Faisalabad Development Authority,

06/08/2026

06/08/2026

03/08/2026

فیصل آباد ڈویلپمنٹ اتھارٹی (ایف ڈی اے) نے مالی استحکام اور ادارہ جاتی وسائل میں اضافے کے حوالے سے ایک اہم سنگ میل عبور کر لیا جس کے تحت ایف ڈی اے سٹی کے مختلف بلاکس میں دستیاب 10 مرلہ اور ایک کنال رقبے پر مشتمل مجموعی طور پر 284 رہائشی پلاٹس فیسکو کو 2 ارب 34 کروڑ 76 لاکھ روپے میں فروخت کئے گئے ہیں۔معاہدے کے تحت پلاٹس کی مالیت کی پہلی قسط کے طور پر 58 کروڑ 60 لاکھ روپے کا چیک ڈائریکٹر جنرل ایف ڈی اے محمد آصف چوہدری نے کمشنر فیصل آباد ڈاکٹر عمران حامد شیخ کی موجودگی میں چیف ایگزیکٹو آفیسر فیسکو محمد عامر سے ایک سادہ مگر پروقار تقریب کے دوران وصول کیا۔ ایڈیشنل ڈائریکٹر جنرل ایف ڈی اے قیصر عباس رند، چیف انجینئر مہر ایوب، ڈائریکٹرز سہیل مقصود پنوں، جنید حسن منج، یاسر اعجاز چٹھہ، افنان سعید سندھو، ایف ڈی اے اور فیسکو دیگر افسران تقریب میں موجود تھے۔ کمشنر فیصل آباد ڈاکٹر عمران حامد شیخ نے اس موقع پر اظہار خیال کرتے ہوئےایف ڈی اے کی جانب سے مالی استحکام کے لیے کیے گئے اس منفرد اور مؤثر اقدام کو سراہا اور کہا کہ جدید تقاضوں سے ہم آہنگ ادارے اپنی آمدن کے نئے ذرائع پیدا کرکے ہی مضبوط، خود کفیل اور پائیدار بنیادوں پر استوار رہ سکتے ہیں۔ انہوں نے کہا کہ ایف ڈی اے نے بہترین منصوبہ بندی، شفافیت اور دور اندیشی کا مظاہرہ کرتے ہوئے ایک ایسا ماڈل متعارف کرایا ہے جو دیگر ترقیاتی اداروں کے لیے بھی قابل تقلید مثال بن سکتا ہے۔ کمشنر نے کہا کہ اس معاہدے سے نہ صرف ایف ڈی اے کے مالی وسائل میں نمایاں اضافہ ہوگا بلکہ شہری ترقی کے منصوبوں، بنیادی سہولیات کی فراہمی اور جاری ترقیاتی سکیموں کی تکمیل میں بھی مزید تیزی آئے گی۔ انہوں نے کہا کہ فیسکو کی جانب سے اپنے ملازمین کے لیے باوقار، محفوظ اور معیاری رہائشی ماحول کی فراہمی کا فیصلہ قابل تحسین ہے، جس سے ملازمین کی فلاح و بہبود اور ادارہ جاتی کارکردگی پر بھی مثبت اثرات مرتب ہوں گے۔ انہوں نے اس توقع کا اظہار کیا کہ دونوں اداروں کے درمیان یہ تعاون مستقبل میں مزید مضبوط ہوگا اور عوامی خدمت کے نئے مواقع پیدا کرے گا۔
