06/08/2026
پریس ریلیز
پبلک ریلیشن آفیسر، ڈپٹی کمشنر آفس گلگت
مورخہ: 06 اگست 2026
ڈپٹی کمشنر گلگت کیپٹن (ر) عارف احمد سے دنیور میوگاہ نالے اور دیگر عوامی مسائل کے حوالے سے مختلف وفود کی ملاقات، فوری اقدامات کی ہدایت
گلگت: ڈپٹی کمشنر/ڈسٹرکٹ مجسٹریٹ گلگت، کیپٹن (ر) عارف احمد سے دنیور کے میوگاہ نالے سے متعلق وفد سمیت ضلع گلگت کے مختلف علاقوں سے تعلق رکھنے والے عوامی وفود نے ملاقات کی۔ وفود نے اپنے اپنے علاقوں کو درپیش مسائل، بنیادی سہولیات، حالیہ بارشوں اور سیلاب سے متاثرہ دنیور کے میوگاہ نالے میں ایکسکیویٹر کی فراہمی، سڑکوں کی بحالی اور دیگر عوامی امور سے متعلق تفصیلی طور پر آگاہ کیا۔
ڈپٹی کمشنر گلگت نے تمام وفود کے مسائل کو توجہ سے سنا اور یقین دہانی کرائی کہ عوام کو درپیش تمام جائز مسائل کو ترجیحی بنیادوں پر حل کرنے کے لیے ضلعی انتظامیہ ہر ممکن اقدامات کرے گی۔
اس موقع پر ڈپٹی کمشنر گلگت نے متعلقہ اسسٹنٹ کمشنرز، ایکسیئن بی اینڈ آر گلگت ڈویژن اور دیگر متعلقہ محکموں کے سربراہان کو فوری تحریری احکامات جاری کرتے ہوئے ہدایت کی کہ موصول ہونے والی درخواستوں اور عوامی مسائل کا فوری جائزہ لے کر ان کے حل کے لیے عملی اقدامات کیے جائیں اور پیش رفت سے ڈپٹی کمشنر آفس کو باقاعدگی سے آگاہ رکھا جائے۔
ڈپٹی کمشنر نے حالیہ بارشوں اور سیلاب سے متاثرہ علاقوں کی مجموعی صورتحال کا بھی جائزہ لیا اور متعلقہ اداروں کو ہدایت کی کہ متاثرہ علاقوں میں امدادی اور بحالی کی سرگرمیوں میں مزید تیزی لائی جائے، متاثرین کو بروقت ریلیف فراہم کیا جائے، جبکہ سڑکوں کی بحالی، نکاسیٔ آب اور دیگر ضروری انتظامات میں کسی قسم کی غفلت برداشت نہیں کی جائے گی۔
انہوں نے کہا کہ ضلعی انتظامیہ عوام کی جان و مال کے تحفظ، فوری ریلیف کی فراہمی اور بنیادی مسائل کے پائیدار حل کے لیے تمام دستیاب وسائل بروئے کار لا رہی ہے۔ عوامی خدمت، شفاف طرزِ حکمرانی اور عوام کے ساتھ مسلسل رابطہ ضلعی انتظامیہ کی اولین ترجیحات ہیں۔
ملاقات کے دوران ایڈیشنل ڈپٹی کمشنر گلگت بھی موجود تھے۔ وفود نے ڈپٹی کمشنر گلگت کی جانب سے عوامی مسائل کے فوری حل، مؤثر عوامی رابطے اور بروقت فیصلوں کو سراہتے ہوئے ضلعی انتظامیہ کا شکریہ ادا کیا۔
