10/09/2026
Ambasadori Durmishi mori pjesë në aktivitetin kushtuar 10-vjetorit të shenjtërimit të Shën Nënë Terezës
“Hani bashkë, lutuni bashkë, … bëni gjëra të vogla me dashuri të madhe.”
Me rastin e 10-vjetorit të shenjtërimit të Shën Nënë Terezës, Drejtoria e Përgjithshme e Arkivave e Shqipërisë,(DPA) organizoi një aktivitet të veçantë, duke paraqitur për herë të parë për publikun një ekspozitë me fotografi dhe dokumente origjinale mbi jetën, veprimtarinë dhe vizitën e Nënë Terezës në Tiranë, në gusht të vitit 1989.
Në këtë aktivitet mori pjesë Ambasadori i Republikës së Kosovës në Shqipëri, z. Skënder Durmishi, së bashku me përfaqësues të trupit diplomatik, të komuniteteve fetare në Shqipëri dhe të misionit bamirës “Motrat e Nënë Terezës”.
Në fjalën e tij, ambasadori Durmishi vlerësoi ekspozitën si një nismë me rëndësi për të kujtuar veprën humaniste të Shën Nënë Terezës dhe për të nxjerrë mësime nga përkushtimi i saj në shërbim të njerëzimit.
“Duke nderuar Nënë Terezën, nderojmë veprën e saj humaniste dhe vlerat, me të cilat u bë simbol dhe inspirim”, u shpreh ambasadori Durmishi, duke theksuar gjithashtu rëndësinë e ruajtjes dhe përcjelljes te brezat e rinj të kësaj trashëgimie të jashtëzakonshme.
Ekspozita solli më pranë publikut një pjesë të udhëtimit shpirtëror dhe humanitar të Shën Nënë Terezës, një figurë që përmes dashurisë, paqes, solidaritetit dhe shërbimit ndaj më të varfërve u shndërrua në një simbol botëror të humanizmit.
Për Kosovën figura e Shën Nënë Terezës është burim i veçantë frymëzimi dhe krenarie, ndërsa mesazhi i saj vazhdon të jetë po aq domethënës edhe sot: të bëjmë gjëra të vogla me dashuri të madhe.
Ambasada e Republikës së Kosovës në Shqipëri shpreh mirënjohjen për Drejtorinë e Përgjithshme të Arkivave për organizimin e kësaj ekspozite dhe për kontributin në ruajtjen e kujtesës dhe trashëgimisë së Shën Nënë Terezës.
