa Boyabenyathi ngizoyiletha imali yakho ngyaxolisa angazi bengingenelwe yini cela sime kwisivumelwano sethu ngiyakucela ndoda

Ndlovu : Iheeee ngoba nakhu sekuthanda wena ngeshwa ke umqondo ubuye isikhathi sesidliwe yinja akusekho ongakwenza manje Mkhize bhekana nemiphumela yakho.

Mkhize :[uhlezi phansi uyakhala ubambe nekhanda] Aw kodwa ngangenzani yini lena engizifake kuyo.

[Kuphakathi namabili isigubhu saMkhize sisanyakaza kuleli elinye igumbi , uMkhize ulele kanti uLindi ubheke ngawo womabili akazizwa kahle ngathi khona okungahambi kahle esibelethweni sakhe]

Lindi : Izinhlungu ezingaka ziqhamukaphi ngampela ngoba bengikahle imini yonke [Ziye ngokuqinisa izinhlungu abambe isisu] aweee ake ngyochama mhlampe kuzokwehla[ uma ethi uyasukuma azibone egcwele igazi ngezansi avele akhale kakhulu avuse uMkhize] Baba!! Baba!! Mkhize vuka kuyonakala

Mkhize : [avuke eseqhasha] kwenzenjani nkosikazi ubani ofayo [ezelula]

Lindi : [ekhala] Ingane yami Mkhize buka

Mkhize :[abone igazi seligcwele umbede lehla nangemilenze kumaLindi] Aybooo kanjani manje [avuke ngokushesha useyatatazela ugqoka ijezi akhiphele noLindi ijezi agqoke]No..no…no..no…Hhayi ngengane yami [aqukule umaLindi aphume naye amphuthumise esibhedlela]

03/07/2026

ISIGUBHU

By Sizakele Xulu

ISIGCAWU 9

[Kusesibhedlela uMkhize noMpiyakhe balinde udokotela nemiphumela kaLindi kuthe kusenjalo wangena udokotela]

Dokotela : [ungena uphethe ifayela asondele kubona] Eeh madoda imiphumela isibuyile iyona lena engiyiphethe la

Mkhize : Awukhulume bakithi ithini imiphumela kade silindile uyalulama kodwa umkami

Dokotela : umkakho ululeme sithole ukuthi udle okuthile okungahambisani nesimo sakhe

Mkhize : [Ngokumangala] isimo sakhe?

Dokotela : yebo unamasonto amathathu ezithwele siyakuhalalisela mnumzane

Mpiyakhe : Hawu bafo awuzange ungitshele ukuthi ukoti akaz..

Mkhize : [ emngena emlonyeni ] nami ilokho okungimangazayo. Dokotela umkami akakwazi ukuthola abantwana , manje ngabe kwenzeka kanjani ukuthi uzithwele?

Dokotela : Shuthi singathi intando kankulunkulu ingephikiswa. Nizobuyela naye ekhaya namuhla usekulungele

Mkhize : Kulungile dokotela siyabonga

Mpiyakhe : Impicabadala ke le bafo emva kweminyaka emingaka nizama

Mkhize : Ey mina kangisenendaba ngijabulela ukuthi sengizoba negazi lami elithi
mina[ngenjabulo] aybo iheeee bafo ngizoba ubaba okwangempela [Kukhale ucingo lwakhe athi uyabheka inombolo angayazi alubambe] Hello

Ndlovu: [Ngezwi elibhodlayo] Siyakuhalalisela Mkhize emntwaneni wakho ongakazalwa , imali yami le ongafuni ukuyikhokha ungabe usazikhathaza ngayo isigubhu leso sesizodla igazi lakho iyona ndlela ozokhokha ngayo leyo[ahleke kakhulu]

Mkhize : [Ngokuthuka] Usho ukuthini ndoda musho njalo

Ndlovu : [ehleka] usale kahle Mkhize bekumnandi ukwenza ibhizinisi nawe nomuhobholo [ aluvale]

Mkhize : [esethukile ewavule wonke amehlo] Hello..Hello..hawu waluvala lomuntu [ekhuluma yedwa ngomncabango] engabe ubesho ukuthini uNdlovu iliphi leligazi lami akhuluma ngalo, Ey engathi kumele ngimubuyisele imali yakhe engaze enze omunye umonakalo angazi nami umuhobholo wami lona ongingenile

Mpiyakhe : Mkhize ukahle?

