DREDD Atsinanana

23/09/2026

🌍🌿 FIovan’ny TOETRANDRO : ATSINANANA, FOTOANA IZAO NO IRENTSIKA

Tsy zavatra lavitra antsika ny fiovan’ny toetrandro.

Mihamafana ny tany, miova ny fizaran-taona sy ny rotsak’orana, ary mihamafy ny loza mety ateraky ny trangan-javatra ara-toetrandro.

🇲🇬 Madagasikara dia anisan’ireo firenena tena marefo manoloana ireo voka-dratsin’ny fiovan’ny toetrandro.

🌊 Ary ny Faritra Atsinanana, noho izy amorontsiraka sy manana ala, renirano, tanimbary ary harena an-dranomasina maro, dia isan’ireo faritra mila mailo sy miomana manokana.

🌀 Rivodoza sy rivotra mahery
🌧️ Oram-be sy tondra-drano
🌊 Fikiky sy fahasimban’ny morontsiraka
🔥 Doro ala sy doro tanety
🌳 Fahasimban’ny ala sy ny loharanon-drano
🌾 Fiantraikany amin’ny fambolena sy ny fiveloman’ny mponina
🐟 Fahasimban’ny harena an-dranomasina

❗ Tsy afaka misakana irery ny fiovan’ny toetrandro maneran-tany isika. Fa afaka mampihena ny anjara birikintsika sy mampitombo ny fahafahan’ny Atsinanana miatrika izany.

🌱 Inona no azontsika atao dieny izao?

🌳 Arovy ny ala, ary aza manimba azy.
🔥 Sorohy ny doro tanety sy ny fandoroana ala.
🌱 Mambole hazo ary karakarao mandra-pahalehibe azy.
🗑️ Aza mandoro fako.
♻️ Ahena sy tantano tsara ny fako.
🌊 Arovy ny honko, ny vatoharana ary ny morontsiraka.
💧 Arovy ny rano sy ny loharanon-drano.
🏘️ Ataovy madio sy tsy voasakana ny lakandrano sy ny tatatra.
📢 Fantaro sy araho ny fampitandremana rehefa misy rivodoza, oram-be na tondra-drano.

💚 Ny fiarovana ny ala anio dia fiarovana ny rano rahampitso.
Ny fiarovana ny morontsiraka anio dia fiarovana ny fiainan’ny taranaka rahampitso.

🌍 Miova ny toetrandro.
Tokony hiova koa ny fomba fiainantsika sy ny fomba fiarovantsika ny tontolo iainana.

🇲🇬 ATSINANANA MIARO NY TONTOLO IAINANA, MIARO NY FIAINANA, MIARO NY HOAVY.

DREDD Atsinanana

22/09/2026

🌱🌳 MPIANATRA IRAY, HAZO IRAY : MAMBOLY ANIO, MIARO NY HOAVY

Ao anatin’ny fiaraha-miasa eo amin’ny DREDD Atsinanana, ny CISCO Toamasina I ary ny Ambasadaoron’ny UNICEF, Ramatoa Lova Renée, dia notanterahina ny Asabotsy 19 Septambra 2026, teny amin’ny EPP Moderne, ny hetsika « Mpianatra iray, hazo iray ».

🍊 Hazo fihinam-boa no novolen’ireo mpianatra, ho fanatsarana ny tontolo manodidina ny sekoly sy ho famoronana toerana maitso, madio, mahafinaritra ary mahasalama, izay ahafahan’ny ankizy mianatra sy mivelatra ao anatin’ny tontolo tsara kokoa.

🌿 Tsy mijanona amin’ny fambolena fotsiny anefa ny andraikitra. Ny mpianatra tsirairay dia entanina hikarakara sy hanara-maso ny hazo novoleny. Amin’izany, ny zaza dia tsy mpamboly fotsiny, fa lasa mpikarakara sy mpiaro ny tontolo iainana.