ڈائریکٹر جنرل ایف ڈی اے محمد آصف چوہدری نے کمشنر فیصل آباد کو بریفنگ دیتے ہوئے بتایا کہ ادارے کے مالی وسائل میں اضافہ اور خود انحصاری کے لیے مختلف بزنس ماڈلز پر تفصیلی غور کیا گیا، جن میں ایف ڈی اے سٹی کے پلاٹس کی فیسکو کو فروخت ایک اہم اور مؤثر حکمت عملی ثابت ہوئی۔ انہوں نے بتایا کہ اس منصوبے کی باقاعدہ منظوری ایف ڈی اے بورڈ آف گورنرز سے حاصل کی گئی اور تمام قانونی، مالی و انتظامی تقاضے مکمل شفافیت کے ساتھ پورے کیے گئے۔ انہوں نے بتایا کہ ابتدائی طور پر ان منتخب پلاٹس کو عام شہریوں کے لیے چار سالہ آسان اقساط پر فروخت کرنے کی تجویز زیر غور تھی، تاہم فیسکو کی جانب سے اجتماعی خریداری کی پیشکش ادارے کے مالی مفاد میں زیادہ موزوں ثابت ہوئی، جس کے بعد تمام قواعد و ضوابط کی تکمیل کے بعد اس منصوبے کو عملی شکل دی گئی۔ انہوں نے کہا کہ اس معاہدے سے ایف ڈی اے کو فوری مالی وسائل دستیاب ہوں گے، جنہیں ترقیاتی منصوبوں، شہری سہولیات کی بہتری اور عوامی خدمات کے معیار کو مزید بلند کرنے پر خرچ کیا جائے گا۔ انہوں نے کہا کہ ادارے کی مالی خود کفالت کے لیے آئندہ بھی جدید، مؤثر اور پائیدار منصوبہ بندی جاری رکھی جائے گی۔ ڈائریکٹر جنرل ایف ڈی اے محمد آصف چوہدری نے اس اہم تقریب میں شرکت پر کمشنر فیصل آباد ڈاکٹر عمران حامد شیخ، چیف ایگزیکٹو آفیسر فیسکو محمد عامر، ایف ڈی اے اور فیسکو کے افسران اور دیگر شرکاء کا شکریہ ادا کرتے ہوئے کہا کہ تمام متعلقہ اداروں کے تعاون سے ہی ایسے اہم منصوبوں کو کامیابی سے پایۂ تکمیل تک پہنچایا جا سکتا ہے۔ چیف ایگزیکٹو آفیسر فیسکو محمد عامر نے کہا کہ فیسکو ملازمین کے لیے ایک جدید، محفوظ اور معیاری رہائشی منصوبہ تشکیل دیا جا رہا تھا، جس کے لیے ایف ڈی اے سٹی اپنی بہترین لوکیشن، منصوبہ بند انفراسٹرکچر اور تمام بنیادی شہری سہولیات کی دستیابی کے باعث سب سے موزوں انتخاب ثابت ہوا۔ انہوں نے کہا کہ یہ منصوبہ فیسکو ملازمین اور ان کے خاندانوں کو بہتر طرز زندگی، محفوظ رہائشی ماحول اور جدید سہولیات فراہم کرنے میں اہم کردار ادا کرے گا۔ انہوں نے کہا کہ ایف ڈی اے کی پیشہ ورانہ استعداد، شفاف اندازِ کار اور انتظامیہ کے بھرپور تعاون کی بدولت یہ معاہدہ انتہائی خوش اسلوبی سے مکمل ہوا، جس پر وہ ڈائریکٹر جنرل ایف ڈی اے محمد آصف چوہدری، ان کی پوری ٹیم اور کمشنر فیصل آباد ڈاکٹر عمران حامد شیخ کے خصوصی تعاون پر دلی شکریہ ادا کرتے ہیں۔ انہوں نے امید ظاہر کی کہ مستقبل میں بھی فیسکو اور ایف ڈی اے کے درمیان باہمی تعاون مزید فروغ پائے گا اور عوامی مفاد کے ایسے منصوبے مشترکہ طور پر کامیابی سے مکمل کیے جائیں گے۔

