20/10/2026
اسلام آباد ۔۔
20 اکتوبر 2026
سپیکر قانون ساز اسمبلی آزاد جموں و کشمیر چوہدری طارق فاروق کی ہدایت پر پاکستان انسٹیٹیوٹ فار پارلیمنٹری سروسز (PIPS) کے زیراہتمام قانون ساز اسمبلی آزاد جموں و کشمیر کے نومنتخب اراکین اور افسران کی استعداد کار میں اضافے، قانون سازی کے طریقۂ کار اور جمہوری طرزحکمرانی سے متعلق آگاہی کے لیے تعارفی و تربیتی پروگرام منعقد کیا گیا۔
تربیتی سیشن میں ڈپٹی سپیکر قانون ساز اسمبلی محمد احمد رضا قادری ، ممبر اسمبلی محترمہ سحرش قمر اور نومنتخب ممبران اسمبلی عمیر نعیم، ثاقب مجید راجہ، محمد یاسین لون، محمد ریاست،محمد احسن رضا، محمدرزاق چوہدری، سردار مختار احمد خان، زیشان علی، محترمہ مریم ادریس، محترمہ مریم زمان اور محترمہ زوبیہ خورشید بھی شامل ہیں ۔
تربیتی سیشن کے اہم خدوخال:-
اس تین روزہ تربیتی پروگرام میں نومنتخب اراکین کو مندرجہ ذیل امور پر تفصیلی بریفنگ اور عملی تربیت دی جا رہی ہے:
1. قانون سازی کا عمل:
بل کی تیاری، مسودہ قانون، اور اس کی منظوری کے تمام مراحل۔
2. پارلیمانی قواعد و ضوابط:
قواعدِ انضباط کار اور ایوان کی کارروائی چلانے کے اصول۔
3. کمیٹی سسٹم:
قائمہ کمیٹیوں کا کردار، ان کی افادیت اور مؤثر نگرانی۔
4. آئینی کردار:
اراکین اسمبلی کے آئینی، قانونی اور اخلاقی فرائض۔
5. عوامی نمائندگی:
حلقے کے عوام سے رابطہ اور عوامی مسائل کو ایوان میں مؤثر انداز میں اٹھانا،
یہ تربیتی سیشن نئے اراکین کو نہ صرف ایوان کے تقدس سے آگاہ کرے گا بلکہ انہیں ایک ذمہ دار اور پیشہ ور قانون ساز کے طور پر اپنی صلاحیتوں کو نکھارنے کا موقع بھی فراہم کرے گا۔
اس تین روزہ تربیتی سیشن میں سیکرٹری قانون ساز اسمبلی امجد لطیف عباسی، ڈپٹی سیکرٹری طارق محمود اور معاونِ خصوصی انجینئر ہارون زبیر بھی شریک ہیں