💚 Amin’ny alalan’ity hetsika ity, ny tanjona dia ny hampivelatra hatrany amin’ny fahazazana ny kolontsain’ny fikolokoloana, ny fandraisana andraikitra ary ny fitiavana ny tontolo iainana. Satria ny hazo iray voakarakara anio dia mety ho lasa aloky ny taranaka rahampitso.

🌳 Sekoly maitso, ankizy tompon’andraikitra, tontolo iainana voaaro.

🌱 Mpianatra iray, hazo iray, andraikitra iray… ho an’ny tontolo iainana sy ny hoavin’ny taranaka!

21/09/2026

🌡️🌊 EL NIÑO : INONA NO TOKONY HO FANTATSIKA? INONA NO TOKONY HATAONTSIKA?

⚠️ Tsy loza mitranga tampoka i El Niño, fa tranga ara-toetr’andro izay mety hanova ny fiparitahan’ny orana sy ny hafanana ary hampitombo ny mety hisian’ny tranga ara-toetr’andro tafahoatra.

🔎 INONA MOA I EL NIÑO?

El Niño dia tranga voajanahary miseho rehefa miakatra mihoatra ny mahazatra ny hafanan’ny ranomasina any amin’ny faritra afovoany sy atsinanan’ny Oseana Pasifika. Miteraka fiovan’ny fivezivezen’ny rivotra sy ny rotsak’orana manerana izao tontolo izao izany, ka mety hisy fiantraikany amin’ny toetr’andro any amin’ny faritra lavitra, anisan’izany i Madagasikara.

🌍 INONA NO MITRANGA AMIN’IZAO FOTOANA?

Araka ny vaovao farany avy amin’ny Organisation Météorologique Mondiale (OMM), efa miorina i El Niño ary vinavinana fa mbola hihamafy mandritra ireo volana ho avy. Mety haharitra hatramin’ny fiandohan’ny taona 2027 izany.

Ho an’i Madagasikara kosa, tsy mitovy ny fiantraikan’izany isaky ny faritra. Ny vinavinan’ny Météo Madagascar ho an’ny Septambra–Novambra 2026 dia manondro fa mety hisy rotsak’orana ara-dalàna hatramin’ny ambony noho ny mahazatra any amin’ny faritra maro, raha misy faritra sasany kosa mety hiaina rotsak’orana ambany noho ny mahazatra.

🌧️🌊 ARY HO AN’NY FARITRA ATSINANANA?

Noho ny toerana misy antsika eo amin’ny morontsiraka atsinanan’i Madagasikara, dia ilaina hatrany ny fahamailoana sy fiomanana, indrindra manoloana ny mety hisian’ny:

• 🌧️ rotsak’orana be tampoka sy maharitra ;
• 🌊 fiakaran’ny rano sy tondra-drano ;
• 🏞️ fihotsahan’ny tany amin’ireo toerana marefo ;
• 🌪️ fisehoan’ny tranga ara-toetr’andro mahery vaika ;
• 🌱 fahasimbana amin’ny voly sy ny loharanon-karena voajanahary ;
• 💧 fahasarotana amin’ny fitantanana ny rano raha miovaova be ny rotsak’orana.

Tsy midika anefa izany fa ny tranga rehetra hitranga eto Atsinanana dia vokatry ny El Niño avokoa. Misy ihany koa ireo anton-javatra hafa, toy ny toe-dranomasina ao amin’ny Oseana Indianina sy ny rafitra meteorolojika eo an-toerana, izay afaka manova ny fiantraikany.

🛡️ INONA NO TOKONY HATAONTSIKA?

Ny fiomanana mialoha no iray amin’ireo fomba lehibe indrindra hiarovana ny aina sy ny fananana.

✅ Araho hatrany ny vaovao sy fampitandremana ofisialy avy amin’ny Météo Madagascar sy ireo tompon’andraikitra eo an-toerana.

