28/05/2026
🚧 O Concello de Rodeiro continúa avanzando na mellora das infraestruturas e servizos municipais.
Na Xunta de Goberno Local celebrada hoxe aprobáronse importantes actuacións destinadas á mellora da rede viaria do municipio, así como novas medidas de colaboración con outras administracións públicas.
Entre os acordos máis destacados atópase a solicitude ao abeiro do plan Vía DEPO da Deputación de Pontevedra, grazas ao cal o Concello contará cunha achega de 189.634,85 € para executar obras de mellora do firme en distintas vías municipais. O investimento total da actuación supera os 203.000 €.
As obras permitirán actuar nos accesos aos lugares de Barrio, Lamazares, dirección Coreixas e acceso ao lugar de Melide, vías que presentan un importante deterioro debido á falta de intervencións de relevancia durante décadas.
Dende o Goberno municipal púxose en valor o compromiso de seguir aproveitando todas as liñas de axuda e subvencións dispoñibles para continuar mellorando as infraestruturas do municipio, destacando tamén a boa situación económica do Concello, que permite asumir a achega municipal correspondente.
Ademais, aprobouse a sinatura do convenio coa Xunta de Galicia para participar no programa de control da avespa asiática (Vespa velutina), reforzando así as medidas de prevención e protección no municipio.
Na sesión tamén se certificou a actuación na estrada dirección Ourín, unha obra considerada de máxima necesidade para os veciños e veciñas da zona, na que o Concello investiu 116.879,12 €.
Seguimos traballando para construír un Rodeiro con mellores servizos, máis seguridade e maior calidade de vida para toda a veciñanza.