Mkhize : Ay ngikahle bafo asambe sosayina lawamaphepha ukuze sothatha ulindi sigoduke usilindile uZinhle endlini [baqoqe izinto zabo baphume]

30/06/2026

Isigcawu 9&10 uyeza kusasa namuhlanje khona obekusangibambile 🥺🙏

28/06/2026

ISIGUBHU

By Sizakele Xulu

ISIGCAWU 8

[UZinhle uhlezi noZama kwaMkhize egumbini lokuphumula]

Zinhle : [echiphiza izinyembezi] akukwazi nje ukuthi kungaba khona okuthile okwenzeka kumama ngingaba yini nje mina ngimncane kangaka [ubuka uZama]

Zama : [ambambhe isandla] Zinhle mntanami ungacabangi kanjalo njengamanje kumele uqine sisi umama wakho uzolulama abuye ekhaya

Zinhle : Cha awukwazi lokho Anti awunaso isiqiniseko [ezisula izinyembezi]

Zama : Zinhle bheka Nana ngiyazi ukuthi angiyena unkulunkulu mina anginaso isiqiniseko ngempilo yomuntu kodwa ngiyazi ukuthi uma ngiguqa ngedolo ngikhuleka kuye uyayiphendula imikhuleko yami

Zinhle : Kulungile ke uma usho kanjalo ,Singathandaza Anti sithandazele ukuthi umama aphile

Zama : Ayikho inkinga Sthandwa sami ngizobiza u Anti Nana ezosikhulekisa awuthi ngimufonele

Zinhle : kulungile Anti

Zama : [athathe ucingo lwakhe aluchofachofe afone] Yah Nana awuphuthume ngapha kwaMkhize ntombi kube zikhindi

[Kusesibhedlela uLindi ulele embedeni ,udokotela uyamxilonga.uMkhize noMpiyakhe basegumbini elilodwa nodokotela bakhathazekile ngoLindi]

Mkhize : Dokotela unani umkami? Uzolulama kodwa ?

Dokotela : Engingakusho ukuthi nathi sisenza uhlolo lwegazi sisalinde imiphumela okwamanje sisalindile asikabi naso isiqiniseko

Mkhize : Aw kodwa nkosyami ngomkami ungenzani [ekhala]

Mpiyakhe : Dokotela izophuma nini imiphumela yegazi?

Dokotela : izophuma nje kungekudala bengizocela niyolinda kuleliyagumbi [abakhombise bephume belandelana]

[Afike unana kwaMkhize afice uZinhle noZama bahlezi esofeni]

Nana : Sanibonani ekhaya

Bobabili : yebo

Zama : Wasiza wafika sihlobo sekwenzeke umshophi la uLindi uvele wawa phansi wakhihliza amagwebu sikhuluma nje basamuphuthumise esibhedlela uMkhize nomfowabo

Nana : [ebabaza ashaya nezandla] Hawuu!! Kodwa usathane owawutheni wona lona odlala ngekholwa,phela umalindi ubengeve ekhuleka sisi

Zama : Ey mina angiyazi lento wesisi khona umuntu osengavele awe nje kungonakele lutho ngoba phela umaLindi ubengaguli

Zinhle : bengicela sithandazele umama bo Anti

Nana : Ew Zinhle ntombi awusangiphuzisi noma ujuzi ke kade ngihamba

Zinhle :[useqala ukucasuka] wemama ezosikhulekisa lana noma uzofuna ojusi layikhaya , umama ulele lapha esibhedlela ulwela impilo yakhe wena uzongitshela ngojusi

Zama : hawu zinhle olwani ulaka olungaka

Zinhle : Yazini futhi cela ningihambele ngoba ayikho into eniyihlalele nizele ukuzohleba nje la, kade ngayibona lento yenu nenza engathi umama niyamukhathalela kanti nisizakala ngezinsizi zakhe [ukhuluma nje usedinwe ugane unwabu useze wama ngezinyawo ulokhu uyabakhomba]
Nana : Zinhle ukuthathelaphi lokhu okushoyo

Zinhle : Ngithe ngiphumeleni emzini kababa [ esho ebakhomba umnyango]

Zama : [baphume sebelandelana] aw waze wakuhlaza uZinhle iqhuba intwala ngewisa lengane

Nana : bamutotose kakhulu lo ,uthi uyazi nje ukuthi abamuzali oMkhize bamuthatha kwezonhlalakahle.