✅ Aza manao fanorenana na fametrahana trano amin’ireo toerana mety iharan’ny tondra-drano na fihotsahan’ny tany.

✅ Diovy tsy tapaka ny lakandrano, tatatra ary lalan-drano, mba tsy hisian’ny fitohanana sy fiakaran’ny rano.

✅ Arovy ny ala sy ny zavamaniry, satria manampy amin’ny fitazonana ny tany sy ny rano ary mampihena ny faharefoan’ny tontolo iainana.

✅ Sorohy ny doro tanety sy ny fandripahana ala, izay mampitombo ny fahasimban’ny tany sy ny mety hisian’ny fihotsahan’ny tany sy ny tondra-drano.

✅ Ho an’ny tantsaha: araho ny vaovao momba ny toetr’andro ary ampifanaraho amin’ny vinavina ny fotoam-pamokarana sy ny fomba fambolena.

✅ Tehirizo mialoha ireo antontan-taratasy sy fitaovana ilaina ary fantaro ny toerana azo antoka raha misy tranga mampidi-doza.

🤝 NY FIAROVANA DIA ANDRAIKITSIKA REHETRA.

Ny fiovan’ny toetr’andro sy ny tranga toy izao dia tsy azo sakanana. Azo ahena kosa ny voka-dratsiny rehefa miomana mialoha, mifampizara vaovao marina ary mandray andraikitra miaraka.

🌿 Arovy ny ala.
💧 Arovy ny rano.
🏡 Arovy ny toeram-ponenana.
👨‍👩‍👧‍👦 Arovy ny aina.

El Niño : Fantaro – Miomàna – Mitandrema – Mandraisa andraikitra.

📍 DREDD Atsinanana
Ho an’ny tontolo iainana voaaro sy ny fiarahamonina mahatanty ny fiovan’ny toetr’andro.

21/09/2026

🔥🌿 LAHARANA FIFANDRAISANA VONJY TAITRA – VANIM-POTOANAN’NY AFO 🌿🔥

⚠️ FAHAMAILOANA AVO NO ILAINA AMIN’IZAO VANIM-POTOANA IZAO.

Miditra amin’ny vanim-potoana ahiana hisian’ny doro tanety sy doro ala isika. Noho ny loza mety aterak’izany, dia ilaina ny fandraisana andraikitra haingana, ny fampitàna vaovao ara-potoana ary ny fiaraha-mientan’ny rehetra.

🔥 Aza miandry ny fiparitahan’ny afo vao mampandre.

Raha mahita tebok’afo na fiandohan’afo, na mahatsikaritra tranga mety hiteraka doro tanety na doro ala:
📞 Antsoy avy hatrany ny tompon’andraikitra akaiky indrindra, araka ny lisitry ny fifandraisana etsy ambany.

📍 Lazao mazava araka izay azo atao :
➡️ ny toerana misy ny afo ;
➡️ ny Fokontany sy ny Kaominina ;
➡️ ny Distrika ;
➡️ ny halehiben’ny afo sy ny fiparitahany raha azo tombanana ;
➡️ ary izay vaovao mety hanampy amin’ny fandraisana andraikitra haingana.

🤝 Ny fampitàna vaovao ara-potoana dia afaka misoroka ny fiparitahan’ny afo sy mampihena ny fahavoazana.

🌳 Arovy ny ala sy ny zavamananaina.
🌾 Arovy ny tanimboly sy ny fananana.
🏘️ Arovy ny mponina sy ny vondrom-piarahamonina.
🌱 Arovy ny tontolo iainana sy ny hoavin’ny taranaka.

📋 Ity tabilao ity dia ahitana ny laharana ifandraisana amin’ireo tompon’andraikitra isaky ny Distrika sy Kaominina, mba hanamora ny fampitàna fanairana sy ny fandrindrana ny fandraisana andraikitra eny ifotony.

⚠️ AFO KELY ANIO, METY HO LOZA LEHIBE RAHAMPITSO.

