Kilar Novels

09/04/2026

KUPAMBIRA MBODZA

By Clarence Mandisodza

0775874868

Vanhasi imbodza yemangwana,
Hunzi musiyei kani anozochema,
Yave hondo newake mubereki paunomutsiura,
Hatichatauri kana wamutuma,
Isu taiziva kutambira waombera,
Twanhasi kutoita zvekubvuta,
Hakuna achada kubatirwa mwana,
Tiri kupambira remangwana mbodza.

Nhasi Regina ave muroora,
Anoita kunge achafa nayo nzara,
Chikonzero hatigoni kubika,
MaTake-away ndiko kwake kurarama,
Mwedzi wese mumba asina kutsvaira,
Pakukura ainzi nderasisi basa,
Hapana akagombedzera tsika,
Vaenzi kaisakwazisa,
'Musiyei ari kunyara,'
Amai vacho kwaitenge kudada,
Hezvo nhasi ave mbodza.

Nhasi uno dzatove baba,
Asi kuita kwacho kunotonyadza,
Kukura kwake aitiza badza,
Zvonzi musiyei rinomurwadza,
Nhasi angove munhu wekubheja,
Mabhurukwa kungorembedza,
Chaakaroorerwa mudzimai ari kuchidemba,
Midziyo yemumba kungotengesa,
Nhasi Tichafa uya rave mbodza.

