Collector Idukki

22/08/2026

ഓണാഘോഷത്തിന്റെ ഭാഗമായി ഇടുക്കി കളക്ടറേറ്റിൽ ജീവനക്കാരോടൊപ്പം ഓണാഘോഷത്തിൽ പങ്കുചേർന്നു. ഒപ്പം വിവിധ ഓണാഘോഷപരിപാടികളിൽ പങ്കെടുത്തവർക്കുള്ള സമ്മാനങ്ങളും വിതരണം ചെയ്തു.

18/08/2026

വരവായ് വൃത്തിയുടെ ചക്രവർത്തി
ഈ ഓണം ഹരിത ഓണം

ഹരിത ഓണം ലോഗോ പ്രകാശനം
ഹരിത ഓണം ജില്ലാ തല ലോഗോ പ്രകാശനം ജില്ലാകളക്ടറുടെ ചേമ്പറിൽ സംഘടിപ്പിച്ചു. ഇടുക്കി നിയോജകമണ്ഡലം എം. എൽ. എ ശ്രീ. റോയ്. കെ. പൗലോസ്, ജില്ലാ കളക്ടർ ഡോ. ദിനേശൻ ചെറുവാട്ട് ഐ. എ. എസ് എന്നിവർ ചേർന്ന് ലോഗോ പ്രകാശനം നിർവ്വഹിച്ചു . ജില്ലാ ശുചിത്വ മിഷൻ കോ ഓർഡിനേറ്റർ ശ്രീ ഭാഗ്യരാജ് കെ. ആർ, ഡി. റ്റി. പി. സി. സെക്രട്ടറി ശ്രീ ജിതീഷ് ജോസ് എന്നിവർ സന്നിഹിതരായിരുന്നു .
സമൃദ്ധിയുടെയും സ്നേഹത്തിന്റെയും ഒത്തൊരുമയുടെയും സന്ദേശം വിളിച്ചോതി വന്നെത്തുന്ന ഓണക്കാലത്തെ പരിസ്ഥിതി സൗഹൃദമായി വരവേൽക്കാം . മഴ മാറി, മനവും മാനവും ഒരുപോലെ തെളിഞ്ഞിരിക്കുന്നു. പുത്തൻ പ്രതീക്ഷകളും സ്വപ്നങ്ങളും നെയ്തുകൊണ്ട് വന്നെത്തുന്ന ഓണനാളുകളെ നമുക്ക് വൃത്തിയോടെയും ശുചിത്വബോധത്തോടെയും വരവേൽക്കാം.മാവേലി തമ്പുരാനെ വരവേൽക്കാൻ നമ്മുടെ വീടും പരിസരവും മാത്രമല്ല, നാടും നഗരവും തെരുവുകളും പൊതുസ്ഥലങ്ങളും ജലാശയങ്ങളും എല്ലാം വൃത്തിയാക്കാം . ഈ ഓണം ആക്കാം.. ആഘോഷങ്ങളും അലങ്കാരങ്ങളും പരിസ്ഥിതി സൗഹൃദമാക്കാം. നിരോധിത പ്ലാസ്റ്റിക്കുകൾ, ഡിസ്പോസബിൾ ഗ്ലാസുകൾ, പാത്രങ്ങൾ, പ്ലാസ്റ്റിക് കവറുകൾ, പ്ലാസ്റ്റിക് കൊടി തോരണങ്ങൾ ഒറ്റത്തവണ ഉപയോഗിക്കുന്ന പേപ്പർ പ്ലേറ്റുകൾ പേപ്പർ വാഴയില എന്നിവ പൂർണ്ണമായും ഒഴിവാക്കി, പകരം വാഴയില, സ്റ്റീൽ പാത്രങ്ങൾ, തുണിസഞ്ചികൾ, പൂക്കൾ , കുരുത്തോല എന്നിങ്ങനെ പരിസ്ഥിതി സൗഹൃദ വസ്തുക്കളുടെ ഉപയോഗം ശീലമാക്കാം . സദ്യയും ഓണക്കളികളും മത്സരങ്ങളും എല്ലാം മാലിന്യ രഹിതമാക്കാം . മാലിന്യങ്ങളെ ഉറവിടത്തിൽ തന്നെ തരം തിരിക്കാം ഭക്ഷണാവശിഷ്ടങ്ങൾ കമ്പോസ്റ്റാക്കാം. അജൈവ മാലിന്യങ്ങൾ ശാസ്ത്രീയ സംസ്കരണത്തിന് കൈമാറാം . Suchitwa Mission- ന്റെ മാർഗ്ഗനിർദ്ദേശങ്ങൾ പിന്തുടരാം.കേരളക്കരയുടെ ദേശീയോത്സവമായ ഓണത്തെ മാലിന്യരഹിതമായി, പ്രകൃതിക്ക് ദോഷം വരുത്താതെ ആഘോഷിക്കാൻ നമുക്കെല്ലാവർക്കും ഒരുമിച്ച് പ്രതിജ്ഞയെടുക്കാം. പൊതുജനങ്ങളും സന്നദ്ധ സംഘടനകളും ക്ലബുകളും സാംസ്കാരിക സാമുദായിക സംഘടനകളും സ്ഥാപനങ്ങളും ഓണാഘോഷ പരിപാടികളിൽ പൂർണ്ണമായും ഹരിത ചട്ടം കർശനമായി പാലിച്ച് ഹരിത ഓണം ക്യാമ്പയിൻ പ്രവർത്തനങ്ങളിൽ പങ്കാളികളാകണമെന്നു അഭ്യർത്ഥിക്കുന്നതിനൊപ്പം ഏവർക്കും സന്തോഷവും സമൃദ്ധിയും നിറഞ്ഞ ഓണവും ആശംസിക്കുന്നു