🔥 Aoka isika rehetra ho mailo, ho tompon’andraikitra ary hanao tatitra ara-potoana.

FIARAHA-MIENTANA ANIO — FIAROVANA NY ALA, NY OLONA ARY NY HOAVY 🌿🤝

18/09/2026

🌿🏙️ ESPACE VERT HOPITALY KELY :

Tamin’ny taona 2024, ny DREDD Atsinanana dia nanamboatra sy nanatsara ny espace vert teo amin’ny Hopitaly Kely, mba hahatonga azy ho toerana madio, maitso, milamina ary mahafinaritra, sady hanatsara ny endriky ny manodidina.

🌪️ Tamin’ny taona 2026, taorian’ny fandalovan’ny rivodoza sy noho ny fanariana fako, ny fanaovana maloto ary ny fampiasana tsy araka ny tokony ho izy, dia hita fa simba sy nihena ny fahadiovan’ilay toerana, ka niteraka fofona ratsy sy fahasimban’ny tontolo iainana.

📍 Ny 17 Septambra 2026, nidina ifotony teny an-toerana ny ekipan’ny DREDD Atsinanana, niaraka tamin’ny Kaominina Toamasina sy ny Fitaleavam-paritry ny Fahasalamana, hijery akaiky ny zava-misy sy hamaritana ireo fepetra tokony horaisina amin’ny fanarenana.

🌱 Nivoitra tamin’izany ny fahavononan’ny DREDD Atsinanana hanarina sy hanatsara indray ity toerana ity, mba hamerenana azy amin’ny endriny madio, maitso ary mendrika ho an’ny besinimaro.

Misy ihany koa espace vert hafa izay namboarin’ny DREDD Atsinanana ka hita fa ao anatin’ny toe-javatra mitovitovy amin’ity toerana ity. Noho izany, tsikelikely, ny DREDD Atsinanana, amin’ny fiaraha-miasa amin’ny Kaominina Ambony Vohitr'i Toamasina, dia hanatanteraka ny fanarenana sy ny fanatsarana ireo toerana maitso ireo, mba hahafahan’ny mponina misitraka toerana madio, maitso ary milamina.

Saingy misy lesona lehibe azo tsoahina amin’izao zava-nitranga izao:

👉 Tsy ampy ny manamboatra toerana iray. Mila tandrovina sy karakaraina isan’andro ihany koa izy.

Aoka àry isika rehetra:
✅ Tsy hanary fako amin’ny toerana tsy tokony hisy azy;
✅ Tsy hanao maloto eny amin’ny toerana ho an’ny daholobe;
✅ Hiaro sy hikarakara ireo toerana maitso sy fotodrafitrasa iombonana.

🌍 2024 : nanamboatra sy nanatsara.
2026 : manarina sy manamafy ny fiarovana.
Ny manaraka : mila fiaraha-mientana mba haharetan’ny vokatra.

🤝 Ny fahadiovan’i Toamasina dia andraikitsika rehetra.

18/09/2026

🌍🛡️ ANDRO MANERAN-TANY HO FIAROVANA NY SOSONA OZONINA – DREDD ATSINANANA

📅 16 Septambra 2026 | 📍 Bazary Kely – Toamasina

Ho fanamarihana ny Andro Maneran-tany ho Fiarovana ny Sosona Ozonina, dia nanatanteraka hetsika fanentanana sy fampahafantarana ny vahoaka teo anoloan’ny biraon’ny DREDD Atsinanana, Bazary Kely Toamasina, ny 16 Septambra 2026.

🌐 Lohahevitra : « Hetsika maneran-tany ho an’ny planeta mangatsiatsiaka kokoa »

📢 FANENTANANA SY FAMPAHAFANTARANA
Olona manodidina ny 1 700 no nahazo fanentanana ary 700 flyers nozaraina nandritra ny hetsika.