17/03/2026

https://chat.whatsapp.com/KLN7FBL0ElIBj3arzX9t4y?mode=gi_t

https://whatsapp.com/channel/0029VagFhhnBadmSjuzcJE1p

ZVEMUDUNDUNDU

By Clarence Mandisodza

0775874868

CHITSAUKO 34-35

Nyaya yekurova Peterson Ubert haana kumbobvira aiti bufu kunyangwe zvazvo vainge vatenderana kureurura nyaya dzavo kune mumwe nemumwe. Uyuwo Ross haana kubvira akataurawo nyaya yekutengerwa hembe dzekuendesa kumafuramhepo naPeterson pamwe nekuzorapiswa paya paairwara uye kufurirwa kuti arambe murume. Kunyangwe zvakadaro, kubva pasvondo mbiri dzavakange vari kuInyanga, vakave nenguva yakanaka kwazvo yekufara pamwe nekugoverana rudo. Kupera kwakaita mazuva avo, vakabva vadzoka Harare.
Vaviri ava vakadzokera parudo rwavo rwekare. Iko kuInyanga, Ubert akaita mhiko dzake kumudzimai wake. “Ndinoda kuti uchitanga kuenda kubasa Ross zvakare kuratidza kuti zvedi ndinokuda, kunyangwe zvazvo zvandinoda kuita zvisingakwani kududzira rudo rwangu. Vhara maziso.”
Ross akavhara maziso ndokubva azokumbirwa kuti amavh**e, pakarepo akatambidzwa kamwe kabhokisi kaduku ndokukavhura achinge anonokerwa nekuona zvaive mukati. Akaona muine makii, “A house for me Ubert?” Ipapo ainge atogadzirira kusvetuka mudenga.
Ubert akaseka zvake ndokuzoti, “Yes my love.”
Pakarepo Ross akabva asvetukira Ubert pamubhedhapo ndokutanga kumutsvoda. Achipedza akanopfugama pasi ndokutaga kutaura uku achirwisana nemisodzi. “Thank you Ubert, I really appreciate this. I promise to be a good wife and to…” Akazoguma akurirwa nemisodzi ndokutanga kuchema. Akanyaradzwa nemurume wake ndokuzoenderera mberi agara pamakumbo. “I promise to love you for the rest of my life.” Pakarepo vakabva vatsvodana.
Vachipedza Ubert akaenderera mberi, “Chimwe chinhu, ndinoda kuti utsvage maid.”
“Wekuitei naye babe?”
“Anokubatsira basa, unomutsvaga zvako kana wavekuenda kubasa.”
“Iiih shamwari, isu tichingova vaviri chete? Hauna kunzwa here zvakaitwa amai Devon vaya vekumanew stands.”
“Naani?”
“Nemurume wavo mupurisa uya, kudanana zvake nemusikana webasa kwakumunhumburisa.”
Ubert akaseka ndokuti, “Saka urikuti ndinozodanana nemusikana webasa here ini?”
“Handina zvangu kudaro asi kungogara ndachengetedza murume wangu kurinane. Basa ndinoita babe, usandityire zvako.”
“Kana wadaro pakanaka, asi kana zvazorema tinozoona zvekuita.”
“Can I ask you something babe but don’t feel offended, pamwe ndingatadza kubvunza zvakanaka.” Akadaro achibva atsvoda murume wake pamwe nekuenderera mberi mush**e mekupihwa mvumo. “Why another house honey isu tiine imwe hombe yatirikushaya kuti toiitisei nekukura zvakare irikupi iyi?”
“Wabvunza mubvunzo wakanaka kwazvo, unoziva ndakashaya kuti ndokutengera mota here kana kuti imba. Ndakazongosarudza imba, asi waida mota?”
“Hiiiii, saka dai wakandibvunza babe isina kuzoita surprise, mota ndiyo yainyatsoita.”
Vachisvika kuHarare Ross akange atononokerwa kare nekuda kuona kwaive nemba yake iyi nokudaro zviya zvekuchatanga vasvika kumba havana kuita saizvozvo. Vakabva vangorurama vakananga kuWestgate, munzvimbo inonzi Sandton. Ipapo nguva dzainge dzave half 6 dzemaheru. Ubert akaridza bhero kamwechete zvavainge vasvika pagedhi ndokubva paita chinguva chingangomedza munhu mate kamwechete risati razarurwa.
“Ko panotogara munhu?” Ross ainge abvunza nezwi rakaderera asi achiratidza kushamisika.
“Ndakafanokuisira maroja.” Akange apindura achidarikira Ubert.
“Imba yangu Ubert?” Vose vakabva vaseka zvavo. “Asi serious wakatoisa maroja?”
Ubert haana kuzokwanisa kupindura sezvo gedhi rakabva razarurwa nemumwe murume ainge akapfeka hovhorosi pamwe nemajombo. Vakapinda Ubert nemurume uyu airatidza kuve mushandi vachisimudzirana maoko. Mota yakanomiswa panzvimbo yayo ndokubva yangodzimwa. Vaviri ava vakaburuka ndokufamba zvishoma kubva pamotokari vachinosangana nemurume uya. Ipapo Ross meso aingunopeka-peka nzvimbo iyi achizvibaya nemibvunzo mizhinji kwazvo mumusoro make. Vakakwazisana Ubert ndokuzivisa mudzimai wake kumurume uyu uyo ainzi mukoma Rori. Akaitawo zvimwechete kuna mukoma Rori achivazivisa kuna Ross.
“Rori zvochirevei manje?” Ross akabvunza zvake mukufara.
“Ndinonzi Lawrence.” Vose vakaseka iye ndokuzoenderera mberi achiti, “Ambuya vangu vakandirera kubva ndichiri muduku ndivo vaiti Rori nekuti vaiti rangu iri havarikwanisi rose. Pavaitomboedzesera vaiti Rorenzi.” Vose vakaseka zvakare.
“Zvanga zvandinetsa kuti izita rudzii iroro?” NdiRoss uyu.
“Inga urikushanda mukomana, maruva atonaka kudai?” Ubert akataura achipeka-peka chivanze, “Ngatibva tatenderera uchiona musha wako Ross.”
Chiri chokwadiwo, vakatenderera vachiona musha, yadhi yacho yainge yakakura kwazvo iine imba imwechete yainge yakavakwa kunge hositeri. Kugedhi, vachangopinda, kwainge kuine kamba kemuchengeti sekaye kanowanikwa pamakambani panonyoreswa vanopinda nevanobuda. Kufamba mamita angangoita gumi nemaviri kubva ipapo, paive nekamba kadiki kainge kasina chinhu. Aka kainge kakabatana nezimba zihombe rairatidza kuti rine makamuri akawanda kwazvo. Kuenda mudenga raienda nemafloors matatu tisingaverengeri yepasi.
Ross ndiye akatanga kubvunza mubvunzo wainge watenderera mumusoro make kwenguva refu. “Wait Ubert, are you telling me that this is a house?”
Ubert akabva amira mberi kwemudzimai wake akamutarisa ndokuti, “Asi hausi kuifarira kani?”
“No babe, just that set-up yacho haisi yeimba yekungogara. It seems like a business premise.”
Pakarepo Ubert akaraira mukoma Rori kuti vavh**e gonhi rekaimba kaya ndokubva vangoita sekudaro. “Nyaya iripano ndeyekudai Ross, this is not actually a house but a business premise like you have said. I want you to think of a business that you will run here, these are your premises babe.”
Zviya zvekuti mukoma Rori vaive pedyo haana kana kumbozvifunga, Ross akasvetukira murume wake ndokumutsvoda pamuromo. Iyewo Ubert akatosimba kuti vasadonha. “Thank you my husband, thank you very much. I really appreciate this.” Ross akataura akamonera murume wake mutsipa nemaoko ose. “Let’s see kuti ndoitei pano Ubert, come…” Izvozvi ainge odhonza mumwe wake ruoko.
Vakafamba ndokukwira kudenga Ross akave wekungoshamisika pamwe nekutenda chete. Nekuda kwezvainge zvamboitika kuti vanotsvodana pasina kuzeza, Rori ainge opota achinzvenga-nzvenga ozouya kana achinge adaidzwa. Chakange chotemesa Ross musoro kwaive kufunga kuti nzvimbo iyi oishandisa kuita bhizimusi ripi chaizvo.
“Rega ndikutengesere pfungwa Ross, ungatondifira nekufunga. Make it a lodge.”
“Iiih babe no. I have my principles shamwari, vanhu vanouya kuzoitira chipfambi chavo pano? Handingadi kubatsira kuparadza dzimba dzevanhu. Maybe a wedding venue, conference place for corporates etc, what do you think.”
“You are a star babe, with that swimming pool outside it will come out nice. Wazviona-ka kuti ndakupa a starting point yekufunga?” Vakabva vaseka zvavo.
Apa vakazobvapo nguva dzotovavarira kubata 9 dzehusiku sezvo vainge vasisina chekumhanyira. Vainge voti vakapinda mupanda uyu, voita nguva varimo vachigoverana zvavo rudo. Mukoma Rori ndivo vainge vasunungurwa zvavo vachinzi vaizongouya vachikiya kana vaviri ava vavekuenda.
Vakasvika kumba nenguva dzahalf 9 ndokuvhurirwa gedhi nababamunini Obert avo vaingunoona zvavo bhora panguva dzakasvika mukoma naamaiguru. Motokari yakapinzwa mugaraji ndokubva vapinda mumba vose munova mavakakwazisana zvizere. Ubert naRoss ndivo vakazonogeza ndokudzoka zvavo kuzotandara. Pakarepo serefoni yaRoss yakatanga kurira, aive Peterson aichaira Ross.
Sezvo serefoni yaive pedyo naUbert, haana kuzengurira kuidavira. Akangoibaya ndokuiisa panzeve asina chaakataura. “Rosslyn, you think you can run away from me, right? I am going to find you and you will suffer for all those whom you sent to beat me…” Pakarepo Ubert akadimbura runhare urwo rwainge rwakaiswa pokuti munhu wese anonzwa.
Ross ainge ongobvunda agere padivi pemurume wake avawo babamunini Obert vainge vasina zvizhinji zvavainge vanzwa nekuda kwekunakidzwa nebhora. Ubert akaita chinguva akanyarara achiratidza kuti ainge odzamisa pfungwa dzake zvinova zvakaonekwa kuburikidza nekukwenya-kwenya musoro wake pamwe nekutura mafemo. Ross akazoguma avharawo chiso chake nechanza chake asisazivi chekuita.
Ubert ndiye akazogura runyararo rwevanhu vaive mumba umu achiti, “Munun’una ndine hurombo kukuvhiringidza kuona bhora. Pane nyaya yandirikuda kubatsirwa pano.” Ubert akatanga nekudaro zvikapa kuti hana yaRoss irove zvakanyanya achiti ainge oda kugadzwa dare.
“Haiwa, taurai zvenyu mukoma,” akadaro Obert.
Ubert asati akanda nyaya yake iyi mudariro, akakumbira Ross kuti amboenda zvake kubhedhuru zvikabva zvawedzera kushushikana kwake. Akaenda achiita sekunge achawa pasi sezvo kadzungu kainge komushanyira zvishoma nezvishoma. Akangosvikozvikanda pamubhedha ndokutanga kutaura oga uku achichema.
“But why Peterson? Chandakakutadzira chii chaizvo chekuti ungabva wada kundiparadzira imba yangu kudai? Vanhu vaurikuti ndakatuma kuti vakurove ndevapi vandisingazivi? Inga paya ndiwe waida kutondiuraya ukasvika pakundiridzira pfuti…”