# വരവായ് വൃത്തിയുടെ ചക്രവർത്തി ഈ ഓണം ഹരിത ഓണം
#ഹരിത ഓണം 2026
# എം. എൽ. എ ഇടുക്കി
#ജില്ലാ കളക്ടർ ഇടുക്കി
#ജില്ലാ ശുചിത്വ മിഷൻ ഇടുക്കി

15/08/2026

ഇടുക്കി ജില്ലാ ആസ്ഥാനത്ത് നടന്ന വർണാഭമായ സ്വാതന്ത്ര്യ ദിനാഘോഷ ചടങ്ങിൽ ബഹു. ഭക്ഷ്യ പൊതുവിതരണ വകുപ്പ് മന്ത്രി ശ്രീ. അനൂപ് ജേക്കബ് അവർകൾ പതാക ഉയർത്തി അഭിവാദ്യം സ്വീകരിച്ചു.

15/08/2026

ഏവർക്കും ഹൃദ്യമായ സ്വാതന്ത്രദിനാശംസകൾ

13/08/2026

ജില്ലാ ഭരണകൂടത്തിന്റെയും ജില്ലാ ടൂറിസം പ്രൊമോഷന്‍ കൗണ്‍സിലിന്റെയും ആഭിമുഖ്യത്തില്‍ സംഘടിപ്പിക്കുന്ന ഈ വര്‍ഷത്തെ ഓണാഘോഷ പരിപാടികള്‍ക്ക് ഓഗസ്റ്റ് 21ന് ചെറുതോണിയില്‍ തുടക്കമാകും. ഓണാഘോഷം ജില്ലാതല സമാപനം സെപ്തംബര്‍ 5 ന് തൊടുപുഴയില്‍ നടക്കും. 21 ന് ഉച്ചയ്ക്ക് 2 ന് വിവിധ കലാരൂപങ്ങളും ബാന്‍ഡ് സംഘവും അണിനിരക്കുന്ന ഓണം ഘോഷയാത്രയോടെ
പരിപാടികള്‍ക്ക് തുടക്കമാകും. പ്രാദേശിക കലാരൂപങ്ങള്‍ക്ക് പ്രാധാന്യം നല്‍കിയാകും ആഘോഷ പരിപാടികള്‍ സംഘടിപ്പിക്കുക. ഓരോ നിയോജക മണ്ഡലങ്ങളിലും ഓണാഘോഷം സംഘടിപ്പിക്കും. ജില്ലയില്‍ മൂന്നാര്‍, ചെറുതോണി, കുമളി, രാജക്കാട്, തൊടുപുഴ എന്നിവിടങ്ങളിലാണ് പരിപാടികള്‍ സംഘടിപ്പിക്കുക.