Nifantoka indrindra tamin’ny:
🔹 Ny atao hoe sosona Ozonina sy ny anjara asany amin’ny fiarovana ny aina eto an-tany ;
🔹 Ny maha-zava-dehibe ny fiarovana azy ;
🔹 Ireo fomba fanao tokony harahina amin’ny fitantanana ireo fitaovana fampangatsiahana ;
🔹 Ny loza mety ateraky ny famoahana tsy voafehy ireo gazy ampiasaina amin’ny fitaovana fampangatsiahana.

❄️🔧 FAMPIRATiana IREO FITAOVANA TEKNIKA
Naseho tamin’ny vahoaka ihany koa ireo fitaovana ampiasaina amin’ny fikojakojana sy fanamboarana ny fitaovana fampangatsiahana, anisan’izany ny fitaovana fanangonana gazy (récupération des gaz), fitiliana ny fivoahan’ny gazy (détection de fuite) ary ny fitaovana enti-manatanteraka ny fanamboarana.

Natao izany mba hampahafantarana fa azo fehezina sy tantanana ara-teknika ny gazy ao anatin’ireo fitaovana fampangatsiahana, ka tokony hialana ny famoahana azy ireny mivantana eny amin’ny tontolo iainana.
Naseho ihany koa ireo karazana gazy fampiasa amin’izao fotoana izao, toy ny R600a, R134a ary R32, izay tsy manimba mivantana ny sosona Ozonina.

🎯 TANJONA SY VOKATRA ANDRASANA
Ity hetsika ity dia mikendry ny:
✅ Hampitombo ny fahalalan’ny vahoaka momba ny fiarovana ny sosona Ozonina ;
✅ Hampiroborobo ny fomba fanao ara-teknika sy tompon’andraikitra amin’ny fikojakojana ireo fitaovana fampangatsiahana ;
✅ Hampihenana ny famoahana tsy voafehy ireo gazy mampidi-doza ho an’ny tontolo iainana ;
✅ Hampahafantatra fa misy eto Atsinanana ny fahaiza-manao sy ny fitaovana ilaina amin’ny fikojakojana sy fanamboarana ireo fitaovana ireo.

🤝 Fiaraha-miasa ho fiarovana ny tontolo iainana
Isaorana manokana ireo mpiara-miombon’antoka nandray anjara tamin’ny fanatanterahana izao hetsika izao, indrindra ny:
🔹 Lycée Technique et Professionnel Toamasina
🔹 AFRITO – Association des Frigoristes de Toamasina

Isaorana ihany koa ny BNO sy ny MEDD tamin’ny fanomezana ireo fitaovana nampiasaina nandritra ny fampiratiana.

🌱 Ny fiarovana ny sosona Ozonina dia andraikitra iombonana.
Amin’ny alalan’ny fanentanana, ny fahaiza-manao ara-teknika ary ny fiaraha-mientan’ny sehatra rehetra, dia afaka mandray anjara amin’ny fiarovana ny tontolo iainana sy ny fahasalaman’ny taranaka ankehitriny sy ho avy isika.

DREDD Atsinanana – Miara-mientana ho an’ny tontolo iainana voaaro sy maharitra. 🌍💚

18/09/2026

18/09/2026

🌊🪸 Ny fiarovana ny vatohara dia fiarovana ny ranomasina, ny morontsiraka ary ny fiveloman’ny mponina.

Tsy fitaovana fanorenana ny vatohara, fa harena voajanahary manana anjara toerana lehibe amin’ny fifandanjan’ny tontolo iainana an-dranomasina. Koa rehefa simba na potehina ny récifs coralliens, dia misy fiantraikany amin’ny zavamananaina an-dranomasina, ny jono ary ny fiarovana ny morontsiraka izany.

👉 Aoka ny vatohara hijanona ao an-dranomasina, fa ny mâchefer no ampiasaina raha hanao kabone.