CHITSAUKO 35

Yeukai haana kuda kupukuta misodzi, chaaikwanisa kuita nguva dzaaitaura idzi kwaive kukwidzira twudzihwa utwo twakange twoperekedzawo misodzi. Akaenderera mberi nekutaura nezwi raive pedyo nezevezeve, “Mubedhuru medu here Chandi? Yes I understand that wanga usingachandide asi you should have respected our matrimonial home, we are not yet divorced Chandi. Zvisinei, I wish you a speedy recovery, you will be fine. You won’t die Chandi because we have a lot to talk about, haungambofi.”
Pfungwa dzaakange abva nadzo kumba handidzo dzaakazosvika nadzo kuchipatara. Akange abva achida kusvikodzura tambo dzose dzaiita kuti murume wake awane kurarama kuti abva angomupfuudza zvake asi ndokuzochinja pfungwa zvaakapindamo.
Kutsveta meso pamurume wake kwaakaita achitanga kupindamo hana yake yakarova kamwechete zvinova zvaasina kunzwisisa. Akambofunga kuti zvimwe ainge afa asi ndokuzoona achifemera kure-kure. Mush**e mekunge apedza kutaura, akange angomira padivi achiyeredza misodzi.
Tete vainge varambidzwa kupinda zvichinzi mudzimai wacho ndiye anodiwa chete nokudaro vainge vagere pavainge vasiiwa nguva dzakadzokera Yeukai kumba. Yeukai akazobuda nguva dzakapinda chiremba achiona murwere, ipapo ainge akumbirwa kuti amire panze vagozoenda vose kuhofisi kuti anzwe zvainge zvabuda mukumuongorora kwavainge vaita.
Iyewo chiremba wacho haana kupedza nguva, akabva angobuda ndokudungamidzana naYeukai vakananga kuhofisi kwake. Kana natetewo vakange vabatana nevamwe, vakapinda ndokuwaniswa pekugara.
“Kutanga ndinoti ndine urombo ne…”
Tete havana kuzomirira kunzwa zvemberi, vakaibararadza mhere uku vakabata gotsi, “Amaiwe kani, Chandi waenda. Ndozvireva kunaaniko zvandaitirwa naYeukai? Amai kani, hwiiii…”
Yeukai akaita hasha dzisina mukare akamboona ndokubata tete vake pahuro uku achipopota. “Tete! Indava muchiita zvinhu zvinonyadza kudai mukadzi mukuru? Chamurikuchema chii ipapa iye munhu ari mupenyu? Mabvira kare muchindiitira mashura nhasi handizivi kuti chii?”
Ipapo tete vainge vanyarara uye vainge varegedzwa kubatwa kwavainge vakaitwa pahuro. Chiremba ndiye akabva achimbidza kutsinhirawo, “Ichokwadi tete, ndanga ndirikuti ndine hurombo nedambudziko rehurwere ramasangana naro. Tirikuedza napose patinokwanisa napo kuti tisarasikirwe nehupenyu…” Chiremba vakaenderera mberi nekutaura.
Tete vakazenge vongoti boi-boi tuziso semuroyi ayedzerwa. Zvakange zvotiwo chiremba ainge oitawo seanoda kuvaburitsa munyaya kuburikidza nekutaura nechirungu. Zvimwe akange otya kuibongomorerwa zvakare mhere. Mush**e mekutsanangurirwa zvizhinji pamwe nekubvunzisisawo twuzhinji, Yeukai natete vakabuda ndokuenda kumotokari.
Vave pamotokari Yeukai akanyebera tete achiti aida kudzokera kubasa kunokumbira mazuva nokudaro akavapa mari yekukwirisa kombi kuti vachienda zvavo. Vakada kumboti sika-sika nerekuti vanosiiwa kumba asi Yeukai akatsika madziro nokudaro vakanosiiwa pamugwagwa pavaizokwirira muchovha unopinda mutaundi.
Ibveipo, Yeukai akarova motokari akananga paMarimba ndokusvikopinda muchitoro cheOK. Imomo akatenga mabhotoro maviri ewaini pamwe nerimwe doro pamwe netuzvinwiwa twuya twekuwedzera simba twemhando yeSwitch neDragon. Rimwe redoro racho akatomborinwira mumotokari ndokuzosimukapo awisa mabhotoro matatu.
Akazoisimudza motokari akananga kumba kunova kwaakamboita nguva arimo mumotokari, panze pegedhi. Akatura mafemo atura-zve zvikaita sekunge mweya wacho uchapera kwawaibva. Ipapo ainge obata-bata wivhi yake achiita seanoibvanyangura. Zvose izvi kwaive kuzvidya moyo nepfungwa nekuda kwemurume wake uyo waaisaziva kuti achararama here kana kuti kwete.
Hongu, chiremba vainge vataura kuti mukana wekurarama wakakura kwazvo kupinda wekurasikirwa nehupenyu asi hupenyu hwemunhu hwaingove huri mumaoko aMwari. Mashoko atete ndiwo mamwe aiwedzera kumudya moyo. “Kureva here kuti Chandi akanzi afa ndini ndinenge ndauraya murume? Pose parikutaura tete varikundipa mhosva yekuda kumuuraya. Divi rangu havana kumbobvira varinzwa asi vakatoona ndirini ndine mhosva. Hongu mhosva ndinayo handirambi asi...” akabva atura mafemo zvakare. “It all comes back to me, hapana kumboti asi apa.
“Excessive intake of alcohol yataurwa iyi kwakange kwave kufunga kuparara kwemba yake nokudaro haisi mhosva yake. Dai ndakaramba kudzingwa paye ndingadai ndakagara pedyo naye ndichiona mafambiro ake. Ndakakanganisa, ndizvo-ka zvakaita kuti Eunice atore advantage...” Pfungwa dzake idzi akadzigurisira paakafunga kuti ainge asiya Eunice mumba make.
Akabuda mumotokari nedoro rake ndokukinura gedhi pamwe nekupinda. Akakinura zvakare gonhi rekupinda mumba ndokubva apinda pamwe nekutsveta doro rake raive mupepa bhegi guru rekwaOK. Eunice ainge akazvambarara nemusana uku misodzi iri pamatama. Yeukai akaramba akamuyeva kwechinguva ndokuzogara pasofa. Akaita nguva huru akamuyeva zvakare agere kudaro ombopota achitarisa pasi sekunge ane zvaaiverenga ipapo.
Akasimuka ndokunochonjomara mberi kwaEunice ndokumugadzirisa kuti agare zvakanaka. Achipedza, akamutsunhura muromo uku misodzi yainge yajenga mumaziso. Mashoko akatanga kutaurwa naEunice zvaakapedza kusungungurwa muromo aive ekuti, “I'm sorry Yeukai,” asi Yeukai wacho haana kudavira.
Pakarepo akamusungura maoko nemakumbo ndokubva anogara zvakare pasofa. Eunice ndiye akamhanyira kunopfugama munyasi maYeukai ndokutanga kuchema achikumbira ruregerero akabata makumbo aYeukai. Yeukai wacho akaita sepasina chaiitika nokudaro akaramba akanyarara zvake akatarisa mudenga achiita sekunge aiverenga tumapundu twesirin'i.