01/08/2026

ڈائریکٹر جنرل فیصل آباد ڈویلپمنٹ اتھارٹی (ایف ڈی اے) محمد آصف چوہدری نے ایف ڈی اے کے ون ونڈو کاؤنٹر کا تفصیلی معائنہ کیا اور شہریوں کو فراہم کی جانے والی سہولیات، درخواستوں کی پراسیسنگ اور سروس ڈیلیوری کے نظام کا جائزہ لیا۔ اس موقع پر چیف انجینئر مہر ایوب اور دیگر متعلقہ افسران بھی ان کے ہمراہ تھے۔ ڈائریکٹر جنرل ایف ڈی اے نے ون ونڈو کاؤنٹر پر موجود درخواست گزاروں سے ملاقات کی اور ان سے براہ راست خدمات کی فراہمی، درخواستوں کے بروقت اندراج، رہنمائی، عملے کے رویے اور مسائل کے حل کے حوالے سے دریافت کیا۔ انہوں نے شہریوں کی آراء اور تجاویز کو غور سے سنا اور متعلقہ افسران کو ہدایت کی کہ عوامی شکایات کے ازالے اور درخواستوں کی بروقت تکمیل کو اولین ترجیح دی جائے۔ محمد آصف چوہدری نے کہا کہ ایف ڈی اے میں اوپن ڈور پالیسی پر ذمہ درانہ عملدرآمد کا مقصد شہریوں کو بلا رکاوٹ، شفاف اور فوری خدمات کی فراہمی یقینی بنانا ہے۔ انہوں نے افسران کو ہدایت کی کہ ہر درخواست گزار کے ساتھ خوش اخلاقی، ذمہ داری اور پیشہ ورانہ انداز میں پیش آیا جائے تاکہ عوام کا ادارے پر اعتماد مزید مستحکم ہو۔ انہوں نے ہدایت کی کہ ون ونڈو کاؤنٹر کے نظام کو جدید تقاضوں سے ہم آہنگ کرتے ہوئے ای فائلنگ، پیپر لیس ورکنگ، آفس آٹومیشن اور جدید انفارمیشن ٹیکنالوجی سے بھرپور استفادہ کیا جائے اور "ای بز پنجاب" کے تحت وصول ہونے والی درخواستوں پر ترجیحی بنیادوں پر محکمانہ کارروائی کریں تاکہ حکومت پنجاب کے کاروباری سہولیات کی فراہمی کے ویژن کے کماحقہ مقاصد حاصل ہو سکیں۔ انہوں نے کہا کہ ڈیجیٹل نظام کے فروغ سے نہ صرف شفافیت، رفتار اور کارکردگی میں اضافہ ہوگا بلکہ درخواستوں کی مؤثر مانیٹرنگ، بروقت نمٹانے اور شہریوں کو بہتر سہولیات کی فراہمی بھی ممکن ہوگی۔ ڈائریکٹر جنرل ایف ڈی اے نے مزید ہدایت کی کہ ون ونڈو کاؤنٹر کی کارکردگی کا باقاعدگی سے جائزہ لیا جائے، عملے کی استعداد کار میں اضافے کے لیے تربیتی اقدامات جاری رکھے جائیں اور ایسی اصلاحات متعارف کرائی جائیں جن سے سروس ڈیلیوری کا معیار مزید بہتر ہو۔ انہوں نے کہا کہ حکومت پنجاب کے وژن کے مطابق ایف ڈی اے کو ایک جدید، شفاف، عوام دوست اور مکمل طور پر ڈیجیٹل ادارہ بنانے کے لیے تمام دستیاب وسائل بروئے کار لائے جائیں گے تاکہ شہریوں کو ایک ہی چھت تلے تیز، معیاری اور آسان خدمات میسر آ سکیں۔

