05/08/2026
𝗖𝗢𝗡𝗚. 𝗜𝗡𝗗𝗬 𝗢𝗔𝗠𝗜𝗡𝗔𝗟 𝗚𝗜𝗗𝗨𝗦𝗢 𝗔𝗡𝗚 𝗠𝗔𝗦 𝗟𝗜𝗚-𝗢𝗡𝗚 𝗦𝗨𝗣𝗢𝗥𝗧𝗔 𝗦𝗔 𝗠𝗚𝗔 𝗠𝗔𝗚-𝗨𝗨𝗠𝗔 𝗔𝗧𝗢𝗟 𝗦𝗔 𝗗𝗘𝗟𝗜𝗕𝗘𝗥𝗔𝗦𝗬𝗢𝗡 𝗦𝗔 𝗞𝗔𝗠𝗔𝗥𝗔
Giduso ni Asenso Pinoy Party-list Representative Atty. Indy Oaminal ang mas lig-on nga suporta sa mga mag-uuma ug ang pagpalig-on sa sektor sa agrikultura atol sa deliberasyon sa Committee on Agriculture and Food sa House of Representatives kabahin sa mga House Bills nga nagtumong sa pagpalambo sa industriya sa humay sa Pilipinas.
Atol sa maong deliberasyon, gipasiugda ni Oaminal nga ang mga gisugyot nga balaod kinahanglan una nga motagad sa pagpalig-on sa lokal nga agrikultura, pagpanalipod sa mga umahan, ug pagpreserbar sa panginabuhian sa mga mag-uuma.
Gipatin-aw usab niya nga bisan importante ang partisipasyon sa pribadong sektor, ang kaayohan sa mga mag-uuma ug ang kasigurohan sa produksiyon sa pagkaon kinahanglan magpabiling prayoridad sa gobyerno.
Gipangutana usab ni Oaminal ang Department of Agriculture (DA) bahin sa dugay nang problema sa pag-apod-apod sa mga binhi ug abuno ngadto sa mga mag-uuma. Nangayo siya og kasiguruhan kon ang gipalapad nga gahum sa ahensya makatabang ba sa pagsulbad sa mga kalangay sa distribusyon aron mas dali nga maabot sa mga benepisyaryo ang gikinahanglang suporta.
Sa maong deliberasyon, nahibaw-an usab nga adunay gibana-banang 2.9 milyon ka ektarya nga produktibong humayan ang Pilipinas, ubos sa gikinahanglang 3 hangtod 3.5 milyon ka ektarya aron mahimong hingpit nga self-sufficient sa produksyon sa humay.
Tungod niini, gipasiugda ni Oaminal ang panginahanglan sa mas episyenteng pagdumala sa mga programa sa agrikultura, pagpalig-on sa suporta sa mga lokal nga prodyuser, ug pagpatuman sa mga lakang nga makasiguro sa dugayng food security alang sa matag pamilyang Pilipino.
Matod pa sa kongresista, ang pagpalambo sa agrikultura dili lamang pagpalig-on sa sektor sa panguma, kondili usa usab ka pamuhunan aron masiguro ang lig-on nga suplay sa pagkaon ug mas maayong kaugmaon sa mga mag-uuma ug sa tibuok nasud.///