“Yeukai, ndiregererewo pazvose zvandakaita. Handizivi kuti ndainge ndapindwa nei kuti ndizosvika pakuita zvinonyadzisa kudai. Asi chandinoda kukuudza ndechekuti murume wako anokuda, kunge ndiri pano kudai inharo dzangu. Tanetsana kuseni achindidzinga pano ndokuguma abuda achiti ndinoda kudzoka usisipo...”
Apa ndipo pakazopindura Yeukai, “Saka uchirikudei pano?”
“Kutaura chokwadi sisi...”
“Handisi sisi vako, usade kundipa hasha Eunice.”
“Sorry Yeukai. Ndanga ndichingotiwo munhu ane stress yezvizhinji saka paanodzoka ndomboona kuti anenge ave sei.”
“Chibuda muno.”
“Ok.”
Eunice akasimuka achiratidza kuti kwaive kumanikidzira, rimwe gumbo rainge razvimba zvekuti kutsika kwaive kumanikidzira. Akatsvaga paainge akaisa makii emotokari yake ndokumawana, kunaka kwazvo ndekwekuti aive mudhanduru makare.
Haana kuda kuzotsvagana nezvakawanda, akazotaura mashoko ake ekuguma amira pamusuwo. “You were right Yeukai, I betrayed you, I betrayed our friendship and I betrayed our trust. I don't know if you will ever forgive me. Tinokwanisa kusazove shamwari zvakare nezvandakaita asi just find it in your heart to forgive me.” Akabva abuda achifamba zvishoma nezvishoma nekuda kwemarwadzo.
Sezvo Yeukai akange atora nhamba dzachiremba pamwe nedzamukoti wepo, haana kuzoenda manheru kunoona murume wake. Akangoita zvekufona ndokuudzwa kuti hapana chainge chanyanya kusanduka zvinova zvakaita kuti awedzere kunwa doro rake nekuda kwekufunganya. Akazoguma abatwa nehope ari pasofa raainge agere kubva zvaainge adzoka kubva kuchipatara. Chaipota chichimusimudza kwaive kunorasa mvura kuchimbuzi.
Mangwana acho akamukira kugeza ndokugadzirira kuenda kubasa asi achidarika nekuchipatara. Ari munzira kuenda kuchipatara, akachairwa naamai vake vachikumbira kuti asvike kumba nekuchimbidza pasina kukundikana. Tete havanawo kutora nguva vasati vamuchaira, akambozengurira kuidavira asi ndokuzorovera moyo padombo.
Nyaya yavakataura ndiyo yakaita kuti aite sekunge achafa nekufunga. Hongu, yaive nyaya yakaoma kuzivisa hama dzemurume wake asi painge pasina zvekuita nekuti dzaifanira kutoziva. Akazosara osvika zvake pachipatara pfungwa dzadhanganyika.
Chinhu chainge chanyanya kushanduka pamurume wake kwaive kufemawo zvinonyatsooneka kusiyana nepaainge apinda pekuti waitonyatsomutarisisa ruviri kana rutatu kuti uone kuti mupenyu. Yeukai akasiya aisa munamato ndokubuda, akanogara mumotokari ndokumboita chinguva achifunga zvokuita. Akazobaya-baya serefoni yake ndokuiisa panzeve.
Mush**e mekukwazisana nemunhu waakachaira, akati, “Babamukuru kuno hakuna kumira zvakanaka. Chandi kutaura kuno ari muchipatara, akangodonha nezuro...”
“Hanzi zvadii zvakare nhai amainini? Zvakaitika nguvai?” Babamukuru vakabvunza.
“Doc vati kidney failure due to excessive intake of alcohol. Zvakaitika nezuro mangwanani ndiri kubasa, ndakabva ndaitawo munyama wekukanganwa foni kubasa nekuda kwekudhanganyika pfungwa.”
“Inga zvakaoma, saka ari kuchipatara chipi? Nhasi wacho mambomuona here? Arisei?”
“Ndakamumhanyisa paBelvedere Medical Clinic. Ari nane zvake pane zvanezuro, arikutomboonekwawo kufema. Nezuro ainge akangoti nho.”
“Pakanaka amainini, regai ndiise pafamily group tione kuti tozvifambisa sei?”
“Maita basa babamukuru, regai ndimbozama kubata vamwe.”
“Zvakanakai amainini, tinenge tichibatana, ari muwadhi chii?”
“Ari muICU.”
“I thought as much, maita basa amainini.”
Achipedza, akachaira hanzvadzi dzaChandi mbiri ndokudzizivisawo. Mumwe wacho muduku ndiye akange oda kubhabhauka achiti sei kuzoziviswa nhasi izvo zvakaitika nezuro? Mush**e mokuchaira vose vaaifunga kuti vakakosha, Yeukai akasimudza motokari akananga kuGlenview. Akange azvipira zvake kunonoka kubasa, akachitanga achaira mukuru wake achimuzivisa zvedamudziko rake ndokubva apihwa mazuva achinzi azodzoka kubasa kana dambudziko rake rapera.
Akasvika kuGlenview nguva dzovavarira kubata 8 dzemangwanani, baba vake vainge vatobuda kuenda kubasa sare amai vake avo vainge votanga kutsvaira mumba. Vakakwazisana ndokutora zvigaro muimba yokutandarira.
Amai vake havana kuda kuparadza nguva, “Yeukai uripamurume here mazuva ano?” Nyakubvunzwa akaramba akanyarara achifunga kuti pachirine chekuvanza here apa. “Haundinzwi here Yeukai, ndati uchiri pamurume here?” Vakange votoita hasha vachinge vakwidza izwi.
“Mhamha, naChandi takanetsana ndokubva andidzinga pamba. Ndakaita almost a week ndisipo pamba ndokuzochairwa nezuro neshamwari yangu zvaakamuona akadonha pabhawa repaPfukwa iro. Kutaura kuno ndakamumhanyisa kuchipatara.”
“Unoda kuuraisa murume here Yeukai? Hee! Une wavakaudza here vekwake kuti ndadzingwa pamba? Vanatete wakavaudza here kana isu kuno wakambotiudzawo here? Seiko uchiita zvinhu zvinonyadza kudai? Icho chamakanetsanirana chacho chii chingabva chadzingisa munhu pamba? Urikuita chipfambi-ka?”
“Mhamha kani, handina chipfambi chandakamboita apa, we just had a small misunderstanding chete.”
“Urikuziva here kuti tete vako vakauya pano svondo radarika iro vachitaura zvose zvavakaudzwa nemukuwasha wangu? Ini ndini ndochifa nekutukwa nababa vako ndichinzi ndirikuziva kwauri, usafunge kuti hama dzaChandi hadzisi kuzviziva Yeukai. Hauna kumbongwara zvako, vanatete nemukoma vake varikuzviziva zvose. Vanga vakangomirira bedzi kuti uvazivise nyaya iyi asi hauna kuita sekudaro, kuti ndizive kuti wanga uripi nguva yese iyi handizivi. Dai ndisina kukudaidza kuno wanga uchida kuti zvizodii? Ukati vabereki havana basa…”