28/07/2026

فیصل آباد( 27 جولائی 2026) ڈائریکٹر جنرل ایف ڈی اے محمد آصف چوہدری نے کہا کہ مون سون موسم کے باعث ایف ڈی اے کے زیر کنٹرول رہائشی کالونیوں اور کمرشل مارکیٹس میں زیر تعمیر عمارتوں میں خصوصی حفاظتی تدابیر اختیار کی جائیں، خصوصاً ایسے عمارتی منصوبوں میں جہاں بیسمنٹ کی تعمیر کی جا رہی تو وہاں ممکنہ شدید بارشوں کی وجہ سے زمین کی کھدائی فوری روک دی جائے۔ انہوں نے ایریا انسپکٹرز کو ہدایت کی کہ وہ کڑی مانیٹرنگ کا عمل جاری رکھیں اور حفاظتی انتظامات کو ہر صورت یقینی بنایا جائے تاکہ کسی بھی ناخوشگوار واقعہ سے بچا جا سکے۔ وہ ایک اجلاس کے دوران مون سون کے حوالے سے زیر تعمیر عمارتوں کے امور کا جائزہ لے رہے تھے۔اجلاس میں ڈائریکٹرز اسماء محسن، جنید حسن منج، سہیل مقصود پنوں، افنان سعید سندھو و دیگر افسران موجود تھے۔ ڈائریکٹر جنرل ایف ڈی اے نے زیر تعمیر عمارات کے مالکان، بلڈرز، کنسلٹنٹ، آرکٹیکٹ، سٹرکچر انجینئر، سپروائزنگ انجینئر کو مطلع کرتے ہوئے کہا کہ تعمیراتی مقامات پر گہری کھدائی کے دوران اردگرد کی زمین کو محفوظ بنانے کے لیے مناسب شٹرنگ اور سپورٹنگ سسٹم استعمال کیا جائے، حفاظتی باڑ اور واضح انتباہی بورڈ آویزاں کیے جائیں جبکہ کھدائی کے دوران اردگرد موجود عمارتوں اور بنیادی ڈھانچے کے تحفظ کے لیے تمام ضروری تکنیکی اقدامات اختیار کیے جائیں، تعمیر کے دوران تمام حفاظتی اصولوں اور انسانی جان و مال کے تحفظ کی سہولتوں کو برقرار رکھا جائے۔ انہوں نے مزید کہا کہ تعمیراتی سرگرمیوں کے دوران غیر متعلقہ افراد، خصوصاً بچوں کو سائٹ سے دور رکھا جائے، حفاظتی سامان کے استعمال کو یقینی بنایا جائے اور کسی بھی ہنگامی صورتحال کی صورت میں فوری طور پر متعلقہ اداروں سے رابطہ کیا جائے۔ ڈائریکٹر جنرل ایف ڈی اے نے خبردار کیا کہ بلڈنگ لاز اور ان سرکاری احکامات پر عملدرآمد نہ کرنے کی صورت میں ایف ڈی اے کی طرف سے قصورواروں کے خلاف فوجداری مقدمہ درج، املاک کو سربمہر، بلڈنگ پلان منسوخ اور بھاری جرمانہ بھی کیا جا سکتا ہے۔ انہوں نے شہریوں سے کہا ہے کہ اگر کسی زیر تعمیر عمارت پر حفاظتی انتظامات ناکافی ہوں یا انسانی جانوں کے لیے خطرہ محسوس ہو تو فوری طور پر ایف ڈی اے کو مطلع کریں تاکہ بروقت کارروائی عمل میں لائی جا سکے۔

