05/08/2026
*یوم شہدائے پولیس*
*ڈسٹرکٹ پولیس لائنز میانوالی میں یومِ شہدائے پولیس کے موقع پر پروقار تقریب کا انعقاد*
*ڈی پی او میانوالی اور ڈپٹی کمشنر میانوالی کی یادگارِ شہداء پر حاضری، پھول چڑھائے، فاتحہ خوانی کی، پولیس کے چاک و چوبند دستے نے سلامی پیش کی*
انسپکٹر جنرل آف پولیس پنجاب عبدالکریم کے خصوصی احکامات اور ریجنل پولیس آفیسر سرگودھا ریجن محمد شہزاد آصف خان کی خصوصی ہدایات کی روشنی میں ڈی پی او میانوالی وقار عظیم کھرل کی زیرِ قیادت پنجاب بھر کی طرح ضلع میانوالی میں بھی یومِ شہدائے پولیس نہایت عقیدت، احترام اور ملی جذبے کے ساتھ منایا گیا۔ اس موقع پر وطنِ عزیز، امنِ عامہ اور شہریوں کے جان و مال کے تحفظ کی خاطر اپنی جانوں کا نذرانہ پیش کرنے والے پولیس افسران و جوانوں کی عظیم قربانیوں کو زبردست خراجِ عقیدت پیش کیا گیا۔
اس سلسلے میں ڈسٹرکٹ پولیس لائنز میانوالی میں ایک پروقار تقریب کا انعقاد کیا گیا، جس میں ڈی پی او میانوالی وقار عظیم کھرل، ڈپٹی کمشنر میانوالی شاہد عباس کاٹھیا، شہدائے پولیس کے اہلِ خانہ، ایس پی انویسٹی گیشن میانوالی مہر محمد ریاض ناز، ڈی ایس پیز، ایس ایچ اوز، پولیس افسران و جوانوں نے بڑی تعداد میں شرکت کی۔
تقریب کا آغاز یادگارِ شہداء پر حاضری سے ہوا، جہاں ڈی پی او میانوالی اور ڈپٹی کمشنر میانوالی نے پھول چڑھائے، شہدائے پولیس کے درجات کی بلندی، وطن کی سلامتی اور امن و استحکام کے لیے خصوصی دعا کی۔ اس موقع پر پولیس کے چاک و چوبند دستے نے شہداء کو شاندار سلامی پیش کی جبکہ فضا "شہداء پولیس زندہ باد" کے نعروں سے گونج اٹھی۔
بعد ازاں ڈی پی او میانوالی وقار عظیم کھرل نے شہدائے پولیس کے اہلِ خانہ سے فرداً فرداً ملاقات کی، ان کی خیریت دریافت کی، مسائل سنے اور متعلقہ افسران کو ان کے فوری حل کے احکامات جاری کیے۔ انہوں نے شہداء کے ورثاء کو یقین دلایا کہ پنجاب پولیس اپنے شہداء کے خاندانوں کو کبھی تنہا نہیں چھوڑے گی اور ان کی ہر ممکن فلاح و بہبود کو یقینی بنایا جائے گا۔
اپنے خطاب میں ڈی پی او میانوالی نے کہا: "آج ہم اپنے ان عظیم شہداء کو سلام پیش کرتے ہیں جنہوں نے عوام کے جان و مال کے تحفظ، امن کے قیام اور وطن کی سربلندی کے لیے اپنی جانوں کا نذرانہ پیش کیا۔ پنجاب پولیس کے شہداء ہمارا فخر، ہمارا سرمایہ اور ہمارے ماتھے کا جھومر ہیں۔ ان کی لازوال قربانیاں ہمیشہ ہمارے لیے مشعلِ راہ رہیں گی۔ میانوالی پولیس جرائم پیشہ عناصر کے خلاف مؤثر کارروائیوں کے ساتھ دہشت گردی کے ناسور کے خاتمے کے لیے بھی پوری جرات، عزم اور پیشہ ورانہ صلاحیت کے ساتھ برسرِپیکار ہے، اور عوام کے جان و مال کے تحفظ کے لیے ہر قربانی دینے کو تیار ہے۔"
ڈپٹی کمشنر میانوالی شاہد عباس کاٹھیا نے اپنے خطاب میں کہا: "آج کا پرامن اور محفوظ معاشرہ ہمارے شہداء کی عظیم قربانیوں کا ثمر ہے۔ ان بہادر سپوتوں نے اپنے خون سے امن کی شمع روشن کی اور آنے والی نسلوں کو محفوظ مستقبل دیا۔ میانوالی پولیس کے شہداء پوری قوم کا فخر ہیں اور ان کی قربانیوں کو ہمیشہ یاد رکھا جائے گا۔"
تقریب کے اختتام پر ڈی پی او میانوالی کی جانب سے شہدائے پولیس کے اہلِ خانہ میں شہداء پیکیج کے چیکس تقسیم کیے گئے۔ بعد ازاں شرکاء کے اعزاز میں پرتکلف ظہرانہ دیا گیا، جہاں شہداء کی عظیم قربانیوں کو خراجِ تحسین پیش کرتے ہوئے اس عزم کا اعادہ کیا گیا کہ ان کے سنہری نقوش اور بے مثال خدمات ہمیشہ زندہ رہیں گی۔
*ترجمان میانوالی پولیس*
゚