WhatsApp Group Invite

17/03/2026

https://chat.whatsapp.com/KLN7FBL0ElIBj3arzX9t4y?mode=gi_t

https://whatsapp.com/channel/0029VagFhhnBadmSjuzcJE1p

ZVEMUDUNDUNDU

By Clarence Mandisodza

0775874868

CHITSAUKO 33

Amai Devon vakasvika kumba kwamusoja Devon kari mupurema uku musoja achidzipwititidza mbanje. Varivaviri vainge vari muimba yekutandarira mahwindo ose akapfigwa.
Izvi zvakapa kuti amai Devon vapinde vachipopotera musoja. “Musoja hausi wave kundijairira here? Haungaputiri mbanje dzako mune mwana wangu..."
“Mhosva ndeyako Dorothy, wati urikuenda zve2 minutes chete asi wopedza gore rese uriko. Ndiwe watondijairira Dorothy."
Panguva yaaitaura iyi amai Devon vainge votopedza kuvhura mahwindo. “Wadii kuburitsa zvako mwana wangu muno?"
“Ogara ega panze? Chikuru ndechekuti wasvika, wanga urikupi Dorothy?"
“Shamwari panga pasina kumira zvakanaka, ndanonotswa nemurume waYeukai..."
Akadimburwa, “Wanga wavekuitei naye? Zvakare Yeukai ndiani?"
“Iwe dzikama. Amai Fundisi vaye vekuZesa saka murume wake ndamuona akazvambarara paPfukwa paya saka ndatozofonera mudzimai wake kuti ndizvo zvirikuno..."
“Ndikubate muromo ipapo, kana uchiti wafonera mukadzi wake unoreva upi wacho?"
“Munodziputireiko mbanje dzacho kana dzichikutambudzai? Ane vakadzi vangani?"
“Iwe mai yekuZesa iyi haisiriyo yakadzingwa pamba nemurume here? Handiti amga akudanana nemumwe mukadzi so akada kungoita zvawakaita izvi asi iye ari mutema zvishoma? Kana isitori shamwari yacho futi."
“Musoja. Unenge uchizvinzwa kupi zvese izvozvo?"
“Ndinogara ndiine dotcom wangu. Murume uya anga akugara ari maPfukwa umu achirova strong stuff everyday zvekuti handisi kushamisika kana urikuti wamuona akadonha. Plus stress inenge yamukurira."
“Asi chinenge chokwadi nekuti mumotokari make manga makazara mabhegi. Saka tazonomusiya kuBMC uko apa tete vake vanga vachingopopota vachiti murume akafa imhosva yako."
Iri ndiro raive vhiki rakaonekwa amai Devon vachitsvodana naMaxwell. Vhiki rinotevera racho uri Mugovera ndiro ravakamukira kuKuwadzana vachizonorwa natete Rodha.
Kunyangwe zvazvo tete vainge vambomira-mira, chakazonyanya kuvatsikirira muviri wavo uyo wainge wakatsonga kusiyana newaDorothy uyo ainge akasimba. Akavarova zviya zvekusiya vasisakwanise kurwisawo, ipapo akanyamura mwana wake ndokumuisa kumusana. Akadarika nemuimba yekugezera ndokunyika tauro raakaonawo imomo mumvura pamwe nekuzvishongedza achitarisa pazigirazi raivemo. Achipedza, akabuda nokuenda kumakombi.
Kumba akasvika ndokurongedza bhegi rake pamwe neremwana wake. Akavhura kagaba kaaichengetera mari ndokutora yose yaivemo ndokubva asiya akiya magonhi ose. Akambofunga kusiira ambuya vaJoze makii ndokuzofunga kaviri, chaakazokwanisa kuita kuvaoneka achiti ainge omhanyira hurwere hwaamai vake kumusha. Ivowo ambuya vaJoze vakaznwisisa ndokubva vangoonekana zvakanaka.
Dorothy akafamba akananga pamugwagwa mukuru unoenda Bhuruwayo ndokukwira muchova unoenda kuNorton. Mush**e meawa imwechete, akange asvika pamba pevabereki vake ndokutambirwa naami vake avo vaichera zvavo mvura mumugodhi. Vakapinda mumba vose ndokukwazisana zvizere, izvozvi Devon kainge kave mumaoko ambuya vacho.
“Asi baba vatobuda kani?” Amai Devon vakabvunza.
“Baba vako unovaziva zvakanaka here wikendi ino? Zvakangofanana nekunge munhu arikubasa.”
“Saka murimega zvenyu?”
“Ehe zvangu, ndatojaira ini, wasiya varisei baba vaDevon?”
“Varinane zvavo, ndati mumboona muzukuru wenyu uyu, mazuva awanda aya.”
“Watogona mwana’ngu. Isu vamwe kuda kufamba unoshaya kuti wosiya ani pamba pacho. Naidzo huku dzatakada idzi, dzinenge dzichida kupihwa chikafu nemvura. Pasina kudaro, unowana dzabiwa nekuti vakomana vacho mazuva ano havasi kujaidza.”
Vakakurukura zvavo amai Devon ndokuzosuma pasuru yavainge vauya nayo iyo yainge yatsvetwa patafura. Sezvo mbuya vaDevon vainge vasati vadya, amai Devon ndivo vakazomhanya-mhanya kugadzirira kudya kwemangwanani, nguva dzakange dzovavarira kubata 10. Vakadya ndokutandara zvavo, midziyo yainge yangoiswa mudhishi, mukicheni yakamirira kuzosukwa.
“Mhamha muchirikuziva here mazuva andakaroorwa aya kuti makanditi kudii maererano nekunetswa nemurume?” Amai Devon vakabvunza.
“Baba vaDevon varikunetsa here?” Ambuya vaDevon vakapindura nemubvunzo.
“Varikunetsa mhamha, ndinogarorohwa mazuva ose, vakada zvavo havarari mumba kana kusiya mari chaiyo mumba havasiyi. Ndamboedza kushingirira asi zvirikundiremera.” Vakange voda kuchema.