28/07/2026

فیصل آباد (25 جولائی 2026) ڈائریکٹر جنرل فیصل آباد ڈویلپمنٹ اتھارٹی (ایف ڈی اے) محمد آصف چوہدری نے ہدایت کی ہے کہ ادارے سے متعلق زیرِ سماعت مقدمات میں عدالتوں کے احکامات کی ذمہ داری اور دیانتداری سے پیروی کی جائے اور ہر مقدمے میں ایف ڈی اے کا واضح، مؤثر اور قانون کے مطابق موقف پیش کریں اس سلسلے میں عدالتی کارروائی کے دوران متعلقہ قانونی نکات، قواعد و ضوابط اور سرکاری پالیسی کو ہر صورت مدنظر رکھا جائے تاکہ ادارے کے مفادات کا مؤثر انداز میں تحفظ یقینی بنایا جا سکے۔ انہوں نے یہ ہدایات ایک مقدمے میں عدالتی حکم پر عملدرآمد کے سلسلے میں ایک فریق کا مؤقف سنتے ہوئے جاری کیں۔ اس موقع پر ڈائریکٹر ٹاؤن پلاننگ اسماء محسن، لیگل کنسلٹنٹ رانا سلیم اور دیگر متعلقہ افسران بھی موجود تھے۔ ڈائریکٹر جنرل ایف ڈی اے نے ٹاؤن پلاننگ سے متعلق قوانین، قواعد و ضوابط اور پالیسیوں کا جائزہ لیتے ہوئے کہا کہ شہریوں کو قانونی دائرہ کار میں بروقت ریلیف کی فراہمی ادارے کی ذمہ داری ہے۔ کسی بھی درخواست گزار کو غیر ضروری تاخیر یا بلاجواز قانونی رکاوٹ کا سامنا نہیں ہونا چاہیے، جبکہ کسی قسم کی قانونی پیچیدگی کی صورت میں عدالت سے رجوع کرنے کی نوبت آنے سے قبل انتظامی اور قانونی سطح پر مسئلے کا مناسب حل تلاش کیا جائے۔ انہوں نے کہا کہ سرکاری امور میں شفافیت، قانون کی عملداری اور عوام دوست انداز میں محکمانہ سروسز کی فراہمی ایف ڈی اے کا نصب العین ہے لہذا تمام افسران اپنی پیشہ ورانہ ذمہ داریوں کو قانون کے مطابق انجام دیں اور ہر کیس میں میرٹ، انصاف اور شفافیت کو مقدم رکھا جائے۔ انہوں نے ہدایت کی کہ بین الشعبہ جاتی رابطے کو مزید مؤثر بنائیں تاکہ مقدمات کے بروقت اور مؤثر دفاع کے ساتھ ساتھ شہریوں کے جائز مسائل بھی فوری طور پر حل کیے جا سکیں۔ انہوں نے اپنے عزم کو دہراتے ہوئے کہا کہ اصلاحات کے ذریعے ایف ڈی اے میں ایسے کمانڈ اور کنٹرول سسٹم پر عملدرآمد کیا جا رہا ہے جس کے ذریعے شہریوں کو زیادہ سے زیادہ سہولت، تیز رفتار خدمات اور قانونی تقاضوں کے مطابق بروقت ریلیف فراہم کیا جا سکے۔