26/06/2026

ISIGUBHU

By Sizakele Xulu

ISIGCAWU 7

[UMpiyakhe upake esangweni laMkhize uzoshiya yena bese ebuyela kwakhe]

Mkhize : Ngiyabonga kakhulu bafo ngosizo lwakho isiyobuye ibonane

Mpiyakhe : Ay akulutho Khabazela noma ngizwa engathi ubhuti khona angifihlela khona nje kodwa kulungile isinqumo esakho

Mkhize : Ay nakhoke usuqalile awuthi ngizihambele[avule isicabha semoto aphume ezwe umsindo osuka ngaphakathi endlini okuwukukhala kukaZinhle] Aybo uZinhle ukhalelani kangaka uyamuzwa bafo?

Mpiyakhe : wena uyangixaka usabuza asambe siyobambeka [baphume ngesamagundane emotweni bebheke endlini]

Mkhize : Ayboo[ebona uLindi edindilize phansi ephuma amagwebu ngomlomo] Malindi!![ekhala emnyakazisa] Zinhle kwenzekeni?? Zama wathula nje umenzeni umkami eeh? Umenzeni?

Zama : [ekhala] kodwa sengingamenzani umngani wami omkhulu kangaka Khabazela [abheke ngakuLindi] lomuntu uwile nami angazi kanjani ubesukuma uya ekhishini wavele wawa phansi

Mpiyakhe : [Ngokucasuka]akusona isikhathi sokuthi nilokhu nikhombana ngeminwe lesi lomuntu uyoze athulele la asimuphuthumise esibhedlela

Zinhle : [Ekhala] baba uzoba kahle kodwa umama?

Mpiyakhe :[abambe uZinhle ehlompe] uzoba kahle mntanami ungakhathazeki

Zama : Hambani bo phuthumani ngizosala ngimubheka uZinhle

Mkhize : Kulungile [bathathe uLindi bahambe bamufake emotweni ishaye izule ibheke esibhedlela ] Kanti asisafiki yini?

Mpiyakhe : bekezeka bafo sesyafika

Mkhize : [eciphiza izinyembezi ekhuluma yedwa ngemicabango] Ey makungaba khona into eyenzeka kumkami ngeke ngizixolele ngoba kunjena nje ingenxa yami ngalawulwa indlala ngahluleka ukuba indoda eqotho emndenini wayo buka manje umkami ulwela impilo yakhe ngenxa yokukhohlakala kwami ey ngaze ngazisola imali impande yesono ngampela lapho akusekho ukubuyela emuva

Mpiyakhe : [ebuka umfowabo embona ukuthi ukude nemicabango] bafo musa uzikhathaza ngaloluhlobo uzolulama uKoti [amuhlikihle ehlombe sakumduduza maqede aqhubeke asheyele]

26/06/2026

ISIGUBHU S2

By Sizakele Xulu

ISIGCAWU 6

[UMpiyakhe no Mkhize baphakathi komugwaqo bazama ukutakula imoto kaMkhize kanokusho]

Mpiyakhe : Eh bafo awudonse ngapha uyiwuke ngemuva kwemoto ukuze ngzoyidonsela eceleni komgwaqo[ emuphosela ugqinsi lwentambo ]

Mkhize : [ayibambe athambise isandla ame abuke umfowabo ] Mpiyakhe mfwethu yazi ibuhlungu lento eyenzeka kimi, kungani nje unkulunkulu angijezise kanje[ uthe nje engakaligwinyi wezwa ngephimbo selibhonga emadlebeni akhe “Mkhize..Mkhize…Mkhize..angithi uyasazi isivumelwano sethu? Ungazodlala ngoThixo wena ha..ha..ha..ha..” abambe ikhanda kuhle komuntu osanganayo amemeze ashaye amadlebe] ay…ay..ay..ay…ay Ngiyazi!!!!

Mpiyakhe : [Ngokukhulu ukuthuka nokumangala umbona nasebusweni ukuthi ukhathazekile] Bafo ukahle kodwa kwenzenjani? Udliwa yini Khabazela?