“Ukagodii kutaura nhai Dorothy? Zvaane nguva yakareba sei zvichiitika?”
“Ndingangoti 6 months…”
“Iwe ndiwe benzi, wakangonyarara chete?”
“Ndaiti zvichachinja mhamha asi zvirikutowedzera. Kundiona ndauya kudai hazvina kumira zvakanaka.”
“Hazvina mhaka, rega ndikubatsire nekuti handina mwana anotambudzwa nemurume ini. Izvozvi vanasisi vako vagere zvakanaka uko, iwe wega ndiwe woda kurara nezamu mukanwa kuti zvidii?”
Vanasisi vaitaurwa ava vaive vana vaLucia vanova amai vaDorothy. Kuwanikwa kwavakaitwa nemurume wavo vakange vaine vana vaviri, vachinge vakafirwa nemurume kuburikidza netsaona. Vana vaviri vavo ava vaiti Miriam naMarian avo vainge vakangosiyana negore rimwechete pakuberekwa. Nemurume wavo, vanova baba vaDorothy, vakange vangoita mwana mumwechete bedzi vasati vabatwa gomarara rechibereko chinova chavakazosarudza kuti chibviswe zvacho. Amai vaDorothy vaive n’anga.
Vakapinda mumupanda wavo wavaisibatsirira vanhu, iyi yakange yatove imba duku yakazvimirira yoga yaive nemipanda miviri uye ichinge irikumash**e kweimba huru. Imomo vakapfeka dhirezi ravo reretso pamwe nezvuma zvavo muhuro ndokugadzirira zvose zvikwanisiro zvebasa ravo. Mumusoro mainge masungwa dhuku nhema. Vakagara pasi vakapfunya chisero Dorothy ndokugarawo akatarisana navo akaitawo zvimwechete’zvo.
Mush**e mekuzeyesa musoro wavo kangangoita kashanu uku vakavhara maziso, vakabvunza, “Urikuda kuti ndikuitirei murandakadzi?”
“Ndirikuda kuti murume wangu andide, asaone mamwe madzimai kunze uko. Ndinoda kuti adzokewo kumba nenguva, chandinotaura chose anditeererewo semudzimai wake. Chimwe-zve ndechekuti ndinoda kuti asandirove kana kundituka, pakati pedu parege kupinda hama dzake dzichida kutonga imba yedu. Amire neni nguva dzose pane kumira nehama dzake. Chekugumisira ndechekuti ndinoda kuti apote achindipawo mari semudzimai wake. Ndingangoti ndizvozvo,” akaguma nekuombera rutatu.
“Ayi! Ayi! Ayi! Ayiiiiiiihi!” Ipapo vaingunomveyesa-mveyesa musoro wavo uku vakatsunzunya maziso. “Usazvidze matare murandakadzi, unondinzwa? Pandirikuona apa hapana kana zuva rimwe rawakarohwa iwe. Unopumhirei murume zvisizvo?”
“Sorii mhamha…”
“Nyarara!” Vakadaro vachiita sekunge vachamurova nemuswe wemombe waive muruoko. “Murume wako arikupi parizvino?”
“Handisi kuziva, akangobuda masvondo maviri adarika asina kutaura kuti arikuenda kupi?”
Amai vaDorothy vakatora girazi ravo ndokuriisa muchanza chavo ndokuchitarisisa kunemwana wavo uyo wavakaraira kuti ataure zita remurume wake rose. Achingopedza kudaro, chiso chaNobert chakatanga kuonekwa pagirazi riya. Panguva idzi aitenge akarara zvake pasi pemutsamvi achiratidza kuti akaneta chose. Ainge akapfeka yunifomu yake yechipurisa.
“Murume arikubasa uyu. Ko haranga yandirikuratidzwa apa yakatakura budzi remurume wako ndiani? Wakarera imbwa nemukaka ikakuruma.”
“Musikana aindibatsira basa akadanana nemurume wangu ndokupihwa pamuviri asi kutaura kuno ndakamuendesa pandakaziva kuti ane pamuviri.”
“Iwe! Iwe-ka! Unovatirei nezamu mukanwa kudaro? Murume anoenda uyu wakatarisa zvako.”
“Ndizvo ndirikukumbira kuti wangu adzoke kumba vasekuru.”
“Rega tizvigadzirise. Anodzoka zvakanaka kwazvo uye achikuda zvaaisamboita. Ndinoda kuti utaure zvose zvaunoda paari apa…” Vakataura vachimuratidza girazi riya raive muchanza chavo.
Dorothy akataura zvose zvaaida, achipedza Nobert akabva apepukawo pagirazi ipapo achiita seanoshaya nzvimbo yaari. Girazi riya rakadirwa-dirwa mvura nemuswe uya amai vaDorothy ndokuchitanga kuchema seshiri vachiita sevanotsvaira nemuswe wemombe uya. Pakarepo Nobert akadoswerwa neshiri pachiso chaipo ndokupukuta chitosi chacho zvikapa kuti amai vaDorothy vasekerere kwazvo.
Zvose izvi zvapera, vaviri ava vakanotandara zvavo panze vachitaura nyaya dzakaksiyana-siyana. Hapana kupedza nguva huru, serefoni yaDorothy yakatanga kuchema ndokumboramba akaitarisa achishamisika nemunhu aimuchaira wacho. Pasina amai vake vakamuraira kuti adavire, yaigona kudimbuka isina adavira.
“Hello…” Dorothy akadavira nezwi rakapomhodzeka.
“Mhoro kani mudzimai wangu, urisei zvako?” Izwi raNobert rakanzwika kudaro rimwe divi renhare.
“Iiih Nobert usatombodaro zvako, handifungi kuti ndirimudzimai wako ini. Dzave svondo mbiri ndisingazivi kuti urikupi, serefoni yako haipindi. Handizivi kuti urikuti ndirikudyei, horaiti, ini handina zvangu basa, ko mwana wako Norbet? Handina kumbokurambidza kunogara naChiedza wako asi…” Pakarepo amai Devon vakabva vatanga kuchema.

