31/07/2026
රට තුළ පරිසර සංරක්ෂණය, නිසි කසළ කළමනාකරණය සහ පිරිසිදු පරිසර සංස්කෘතියක් ගොඩනැගීම සඳහා ජනතා සහභාගීත්වය වර්ධනය කිරීමේ අරමුණින්, රජයේ "ක්ලීන් ශ්රී ලංකා" ජාතික වැඩසටහන යටතේ දිවයිනේ ප්රථම වරට ක්රියාත්මක කිරීමට නියමිත "සර්ව ආගමික ධර්මතා" වැඩසටහනේ ආරම්භක දැනුවත් කිරීමේ වැඩසටහන, ඇසළ පොහොය නිමිත්තෙන් පසුගිය (29) දින ගාල්ල කළුවැල්ල ජාත්යන්තර බෞද්ධ මධ්යස්ථානයේදී පැවති ශීල සමාදාන ව්යාපාරයට සමගාමීව පැවැත්විණි.
බෞද්ධ විහාරස්ථාන, හින්දු කෝවිල්, ක්රිස්තියානි පල්ලි සහ මුස්ලිම් දේවස්ථාන කේන්ද්ර කරගනිමින් සියලු ආගමික නායකයන්ගේ මඟපෙන්වීම යටතේ පරිසර සංරක්ෂණය, නිසි කසළ කළමනාකරණය සහ පිරිසිදු පරිසරයක් පවත්වාගෙන යාමේ වැදගත්කම ජනතාව අතර ප්රචලිත කිරීම මෙම වැඩසටහනේ ප්රධාන අරමුණ වේ. ආගමික වටිනාකම් හා සමාජ වගකීම ඒකාබද්ධ කරමින් පරිසර සුරැකීම ජනතා ව්යාපාරයක් බවට පත් කිරීම ද මෙහි අපේක්ෂාවකි.
ශ්රී ලංකා අමරපුර මහා නිකායේ ම්රම්ම වංශාභිධජ සිරි සද්ධම්ම යුක්තික පාර්ශ්වයේ මහා නායක, ධුරන්ධර දර්ශනපති පණ්ඩිත "සිරි චන්දසිරි වංශාලංකාර ධම්ම කීර්ති ශ්රී" අතිගෞරවණීය කණුමුල්දෙණියේ චන්දවිමලාභිධාන මහ නාහිමිපාණන් වහන්සේගේ ගෞරවනීය අනුශාසකත්වයෙන් පැවති මෙම අවස්ථාවට දකුණු පළාත් ගරු ආණ්ඩුකාරවර ආචාර්ය සුසිරිපාල මානවඩු මැතිතුමා, ක්ලීන් ශ්රී ලංකා වැඩසටහනේ දකුණු පළාත් සම්බන්ධීකාරක සංජය ධනුෂ්ක මහතා, නාගරික මන්ත්රීවරුන්, රාජ්ය නිලධාරීන්, ආගමික නායකයන් සහ ප්රදේශවාසීන් ඇතුළු පිරිසක් සහභාගි වූහ.
මෙම වැඩසටහනේ සාර්ථකත්වය මත ඉදිරියේදී දකුණු පළාතේ සියලු ආගමික ස්ථාන කේන්ද්ර කරගනිමින් එය ව්යාප්ත කිරීමටත්, අනතුරුව දිවයින පුරා ක්රියාත්මක කිරීමටත් අපේක්ෂා කෙරේ.