23/07/2026

فیصل آباد (22 جولائی 2026) فیصل آباد ڈویلپمنٹ اتھارٹی (ایف ڈی اے) نے گزشتہ مالی سال کے دوران مختلف شعبوں سے مجموعی طور پر 74 کروڑ روپے سے زائد کا ریونیو وصول کیا۔ یہ بات ڈائریکٹر جنرل ایف ڈی اے محمد آصف چوہدری کی زیر صدارت منعقدہ اجلاس میں بتائی گئی، جس میں گزشتہ مالی سال کے دوران ریونیو وصولی کی کارکردگی کا تفصیلی جائزہ لیا گیا اور رواں مالی سال کے ریونیو اہداف کے حصول کے لیے حکمت عملی پر غور کیا گیا۔اجلاس میں ایڈیشنل ڈائریکٹر جنرل ایف ڈی اے قیصر عباس رند نے مختلف مدات میں وصول کیے گئے ریونیو کے اعداد و شمار، ذرائع آمدن میں اضافے کے امکانات اور آئندہ مالی سال کے لیے مجوزہ حکمت عملی پر تفصیلی بریفنگ دی۔ اجلاس میں چیف انجینئر مہر ایوب، ڈائریکٹرز جنید حسن منج، قیصر جاوید، افنان سعید سندھو، ڈپٹی ڈائریکٹر فنانس عدنان شہزاد، افضال انصاری، بلال احمد اور دیگر افسران بھی شریک تھے۔ اجلاس کو بتایا گیا کہ گزشتہ مالی سال کے دوران غیر قانونی تعمیرات پر عائد جرمانوں کی مد میں 25 کروڑ 42 لاکھ روپے، پلاٹس ٹرانسفر کے واجبات 8! کروڑ 23 لاکھ روپے، تعمیر مدت میں توسیع کے چارجز کی مد میں 9 کروڑ روپے، نقشہ جات کی منظوری کی فیس کی مد میں 9 کروڑ 45 لاکھ روپے، لینڈ کنورژن فیس کی مد میں 5 کروڑ 81 لاکھ روپے، کمرشل چارجز کی مد میں 6 کروڑ روپے، پرائیویٹ ہاؤسنگ سکیموں کی جی آئی ایس سکرونٹی واجبات کی مد میں 2 کروڑ 13 لاکھ روپے، متفرق واجبات کی مد میں 6 کروڑ 43 لاکھ روپے، اونرشپ سرٹیفکیٹس کے اجرا کی فیس کی مد میں 86 لاکھ روپے جبکہ ٹاؤن پلاننگ رپورٹس کے اجراء کی فیس کی مد میں 67 لاکھ روپے وصول کیے گئے۔ اس موقع پر ڈائریکٹر جنرل ایف ڈی اے محمد آصف چوہدری نے ذرائع آمدن میں مزید اضافے کی ضرورت پر زور دیتے ہوئے ہدایت کی کہ رواں مالی سال میں ریونیو اہداف کے حصول کے لیے مؤثر، قابلِ عمل اور نتیجہ خیز حکمت عملی اختیار کی جائے۔ انہوں نے کہا کہ ادارے کے مالی استحکام اور ترقیاتی منصوبوں کی بروقت تکمیل کے لیے نئے بزنس ماڈلز متعارف کرانے، ریونیو کے نئے ذرائع تلاش کرنے اور موجودہ وسائل سے زیادہ سے زیادہ استفادہ حاصل کرنے کی ضرورت ہے۔ انہوں نے کہا کہ تمام متعلقہ شعبے اپنی کارکردگی کو مزید بہتر بنائیں، ریونیو وصولی کے عمل میں شفافیت، تیز رفتاری اور مؤثر نگرانی کو یقینی بنایا جائے اور نادہندگان سے واجبات کی وصولی کے لیے قانون کے مطابق بلاامتیاز اقدامات کیے جائیں۔ انہوں نے ہدایت کی کہ ریونیو سے متعلق تمام امور کی ماہانہ بنیادوں پر مانیٹرنگ کی جائے تاکہ اہداف کے حصول میں کسی قسم کی رکاوٹ نہ آئے۔
ڈائریکٹر جنرل ایف ڈی اے نے کہا کہ مالی خود کفالت کسی بھی ادارے کی مضبوطی کی بنیاد ہوتی ہے، لہٰذا ایف ڈی اے کو ایک جدید، فعال اور خود انحصار ادارہ بنانے کے لیے تمام افسران اور متعلقہ شعبے ٹیم ورک کے جذبے کے ساتھ اپنی ذمہ داریاں ادا کریں۔ انہوں نے اس عزم کا اظہار کیا کہ بہتر مالی نظم و نسق، جدید اصلاحات اور مؤثر ریونیو مینجمنٹ کے ذریعے ایف ڈی اے کی ترقیاتی سرگرمیوں کو مزید وسعت دی جائے گی اور شہریوں کو بہتر شہری سہولیات کی فراہمی کے لیے تمام دستیاب وسائل بروئے کار لائے جائیں گے۔