WhatsApp Group Invite

17/03/2026

https://chat.whatsapp.com/KLN7FBL0ElIBj3arzX9t4y?mode=gi_t

https://whatsapp.com/channel/0029VagFhhnBadmSjuzcJE1p

ZVEMUDUNDUNDU

by Clarence Mandisodza

0775874868

CHITSAUKO 32

Kusara kwakaita Eunice mumba zviya zvakabuda Chandi achisiya amuudza kuti aida kuzodzoka asisipo, akatosara achiseka zvake. Akatenge atanga kuseka handi wacho asatai atombobuda gonhi. “Chandi arikuda kumbondiona saani chaizvo? Ndirikutoona zvangu kuti haanyatsondipihwa zvakanaka, anongondionera mukagaba kevhikisi nhai? Paya ndakamboti zvimwe kwaive kudhakwa pamwe nekufunganya kurambana nekapfambi kake asi ndirikutoona kuti mupfuhwira uya uchiri kumutonga. Paairara neni aifunga kuti ndiri joki here ini?
“Zvino zvaarikuda kuzviita magen'a regai tigoona kuti akangwara kusvika papi uye kupinda ini here? Handiti ari kudzoka? Ndinoda kupedzerana naye zvekuti haazombofa akafunga zvakare nezvepfambi yake. Hee bhedhuru rangu nemudzimai wangu, hee respect hahahada! Wuuuri! Seka zvako Eunice iwe. Rega ndinyatsobika breakfast ndimusote, ndipo paachaona kuti paye mudzimai wake hapana zvaakamuita. Kana iye Yeukai wacho achauya achitora manotsi..."
Chakazomudimbura kutaura achifinyama chiso paaingunotaura apa kunzwa kuzarirwa. Akamhanya kuchimbuzi ndokuedza kurutsa asi hapana chaida kusiya nedumbu rake. Moyo wakazogadzikana ndokuchizobuda onogara zvake muimba yekutandarira.
Akabatidza chivhitivhiti ndokutanga kuona zvake achichinjanisa zvekuona nerumoti. Pave paya akasimuka ndokunanga mukicheni munova maakatanga kugadzirira kudya kwemangwanani akamirira kusvika kwaChandi.
Kuvhura kwaakaita mufiriji achiti atore bhuruvhosi yekukanga kamweya kose kenyama yaivemo kanenge kainge katoita kurangana kumugaririra. Kakanoti pfee mumhuno zvakanyorovera sekupinda kunoita shinda paburi renariti. Akamhanya zvakare kuchimbuzi ndokurutsa zvishoma. Akazobvako achukucha mukanwa nemvura yepatepi yemo ndokunoita nguva akagarazve muimba yokutandarira.
“Chiiko chirikuitika kwandiri? Ndinovimba zvandirikufungira handizvo. Kana zvikave izvo zvangu zvinenge zvaringana, pano ndinenge ndadzika midzi. Hohohodo! Seka zvako Eunice iwe," ipapo akarovanisa maoko ndokubva azembera zvake pasofa kuratidza kudekara. Akaenderera mberi nekutaura ega, “Ndirikufanira kutanga ndabata chokwadi, ndikadya ndonotenga pregnancy test yangu. Zvake zvekuda kudadira munhu atove nepamuviri pake ngaasiyane nazvo. Wake inga wani akazvibaisa dhepo kuratidza kusada zvake."
Akaropodza twuzhinji ndokuzonzwa mudumbu kurira chiratidzo chekuti nyoka dzainge dzotsvaga chingadzinunure. Ndizvo zvakamusimudza pasofa odzokera kukicheni kunova kwaakazongozora majarini pachingwa nekubika tii. Akange otya kuedza zvakawanda nekutya kurutsa.
Midziyo yaakange ashandisa haana kuisuka achiitira kuti agozosuka neinenge yashandiswa naChandi. Akageza ndokupfeka zvake zviya zvekuti kana dai Chandi aisvika, hameno kuti aizokwanisa kuzvibata here. Pedzezvo, akatanga kunzwa zvake mhanzi neruzha rwainge rwawedzerwa zvekuti kana kuvavakidzani rwaisvika. Mati kutambisa chiuno here kwaiitwa naEunice? Achiti akachizunguza waifunga kuti ndiko kuparara kwacho, akazeya-zeya akananga uko, odzoka zvakare maoko akasimudzwa mudenga. Akange atove munyika yake ega. Kuvhurwa kwegedhi haana kukunzwa kana negonhi racho haana kukunzwa.
Nerimwe divi, zviya zvakatakurwa Chandi kuenda kuBelvedere Medical Clinic, akasvika ndokubva atotanga kubatsirwa pakare. Akaongororwa zvose ndokuwanikwa chiropa chisisina kumira zvakanaka zvakare kupera mvura mumuviri iya yavanoti dehydration. Nekuda kwemamiriro ainge aita hutano hwake, akange aiswa palife support.
Yeukai akazotyaira akananga kumba, mutyairi uya wetaxi ainge apedzerana naye kare zvavakaparadzana vachienda kuBMC iye odzokera kwake. Tete vainge vasara kuchipatara vagere panogara vaenzi vakamirira kudzoka kwaYeukai. Vakange vafamba rwendo rwose vachipopota kwazvo, vakange vambotaura muromo wekuti kana Chandi akafa ndiye anenge akonzera. Vedu amai Devon vaive murima, havana kuda kubvunza nezvazvo. Yeukai ndiye akachizotanga kudyawo marasha achipomera tete mhosva yekuvaitira Kumba vaida kunotora medical aid yaChandi pamwe nekunotsvaga mishonga nemadhiripi zvavainge vanyorerwa.
“I hope hapana kukiiwa shamwari nekuti ingatoita disaster chaiyo." Akadaro Yeukai achitsika mabh**eki pamberi pegedhi remba yake.
“Handiti paya maatsvaga muhomwe mukamashaya? Kureva kuti pakavhurika," Dorothy akapindura votovhura magonhi kuti vadzike.
Yeukai ndiye aiva pamberi, akazarura gedhi ndokubva rabvuma. “Pano kutoita kunge pabhawa, chokwadi munhu kusiya radio iri pafull blast kudaro?" Yeukai akadaro.
Nekuda kweruzha urwu, amai Devon havana kukwanisa kunzwa zvakataura mjmwe wavo. Yeukai akazarura gonhi ndokubva rangobvuma pakarepo. Ari mupaseji akanzwa izwi remunhukadzi richikwamatata kuimba zvikamupa mibvunzo mizhinji kwazvo. Achipindamo akawana Eunice achitamba zvake uku akabata chiuno neruoko rwumwechete akafuratira kugonhi. Yeukai akabva angodzima radio pakarepo.
“Iwe h**e iwe, urikudei mumba mangu?" Yeukai akabvunza achifamba kuenda kunaEunice.
“Mumba mako? Usade kundinzwa Eunice, ndingatobvunza iwe kuti urikudei muno nekuti ndini ndatove amai vepano..."
Kana dai aine zvimwe zvaaida kutaura akange adya manonoko. Akawetsurwa mbama yakamudzimaidza. Panguva idzi amai Devon vakange vavemowo, pavakaona Yeukai oda kurwiswa, vakabva vangopindawo mudariro. Pasina kuti Eunice airwisana nevanhu vaviri, dai aive mumwechete, angadai asina kumbopedza nguva. Angadai akarakasha munhu wake nenguva isipi. Kana ivowo vaviri vacho vakanzwa kuti pakange paita zvemurwi mukuru chaiye. Amai Devon vakange vasvika pakumuruma bendekete iri ndokuita chinamira chaicho.
Ivowo vainge vazvipihwa zvibhakera zviviri zvitatu zvematsenganzungu ndokumboona rima mumaziso avo. Yeukai ainge arohwa chirebvu nebvi ropa ndokubva rangoita zvarakadanirwa richidavira. Pakarwiwa kwete zvekutamba vose vakange vaneta, ainge anyanya kukuvara zvakaipisisa ndiEunice. Kana kutukana kwacho kwavaida kuita hakuna kuenda kure sezvo mazwi aisabuda zvakanaka.
"Yeukai, rangarira kuti urikufanira kudzokera kuchipatara." Amai Devon vakadaro.
“Zvakaoma zvandinoitirwa a'sikana. Munoti harisiwo shura here iri? Ko hatisi kudzoka tose here?"
“Rangarira zvandakuudza paya kuti ndasiya mwana namusoja. Izvezvi haasi kutoziva kuti ndiri kupi. Kungoti haasi kufona zvake kureva kuti zvichakanaka."
“Zvino todii nepfambi iyi?" Yeukai akabvunza achinongedza Eunice uyo ainge ati rabada pasi achingogomera.
“Ngatimusiye aende, pano handifungi kuti achasa zvakare kupatsika."
