11/06/2026
Kryetarja e Alternativës, ministrja Kusari-Lila vizitoi Parkun e Inovacionit dhe Trajnimeve në Prizren
Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, vizitoi sot Parkun e Inovacionit dhe Trajnimeve (ITP) në Prizren, ku u njoftua nga afër me aktivitetet, rezultatet dhe planet e ardhshme të këtij projekti, i cili konsiderohet një nga qendrat më të rëndësishme të inovacionit, teknologjisë dhe ndërmarrësisë në Kosovë.
Gjatë vizitës, ministrja Kusari-Lila u shoqërua nga drejtori i Zyrës së GIZ-it në Kosovë, David Oberhuber, drejtori ekzekutiv i ITP Prizren, Muhamed Rexhepi, udhëheqësja e ekipit të ITP Prizren, Rudina Qerimi, zëvendësshefi i Misionit në Ambasadën Gjermane, Christian Böttcher, shefi i Bashkëpunimit në Ambasadën Gjermane, Daniel Alker, drejtori i Zyrës për Planifikim Strategjik në Zyrën e Kryeministrit, Vedat Sagonjeva, si dhe udhëheqësja e Divizionit për Financim në Ministrinë e Financave, Dije Rizvanolli.
Me këtë rast, ministrja vlerësoi transformimin e hapësirës së ITP-së, e cila nga një ish-kazermë ushtarake është shndërruar në një qendër moderne të inovacionit dhe zhvillimit ekonomik.
Sipas saj, ky transformim pasqyron edhe rrugëtimin e vetë Kosovës, nga sfidat e së kaluarës drejt një të ardhmeje të bazuar në dije, kreativitet, teknologji dhe ndërmarrësi.
Gjatë takimeve u diskutua për të ardhmen e parkut, sfidat me të cilat përballet, si dhe mundësitë për zgjerimin e ndikimit të tij në zhvillimin ekonomik të vendit.
Pas shtatë vitesh funksionimi, Parku i Inovacionit dhe Trajnimeve ka arritur rezultate konkrete, me 60 biznese të vendosura brenda parkut dhe mbi 500 vende pune të krijuara në një hapësirë prej 40 hektarësh.
Ministrja Kusari-Lila u informua gjithashtu për fazën e re të zhvillimit të projektit, e cila do të fokusohet në mënyrë më të specializuar në sektorët prioritarë të inovacionit dhe teknologjisë.
Ajo theksoi se mbështetja e Qeverisë së Kosovës për ekosistemin e inovacionit mbetet thelbësore për fuqizimin e ndërmarrjeve, krijimin e vendeve të reja të punës dhe zgjerimin e mundësive për të rinjtë.
Sipas ministres, ITP Prizren ka potencial të madh për t'u shndërruar në një qendër rajonale të teknologjisë, kërkimit dhe ndërmarrësisë, duke lidhur biznesin, arsimin dhe inovacionin, si dhe duke e pozicionuar Kosovën si një destinacion gjithnjë e më tërheqës për investime dhe zhvillim të qëndrueshëm.
