24/08/2026
ചരിത്രത്തിലാദ്യമായി ഓണത്തിനു മുന്നേ ആശമാർക്ക് ഹോണറേറിയവും ഉത്സവബത്തയും ലഭിച്ചു.
ആശമാർക്കുള്ള ഹോണറേറിയവും ഉത്സവബത്തയും ഓണമെത്തുന്നതിനും ദിവസങ്ങൾക്കു മുൻപേ തന്നെ നൽകി, നാടിന്റെ ആരോഗ്യം കാക്കുന്നവരുടെ മുഖങ്ങളിൽ ആശ്വാസത്തിന്റെ പുഞ്ചിരി തെളിയിച്ചു. ആഗസ്റ്റ് മാസത്തെ ഹോണറേറിയമായി 12,000 രൂപയും ഉത്സവബത്ത ഇനത്തിൽ 1,450 രൂപയുമുൾപ്പടെ ആകെ 29 കോടി 93 ലക്ഷം രൂപയുടെ ഹോണറേറിയവും 3 കോടി 61 ലക്ഷത്തോളം രൂപയുടെ ഉത്സവബത്തയുമാണ് സംസ്ഥാനത്തെ ആശമാരുടെ അക്കൗണ്ടിലെത്തിച്ചത്.��മുൻ കാലങ്ങളിൽ നാടും നഗരവും ഓണോത്സവത്തിനൊരുങ്ങുമ്പോഴും ആശമാർക്ക് ആധി മാത്രമായിരുന്നു മനസ്സിൽ. തങ്ങളുടെ വരുമാനമൊന്ന് കൊണ്ട് കുടുംബം നയിച്ച് പോന്നിരുന്ന ഇവരുടെ ഹോണറേറിയവും മറ്റ് ആനുകൂല്യങ്ങളും മുടങ്ങിയപ്പോൾ നിറം കെട്ടത് അവരുടെ കുടുംബത്തിന്റെ ആകെ സന്തോഷമായിരുന്നു. എന്നാൽ ആശമാരടക്കമുള്ള മുൻനിര ആരോഗ്യ പ്രവർത്തകരുടെ പ്രശ്നങ്ങൾ പഠിച്ച്, ഹോണറേറിയവും മറ്റ് ആനുകൂല്യങ്ങളും യഥാസമയം അനുവദിക്കുന്നതിലെ തടസ്സങ്ങൾ പരിഹരിക്കുന്നതിന് അർഹിക്കുന്ന പ്രാധാന്യം നൽകി പ്രവർത്തിച്ച സർക്കാർ, ചരിത്രം തിരുത്തികുറിക്കുക തന്നെ ചെയ്തിരിക്കുന്നു. മുൻപ് ഓണത്തിന് ഇവർക്ക് ലഭിച്ചിരുന്നത് അതിനു മുൻമാസങ്ങളിലെ ഹോണറേറിയമായിരുന്നു. എന്നാൽ ഇത്തവണ ആഗസ്റ്റ് മാസം അവസാനിക്കും മുന്നെ ഓണം എത്തിയെങ്കിലും ഉപാധികളിലേതുമില്ലാതെ ഹോണറേറിയം മുഴുവനായും സർക്കാർ നൽകി. അതുകൊണ്ട് തന്നെ ഇതാദ്യമായി ആശമാർക്ക് ഒരു രൂപ പോലും കുടിശ്ശികയില്ലാത്ത ഒരോണക്കാലം ഉറപ്പാക്കാനായി. ആരോഗ്യമേഖലയിൽ സമാനതകളില്ലാത്ത സേവനം അനുഷ്ഠിക്കുന്ന ആശമാർക്ക് ഒരു പാട് നാളുകൾക്ക് ശേഷം കുടുംബസമേതം സന്തോഷപൂർവ്വം ഒരോണക്കാലം ആഘോഷിക്കാനാവട്ടെ.