“Aewa kana a'sikana, uyu handisati ndapedza naye. Ndiye nyakuita makuhwa kumurume wangu kuti ndizosvika pakudzingwa pamba pangu. Uyu kana jeri ndinopikira ndamuuraya..."
“Chirega kudaro Yeukai, parizvino hatidi kusimudza mweya wakaipa. Tinoda kuti murume atange anaya..."
“Handichina basa naye, ngaafire ikoko. Dai akandiitira chipfambi nemumwe munhu asiri h**e iri ndazvinzwisisa. Ngaafe zvake ndizvigarire pamba pano ndega."
Amai Devon vakanyengerera mumwe wavo kuti adzore moyo Yeukai ndokuchizoita sekudaro. Vakasiya vabatsirana kusunga Eunice maoko nemakumbo pamwe nemuromo ndokuchizobatidza wairesi iya yaambenge achidandaura. Ruzha harwuna kudzikiswa.
Yeukai ndiye akazopinda mubedhuru ndokuona mubhedha usina kana kuwaridzwa pamwe nenhumbi dzaEunice dziripo pamubhedha zvikabva zvawedzera hasha dzake. Akadzoka achidya marasha ndokusvikotanga kurova zvakare Eunice, pasina kuzobatwa kwaakaitwa naamai Devon, angadai akafirapo.
Ndipo paakange asisadi kudzokera kuchipatara apa achiti zvaive nani kuti afire ikoko. Amai Devon vakadoedza kunyengerera bhururu wavo asi zvakashaya basa dzamara vazongoendawo vachisiya Yeukai nemunhu wake. Vakatomusiya achigeza ropa pamwe nekuzvitova-tova asi vachimukohomedzesa kuti asasarova zvakare munhu.
Yeukai achipedza zvose izvi akanotora mabhegi ake mumotokari ndokupedza. Nhumbi dzacho akadziburitsa mumabhegi ndokudzirongedza zvake mumbhedhuru imomo, dzaEunice pamwe netumwe twaakasangana natwo akanotwupisa kuseri kwemba.
Kupedza kwaakaita kupisa zvinhu zvaEunice akabva adzoka maainge asiya Eunice ndokugara pasofa. “Eunice, unofunga kuti wakangwara iwewe? Handina kukuudza here kuti make sure you are not involved in my family matters?" Akabvunza akatarisa Eunice. "Yeukai, rangarira kuti urikufanira kudzokera kuchipatara." Amai Devon vakadaro.
“Zvakaoma zvandinoitirwa a'sikana. Munoti harisiwo shura here iri? Ko hatisi kudzoka tose here?"
“Rangarira zvandakuudza paya kuti ndasiya mwana namusoja. Izvezvi haasi kutoziva kuti ndiri kupi. Kungoti haasi kufona zvake kureva kuti zvichakanaka."
“Zvino todii nepfambi iyi?" Yeukai akabvunza achinongedza Eunice uyo ainge ati rabada pasi achingogomera.
“Ngatimusiye aende, pano handifungi kuti achasa zvakare kupatsika."
“Aewa kana a'sikana, uyu handisati ndapedza naye. Ndiye nyakuita makuhwa kumurume wangu kuti ndizosvika pakudzingwa pamba pangu. Uyu kana jeri ndinopikira ndamuuraya..."
“Chirega kudaro Yeukai, parizvino hatidi kusimudza mweya wakaipa. Tinoda kuti murume atange anaya..."
“Handichina basa naye, ngaafire ikoko. Dai akandiitira chipfambi nemumwe munhu asiri h**e iri ndazvinzwisisa. Ngaafe zvake ndizvigarire pamba pano ndega."
Amai Devon vakanyengerera mumwe wavo kuti adzore moyo Yeukai ndokuchizoita sekudaro. Vakasiya vabatsirana kusunga Eunice maoko nemakumbo pamwe nemuromo ndokuchizobatidza wairesi iya yaambenge achidandaura. Ruzha harwuna kudzikiswa.
Yeukai ndiye akazopinda mubedhuru ndokuona mubhedha usina kana kuwaridzwa pamwe nenhumbi dzaEunice dziripo pamubhedha zvikabva zvawedzera hasha dzake. Akadzoka achidya marasha ndokusvikotanga kurova zvakare Eunice, pasina kuzobatwa kwaakaitwa naamai Devon, angadai akafirapo.
Ndipo paakange asisadi kudzokera kuchipatara apa achiti zvaive nani kuti afire ikoko. Amai Devon vakadoedza kunyengerera bhururu wavo asi zvakashaya basa dzamara vazongoendawo vachisiya Yeukai nemunhu wake. Vakatomusiya achigeza ropa pamwe nekuzvitova-tova asi vachimukohomedzesa kuti asasarova zvakare munhu.
Yeukai achipedza zvose izvi akanotora mabhegi ake mumotokari ndokupedza. Nhumbi dzacho akadziburitsa mumabhegi ndokudzirongedza zvake mumbhedhuru imomo, dzaEunice pamwe netumwe twaakasangana natwo akanotwupisa kuseri kwemba.
Kupedza kwaakaita kupisa zvinhu zvaEunice akabva adzoka maainge asiya Eunice ndokugara pasofa mush**e mekumusunungura muromo kuti vambokurukura. “Eunice, unofunga kuti wakangwara iwewe? Handina kukuudza here kuti make sure you are not involved in my family matters?” Akabvunza akatarisa Eunice.
Eunice akagomera achipindura, “Chimwe chii chauchada Yeukai? Just kill me ufare.”
Yeukai akaseka zvake uku achirovanisa maoko ake ndokuti, “I won’t do that Eunice, I want to see you suffer for the rest of your life. Not because of anything but betrayal, I trusted you ndikakutora semunin’ina wangu and this is how you chose to pay me back? Chandakakutadzira chaicho chii Eunice?” Eunice haana kupa mhinduro nokudaro Yeukai akaenderera mberi. “Horaiti, waiita makuhwa kumurume wangu, I have no problem with that nekuti ndizvo zvatiri vanhukadzi. Ko kuzotora murume wangu Eunice?”
“Handina chekutaura newe Yeukai, murume wako ndiye akandida ega achiti he is fed up with you. So blame your husband.”
“Uri dofo Eunice. That is betrayal yandambotaura paya. Kunyangwe dai kurikunzi ini naChandi takarambana zvekuti taane makore tisisiri tese, the fact that you are my friend zvaisaita kuti udanane naye.”
“This is 21st century Yeukai, zvaurikutaura izvo zvakasara. He loves me, saka unoda kuti ndiite sei?”
Mhinduro iyi ndiyo yakasimudza Yeukai ndokusvikorova Eunice ganyamuto rembama ndokubva Eunice wacho atoseka zvake. Yeukai akabva aita zvekuchonjomara mberi kwemhandu yake iyi.
“Yeukai you will regret this. The only option you have now is to kill me otherwise watove murimi emote.”
“Handisi mhondi Eunice. I am happy to notify you that I have accepted your challenge. I am not a coward anouraya vari weak. Now listen and listen carefully, ndichadzoka and ndichakuendesa kumba kwako manheru.”
Yeukai akavhara zvakare muromo waEunicr ndokuisa mhanzi iya asi apa ainge adzikisira ruzha rwayo. Akakiya gonhi pamwe negedhi ndokupinda mumotokari make pamwe nekutoisimudza.
Achisvika kuBMC, akaita chinguva arimo mumotokari make achifunga kuti odii chaizvo naChandi. Pfungwa dzaakachimbidza kurasira kure dzaive dzekumuuraya. “Handingamboiti chitema chakadaro, pasina izvozvo, handisirini here ndakakonzera zvose izvi? Parizvino regai ndione kuti Chandi ararama, zvizhinji tozozviona mberi.”
Akaburuka ndokunanga muchipatara munova maakasvikovapa medical aid yake pamwe nekukumbira kunomuona kunyangwe zvazvo Chandi ainge asingapgakanyiki kana kudii. Michina ndiyo yainzwika kurira ichiti ti, ti, ti.
“Chandi ndine chigumbu newe.” Yeukai akatanga nekudaro zvaainge amira padivi nemubhedha wainge urere murume wake. Ipapo ainge akamutarisa pachiso, “I know I was such a bad wife asi how could you do this to me? Eunice here of all the people Chandi?” Hova mbiri dzemisodzi dzakange dzotomhanyidzana nematama ake.

WhatsApp Group Invite