Mkhize : [kubengathi wehlisa umoya aziqoqe] ay ngikahle bafo akukho okungidlayo khululeka asiyikhiphe lemoto la emgwaqeni ingaze idale izingozi ezingenasidingo

Mpiyakhe : [ asondele kuMkhize bese ekhulumela phansi] Khabazela angithi uyazi ukuthi ngingumfwenu akekho omunye oyokwazi ukukhuluma naye ngaphandle kwami.Mina bafo uyangithusa mase wenza kuhle komuntu obona izipoki khuluma nami bafo khona ngizokwazi ukukusiza

Mkhize : [embuka ngqo ezinhlamvini zamehlo] Mpiyakhe uzongisiza ngokuthi sidonse lemo…[ izwi liphinde linkenkethe emadleni akhe futhi “Mtshele….mtshele umfwenu uzomufihlela kuze kube inini” azikhwehlelise ubala enzela ukuziba lelizwi elikhulumayo kuyena] eeeh ngizoyigaxa lana bese ungena la…

Mpiyakhe : [ amngene emlonyeni ] wena bafo ubona ukuthi ngiyingane umthetho wakho

Mkhize : Ay musa ukungibhedela wena asisuse lemoto la

Mpiyakhe : Cha awume kancane ngemoto ungitshele kahle ukuthi kwenzakalani ngawe uyangixaka nje ngathi uphazamisekile

Mkhize : [abhoke ngolaka ]Ey weMpiyakhe uzongisiza noma uzolokhu ungibelesele ngalembuzo yakho engasile

Mpiyakhe : [avuke ngolaka naye] Mkhize!!! Uzongakhulumi nami engathi udilika emthini angiyona ingane, mina ngifuna ukukusiza njengegazi lami wena uyangedelela ungishaya indiva

Mkhize : [umoya wakhe usuphakeme] Hlukana nezindaba zami Mpiyakhe wenze into ekucele yona hhayi lento ongifundekela ngayo

Mpiyakhe : [ usegane unwabu ] uyazizwa usakhuluma kanjani nami Mkhize? Hhe? Ngzosuke ngiyeke kwakukusiza mina muzongidelela kanje ngizoyeka ngampela.

Mkhize : Kulungile bafo ngena emotweni uyidonse sengiyfakile ngemuva

Mpiyakhe : [esadiniwe] uyeyisa wena[ angene emotweni yakhe adonsele imoto kaMkhize eceleni komgwaqo maqede aphume emotweni aqaqe intambo ebeyidonsa ngayo ayibuyisele ngaphakathi emotweni yakhe] usungafonela ke abantu bomushwalense bezoyilanda ngiqedile mi la

Mkhize : ngiyabonga bafo[ kukhale ucingo lwakhe alubambe ngokunganaki ukuthi ubani ofonayo] yebo muntu khuluma

Ndlovu : [ehlekela phezulu ] Ha…Ha…Ha.. awuzimisele namanje ngokutshela uMpiyakhe iqiniso ngawe?

Mkhize : [ethukile] Awuhlukane nami wena

Ndlovu : ukhuluma nobani kanjalo wena mfana usukhohliwe ukuthi ngingubani mina ufuna ngikukhumbuze

Mkhize :[eziqinisa nenkani] Ey ungazongisabisa wena ngeke ungenze lutho

Ndlovu : soke sibone mase ngenza impilo yakho ibe maxhapheshu kusukela manje

Mkhize : usukwenzile vele kanti usafu….[kuvele kuqubuke elikhu ilangabi leli emotweni kaMkhize ishe ingqongqe] Aybooo imoto yami [akhale]

Ndlovu : kusekuncane lokhu mungayikhokhi imali yami ngilandelisa ngomndeni wakho

Mkhize : [ekhala ]Ngiyakucela hhayi umnde…[lucishe ucingo engakaqedi ukukhuluma] Ibhadi elingaka kodwa ngehlelwa yini[ abambe ikhanda]

Mpiyakhe : [ethukile] Kwenziwanjani mase kunjena Mkhize ishiswa yini imoto? Kukhona ongifihlela khona bafo ubani lona ukusabisayo usumncenga kangaka?

Mkhize : [ usahlahle amehlo uthukile] ay Mpiyakhe cela ungibeke ekhaya manje ayikho ntebesiyizele la okuncono lokhu kwenzeke ingasekho phakathi nomgwaqo

Mpiyakhe : Kwenzakalani Mkhize khuluma!!

Mkhize :awufuni ukungibeka endlini?

Mpiyakhe : ay kulungile felenkanini asambe [bangene emotweni bahambe bayishiye ivutha imoto kaMkhize]

Ntethe's novels and drama

16/07/2026

16/07/2026

16/07/2026

07/07/2026

04/07/2026

03/07/2026

30/06/2026

28/06/2026

26/06/2026

26/06/2026

Address

Website

Alerts

Shortcuts

Share

Listing takedown request