20/07/2026

فیصل آباد (20 جولائی 2026) فیصل آباد ڈویلپمنٹ اتھارٹی (ایف ڈی اے) کی ڈویلپمنٹ اینڈ فنانس کمیٹی نے مالی سال 2027-2026 کے سالانہ بجٹ کی تجاویز اور مالی سال 2026-2025 کے نظرثانی شدہ بجٹ کی تفصیلات کی متفقہ طور پر منظوری دے دی۔ یہ منظوری کمیٹی کے اجلاس میں دی گئی جو ڈائریکٹر جنرل ایف ڈی اے محمد آصف چوہدری کی زیر صدارت ایف ڈی اے کمپلیکس میں منعقد ہوا۔
اجلاس میں ایڈیشنل ڈائریکٹر جنرل ایف ڈی اے قیصر عباس رند نے مالی سال 2026-27 کے مجوزہ بجٹ، متوقع آمدن، ترقیاتی و غیر ترقیاتی اخراجات، ریونیو کے ذرائع، مالی نظم و ضبط اور آئندہ سال کے ترقیاتی اہداف پر تفصیلی بریفنگ دی۔اجلاس میں پلاننگ اینڈ ڈویلپمنٹ بورڈ پنجاب، سیکرٹری ہاؤسنگ، اربن ڈویلپمنٹ اینڈ پبلک ہیلتھ انجینئرنگ ڈیپارٹمنٹ پنجاب، سیکرٹری فنانس پنجاب کے نمائندہ افسران، ڈپٹی کمشنر فیصل آباد کے نمائندہ ایڈیشنل ڈپٹی کمشنر (فنانس اینڈ پلاننگ) مدثر ممتاز، منیجنگ ڈائریکٹر واسا کے نمائندہ ڈپٹی منیجنگ ڈائریکٹر شعیب رشید، چیف انجینئر ایف ڈی اے مہر ایوب، ڈائریکٹرز جنید حسن منج، قیصر جاوید، افنان سعید سندھو، ڈپٹی ڈائریکٹرز فنانس عدنان شہزاد، افضال انصاری سمیت دیگر متعلقہ افسران شریک ہوئے۔
اجلاس کے دوران مالی سال 2026-27 کے ترقیاتی اور غیر ترقیاتی بجٹ کے مجوزہ تخمینوں، ذرائع آمدن میں اضافے کے لیے اختیار کی جانے والی حکمت عملی، متوقع ریونیو، نئے ترقیاتی منصوبوں، شہری انفراسٹرکچر کی بہتری، عوامی خدمات کے معیار میں اضافے، ادارہ جاتی اصلاحات، مختلف شعبوں کے اخراجات اور فنڈز کی تقسیم کا تفصیلی جائزہ لیا گیا۔ اس موقع پر مالی سال 2025-26 کے بجٹ کے مقابلے میں آمدن اور اخراجات کی صورتحال، بجٹ اہداف کے حصول اور مالی نظم و نسق کا بھی تقابلی تجزیہ پیش کیا گیا۔ شرکاء نے بعض نکات پر وضاحت طلب کی جس کے بعد مجوزہ بجٹ تجاویز کی متفقہ طور پر توثیق کر دی گئی۔ ڈائریکٹر جنرل ایف ڈی اے محمد آصف چوہدری نے اجلاس سے خطاب کرتے ہوئے مختلف محکموں کے افسران کا شکریہ ادا کیا اور کہا کہ مالی سال 2026-27 کا بجٹ متوازن، حقیقت پسندانہ اور ریونیو پر مبنی حکمت عملی کے تحت مرتب کیا گیا ہے۔ انہوں نے کہا کہ غیر ضروری اخراجات میں مناسب کمی، آمدن کے نئے ذرائع کی نشاندہی، وسائل کے مؤثر استعمال اور مالیاتی نظم و ضبط کو بجٹ کی بنیادی ترجیحات میں شامل رکھا گیا ہے۔ انہوں نے کہا کہ وزیراعلیٰ پنجاب کے ویژن اور عوام دوست پالیسیوں کے مطابق ایف ڈی اے شہریوں کو جدید، معیاری اور شفاف شہری سہولیات کی فراہمی کے لیے اپنی ترقیاتی سرگرمیوں کو مزید مؤثر بنائے گا۔ بجٹ میں جاری ترقیاتی منصوبوں کی بروقت تکمیل، نئی سکیموں کے آغاز، بنیادی شہری انفراسٹرکچر کی بہتری، ڈیجیٹل گورننس، ادارہ جاتی استعداد کار میں اضافے اور عوامی خدمات کی فراہمی کے نظام کو مزید مضبوط بنانے کے لیے مناسب مالی وسائل مختص کیے گئے ہیں۔ انہوں نے مزید کہا کہ ادارے کی مالی خودمختاری اور پائیدار ترقی کو یقینی بنانے کے لیے ریونیو میں اضافے، واجبات کی مؤثر وصولی، مالی شفافیت اور احتساب کے نظام کو مزید مستحکم کیا جائے گا۔ انہوں نے اس عزم کا اظہار کیا کہ دستیاب وسائل کو عوامی مفاد میں بروئے کار لاتے ہوئے ایسے ترقیاتی منصوبوں کو ترجیح دی جائے گی جن سے شہریوں کو براہ راست اور دیرپا فوائد حاصل ہوں، جبکہ تمام منصوبوں کی بروقت تکمیل، اعلیٰ معیار اور شفافیت پر کوئی سمجھوتہ نہیں کیا جائے گا۔ اجلاس کے اختتام پر ڈویلپمنٹ اینڈ فنانس کمیٹی نے مالی سال 2026-27 کے مجوزہ بجٹ اور مالی سال 2025-26 کے نظرثانی شدہ بجٹ کی باضابطہ منظوری دیتے ہوئے اسے قواعد و ضوابط کے تحت بورڈ آف گورنرز کے اجلاس میں پیش کرنے کی سفارش بھی کر دی۔