📍 Ho an’ny eto Toamasina, ny mâchefer dia azo ahitana eny amin’ny :
🔹 Terrain Lemalade
🔹 Eo amin’ny fivarotana ampitan’ny sampanana mankany Lycée Stella Maris Androranga

📞 Raha mila fanazavana fanampiny : 034 80 585 50

Efa maro ny fanentanana sy fampianarana natao mahakasika ny fiarovana ny vatohara sy ny fampiasana ny mâchefer, ary koa ny fampahafantarana ny Didim-paritra laharana faha-13/20/REG/ATS/GOUV tamin’ny 08 Desambra 2020, izay mifehy ny fiarovana ny vatohara sy ireo faritra saro-pady ary ireo faritra voakasiky ny récifs coralliens.

🌱 Arovy ny vatohara. Arovy ny ranomasina. Arovy ny hoavintsika.

17/09/2026

🌳🛡️ ANKERANA : FISAFOANA ARY FANENTANANA HO FIAROVANA NY ALA

Ny fiarovana ny ala dia tsy mijanona amin’ny fanaraha-maso sy ny fisamborana ireo mpandika lalàna. Mitaky fisorohana, fanentanana, fiaraha-mientana ary fandraisana andraikitra iombonana ihany koa izany.

Ao amin’ny Kaominina Maroseranana, Distrikan’i Brickaville, ny atiala Ankerana dia isan’ireo faritra manan-danja ao anatin’ny Tandavanala Ankeniheny-Zahamena (CAZ), izay mitahiry harena voajanahary sarobidy ho an’ny tontolo iainana sy ho an’ny taranaka.

📅 26 Aogositra – 06 Septambra 2026, dia notanterahina ny fisafoana sy fanaraha-maso niarahan’ny Ben’ny Ala Brickaville, ny Zandarimariam-pirenena ary ny Conservation International.

🎯 Nifantoka tamin’ny : 👉 fanaraha-maso ny toetry ny ala sy ny faritra arovana ;
👉 fisorohana sy famantarana ireo asa mety hanimba ny ala ;
👉 fanaraha-maso ireo hetsika mifandraika amin’ny fitrandrahana tsy ara-dalàna ;
👉 fanentanana sy fampahafantarana ireo mponina manodidina momba ny andraikiny amin’ny fiarovana ny ala.

📊 Vokatra azo :
🌿 manodidina ny 1 800 ha ny velaran’ala voatety sy nojerena;
👮 olona 03 no voasambotra nandritra ny hetsika ;

🔎 nohamafisina ny fanaraha-maso ny fivezivezen’ireo olona avy any ivelany sy ireo hetsika mety hampidi-doza ho an’ny ala ;
⛏️ nohamafisina ny fanentanana momba ny fitrandrahana volamena tsy ara-dalàna sy ny fiantraikany amin’ny tontolo iainana ;
🔥 nohamafisina ihany koa ny fisorohana ny doro ala sy ny doro tanety.

👥 Iza no kendrena?
Ny hafatra dia natao indrindra ho an’ireo mponina manodidina ny ala, mpampiasa ny harena voajanahary, mpandraharaha, mpandeha sy olona miditra amin’ny faritra, ary ireo rehetra manana andraikitra amin’ny fiarovana ny tontolo iainana.

🌱 Vokatra andrasana :
✅ hampihenana ireo asa fanimbana sy fitrandrahana tsy ara-dalàna ;
✅ hampitombo ny fahafantaran’ny mponina ny lanjan’ny ala sy ny lalàna mifehy azy ;
✅ hampitombo ny fandraisan’anjaran’ny vondrom-piarahamonina amin’ny fiarovana ny ala ;
✅ hisorohana ny doro ala sy ny fahapotehan’ny harena voajanahary ;
✅ hiantohana ny faharetan’ny ala sy ny tombontsoa entiny ho an’ny taranaka ankehitriny sy ny taranaka ho avy.