ഓണാഘോഷത്തോടനുബന്ധിച്ച് 21 മുതല്‍ 31 വരെ ഇടുക്കി ഡാം സന്ദര്‍ശിക്കാന്‍ അവസരമൊരുക്കും.
ഡാമില്‍ പ്രകാശഅലങ്കാരവും ഒരുക്കും. കുടുംബശ്രീയുടെ നേതൃത്വത്തില്‍ ഭക്ഷ്യമേളയും നടക്കും. പൂര്‍ണമായും ഹരിത പ്രോട്ടോക്കോള്‍ പാലിച്ചായിരിക്കും പരിപാടികള്‍ സംഘടിപ്പിക്കുക. 15.50 ലക്ഷം രൂപയാണ് ഓണാഘോഷ പരിപാടികളുടെ സംഘാടനത്തിനായി ജില്ലയ്ക്ക് സര്‍ക്കാര്‍ അനുവദിച്ചിരിക്കുന്നത്.

ബഹു..റോയ് കെ. പൗലോസ് എം എല്‍ എ യുടെ നേതൃത്വത്തില്‍ ജില്ലാ കളക്ടറുടെ അധ്യക്ഷതയില്‍ ജില്ലാതല ഓണാഘോഷ പരിപാടികളുടെ സംഘാടനം സംബന്ധിച്ച് ആലോചനാ യോഗം ചേര്‍ന്നു. ജില്ലാ പഞ്ചായത്ത് പ്രസിഡന്റ് പ്രൊഫ. ഷീല സ്റ്റീഫന്‍, വാഴത്തോപ്പ് ഗ്രാമപഞ്ചായത്ത് പ്രസിഡന്റ് ആന്‍സി തോമസ്, ഇടുക്കി ബ്ലോക്ക് പഞ്ചായത്ത് വൈസ് പ്രസിഡന്റ് എ.പി. ഉസ്മാന്‍, അഡീഷണല്‍ ജില്ലാ മജിസ്‌ട്രേറ്റ് മിനി കെ. ജോണ്‍, ഡിടിപിസി സെക്രട്ടറി ജിതേഷ് ജോസ്, ജനപ്രതിനിധികള്‍, വിവിധ രാഷ്ട്രീയ കക്ഷി പ്രതിനിധികള്‍, വ്യാപാരി വ്യവസായി സംഘടനാ പ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

10/08/2026

കര്‍ക്കിടക വാവുബലി തര്‍പ്പണത്തോടനുബന്ധിച്ച് അയ്യപ്പന്‍കോവില്‍ ശ്രീധര്‍മ്മശാസ്താ ക്ഷേത്രത്തില്‍ ഭക്തജനങ്ങളുടെ സുരക്ഷ ഉറപ്പാക്കുന്നതിനായി എല്ലാ ക്രമീകരണങ്ങളും ഏര്‍പ്പെടുത്താന്‍ തീരുമാനം. അഡീഷണല്‍ ജില്ലാ മജിസ്ട്രേറ്റ് മിനി കെ. ജോണിന്റെ അധ്യക്ഷതയില്‍ കളക്ടറേറ്റില്‍ ചേര്‍ന്ന ഉന്നതതല യോഗത്തിലാണ് സുരക്ഷാ ക്രമീകരണങ്ങള്‍ വിലയിരുത്തിയത്. മുന്നൊരുക്കങ്ങള്‍ സംബന്ധിച്ച് വിവിധ വകുപ്പുകള്‍ക്ക് കൃത്യമായ നിര്‍ദേശങ്ങള്‍ നല്‍കി. മുന്‍വര്‍ഷങ്ങളില്‍ ശരാശരി അയ്യായിരത്തോളം ഭക്തജനങ്ങളാണ് വാവുബലി ദിനത്തില്‍ ക്ഷേത്രദര്‍ശനത്തിനും തര്‍പ്പണത്തിനുമായി എത്താറുള്ളത്. നിലവില്‍ പ്രദേശത്ത് ജലനിരപ്പ് കുറവാണെങ്കിലും ജില്ലയില്‍ റെഡ് അലര്‍ട്ട് മാറിമാറി വരുന്ന സാഹചര്യത്തില്‍ ശക്തമായ നീരൊഴുക്കിന് സാധ്യതയുണ്ടെന്ന് യോഗം വിലയിരുത്തി. അപകടസാധ്യത പൂര്‍ണ്ണമായും ഒഴിവാക്കുന്നതിന്റെ ഭാഗമായി ഫയര്‍ഫോഴ്സും പോലീസും സ്ഥലത്ത് സംയുക്ത പരിശോധന നടത്തി ഒഴുക്ക് കുറഞ്ഞ സുരക്ഷിത മേഖലകള്‍ മുന്‍കൂട്ടി അടയാളപ്പെടുത്തും.

