06/08/2026
දකුණු පළාත් කෘෂිකර්ම දෙපාර්තමේන්තුව විසින් සංවිධානය කරන ලද "දක්ෂිණ කෘෂි අභිමන් 2026" ව්යවසායක නිෂ්පාදන ප්රදර්ශනය අද (06) උදෑසන බෙන්තොට නිවාඩු නිකේතන පරිශ්රයේදී දකුණු පළාත් ගරු ආණ්ඩුකාරවර ආචාර්ය සුසිරිපාල මානවඩු මැතිතුමන්ගේ ප්රධානත්වයෙන් හා ගාල්ල දිස්ත්රික් ගරු පාර්ලිමේන්තු මන්ත්රී ටී. කේ. ජයසුන්දර මැතිතුමන්ගේ ගෞරවනීය සහභාගීත්වයෙන් ආරම්භ විය.
දකුණු පළාතේ කෘෂිකාර්මික ව්යවසායකයන්ගේ නිෂ්පාදන ප්රවර්ධනය කිරීම, දේශීය නිෂ්පාදන සඳහා වෙළඳපොළ අවස්ථා පුළුල් කිරීම සහ කෘෂිකාර්මික නවෝත්පාදන ජනගත කිරීමේ අරමුණින් සංවිධානය කළ මෙම ප්රදර්ශනයේදී ප්රදේශයේ ව්යවසායකයන් විසින් නිෂ්පාදනය කරන ලද විවිධ කෘෂි නිෂ්පාදන, මල් හා පළතුරු පැළ, අත්කම් නිෂ්පාදන ඇතුළු නිර්මාණාත්මක නිෂ්පාදන රැසක් ප්රදර්ශනය කෙරිණි. එමෙන්ම ප්රදර්ශනයට පැමිණි ජනතාවට එම නිෂ්පාදන සෘජුවම මිලදී ගැනීමේ අවස්ථාවද සලසා දී තිබිණි.
මෙහිදී පැවැති කෙටි උත්සව සභාව අමතමින් දකුණු පළාත් ගරු ආණ්ඩුකාරවර ආචාර්ය සුසිරිපාල මානවඩු මැතිතුමා සඳහන් කළේ, දේශීය ව්යවසායකයන් ශක්තිමත් කිරීම තුළින් ග්රාමීය ආර්ථිකය සවිබල ගැන්වීමට මෙන්ම දකුණු පළාතේ කෘෂිකාර්මික ක්ෂේත්රය නව තලයකට ගෙන යාමට මෙවැනි වැඩසටහන් මහත් පිටිවහලක් වන බවයි. එමෙන්ම කෘෂිකාර්මික ව්යවසායකත්වය දිරිගන්වමින් නිෂ්පාදකයා සහ පාරිභෝගිකයා අතර සෘජු සම්බන්ධතාවක් ගොඩනැගීමට මෙවැනි ප්රදර්ශන වැදගත් දායකත්වයක් සපයන බවද එතුමා අවධාරණය කළේය.
මෙම අවස්ථාව සඳහා බෙන්තොට ප්රාදේශීය සභාවේ ගරු සභාපති ප්රේමකුමාර විජේවර්ධන මහතා, ගරු උප සභාපති ප්රසන්න ගුණවර්ධන මහතා, දකුණු පළාත් කෘෂිකර්ම අධ්යක්ෂිකා අනූෂා පලිහවඩන මහත්මිය, බෙන්තොට ප්රාදේශීය ලේකම් ඩබ්. ඒ. ජනහිත මහතා ඇතුළු කෘෂිකර්ම දෙපාර්තමේන්තුවේ නිලධාරීන්, ව්යවසායකයින් සහ ප්රදර්ශනය නැරඹීම සඳහා පැමිණි විශාල ජනතාවක් එක්ව සිටියහ.