20/07/2026

فیصل آباد (18 جولائی 2026) ڈائریکٹر جنرل فیصل آباد ڈویلپمنٹ اتھارٹی (ایف ڈی اے) محمد آصف چوہدری نے حکومتِ پنجاب کی عوام دوست پالیسی کے تحت اوپن ڈور پالیسی پر عمل درآمد کو مزید مؤثر بناتے ہوئے اپنے دفتر میں شہریوں سے براہِ راست ملاقات کی، ان کے مسائل، شکایات اور تجاویز تفصیل سے سنیں اور متعلقہ معاملات کے فوری اور مؤثر حل کے لیے احکامات جاری کیے۔ اس موقع پر شہریوں نے پلاٹوں اور رہائشی سکیموں سے متعلق امور، جائیدادوں کی کمرشلائزیشن، بلڈنگ پلانز کی منظوری، مختلف این او سیز و اجازت ناموں کے اجرا، تجاوزات، ایف ڈی اے سٹی کے الاٹیز کے مسائل، پراپرٹی ٹرانسفر، واجبات کی ادائیگی اور دیگر انتظامی معاملات سے متعلق اپنی درخواستیں پیش کیں۔ ڈائریکٹر جنرل ایف ڈی اے نے ہر درخواست کا انفرادی طور پر جائزہ لیتے ہوئے متعلقہ افسران کو ہدایت کی کہ تمام درخواستوں پر قانون، میرٹ اور شفافیت کے اصولوں کے مطابق مقررہ مدت کے اندر کارروائی مکمل کرکے درخواست گزاروں کو فوری ریلیف فراہم کیا جائے۔ محمد آصف چوہدری نے ہدایت کی کہ جائیدادوں کی کمرشلائزیشن سے متعلق زیر التواء درخواستوں کو ترجیحی بنیادوں پر نمٹایا جائے، جبکہ ایف ڈی اے سٹی کے الاٹیز کو واجبات کی ادائیگی، گھروں کی تعمیر، بلڈنگ پلان کی منظوری، پراپرٹی ٹرانسفر اور دیگر متعلقہ امور میں ہر ممکن سہولت فراہم کریں تاکہ شہریوں کو غیر ضروری تاخیر اور مشکلات کا سامنا نہ کرنا پڑے۔ انہوں نے متعلقہ شعبوں کو غیر قانونی تعمیرات، قبضہ مافیا اور تجاوزات کے خلاف بلاامتیاز اور مسلسل کارروائیاں جاری رکھنے کی ہدایت کرتے ہوئے کہا کہ قانون کی خلاف ورزی کسی صورت برداشت نہیں کی جائے گی اور شہریوں کے حقوق کے تحفظ کے لیے تمام دستیاب قانونی اقدامات بروئے کار لائے جائیں گے۔ ڈائریکٹر جنرل ایف ڈی اے نے کہا کہ شہریوں کو بروقت، معیاری، شفاف اور بلاامتیاز خدمات کی فراہمی ادارے کی اولین ترجیح ہے۔ انہوں نے واضح کیا کہ اوپن ڈور پالیسی کا بنیادی مقصد عوام کو اپنی شکایات اور مسائل کے حل کے لیے براہِ راست رسائی فراہم کرنا ہے تاکہ ان کے جائز مسائل ترجیحی بنیادوں پر، کم سے کم وقت میں اور مؤثر انداز میں حل کیے جا سکیں۔ انہوں نے متعلقہ افسران کو تاکید کی کہ عوامی شکایات کے ازالے میں کسی قسم کی غفلت، سستی یا غیر ضروری تاخیر ہرگز برداشت نہیں کی جائے گی۔ تمام درخواستوں کو قانون، میرٹ اور شفافیت کے مطابق نمٹاتے ہوئے شہریوں کے اعتماد پر پورا اترنا اور ایف ڈی اے کو ایک عوام دوست، جوابدہ اور مؤثر ادارہ بنانا تمام افسران کی مشترکہ ذمہ داری ہے۔