ക്രമസമാധാന പാലനത്തിനും ഗതാഗത നിയന്ത്രണത്തിനുമായി 50 പൊലീസുകാരെ പ്രദേശത്ത് നിയോഗിക്കും. പീരുമേട്, കട്ടപ്പന ഡിവൈ.എസ്.പിമാരുടെ നേതൃത്വത്തില്‍ മുന്‍വര്‍ഷങ്ങളിലേതുപോലെ വിപുലമായ ട്രാഫിക് ക്രമീകരണങ്ങള്‍ നടപ്പിലാക്കും.

ചെറിയ പാലത്തില്‍ വെള്ളം കയറിയാല്‍ ക്ഷേത്രത്തിലേക്ക് പ്രവേശിക്കാന്‍ തൂക്കുപാലം മാത്രമാണ് ആശ്രയം. ഇതിനാല്‍ അപകടങ്ങള്‍ ഒഴിവാക്കാന്‍ ഭക്തജനങ്ങളെ കൂട്ടത്തോടെ കയറ്റിവിടാതെ നിയന്ത്രിത അളവില്‍ മാത്രം പ്രവേശിപ്പിക്കും.

പുഴയില്‍ പെട്ടെന്ന് ഒഴുക്ക് കൂടിയാല്‍ പകരമായി സുരക്ഷിത ബലിതര്‍പ്പണ സൗകര്യം ഒരുക്കും. ജില്ലാ ഫയര്‍ ഓഫീസറും കട്ടപ്പന ഡിവൈ.എസ്.പിയും ചേര്‍ന്ന് സുരക്ഷിത സ്ഥാനങ്ങള്‍ മാര്‍ക്ക് ചെയ്യും.

പുഴയും പരിസരപ്രദേശങ്ങളും മലിനമാകാതിരിക്കാന്‍ കാഞ്ചിയാര്‍ ഗ്രാമപഞ്ചായത്തിന്റെ നേതൃത്വത്തില്‍ മാലിന്യ സംസ്‌കരണത്തിന് പ്രത്യേക ക്രമീകരണം ഏര്‍പ്പെടുത്തും.

കര്‍ക്കടക വാവുബലിയോട് അനുബന്ധിച്ച് ഔദ്യോഗികമായി നല്‍കുന്ന സുരക്ഷാ നിര്‍ദേശങ്ങള്‍ പൂര്‍ണ്ണമായും പാലിക്കാന്‍ ക്ഷേത്ര ഭാരവാഹികളും ഭക്തജനങ്ങളും തയ്യാറാകണമെന്ന് എ.ഡി.എം പറഞ്ഞു.

വിവിധ വകുപ്പ് ഉദ്യോഗസ്ഥരും ജനപ്രതിനിധികളും യോഗത്തില്‍ പങ്കെടുത്തു.

10/08/2026

06/08/2026

Awareness

06/08/2026

പുതുക്കിയ കാലാവസ്ഥ പ്രവചനം അനുസരിച്ചു ജില്ലയിൽ റെഡ് അലെർട് പ്രഖ്യാപിച്ചിരിക്കുന്നു.