04/09/2026
ປີໂຕຣເທຣດ ໄດ້ຮັບໃບຢັ້ງຢືນເປັນ ບໍລິສັດຜູ້ປະກອບການ AEO (Authorize Economy Operation) ຈາກກະຊວງການເງິນ.
ໃນວັນທີ 4 ກັນຍາ 2026 ກະຊວງການເງິນ, ກົມພາສີ, ພະແນກກວດສອບຄືນການແຈ້ງພາສີ, ຄະນະດ່ານພາສີສາກົນ ແລະ ຕາງໜ້າໃຫ້ກັບກະຊວງ ແລະ ພະແນການທີ່ກ່ຽວຂ້ອງ ພ້ອມດ້ວຍຄະນະຜູ້ບໍລິຫານ ປີໂຕຣເທຣດ. ໂດຍການເປັນປະທານຂອງ ທ່ານຫົວໜ້າກົມພາສີ ທ່ານ ປອ ພູເຂົາຄຳ ວັນນະວົງໄຊ ແລະ ຕາງໜ້າໃຫ້ແກ່ບໍລິສັດໂດຍ ທ່ານ ນາງ ຈັນທະດອມ ເມກສະຫວັນ ຮອງຜູ້ອຳນວຍການໃຫຍ່ຝ່າຍບັນຊີ-ການເງິນ.
ໃນໄລຍະທີ່ຜ່ານມາ ປີໂຕຣເທຣດ ໄດ້ຮັບການຢັ້ງຢືນເປັນ ບໍລິສັດຜູ້ປະກອບການດີເດັ່ນ AEO ມາແລ້ວໃນສົກ 2023-2026, ປີໂຕຣເທຣດ ໄດ້ຍືນບົນຫຼັກການຂອງຄວາມຖືກຕ້ອງໂປ່ງໃສຂອງການລາຍງານການນຳເຂົ້າ, ການເສຍພາສີອາກອນທີກວດສອບໄດ້ ຜ່ານມາດຕະຖານທາງດ້ານບັນຊີ-ການເງິນຂອງບໍລິສັດທີ່ຜ່ານຜູ້ກວດສອບບັນຊີຕາມາດຕະຖານ (big 4) ແລະ ການດໍາເນີນງານທາງທຸລະກິດຂອງບໍລິສັດ ພາຍໃຕ້ຮູບແບບ ບໍລິສັດມະຫາຊົນ ເຮັດໃຫ້ບໍລິສັດເປັນຜູ້ໄດ້ຮັບການຍອມຮັບຈາກ ຄະນະກຳມະການກວດສອບ AEO ພາຍຫຼັງທີ່ຜ່ານການກວດສອບຕາມເກນການກວດສອບ 4 ພາກໃຫຍ່ ແລະ ມີຫຼາຍກວ່າ 200 ຄຳຖາມທີ່ຕ້ອງໄດ້ກວດກາ ແລະ ສະໜອງເອກະສານຢ່າງເຂັ້ມຫງວດ.
ຜ່ານການກວດສອບ ປີໂຕຣເທຣດ ໄດ້ຄະແນນຜ່ານ 87% ແລະ ຖືກຈັດຢູ່ໃນລະດັບ ບໍລິສັດຜູ້ປະກອບການ AEO ຂັ້ນ A ຢ່າງສົມກຽດ. ໃນນີ້ ໃບຢັ້ງຢືນຜູ້ປະກອບການດີເດັ່ນ AEO ມີຜົນສັກສິດນັບແຕ່ວັນທີ 10/7/2026 - 10/7/2029.
ການໄດ້ຮັບມາດຕະຖານຜູ້ປະກອບການ AEO ໃນຄັ້ງທີ 2 ຢ່າງເປັນທາງການໃນມື້ນີ້ ສະແດງໃຫ້ເຫັນວ່າ ບໍລິສັດ ໄດ້ຮັບຄວາມໄວ້ວາງໃຈຈາກພາກລັດ ພ້ອມທັງໃຫ້ຄວາມສະດວກຫຼາຍຢ່າງ ໃນການນຳເຂົ້ານ້ຳມັນເຊື້ອໄຟເຊັ່ນ: ການກວດປ່ອຍສິນຄ້າໄວຂຶ້ນ, ຫຼຸດຜ່ອນເວລາ, ຄ່າຝາກສາງ, ສາມາດເຂົ້າເຖິງຂໍ້ມູນສຳຄັນ, ເປັນບໍລິສັດທີ່ໜ້າເຊື່ອຖືໃນລະດັບປະເທດ ແລະ ພາກພື້ນ, ເຮັດໃຫ້ພາບພົດຂອງອົງກອນດີຂຶ້ນ. ນອກນີ້ຍັງຮັບປະກັນຄວາມປອດໄພທາງດ້ານການຄ້າ, ການຂົນສົ່ງ ແລະ ແນ່ໃສ່ຍົກສູງການຈັດຕັ້ງປະຕິບັດກົດໝາຍ, ລະບຽບການຢ່າງຖືກຕ້ອງ ແລະ ເຂັ້ມງວດໂດຍສອດຄ່ອງກັບຫຼັກສາກົນ.