📢 Hafatra ho an’ny rehetra :
Ny ala tsy an’ny olona iray, fa lova iombonana. Ny fiarovana azy dia tsy andraikitry ny mpitandro filaminana sy ny tompon’andraikitra ihany, fa andraikitsika rehetra.

👉 Miaro ny ala isika androany, mba mbola hisy ala sy harena voajanahary ho an’ny taranaka rahampitso.

16/09/2026

🪸🌊 FIAROVANA NY VATOHARA (CORAIL) : OLONA DIMY TRA-PAHATRA MITONDRA VATOHARA TAO MORAFENO – TOAMASINA

📍 Fokontany Morafeno – Toamasina
📅 14 Septambra 2026

Ao anatin’ny fanamafisana hatrany ny fanaraha-maso sy ny fiarovana ny harena voajanahary an-dranomasina, dia nisy olona dimy tra-pahatra tao amin’ny Fokontany Morafeno, Toamasina, ny 14 Septambra 2026, nitondra vatohara (corail).

Nentina avy hatrany tao amin’ny DREDD Atsinanana ireo olona dimy ireo, ka nanaovana fanadihadiana niarahan’ny OPJE sy ny SREDD, mba hamantarana ny zava-misy sy handraisana ireo fepetra mifanaraka amin’ny lalàna sy ny fitsipika manan-kery.

👥 MOMBA IREO OLONA TRA-PAHATRA

Amin’ireo olona dimy ireo :
• telo no ankizy tsy ampy taona ;
• roa no olon-dehibe, ka vehivavy ny iray.

⚖️ FEPETRA SY FITANTANANA IREO VATOHARA TRATRA

Mifanaraka amin’ny Arrêté régional momba ny fiarovana ny vatohara sy ny faritra saro-pady an-dranomasina, izay nivoaka tamin’ny taona 2020, dia hotantanana araka ny fepetra voalazan’izany lalàna izany ireo vatohara tratra.

Anisan’ny fepetra ny fanomezana azy ireo ho an’ny fikambanana, amin’ny alalan’ny fomba fanao sy ny fepetra ara-dalàna mifandraika amin’izany, mba hahazoana antoka fa ampiasaina amin’ny tanjona mifanaraka amin’ny fiarovana sy ny famerenana amin’ny laoniny ny tontolo iainana an-dranomasina.

🌱 FEPETRA FANARENANA SY FANENTANANA

Ho an’ireo olona voakasik’ity raharaha ity, dia ampiharina ny fepetra fanarenana eo anivon’ny DREDD Atsinanana, araka izay voalazan’ny rafitra sy ny fepetra manan-kery.

Tafiditra ao anatin’izany ny asa fanadiovana sy fanarenana ny tontolo iainana, izay natao ho fampahatsiahivana ny andraikitry ny tsirairay amin’ny fiarovana ny harena voajanahary sy ho fandraisana anjara amin’ny fanarenana ny tontolo iainana.

🪸🌊 MITOHY NY EZAKA FIAROVANA NY HARAN-DRANOMASINA

Manamafy hatrany ny DREDD Atsinanana fa tsy azo sarahina amin’ny fandraisana andraikitra eny ifotony ny fiarovana ny tontolo iainana an-dranomasina.

Ny vatohara dia manana anjara toerana lehibe eo amin’ny fifandanjan’ny tontolo iainana an-dranomasina, ary manampy amin’ny fiarovana ny morontsiraka sy ny fahaveloman’ireo karazan-javamananaina maro.

🤝 Koa miantso ny rehetra mba ho mailo, hanaja ny lalàna ary handray anjara amin’ny fiarovana ireo harena voajanahary an-dranomasina, izay lova iombonana sy tokony hotehirizina ho an’ny taranaka ankehitriny sy ny taranaka ho avy.

DREDD Atsinanana – Miasa eny ifotony, miaro ny harena voajanahary, miara-miasa amin’ny Fokonolona.