18/09/2026
🇽🇰🇫🇮 Gjatë vizitës së saj të punës në Finlandë, Ambasadorja Shkendije Geci-Sherifi, mori pjesë në aktivitetin e nivelit të lartë “Zgjerimi i BE-së: Roli dhe mundësitë e Finlandës – 30 vjet asistencë teknike përmes TAIEX”, organizuar nga Ministria e Punëve të Jashtme e Finlandës.
Aktiviteti, me pjesëmarrjen e Komisioneres Evropiane për Zgjerim, Marta Kos, dhe Ministrit finlandez për Çështjet Evropiane, Joakim Strand, u fokusua në rolin e Finlandës në mbështetjen e procesit të zgjerimit të BE-së dhe në kontributin e saj përmes ekspertizës dhe asistencës teknike në mbështetje të reformave institucionale në kuadër të procesit të zgjerimit të BE-së.
Gjatë qëndrimit në Helsinki, Ambasadorja Geci zhvilloi takime në Ministrinë e Punëve të Jashtme të Finlandës me znj. Anu Apo, udhëheqëse e ekipit për Evropën Juglindore, Zgjerimin e BE-së dhe Ballkanin Perëndimor, si dhe me z. Juho Takkunen, përgjegjës për Kosovën, në kuadër të Departamentit Euro-Atlantik. Ajo u takua gjithashtu me z. Antti Häikiö, këshilltar ministror në Ministrinë e Brendshme të Finlandës, dhe me znj. Lili Verdha, Konsulle e Përgjithshme e Nderit e Republikës së Shqipërisë në Finlandë.
Vizita u zhvillua në kuadër të angazhimit për forcimin e marrëdhënieve dhe bashkëpunimit ndërmjet Kosovës dhe Finlandës, veçanërisht në mbështetje të procesit të integrimit evropian të Kosovës.
